我唔覺意穿越咗時空 遇到個神秘女仔？！（2）

佢咁弱～

有Jennifer㗎嘛

更新到Chapter 78
而家已經燒咗好多文...

我之後仲要不停做委託...
希望唔會停更啦

Chapter 78 真係上山

『係紅色... 仲有... 仲有紫色...』唔通我哋搵到土壤樣本墜落位置？！

Jennifer唔出聲，望住個畫面...

『呢個位置... 大概200米高左右。等等，呢個位置係水塘。』我對照返政府嘅地圖...

「我重新開鏡頭，試下低空俯衝過去影！」Jennifer拎起Laptop，跟住改咗啲settings，命令架飛機返去水塘嘅位置盤旋！

跟住眼前出現水塘嘅畫面...

見到水塘嘅盡頭有一啲白色殘骸...

『嗰度！今次兜一個圈過去！』我指住住水塘嘅畫面！

「可惡！竟然咁隱蔽！點解我一直都無發現佢喺呢度！」Jennifer再睇住新嘅相...

只見架飛機scan出嚟所有水全部都係用紅色表示！

水塘嘅盡頭有啲位置更加用紫色！

「啲水全部污染晒，我哋要諗辦法。」Jennifer皺眉頭咁講...

『如果人落水危險嘅話，遙控船會唔會work呢？』我諗緊用無人嘅方法...

「我哋可以試下，但係唔樂觀。佢呢個位置可能要划艇入去... 或者我哋要喺側邊遊繩落去...」Jennifer都喺度分析緊我張政府地圖...

我細心一望... 殘骸係一隻白色嘅火箭...

火箭已經解咗體... 有好多唔同嘅散件咗跌出嚟...

水塘嘅盡頭係淺水區域，有啲石頭同埋溪澗喺度...

就算真係用遙控船都有可能擱淺！更何況無人知道隻船掂到啲污染咗嘅水之後會發生咩事！

「你等等，我將呢啲相Send過去米國果邊...」Jennifer打開咗一個紫色嘅Email...

係protonmail... 跟住佢attach晒無人機影到嘅相...

Send咗...

跟住唔夠2分鐘就收到Reply！

Dear HKI Defenders,

The attached picture is a container of the soil samples being used on the above-mentioned spacecraft. Kindly retrieve the containers from the crash site and wait for further instructions.

Regards.
...

跟住有一張紅色盒嘅相... 上面有DO NOT OPEN嘅紅白色封條！

我再望下殘骸嘅相... 溪澗入邊的確有啲紅色嘅物體，但係我睇唔清楚係乜嘢嚟！

不過似乎我哋今次真係搵到殘骸...

「Professor Y, 你望下呢啲相...」Jennifer開咗Video Call...

「睇落真係似... 你哋小心啲。如果真係搵到嘅話，我再同米國傾下交收嘅安排！」Professor Y都認真咁望住個mon講...

「同埋我想問一問，你有冇研究過G-Particle... 我有一樣嘢想拜託你。」Jennifer誠懇咁望住Professor Y個畫面...

「如果你哋攞得到過嚟嘅話，我可以幫你研究下。前提係你要攞得到過嚟。」Professor Y嘅意思係... 我哋過唔到去？

「我自有辦法，之後再搵你。」Jennifer匆忙收線...

「恆，出發囉？」Jennifer認真咁望住我...

『Jennifer，我希望今個任務唔會係我哋最後一個任務...』我都望住佢...

「過嚟...」Jennifer摸住我嘅後尾枕... 慢慢錫咗落嚟...

我開始比Jennifer錫得多... 慣咗...

動作無再好似之前咁唔自然咁生硬...

「帶繩，仲有行山杖...」Jennifer喺度拎住啲裝備，我幫佢放入車...

「等等，我最後想搵一搵佢哋...」Jennifer帶我上返大本營嗰度...

大家都望住我哋兩個... 唔知我哋兩個有咩重大事宣布咁...

