我唔覺意穿越咗時空遇到個神秘女仔？！（2）

格躺 2022-07-29 14:12:14

Chapter 105 訓練（中）

Professor佢拉我去另外一邊... 呢度個mon個鏡頭係用第三人稱嘅角度望住F-35！

「啪！」Jennifer大力咁將左手嘅油門推到最盡，嘗試加速撇甩支導彈！

Professor佢擰擰頭... 只見F-35嘅引擎噴出大量火光！

Jennifer啟動咗Afterburner！

Jennifer嘅右手突然大力一拉！F-35不停哋打側轉圈！

我明啦！Jennifer嘗試利用速度同埋不停改變方向嚟擾亂支導彈？

跟住只見Jennifer突然將F-35向下俯衝，直飛向大嶼山！

佢係嘗試用大嶼山嘅山勢嚟令到支導彈撞落山！

Professor就繞埋雙手，一副食花生咁嘅樣...

我嗰邊嘅畫面見到飛機嘅後方有個光點追著架F-35...

只見Jennifer就快成功駛過大嶼山嘅山脊之際！

「碰！」畫面顯示導彈擊中F-35爆炸，Jennifer嘅眼前嘅畫面變黑！

Jennifer佢除咗頭盔，面上嘅表情就好似鼻碰到灰咁...

以Jennifer咁好勝嘅性格，咁樣俾Professor擺咗一道，肯定好唔爽。

「點吖？」Professor佢幽幽咁問Jennifer...

「我覺得我死得不明不白。」Jennifer有啲沮喪咁講...

「首先，你頭先做嗰啲動作... 如果你喺架真機上面嘅話，晨早就俾啲G-Force整到暈咗啦。」

「跟住，你未搞清楚頭先嗰支係乜嘢類型嘅導彈。F-35係隱形戰機，某國製嘅雷達一般嚟講都好難lock到佢。你頭先有冇聽到Radar Warning Receiver響吖？」

係喎！我明啦！Jennifer用嘅戰術係對付雷達追蹤嘅導彈！

但係頭先追住佢嘅... 睇怕係熱力追蹤導彈！唔怪得我好似覺得差咗啲嘢...

加上Jennifer開Afterburner，引擎露出大量火光！

佢變相將自己隻F-35變成一隻大標靶！

「冇。」Jennifer如實回答...

「你頭先面對嘅係IR Homing嘅地對空導彈。正確嘅處理方法係收油門，放Flares，然後改變方向。」Professor細心咁解說...

同時隻手喺度比畫住Jennifer應該做嘅飛行姿勢...

「嗯，陣間俾我試多次。」Jennifer似乎唔忿氣...

「到你啦阿恆。」Professor拍一拍我膊頭... 示意我坐上駕駛座...

我慢慢行埋去... 心裡面不禁有啲緊張。

我以前有玩過XPlane 11... 有時亦都會玩吓Infinite Flight咁...

之前仲好中意玩War Thunder... 不過就未玩到噴射機...

但係一部Full Size嘅Simulator... 我真係未試過...

我坐上駕駛座... 綁好安全帶...

Professor幫我戴上頭盔...

嘩！F-35嘅頭盔就好似AR咁樣！我望到邊，啲資料顯示就會跟住我對眼嘅方向！

我眼前再次出現機場嘅畫面...

我認真望下駕駛倉嘅Mon...

一共有兩個正方形Mon... 左邊係顯示航道同埋架飛機見到嘅嘢... （Tactical Situation Display）

右邊係我嘅武器欄... 原來我仲可以撳啲掣，改下排位都ok嘅！又真係幾方便！甚至仲容易過揸波音737！

「同頭先一樣，起飛。」Professor佢喺我側邊示意我起飛...

頭先睇咗Jennifer點樣操作之後，我大概有啲頭緒。

我將油門推到盡，跟住右手輕輕一拉...

F-35緩緩升起... 我左手伸前控制收起個起落架，然後收油...

