[獨遊] 終於踏足南美洲

樓主小心安全

Day 12 - Punta Arenas

聽日零晨機去 Santiago，因為機場喺 Punta Arenas，我班機又遲所以喺市中心hea 陣。

Puerto Natales 去 Punta Arenas 搭大巴3個鐘左右，架大巴可以去埋機場，但係冇大巴由市中心去機場。

去機場要比差不多 1.5倍價錢搭的士，好 on9

我上網睇大概 7,000 CLP，但最後埋單比左雙倍價錢，搶錢。

落左巴士都冇乜特別野做，都係週圍行下。






但出面超大風，孭住啲行李喺強風底下行得好吃力，求其搵張櫈坐算。


Hea 左陣去食飯，呢個係點解我要特登停一停市中心嘅原因。上網搵左間幾特別嘅餐廳叫 La Luna，見到啲相幾正就想試試，當獎勵自己行左四日山咁辛苦。



叫左呢個特別推薦，一次過有曬幾款 La Luna 最受歡迎嘅食物: Ceviche, Garlic Squid, Baked King Crab Chowder, Scallops Parmesan, Chili Shrimps


好耐冇食呢種海鮮類嘅西餐，好多芝士好多 cream 好肥，但好好味


食唔曬，可能太膩

間餐廳仲有一個幾特別嘅地方就係啲牆比客人貼滿曬野，例如自己國家嘅銀紙，行李個 barcode，名片，證件相都有勁搞笑。我本身都打算攞張10蚊紙貼喺度，但身上得50同100，咁多錢留返比自己返香港洗算。


智利啲野同香港差不多價錢，今日係我嚟左智利咁耐第一次喺餐廳食野。本身餐飯已經唔平 ~30,000 CLP，仲要收 18% VAT。之後喺智利都係少啲出街食飯。

暫時都未遇過危險，但我會萬事小心

發覺去好多地方都由伊斯坦堡轉機，去歐洲好合理，連去南美都由呢度轉機

因為土耳其航空有直航去巴西同阿根廷，最方便
啲美國人去 Patagonia 都要轉兩三程，所以其實經北美轉機唔係方便好多

bro有冇騎Rose馬上山😛我落山果陣成陣馬屎味

我行上去 不過都係2個鐘左右

如果大家係有玩開露營，玩 W Trek 建議千祈唔好提早上網 book 或者揾 agent book campsite！

我哋啱啱2月中去完，W Trek 最西邊Paine Grande 同最東邊 Camping Centro 其實都俾 walk-in。講緊自己帶晒所有露營裝備，我哋個friend早半年上網book，一個俾咗 $14美金、另一個俾咗 $56美金。但事實係 walk-in 只係 9000CLP ($9.5USD) 同 20,000CLP ($21.2USD)。只不過係中間嗰個唔俾 walk-in，變咗你有2晚留喺 Paine Grande，即日來回去2個 viewpoint，一日去 Glaciar Grey、一日去 Britanico，但就唔使揹住個大背囊行。

Day 13-14 - Santiago de Chile

可能真係太 chur 突然喉嚨痛，兩日後飛 San Pedro de Atacama ，點算

機場出市區搭機場巴士，2,000 CLP 到市區，再轉地鐵或市區巴士




又買多張用一次唔知幾時再有用嘅卡



由於呢兩日復活節，Santiago 本身已經冇乜野做就更加少野做，有開嘅地方都多人。

無無聊聊就去行商場


之前有考慮上 Sky Costanera 睇夜景，但唔平就冇去



因為所有行程都好隨意，所以我經過得最多嘅係公園。公園最多情侶，第二先係一家大細，食左好多狗糧



買左杯智利名物，mote con huesillo，糖水來的


隨便入去左啲唔洗錢嘅博物館

Museo Nacional de Bellas Arts，藝術呢啲我識條鐵



Museo Histórico Nacional，嗰陣咁啱有個短期展覽係講1973智利年政變。嚟之前我對南美國家嘅歷史都唔太認識，睇完先知智利曾被軍政府統治，直至90年先結束17年嘅軍事獨裁制度。

雖然得西文文字解說，但有英文導航，免費的





Museo de la Memoria y los Derechos Humanos (Museum of Memory and Human Rights) - 有一部分同之前個展覽有重複嘅地方留左一陣就走。





