[獨遊] 終於踏足南美洲

值得就好
印加古道一路上見到唔同嘅遺址
呢個體驗係其他行山徑比唔到嘅

其實一直都想去馬丘比丘，硬係拎唔出勇氣樓主好勁隊友好廢

Day 45-46 - Lima

離開 Cusco 之後我同朋友就搭過夜巴士去 Nazca，之不過只有我朋友喺 Nazca 去左搭小型飛機睇 Nazca Line，我不感興趣就冇參加所以 hea 左日


呢個 chupe de camarones 勁好飲，好似冬蔭功咁嘅味可惜之後都再見唔到

夜晚去左食漢堡包，好大份


喺 Nazca hea 左一日後就搭巴士去 Lima


Lima 啲交通勁亂，啲車橫衝直撞，成日無故塞車。喺 Lima 出入我都係撘 uber，呢度啲的士成日亂開價，貴 uber 兩倍

Miraflores
今次住秘魯富人區，感覺有啲似九龍塘。見到啲有錢白人請個秘魯保姆湊住自己仔女




我地住嗰度唔近海邊，差不多黃昏前行左30分鐘去海邊



我覺得個夜景還好啦，始終好難有其他地方嘅夜景靚得過香港


跟住去左 Larcomar 商場，冇乜野睇全部都係啲連鎖牌子

Central District
第二日參加左一個 free walking tour，我朋友報的 (我成日覺得免費嘅野係最貴，話就話免費但比得少又唔係比得多不如正正經經參加個正價團）

