我唔覺意穿越咗時空 遇到個神秘女仔？！（2）

星期日無嘢做？

有啲唔舒服
起咗身之後先出文 請見諒

抱歉，個人都唔係好掂
今日果篇可能多啲錯字

更新到Chapter 70

Chapter 70 Jennifer都可以...

Jennifer佢溫柔咁錫咗落嚟...

我頓時面紅... 我始終都係一個怕醜嘅人...

好少俾人主動咁樣...

Jennifer佢望住我...

「你賺咗啦~ 俾個咁靚嘅女仔錫喎！」Jennifer講笑咁講~

『咩喎！你咁樣分明係賣花讚花香啦！』我又唔抵得佢咁得戚喎！

「咁我同Jessie邊個靚啲？」Jennifer扮嬲咁望住我！

『緊係Jennifer閣下啦~』呢個反而係真嘅...

「咁我同Angie比，邊個正啲？」Jennifer對眼發住紅光咁望實我...

『咁... Angie對腳...』其實純粹係我想睇Jennifer嬲個樣~

「Angie對腳吖啦！Angie對腳吖啦！」Jennifer大力扭我耳仔！

『嗚！痛痛痛！但係Jennifer好人喎！Angie佢好cool架！』我一度掙扎一度講！

「我唔好人架喎！痛唔痛吖？」Jennifer特登大力扭！

『唔痛唔痛！小人我抵死！Jennifer大人求下你高抬貴手，放過小人我！』我即刻成隻死狗咁認錯！

誰知，我掙扎果陣突然失平衡！幾乎喺車頂跌落地下！

『嘩！』我半個身跌咗出去！Jennifer佢及時拉著我！

『Jennifer...！』係估唔到Jennifer反應可以咁快！

佢嘅反應速度簡直不可置信！由頭先蝦緊我去到佢伸手拉我，半秒時間都冇！

「知道要珍惜我未？」Jennifer再次提醒我...

『知道知道...』我心有餘悸...

睇完日出之後，個人好似放鬆咗好多...

每日都生活喺繁忙城市裡邊嘅香港人，又有幾可有時間睇日出吖？

『係啦... 今日有咩做？』感覺上大本營果邊嘅情況似乎穩定咗落嚟...

啱啱行過見到走廊有着住工場制服嘅人過嚟整激光炮條水喉...

「你唔記得咗，我哋要返去睇綽姿佢哋咩？」Jennifer提一提我...

『係喎！差啲唔記得！』我先醒起琴日嘅事！

『話說你有冇加熱嘅嘢...？』我拎起琴日拎返黎果罐午餐肉...

「呢個得唔得？」Jennifer拎起咗一支手提式火槍點著咗佢！

『嘩！』『會燶架！』我大吃一驚！

「仲以為你要溶啲嘢添...」Jennifer無奈咁熄咗佢，望住我手上個金屬罐...

『吖！熱水壺！』我將罐午餐肉放落熱水壺，再加水，加熱...

跟住我再倒晒啲水佢... 用手小心咁拉開個罐...

「嗯？呢個味道好得意！」Jennifer聞到午餐肉嘅味道，跟住就走咗過嚟望下氣味嘅來源！

大鑊，無匙羹...

『Jennifer你會唔會有兩支幼棍之類嘅嘢...？』我周圍望望...

「Glass Rod得唔得？」Jennifer遞咗兩支chem lab嘅玻璃棍俾我...

我小心翼翼咁洗乾淨佢... 跟住將啲午餐肉夾出嚟！

「我又要試！呀吖吖吖！」Jennifer擘大口...

跟住我餵咗佢食一舊... 佢喺度咀嚼緊...

佢食緊好味嘅嘢果陣，個表情真係好得意！

真係好想搣佢塊面！

「有啲鹽嘅味道... 嗯... 地球嘅食物都幾有趣。」Jennifer滿意咁講...

『嗰啲叫鹹味吖Jennifer~』Jennifer佢肯定係唔識形容...

跟住Jennifer又示意我餵佢了...

於是，我地兩個就一人一啖咁分咗罐午餐肉...

