[獨遊] 終於踏足南美洲

留名，樓主係秘魯有無坐飛機睇納斯卡線？

大陸D車宜家好靚
我早排去韶關, D長途車每個座位有感應, 冇戴安全帶的話, 會響

個時玩左7個月，只係無去烏拉圭巴拉圭 (圭亞那個三個地方其實唔係好算南美 )
都有諗過寫返個遊記，但因為太長時間，都唔知邊度開始講起

想睇

想睇

正，差不多成個南美玩曬
比人偷野唔好彩， 不過安全返黎就好
樓上有人話想睇，你可以考慮下

樓主巴士飛係現場買？

係，玻利維亞、秘魯全部巴士飛都係到左先買（除左 Nazca）。

你依家個人去到邊

危地馬拉
過兩日開始返學進修下啲西班牙文

危地馬拉啲物價真係高，尤其搭車好貴
chicken bus 係平但要不停轉車好唔方便

熱唔熱

還可以，20 - 28 度左右

你玩幾耐呀？一切小心呀

Day 31-33 - Arequipa & Colca Canyon

到左秘魯都好幾日，仲未習慣呢度啲物價同好明顯旅遊化好多（點知離開秘魯之後啲野仲貴，拍得住香港價錢好痴線）

Arequipa 同 Sucre 一樣都被稱為白色城市，相比之下我鐘意 Sucre 有活力多啲



留左三日我嘅行程係比較休閒，一般隨便行下，最後一日先跟團去 Colca Canyon。

Arequipa 市中心同行遠少少都有免費嘅 Mirador，但我覺得都係 Sucre 靚啲






要唱錢的話，Arequipa 個匯率係最好，但我係一蚊都冇唱到（到 Cusco 之後超級後悔）。

Arequipa 信用卡好普遍，好多都可以碌卡，而且冇手續費（ Cusco 好多收 5% 手續費）

Alpaca Mundo
一個賣貴價草泥馬產品嘅鋪頭


呢度仲有個免費嘅小型展覽同養左幾隻草泥馬雖然免費，但個展覽都做得幾精緻。






有好詳細介紹現存嘅4種草泥馬（幸運地我今次旅程4種都見曬），等我簡單介紹一下

Llama - 咁多種入面最大隻嘅一種，馬丘比丘見到嘅品種就係佢，多數用黎載物


Alpaca - 市面上最常見嘅草泥馬毛同草泥馬肉都係嚟自 Alpaca，而 baby alpaca （即係一隻草泥馬第一次收集嘅毛）據聞係最軟最舒服所以標榜 baby alpaca 會賣貴啲

Alpaca 有三種顏色


Guanaco - 主要分佈喺智利同阿根廷，去 Patagonia 好大機會會見到。個樣同 Vincuña 好似但大隻啲 (唯一影唔到相，因為每次見到都喺架車上面）

Vincuña - 四種入面體積最細但最精貴，秘魯受保護動物。佢嘅毛長期被奢侈品牌訂購，所以就算喺秘魯都好難見到實物。我有次入左間又係賣貴價草泥馬衫嘅鋪頭有 Vincuña 賣，但誇張到要用個玻璃隔住，仲諗住摸下都摸唔到


收集左啲毛後處理同加工


用草泥馬毛編織


Monastario de Santa Catalina
以前係一個修道院，而家已經冇人住，入去純粹參觀下呢個幾靚嘅建築物。我對宗教唔太了解就唔打咁多字，比多啲圖大家睇就算











唔知點解好想食壽司，咁啱 hostel 隔離有間秘魯日本 fusion 菜，見 google 評分又 ok 就行左入去。

點講好，點解我所有食物都有舊 cream cheese 喺裡面一開始睇餐牌見到 crema de queso 以為有啲芝士醬但裡面全部一粒粒芝士

同意Sucre 比較有活力，同即使海拔比較高，但唔知點解比較舒服
野食方面就無計，一定秘魯呢邊好好多

Colca Canyon tour幾錢？

Colca Canyon
Cola Canyon 係全世界第二深嘅峽谷，要好好體驗呢個峽谷最好嘅方法係參加2日/3日行山團，由下向上再從上到下走，但呢個升降距離實在太大我考慮左幾個鐘就決定放棄，舒舒服服坐車算

去 Colca Canyon 朝早3點就出發，但搭車有多三個鐘瞓都唔算太辛苦


過左兩個星期，我覺得自己完全適應高海拔，一日內由3千米上5千米再上上落落都冇任何反應。除左行山特別喘氣外 頭疼缺氧嗰啲完全冇（反而我朋友到秘魯一直高反到走嗰日）。

除左開頭食左4日醫生開比我嘅高反藥，頭疼時啪粒止痛藥，飲下維他命 C 同 Coca 茶，我覺得自己適應非常良好

瞓瞓下被叫醒落車，架車放低左我地喺個火山觀景台（完全唔知有個咁嘅行程）




望望下個火山爆發左（未到危地馬拉已經見到火山爆發），仲要噴左幾次都幾好彩


之後有個行程可以著當地衫影下相



當地人突然拉住啲團友影相喺度轉圈


開始見到峽谷


途經一個叫 Maca 嘅鎮，導遊會鼓勵團友同啲草泥馬影相，我偷拍左幾張






然後去睇秘魯其中一個神聖嘅動物，禿鷲 ( Condor )。喺秘魯會成日見到 Condor + Puma + Snake 呢個組合，因為呢三個動物代表左印加文化嘅三個世界，大自然 + 現實世界 + 死後世界。

導遊話我地唔係睇禿鷲嘅季節，但去到都見到成7隻





飛得太快，我個相機對唔到焦




之後又去左另一個 Mirador


導遊話好多時呢度嘅人會攞三塊 Coca 葉向大自然許願，好似咁


中間仲有幾個行程，浸溫泉，玩 zipline，睇草泥馬。溫泉同 zipline 要另外收費，我冇興趣就冇玩。呢個一日團我直接喺 hostel 報， 75 sol 包兩餐好抵玩。








玩左15個鐘終於返到 hostel，收拾完行李就去巴士站搭車去 Cusco。


唔同巴士公司啲 style 都好唔同。遲15-30分鐘好正常，但今次15分鐘前已經催我上車

75 sol

咁平