本來特登去 Quinta Normal 區係想去佢地個自然歷史博物館，National Museum of Natural History，但可惜復活假佢唔開門



Santiago 隨便逛






今次住聽聞好垃圾嘅 Bellavista 區，去之前都擔心治安麻麻但日頭感覺安全。


Hostel 同房有個愛爾蘭女仔好勁，一個人踩單車北到南由哥倫比亞出發去 Patagonia 再上返 Santiago，玩左9個月過多陣就返屋企

我鍾意 backpacking 其中一個原因就係可以遇到啲平時完全唔會遇到嘅人，每個人都有自己嘅故事 雖然今次仲未認識到可以同行嘅朋友，但就算冇我都期待之後嘅旅程

諗住去搭纜車但好多人，算數。遲啲喺 La Paz 搭到飽






San Cristóbal 可以行上山頂，行左一少段但實在太熱我又著牛仔褲就冇繼續






幾多人喺度練跑，好勁，我覺得跑斜路超級辛苦，勁大個太陽曬住又再辛苦啲


聽日零晨機，今晚又係瞓機場

去旅行都幾易水肚不服

我地個時遇到個德國大叔都係咁教路
2日留Paine Grande
會平過住中間唔同公司個2間
佢最後好似都係walk in Centro
明明就有位紥營但網上無開

我都係係Santiago 飛去Atacama就開始病
好彩去鹽湖前好返哂

你會唔會Join 3日2夜去鹽湖呀

我就係3日2夜團開始病

3日2夜團 日頭就好舒服
夜晚好鬼凍

應該係高原反應搞唔掂
第一次行步路都喘氣

嘩 咁好辛苦
保重

有冇食定高山藥

利申：高山藥+紅景天supplement ，去完彩虹山都無事

其實都唔少人想去亞洲歐洲以外嘅地方，不過機票價錢同假期係大障礙

之前睇背包客棧話阿根廷有淋臭水黨，扮幫手抹乾淨跟住偷錢，而家仲有冇？

已經有食定高山藥，但好似幫唔到好多
不過好似已經適應左

我冇遇過，沿途都冇聽到有人遇過
真係要好黑仔先會比人淋臭水再偷野

你好勇敢呀，我會keep住追你既遊記，希望有生之年可以抽3個月去探索外面世界

喺Uyuni飲多啲水應該會舒服好多祝你旅途愉快

Day 15-16 - San Pedro de Atacama

頭兩個星期太進取，搞到個人好攰（咁都未病真係偷笑） 跟住落黎去高原我要放慢一下自己嘅節奏

智利物價唔平，我覺得已經洗凸左好多，Atacama 有好多 local tour 可以參加，但因為之後我有3日2夜團去玻利維亞，中間有啲景點會差不多，所以我淨係去左個星空團，其他時間就休息

Atacama 日頭勁大個太陽，又曬又熱又乾，啲車一經過就沙塵滾滾



個鎮有條主街，都係旅遊社同賣手信。冇特別做過功課順眼就入去問下，一路行一路提醒自己唔好急，擔心會有高山症




星空團 25,000 clp 我諗應該市價掛

其實睇星可以自己踩單車或者行出個鎮少少，遠離啲光但我一條友就廢事

夜晚9點出發，個團會帶你去個鎮外面遠少少一躂好暗嘅地方，落車之後有櫈比你坐，中間仲有茶點食


咁導遊就會講解一下啲天文學嘅知識，咩季節最適合觀星，呢幾粒又係咩星，都講得好詳細。同埋都有少少互動問題，唔會令你覺得無聊

如果你好似我咁對天文學完全冇認識，你會聽到一頭霧水我淨係記得導遊話射手座就係嗰幾粒連埋一齊，嗰個係個頭，嗰個係對腳，嗰個就係枝弓，但佢講完我都覺得好抽象唔關語言問題，就算導遊講廣東話我都唔會聽得明

但係，真係第一次肉眼見到咁多星星，咁大粒咁光以前都去過啲少光害嘅地方抬頭就係星，但 Atacama 實在靚太多

一路孭住個咁重嘅腳架四圍走，終於用得著




本身散光頗深（度數配足會頭暈），望住個天太耐啲星開始散開

我覺得相機影出黎嘅係一回事，要睇相上網大把啦，但親眼睇到係好震撼（呢啲好日唔出城嘅城市人真係見識少）

就算冇相機都唔緊要，領隊會帶機幫每一個團友影。我就好好把握呢個時間，用啲團友練習下我嘅攝影技術（全部對焦失敗）





離開 Atacama 之前一晚入左間類似家庭餐廳嘅地方食飯，都係隨便叫，望住個餐牌都睇唔明。雖然份量多，但咁就 8,000 CLP 都幾貴



如果智利唔係咁貴我會想留耐啲喺 San Pedro de Atacama，因為平時真係好少機會見到咁多星星