Lima 大多數都係睇殖民歷史，秘魯獨立呀，同鄰國嘅愛恨情仇等等



我覺得自己會將幾個中南美國家歷史混淆就廢是寫錯，有興趣可以自己 google










Madreselva，導遊話係秘魯版嘅 red bull，飲左杯唔覺得有用


Mercado Central
因為我朋友好想食 Ceviche 就去左 Lima 嘅中央市場

唔知係咪地區問題，Cusco, Arequipa, Sucre, La Paz 嘅果汁店多好多選擇，Lima 少好多款

佢地嘅餐牌都係大同小異，唔好問我餐牌點解，樓主翻譯不能


叫左呢個三餸拼盤，略微酸左少少


仲叫左呢個類似海鮮雜燴嘅野，略鹹


之前喺 Nazca 飲過一碗蝦湯 chupe de camarones 好好味，諗住喺 Lima 會搵返差不多味道但係搵唔到

Churros 好好味


Barrio Chino 唐人街
難得咁近就去秘魯嘅唐人街望望

我旅行好少會去唐人街，我覺得我要睇華人亞洲咪有，做咩要睇其他國家住嘅華人

但 Lima 呢個唐人街同我想像中好唔同，啲鋪頭裡面好多員工都係本地人（可能係第二三代同秘魯人結婚嘅華人所以睇唔出個分別），而且好多本地人幫襯




中秘友好關係


我從來未見過華人以外嘅人砍燒味


油鹽醋糖公仔麵要放喺個玻璃櫃裡面


但話時話，唔同美國加拿大華人超市啲嘢咁平，中南美嘅亞洲食物好貴，唔知係撘飛機過黎定好重入口稅



同朋友道別前喺酒店附近食左個港女下午茶


離開 Lima 嗰晚叫左個幾鐘 uber 都冇車去巴士站，最後要比好貴的士錢

唔知撞車定點，成條路深紅色（成日停左喺度都唔郁唔知塞乜，總之就塞到痴撚線）。一路好擔心今晚趕唔趕到巴士，不過啲巴士應該一齊塞緊


差不多兩個鐘後，終於到 Terminal de Plaza Norte

但原來架車兜唔到入個站裡面，落車後仲要行10分鐘。我攞住啲行李跑跑跑，身水身汗終於跑到巴士站

因為唔多車去 Huaraz 望左陣先見到有去呢個地方嘅巴士。第一間比想像中貴（呢個時候仲有心情格價），跑多一間，平35 sol 即比。



仲有15分鐘架車就出發（雖然最後都係遲走），我仲要跑去比稅同去廁所，不過短跑選手最後8分鐘前上到車

去馬丘比丘唔洗勇氣，有錢就得

真，香港人最唔缺就係錢，要養家另計

真係好正 成個行程好完美 導遊好團友好伙食竟然都好好 同埋真心多謝班porter 冇佢哋我諗要行一倍時間

留名支持，等睇Huaraz 行山靚相
呢度都係我如果可以重遊南美時想去既地方
呢個有個巴打叫利馬王子，希望佢上水講幾句利馬唐人街以至華人既故仔

我喺 Huaraz 只係行啲輕擎路線
整理下應該聽日更新到
召喚利馬王子巴打

Day 47-51 - Huaraz

喺架車瞓左成程後（我擁有隨時隨地瞓得着技能），朝早六點幾到 Huaraz 我喺個站坐左陣，好快就有個人過黎 sell 我 tour。由於個人仲未完全清醒，完全聽唔明佢講咩我同佢講我好攰咁佢就放過我

離開車站時佢仲話我知點行去 hostel。雖然南美人成日努力推銷我，但就算我拒絕都未曾試過比人黑面（喺香港比人屌左老母啦），呢樣令我覺得呢度啲人真係純樸友善



行左廿分鐘就到 hostel，今次住嘅 hostel 叫 Caroline Lodging，個老闆講起碼4種流利語言，英法西荷。除左可以幫你安排行山行程之外（就算唔跟團，自己帶裝備老闆都可以幫你安排交通同話你知點搭車）。


呢度早餐日日唔同款，以 20 sol 一晚黎講抵到爛




樓上仲有個天台可以望到雪山唔知係咪未到旺季好少人，有兩晚包房。


隔離天台有隻金毛好得意可惜我地有一路之隔，只可以遠遠 Hi 下佢



Huaraz 係秘魯嘅行山大本營，所有難度任君選擇，我今次只係行左兩日超簡單路線。鐘意行山嘅人留半個月都唔多，呢度風景完全唔輸Patagonia
我覺得有埋天氣搭夠直頭靚過添

比個價目表大家參考下


到步第一日就唔行山，咁啱 hostel 有個法國女仔都係前一晚到，我地就一齊上左 Huaraz 鎮嘅山頂，搭 colectivo 1號去總站 cementario 隔離條路一直上大概 20 分鐘就到，唔想行都可以搭的士到頂。





山頂上面有個好大嘅十字架


影影下相比隔離一對秘魯夫婦叫左過去幫手影相拍片 我一路影個男人就開始講野，原來今日係佢同佢老婆嘅結婚週年，佢就咁對住我呢個陌生人講左一段我聽唔明嘅感人肺腑嘅告白佢講完之後就叫佢老婆都講幾句，好恩愛

坐左陣就落返山，行落山時撞到啱啱對夫婦都揸車走，佢地仲同我講拜拜

如果喺香港有人叫我幫佢拍片之後告白，我應該會反曬白眼勁無奈但唔知係咪秘魯人友善得黎又真誠我覺得佢地好可愛

落山時經過個墳場入去行左陣，南美洲嘅墳場其實係一個觀光景點，之前去幾個城市佢地嘅墳場喺 TripAdvisor 係有排名（例如 Buenos Aires 同 La Paz)

平時一條友我唔敢入今日有個伴就大膽啲跟住佢入去因為係公眾假期嘅關係，嗰日都幾多人掃墓，佢地會買好多花跟住執靚佢。仲見到唔知係有人入葬定咩儀式，有一對小型樂隊喺個墓前演奏，我諗同破地獄有異曲同工之妙