「嘟嘟嘟嘟嘟！嘟嘟嘟...」我左邊嘅Mon突然有嘢喺度閃！

Radar Lock！竟然！隱形嘅F-35都鎖定到？！

今次唔係熱力追蹤導彈啦！

有一個紅色正方形喺度閃緊！應該係代表地面嘅SAM Site... （Surface to Air Missile）

「Missile Launch！Missile，6 O'Clock！」係防空導彈？

紅色正方形附近多咗個紅色箭嘴同埋紅色線！

「正常嚟講，好難鎖定你嘅，但係如果你真係咁唔好彩嘅話，點算呢？」Professor佢喺身邊幽幽咁問我...

我知道邊個發射... 而家RWR顯示，雷達信號來源係SAM Site... 唔係嗰支導彈...

換言之就算我用Chaff（雷達干擾影像）都唔會有效。

「啪！」我猛然將F-35加速！我再留意導彈飛過嚟嘅方向...

導彈係唔會向住你飛嘅，導彈會向住你前面嘅方向飛！

因為佢要做嘅嘢係盡快攔截你，所以佢會估你一陣會飛去邊個位置，然後預先飛過去嗰度捉你！

我不停地拉著F-35右邊嘅控制桿，然後圍住機場不停地用S字型打圈嘅方法！

咁樣支導彈就無辦法準確咁攔截到我啦！

我等支導彈就快飛近我之際... 我扭！

我再扭！支導彈就不停地嘗試追，但係每次差唔多追到我嗰陣我就改變方向！

Professor佢繞埋手... 使咗個眼色...

「唔錯... 呢個戰術幾有諗頭吖... 不過...」Professor佢竟然讚我？

「Missile Launch！Missile，6 O'Clock！Missile，4 O'Clock！」可惡！多咗一支追著我！

而家有兩個紅色箭嘴喺我嘅機後！

乜Professor你咁矛架？！見我玩得掂就整多支俾我嘆吖？！

我望一望頭盔嘅顯示器... 而家架F-35突破咗音速！

已經去到1.3馬赫！仲係甩唔到嗰兩支飛彈！

如今我不停地扭嘅戰術冇效啦！因為有兩支導彈喺不同角度追著我，我避到一支都避唔到第二支！

我孤注一擲！陸基雷達係有死穴嘅！通常佢哋都無辦法望到低過自己嘅嘢！

因為地面同埋海水反射出嚟嘅雷達信號會有好多干擾！個原理就好似我哋會望到海水反光一樣！

我將機頭大力向下擺，同時推盡油門！

Professor佢滿意咁一笑...

「碰！碰！」我眼前一黑！

始終F-35都係俾導彈擊中！我只係捱得耐過Jennifer少少...

我垂頭喪氣咁除頭盔同埋解安全帶...

「阿恆，你同Jennifer兩個真係好似...」Professor佢若有所思咁講...

「『嗯？』」我哋兩個都專心咁望住Professor...

「你哋有飛行嘅膽色，但係忽略咗一樣嘢。我話知你哋嘅飛行技術有幾高，架機飛得有幾快... 記住一樣嘢：導彈係永遠都飛得快過你。」Professor佢嚴正咁講...

咁我明白啦！頭先我一味喺度嘗試甩支導彈，慢慢都冇發現到其實自己就快被追上...

「至於阿恆，如果頭先只係得一支導彈嘅話... 你有可能走得甩。你用嗰個方法，的確可以不停消耗導彈嘅燃料。但係現實嚟講... 到時PLA有成隊陸軍嚟對付你一架F-35，你覺得淨係會射一支咁少咩？」Professor托一托眼鏡...

「至於你最後使出嘅戰術，我不得不佩服你嘅勇氣。你嘗試利用陸基雷達嘅死角，打算飛向接近水面嘅高度嚟令到雷達無辦法睇到你。但係你一個唔小心... 就會機毀人亡架啦。」Professor嘅嘴角稍為揚起... 仍然語重心長咁同我講...

佢連我心入邊諗緊嘅戰術都估到... 我真係甘拜下風！

我服輸啦。

「好啦，繼續輪流訓練...」跟住又到Jennifer坐上去...

鐵拳無敵鍾培生 2022-07-29 21:44:20