W Trek - Day 5
最後一日,雖然話今日條路比較平坦,但都要行成廿幾公里
去嘅時候都還好,返黎嗰陣係靠我就行完啦嘅諗法完成
大部分時間都冇點留意其他野,淨係諗住要向前行。最後一日已經係强弩之末,一唔專心就會踩錯腳跟住就仆街
一直落微微雨連相都冇點影,得幾張相比大家睇
今日目的地係 Grey Glacier,好多人都話睇過 Perito Moreno 會覺得呢個冰川好渣,但我覺得意義唔同就算細都要見見佢
沿途會經過 Refugio Grey,行 O Trek 嘅人好似會喺度住一晚
終於到 Grey Glacier,難得週圍冇人我霸曬個地方
食完個包,返歸
返去嘅時候撞返嗰一家五口,佢地應該繼續行 O,當我同佢講我今日就完嘅時候佢恭喜我
其實呢幾日有好多熟悉嘅面孔,因為大家都係行同一條路,山上面見到食飯又見到,雖然冇點溝通但見到會打招呼。雖然辛苦,但同一時間有一大班人同我一齊辛苦緊令我覺得自己唔係獨自作戰。
返去中途又撞返 Meghan 同 Cort,佢地再留多一晚喺 Sector Grey 第二朝搭船近距離睇冰川。真係好,可以正式告個別
淨低嘅路我都慢慢行,反正唔趕時間。七個半鐘後,終於完成
呢幾日總共行左90.9公里,30個鐘,恭喜自己成功行完
今次體驗係好特別,我唔享受係一樣野,個環境其實好舒服,行山客都好有禮貌
條徑非常乾淨,唔會有人大聲播歌同喧嘩
就算好多時得一個人都覺得安全,香港我淨係敢一個人行啲旺角咁嘅山。
山就行完,架船位置有限,先到先得提早去排隊,比我排頭位
船終於到
再見 Torres del Paine,返 Puerto Natales
我承認我安排得太趕,之後嗰幾日攰到
好彩冇病,跟住我會調整一下個步伐盡量 hea 啲
行山行程告一段落,直至秘魯先有山行
我都唔想我個南美遊記變左行山遊記。