有時簡簡單單咁... 我哋就已經好滿足~

只見Jennifer佢喺度執緊裝備... 今次佢唔係拎原本支槍？

等等，呢支全白色嘅大型槍械... WTF！係火焰槍！

只見槍身印住THE BORING COMPANY字樣！

『我哋去放火咩？！』我驚訝咁望住Jennifer拎起支火焰槍...

「我點知綽姿佢仲會唔會有咩花臣架？既然槍都打唔入囉，火燒囉！」Jennifer冷笑兩聲...

『唔好咁啦乖，等我嚟同佢傾啦... 係啦，要帶返佢哋啲私人物品比佢哋。』我示意Jennifer攞返嗰啲紅色水晶，同埋佢哋果兩部電話...

Jennifer好唔願意咁先肯放低支火焰槍，然後喺枱面上面嗰啲儀器道攞返啲水晶出嚟...

佢望一望儀器上面嘅顯示器... 面上露出一絲疑惑...？

跟住佢同我一齊出發行去太古城...

『如何？有冇研究到乜嘢？』我好奇咁問... Jennifer似乎想分析水晶入邊有啲乜嘢...

「係儲咗能量嘅A-Particle，問題係呢個技術應該係得我哋先會有... 不過A-Particle喺地球有辦法合成到。」又多一隻Particle？！

「你就當好似電池咁，不過可以用喺人身上面。呢兩粒都係Class 2嘅電池。」Jennifer一度解釋...

『咦，會唔會就係因為佢哋用咗電池，所以先刀槍不入？我記得我每次開槍，都係打中佢哋件袍...』我嘗試推理...

「有呢個可能性。」Jennifer稍為放心咁講...

「而我嘅身體個病，都係同呢樣嘢有關~」Jennifer紅起雙眼望一望我...

『喂吖你唔好嚇我啦！仲有你唔係病吖！』我輕輕力打Jennifer一下！

「嘻嘻~」Jennifer回復原狀，拖住我慢慢嚟到太古城呢邊...

我心中有個疑惑... 於是我撞一撞Jennifer，話咗佢知...

「你已經係執行者嚟。點解仲係咁弱，仲會拖我後腿？」我遠處聽到綽姿把聲...

似乎佢鬧緊佢個拍檔？

「我... 咁... 我真係盡咗力架啦嘛...」另外一把男聲...

「明明做埋呢個任務我哋就可以自由，點解偏偏係呢個任務先嚟失手！」綽姿佢繼續講...

『早晨~』我輕輕敲門，跟住推門入去...

「你！係咪你趁我瞓著果陣偷咗我嘢？」綽姿一見到Jennifer，即刻急步行埋去指住佢！

「係吖。不過而家我研究完啦，我打算還返比你。」Jennifer非常之冷靜咁拎起兩部手機交比綽姿佢...

「至於呢個，我反而想知你用咩途徑攞返黎？」Jennifer展示手上果兩粒紅色「電池」...

「精神能量液，用Sil買。」綽姿冷淡咁講...

「姐係唔話我知啦？呢個我唔可以比返你住，我已經知道佢可以做啲乜嘢。」Jennifer收起兩粒紅色電池...

「「吓？」」綽姿同埋佢個同伴都有啲錯愕...

我望一望Jennifer，示意佢試一試我心中嘅疑問~

「係啦，可唔可以借你呢個嚟玩下？」Jennifer指一指個男人身邊果把激光劍刀柄...

「吓... 你咪儘管攞去囉... 反正... 反正你哋都用唔到...」個男人似乎唔太care佢自己嘅武器...

「係吖？」Jennifer奸笑... 佢對雙眼漸紅！

綽姿佢驚訝咁望住Jennifer！跟住就似乎好驚...

但係佢唔郁，亦都扮到好鎮定！

另外個男人就似乎未意識都發生咩事，只係呆呆咁望住Jennifer...