影人地個墳好似唔太專重所以只係影左一幅


呢度嘅墳每一個都好特別，唔係好似香港嗰啲咁一式一樣，都唔係美國嗰啲咁。香港墳墓有家族位，呢度都有但呢度嘅家族位大到成間屋咁，可以放到8個棺材入去

同埋有啲靚到好似個小型教堂咁，裡面大到可以坐幾個人，都幾大開眼界 呢度啲墳墓七彩繽紛，完全唔係平時去掃墓有種陰森嘅感覺

Laguna Rocotuyoc

第二日去左個比較新嘅景點， Rocotuyoc 最近先開放，可能因為咁所以遊客唔多。其實 Huaraz 本身遊客都唔太多。

秘魯去所有景點用最多時間係搭車，通常3-4鐘去，然後3-4個鐘返。Cusco 附近嘅路雖然長但尚算靚仔，Huaraz 去景點嘅路全部扽到呀媽都唔認得，搭車仲攰過行山


中間停左陣喺個瀑布，個人未瞓醒



坐多一個鐘就到目的地，落車行5分鐘就見到個湖




天氣超級好，個湖超級靚，每個角度都世界級








行多30-40分鐘可以近距離見到冰川




逗留左陣就沿路返去，之後又搭返車返 Huaraz。一個短短2個鐘嘅行程，搭車就用左半日

Laguna Paron
前一日去完 Rocotuyoc 之後，黃昏開始落左成日雨，個人又唔係好舒服就抖左日

同 Rocotuyoc 差不多，Laguna Paron 都係車到去湖邊，但路程顛簸好多，會暈車浪嘅人應該一定嘔

之前好似講過秘魯大部分景點話事人係當地嘅原住民，所以好多時如果啲村民話唔開就唔開 入去時仲要比過路入場費啲村民

Laguna Paron 好似又係有啲講唔掂數嘅問題，為左避免入唔到去我地朝早7點就出門口。

可惜千算萬算，算唔到架車中途死火。我地停左喺路邊成個鐘（到離開嗰陣架車都仲喺度，司機等左勁耐好慘）



之後有另一架車黎接我地繼續上路。但呢架車少兩個位又冇咁舒服，成車人都坐得好辛苦

6個鐘後終於到 Laguna Paron，可惜落雨加有霧，好彩遮唔曬後面嘅山



個湖隔離有條路可以比你行30分鐘上觀景台




辛苦就唔辛苦，但咁多石頭要爬嘅




啲水真係咁嘅色，我冇執過，部電話都冇 AI 自動調色，真係咁嘅樣




據聞好出名嘅 Paramount logo 裡面個雪山就係 Laguna Paron 前面座山，但我冇 fact check


除左行上觀景台之外，可以喺個湖撐艇，我同同行嘅法國妹以為唔夠時間就冇去，點知啲團友得15分鐘都上艇，總之我都去啦



逗留左兩個幾鐘又係時候要走，坐三個幾鐘返 Huaraz，架車超級扽

返到 Huaraz 獎勵自己喺秘魯嘅最後一晚，晚餐去左食 pizza，咁樣加埋都係 36 sol 勁平


除左我去嘅兩個超容易景點，Huaraz 附近仲有好出名嘅 Laguna 69，Glacier Pastoruri（因為全球暖化呢個冰川好似過多幾年就會消失），4日 Santa Cruz，8日 Huayhuash，同一個我本身有興趣可惜天氣不似預期去唔到嘅 Nevado Mateo 雪山。

比起之前去過嘅任何一個城市，Huaraz 算小眾，基本上黎旅行嘅人都係嚟行山，冇乜純觀光嘅遊客。因為旅遊業冇 Cusco 蓬勃，呢度嘅導遊同居民都只會講西文

秘魯行程暫時到呢度，聽日就搭返大巴去 Lima 機場過一晚等搭飛機去中美洲

lm 有生之年都想解鎖南美洲

E+係邊樹呀?