「今日我成功搵到米國支火箭墜落嘅位置。我而家會帶阿恆佢出去，行動果陣我唔會同佢分開。如果... 如果我哋兩個有乜嘢不測嘅話...」Jennifer講到一半都有啲震...

「真係如果我哋3日之後都無返黎嘅話... Angie，呢度就交比你啦。」Jennifer面色凝重咁講...

Angie嘅表情都認真落嚟... 沉思咗一陣...

「無問題。你哋今次要小心。」Angie好淡定咁講...

「恆，我喺度等你返黎架。」Erika都走嚟同我講...

「我都會等你~ 」Jessie依然係笑面盈盈咁...

你又想捉我做獵物咋嘛Jessie...

「恆，我信你可以嘅。」Jack似乎對我好有信心...

「仲有，Erika。麻煩你將無人機轉做Radar Surveillance Mode嚟保護基地呢度啦。」Jennifer臨走前講...

「收到。」Erika認真咁答！

「各位，我哋出發啦，後會有期。」Jennifer轉身，拖住我行...

我而家嘅心情係有史以來咁沉重...

一來我知道如果我哋搵到G-Particle嘅話，我終於有希望可以返去...

二來我亦都記得，萬一我哋失手，有乜嘢不測嘅話... 隨時命都無埋！

Jennifer拖我返入房... 拎咗兩件衫出嚟...

係之前我哋係康怡個商場「買」嗰兩件...

「着住佢，可能呢件衫可以為我哋帶來幸運呢？」Jennifer遞咗件衫比我...

『地球嘅迷信嘢，你buy嘅咩？』我都唔反對，所以喺度着緊件衫...

「有時去到最後，無嘢可以信果陣，唯有係咁。」Jennifer苦笑一聲...

呢件衫... 係見證住我同Jennifer呢段奇妙嘅關係...

對我哋嚟講有特別嘅意思。

Jennifer確保所有裝備都齊之後，就同我一齊上車...

我望住地圖...

『Jennifer，佢嗰度嘅位置係大潭水塘上半部分，我哋要經上次嗰條車路上去，中間有個位置會有個車閘。』我指住大風坳嘅位置...

好彩我平時喺港島有行山姐。

『萬一開唔到車閘嘅話，可能要用炸藥炸毀佢，唔知你有冇準備呢？』我連有車閘呢啲細節我都仲記得！

「有。」Jennifer打開車頭嘅儲物櫃，拎起一盒白色嘅C4...

我嚇一嚇... 佢洗唔洗帶咁多吖...

「你帶路。」Jennifer都變得緊張...

『先去鰂魚涌，上次上山嗰條車路。』我指住地圖上面水族廣場嘅舊址...

「Ok。」Jennifer開車... 慢慢駛往鰂魚涌...

再次經過溶溶爛爛嘅港島區街頭...

經過我同Jennifer一齊探險嘅商場...

都勾起咗呢幾日嚟唔少嘅回憶。

『Jennifer，記住前面轉左上柏架山道。』我仲記得佢上次搞到要倒車...

今次Jennifer就無miss到個路口啦~

沿途上斜我仲諗起，早幾日就係因為我「喂」咗佢一聲，搞到比佢嚇到賴屎咁滯！

『喂~ Jennifer！』我笑笑口咁叫佢~

「我... 無心情陪你玩吖今次。」似乎Jennifer都認真...

「揸到有啲攰，我想抖抖。」Jennifer停咗車，將個軚盤扭咗一邊，確保唔會溜後。

跟住佢拎起紫色水樽喺度飲嘢...

「你想飲嘅，我有預你份。」Jennifer拎起第二個藍色水樽比我...

佢真係好細心... 會照顧埋我。

『Thank You』我接過水樽喺度飲...

「繼續囉？」Jennifer望住我...

『Jennifer...』我有啲驚咁望住佢...

其實我哋越上，就越接近嗰度... 我真係好驚會...

Jennifer佢粒聲都無出，側身過嚟攬住我...

「其實... 我都好驚。」Jennifer震住咁講。

Jennifer都唔係萬能架

今晚早咗少少出文

個故就嚟完

留名

我係唔會俾你哋估到我嘅