三陽正嘢唔知樓上既兩位話要買鞋既巴打買左未,不過我睇完上面既留言諗左諗,都係覺得有少少唔對路,覺得都係應該要講兩句。
啱亞洲人肥腳
首先係關於有位巴打提及過既亞洲人腳型既問題,其實呢個係好多年前已經揭穿左係「偽科學」,係賣鞋既人,尤其是大陸牌子既商人為左令自己既鞋可以同歐美牌子競爭而作出黎既野(主要係運動鞋),同「中國製疫苗更適合中國人體質」、「西藥唔岩中國人,中藥更適合中國人身體」之類既說法係異曲同工。
以醫學上黎講,其實根本無所謂亞洲人腳型呢種講法,主要係用希臘腳、羅馬腳、埃及腳等去分人既前掌(腳趾)既形狀同,再配合腳背高度、是否有扁平足之類去判斷一個人既足部健康風險。又或者換個講法,同為香港人,點解有啲人二趾長過公又有啲似秋刀魚既樣,點解有人肥腳扁平足,有人又薄腳高足弓?
就好似我對腳就好岩G&G、Edward Green既大部份楦,但其他人未必適合。呢個亦都係我地點解見到市面上咁多唔同品牌、唔同鞋楦種類既原因。衰啲講句,你當歐美啲鞋麌戇鳩既咩,如果真係有一種主流亞洲人腳,佢地當年打入亞洲,尤其日本、中國市場既時候會唔諗設計個新鞋楦出黎?佢地係咁蠢就輪唔得到佢地搵咁多錢啦!
基於唔同前掌形狀既組合,每個人適合既楦都唔一樣,正因為咁係網上面/聽朋友講邊個牌子既鞋好舒服,到現實自己著既時候可能覺得好大鑊。鞋同衫唔同,衫唔岩身炒車最多咪樣衰啲,鞋唔岩腳炒車行街行到一腳水泡真係唔係講笑,步步都係痛黎。所以一直同大家講網上面雖然好似有時買鞋會平過實體鋪,但買鞋之前係一定要試,有時換個款個Fitting已經可以唔同左,更何況一個你未試過既牌子、未試過既楦?仲要未試有啲人鍾意鞋緊啲、有啲人習慣鬆泡泡。
係網上討論,可以講下做法、用料呢啲客觀野,但咩鞋咩楦岩自己係只可以自己去試,無得偷懶的。