我去左秘魯
但無去Huaraz
記低先 有日再去南美可以去下行山

溝唔溝通到d

簡單對話基本上都冇問題
但講多幾句就溝通唔到
尋日個的士司機係咁同我吹水但我聽唔明

危地馬拉篇

話咁快我嘅旅程都過左一半，喺秘魯玩左三個幾禮拜後就要同南美洲講再見

喺南美洲過左一個半月都順順利利，點知喺利馬機場發生左一個小插曲差啲上唔到機 check in 嗰陣個地勤同我講要有離開危地馬拉嘅證明如果唔係唔上得機

我比佢睇我墨西哥離開張機票佢都話唔得，一定要係離開危地馬拉嘅證明

好彩佢比我去到登機口再 show 比佢睇，我一路過關一路瘋狂搵巴士飛，最後比我到登機口前買左張巴士飛

到閘口驗飛嗰陣，另外一個地勤又話唔可以巴士飛一定要機票，好彩佢個同事比我過

慌左陣有驚無險成功上到飛機。已經好耐冇試過比人問回程機票，我完全冇諗過呢個問題張巴士飛睇下之後用唔用到啦，用唔到當買個教訓。


秘魯冇直機去危地馬拉，我中途喺 Dominican Republic 轉機去 Guatemala City。成功降落 Santa Domingo，坐兩個鐘後又上返飛機。






落左機排兩排等過關就搞掂。一早訂左 shuttle 車我去 Antigua，等左陣就上車。



身上一毫字現金都冇，即刻衝去銀行襯佢閂門前唱返少少，再買左個幾好食嘅有料Tortilla



只係喺 Antigua留左晚第日就去 Lake Atitlan

想請問樓主用咩護照入危地馬拉?

Day 53-55 Lake Atitlan
Panajachel
因為尋晚唱完錢後啲旅行社已經閂曬門，所以我係一早起身去買飛。聽聞直接同旅行社買最平，經 hostel 買係貴啲，但我覺得其實差不多啦


司機遲大到，等左個半鐘架車先出現


唔知係天氣太差（個天長期灰色好似層霧咁）定我對 Lago Atitlan 太大期望，黎到湖邊連個火山都望唔到




好彩我住最平嘅 hostel，呢度好少少嘅酒店成千蚊一晚，對住個咁嘅湖完全唔值

雖然網上話 Panajachel 係最旅遊化，但我揀呢度因為最方便，我得兩晚喺度唔想出入都搭船

行曬成條手信街 + 海邊我覺得呢度絕對係勁少遊客，同想像中好大分別（所以網上睇到嘅野參考下就算，現實可以好唔同）。

反而好受 backpacker 歡迎嘅 San Pedro 同 San Marcos，好多人都話週圍都吸毒（我唔知所謂嘅 drugs 係邊款啦可能合法嘅，但我就唔啱）

喺海邊散步比人推銷左遊船河行程左好耐



第一晚日落都見到個太陽，第二晚啲霧遮曬



San Pedro & San Juan
第二日就搭船去 Lake Atitlan 最受歡迎嘅鎮 San Pedro de laguna，直接行去公眾碼頭搭船就得。公家船都要 25 GTQ。




San Pedro 真係冇野做，行下食個飯飲杯咖啡就離開







間餐廳個老闆娘定員工見我亞洲人就搭下傘，佢話自己係日本人定唔知混血兒，有個日本名（當時西班牙文好有限都唔太聽得明）


搭 tuk tuk 10 GTQ大概5分鐘就到隔離 San Juan，據聞 San Juan 係最多手本地工藝品

但危地馬拉嘅手工實在差秘魯太多，全部布都好多線頭，零意欲消費，影下相就算。







影影下相突然見到隔離有個亞洲女仔，本身諗住點下頭就算但佢一嚟就問我邊度黎，先發現遇到同鄉

就是咁，我遇到我今次旅程嘅第一個香港人（之前移民左嗰啲 abc bbc cbc 唔計）

難得遇到同鄉就搵個地方坐地傾左陣，我地去左食雪糕。


呢個香港女仔其實已經旅居左好幾年，喺度讀緊西班牙文但過兩個禮拜就離開中美洲。可能因為旅居，所以佢通常一個地方留好耐，唔係好似我呢啲趕頭趕命，三四日就移動去下一個城市。

講講下都吹左成個幾鐘，講完後佢返住宿休息我就週圍行多個圈就返 Panajachel

g 持！

唔係要美簽咩

天氣好差下