「吱！」突然，一度紅光伸咗出嚟！

痴線！Jennifer竟然啟動到激光劍！點解會比我估中架！？

「嘩！你都係SPIRIT！」個男人嚇到匿埋喺個女仔身後！ 佢好似連企都企唔穩！

但係綽姿都嚇到郁唔到，僵硬咁企咗喺度望住Jennifer！

只見Jennifer用把劍果陣，劍嘅激光無咁長，亦都無咁光... 但係都幾嚇人吓！

Jennifer輕輕咁用劍喺地下畫咗一下... 只見個地下燶咗！證實Jennifer都用到佢哋啲武器！

完全證實咗我嘅懷疑！

跟住Jennifer就收返把劍，雙手將劍柄交比返個男人...

佢哋兩個已經嚇到唔識反應...

「原來係咁~ 而家知我厲害未？」Jennifer好得戚咁講！

「但係點解我果陣感受唔到你嘅氣息？」綽姿佢心有餘悸咁講...

「我唔係你口中所講嘅SPIRIT，我只係一個特別啲嘅人。」Jennifer單單眼~

突發 深夜出文

更新到Chapter 71

呢個故 我打算堅持寫落去！

Chapter 71 往事

「我唔係你口中所講嘅SPIRIT，我只係一個特別啲嘅人。」Jennifer單單眼~

「你究竟係咩人？逆行者？」綽姿冷冷咁望住Jennifer問...

呢個女仔都幾犀利，由頭先比人嚇親而家喺度審問人... 真係變得幾快。

「想知吖？要搵嘢交換架喎~」Jennifer喺度奸笑...

「唔想。」綽姿佢又真係幾倔強...

「想我比返呢樣嘢你，你哋就乖乖哋留喺度。我知道呢樣嘢有保質期，大概7日左右。不過我有儀器可以延長佢，呢層你唔使擔心。」Jennifer開始識得講條件...

佢拎起手上嘅紅色水晶喺度同綽姿講...

綽姿嘗試上前搶！但係Jennifer佢始終都係大力過個𡃁妹仔...

證明佢哋真係無用「電池」嘅話就同一般人無分別。

「乖，等我講埋先。至於你哋嘅任務，我都可以幫你達成，不過有條件。」Jennifer想獻身？！

我緊張咁望住佢！

「我諗一個星期之內，我需要去一轉九龍。如果淨係得我同阿恆去嘅話，我地肯定會被對面嘅關閘人員生擒。」Jennifer想去九龍... 等等先，仲有我份？！

「但係，如果我比你押過去嘅話，就可以成功深入九龍。你可以揀一個偏僻嘅交收位置，達成你嘅任務。但係我會借用你呢樣嘢，喺你完成任務之後再逃走。」Jennifer拎起個男人果把激光劍...

都係一個幾冒險嘅計劃... Jennifer諗住依靠自身嘅能力去掙脱再逃走！

「我會考慮。似乎你都有好多情報可以比我賣。」綽姿冷眼打量住Jennifer...

唔知點解... 我覺得綽姿呢種咁tough嘅𡃁妹... 都有佢嘅吸引之處...

不過佢都係無Jennifer咁溫柔~

「好啦，咁我哋走啦，你哋兩個保重。」Jennifer拉我走...

「係啦綽姿，呢個好好味架，你哋可以試下！」Jennifer臨走前又攞多一罐午餐肉，跟住都叫綽姿試下...

睇嚟佢終於無咁憎恨綽姿啦~

「哦。」綽姿都係依舊咁冷淡...

Jennifer同我一直行返去海防果邊...

『係啦，你話你要去九龍果邊... 難道說係要去見Professor Y？』我醒起頭先Jennifer講過嘅嘢...

「無錯，不過係我哋搵到G-Particle之後嘅事。」我聽到之後嚇一跳，Jennifer都有留意到我嘅表情變化。

「放心，今次我會同你一齊去搵，無論發生咩事我哋都會一齊行事！」Jennifer堅定咁望住我！

『嗯。』我唔再講嘢，慢慢跟住Jennifer行西灣河嘅海傍...

我只係擔心，我會唔會好快就死呢？

但係既然Jennifer都承諾咗我...

同埋G-Particle都係我返去2022年嘅關鍵...

呢樣嘢遲早都要面對。

Jennifer帶我返咗去海防果邊，跟住佢喺度攞啲嘢...

只見佢攞咗個熱水壺同埋頭先罐午餐肉...

我仲以為佢攞返黎自己食嘅添？

「係啦，我陣間去探下Christina，你跟唔跟埋嚟？」Jennifer喺度收拾緊行裝...

Christina？果個早熟嘅𡃁妹仔...？

睇佢個樣好似細綽姿2-3年左右...？不過Christina應該唔係嗰啲咩SPIRIT掛...

『都好。』我想話返佢知，Jennifer有好好照顧我！

「似乎南海艦隊俾神秘人轟炸完之後，呢度就無咩風吹草動... 都係趁而家搬佢哋過嚟好。」Jennifer打算搬果個細路過嚟？

「咕咕！咕咕！」隻斑鳩喺度叫？？！

「咦！佢好似有返啲精神！」Jennifer又突然轉身望住暖櫃包住毛巾嘅斑鳩...

跟住Jennifer餵咗佢飲啲水，比咗啲蟲佢食...

然後就同我一齊出發去明華大廈...

『不如我幫你拎住個熱水壺？』我都好奇，明華大廈果邊有電架咩？

只見遠處其中有一棟嘅低層著咗燈...

沿途路邊嘅地下都剷開咗，有啲黑色好粗嘅電纜外露咗出嚟...

Jennifer都見到我喺度打量阿公岩道嘅路面...

「當初，我哋仲特登供電比堅持留守喺港島區嘅市民... 明華大廈呢一區就成為咗市民嘅避難所...」

「而我哋就照顧住佢哋，靠Johnson果邊嘅食物生產儀器... 之後Professor Y佢都搬咗幾台舊版本嘅過嚟海防呢邊。」

「 但係如你所見，海防果幾台只可以將空氣入邊嘅二氧化碳變成澱粉質，仲有其他人類必要嘅營養。佢無辦法合成除咗空氣入邊以外嘅物質。」Jennifer一度同我解釋...

「我哋淨係靠咁樣，養著明華大廈呢區嘅人... 當時呢度都總共有百幾戶人...」

『之但係點解而家好似無晒人嘅？』明明一切都好似好平安架喎...

「咁你就要聽下我講故事啦...」Jennifer同我喺路邊嘅石壆坐低咗... 佢個頭挨著我個膊頭...

我眼前一黑！

##### 2033年，Jennifer尚未被刪除嘅記憶

「咇！」紅色固網電話響起！

咦？係緊急事件？

『海防博物館指揮部，有咩幫到你？』我拎起聽筒...

「救面（命）吖！min（明）華大xia（廈）呢度失火吖！你哋葵（快）啲過嚟幫手吖！」我聽到背景有混亂嘅雜聲！有人好似喺度叫緊？

可惜果陣我無留意到呢通電話嘅異樣...

「轟隆！」出面傳來爆炸聲！我哋呢度大本營都聽到！

「發生咩事吖Jennifer...」啱啱嚟到嘅Erika有啲擔心咁望住我...

『似乎明華大廈果邊出現咗啲意外... 我諗要動員處理。』我同Erika佢講，同時拎起第二個聽筒...

「帶埋我去！我都想幫手！」Erika都想出一分力...

『唔好，呢啲事等我親自處理。你留喺度啦，始終呢度需要人看守。』我唔想要新嚟嘅Erika冒險...

Erika扁嘴... 但係無出聲。

『所有宿舍人員注意，我係副指揮。明華大廈嘅避難區發生火警。暫時火勢情況不明！另外亦傳出爆炸聲。A Team，A1至A13，立即喺鯉魚門宿舍出口集合！』我拎起廣播器宣布！

跟住我就好急咁跑去宿舍果邊！

「Jennifer，所有人齊晒！可以出發！」A1隊嘅隊長Eden向我匯報！佢揸住宿舍嘅哥爾夫球車，載著我同埋A1其他嘅隊員一齊開車離開宿舍！

綽姿係咪gigi？

yes

可以咁樣理解呀

你嘅最愛

咁多彩蛋嘅

係客串
又應該咁講 我只係講返飛揚個世界入邊
另一個時空發生緊嘅事姐

飛揚universe

又係咪真係佢嘅Universe呢...
應該咁講啦 只係接近佢嘅Universe
有啲嘢始終係唔同嘅