我唔覺意穿越咗時空 遇到個神秘女仔？！（2）

大家等我一陣

更新到Chapter 98

Chapter 98 恐怖武器

「吖！！！呢樣嘢！點解！點解你會有！？」Jennifer
突然嚇到跳起大叫！

Professor手上揸住一個灰色半圓形嘅Y字形棍...

似一個大啲嘅丫叉... 係咩裝置嚟？！

點解會嚇到Jennifer咁樣架！？

Jennifer嚇到縮喺間房嘅角落...

我慢慢退後，靠近Jennifer... 我未拍個頭埋去已經感受到！

Jennifer嘅思緒好亂好驚，我嘅直覺話我知，呢支丫叉好危險！

『乜嘢嚟！Professor！你做咩整驚咗Jennifer！？』我發火問！究竟點解Jennifer會變成咁！

『Jennifer！Professor佢！我係咪要制止佢？』我喺心入邊問！

「呢樣嘢... 唉。Jennifer... 你係咪要出一出去先？」Professor佢冇靠近我哋兩個嘅意欲...

反而佢見到Jennifer嘅反應之後，暫時收返支丫叉，搖搖頭...

Jennifer好似冷靜咗少少...

但係我再望真啲... 佢對眼失控咁發紅...

原來佢喺度喊緊... Jennifer拖咗我出去門口閂埋門，留低Professor佢自己一個喺房...

「我記得返啲嘢... 阿恆... 阿恆...當時... 當時個賤人就係用嗰樣嘢...」Jennifer震住咁同我講...

Professor佢？！

「唔係... 我唔知佢點樣得到呢樣嘢... 嗰支棍可以令到我哋失憶。至於失憶嘅範圍，連揸住棍嘅人都唔會控制到... 係一樣好恐怖嘅武器。」Jennifer喺後面攬住我，細細聲喺我耳仔邊講...

「阿恆，你放心啦，嗰樣嘢傷害唔到你架。你哋腦袋嘅接收能力冇我哋咁靈敏，不過... 我諗我估到Professor打嘅主意啦。」Jennifer慢慢講... 似乎慢慢冷靜返...

『咁Professor佢安唔安全？』我其實仲未信呢個人！

佢出爾反爾，我真係完全捉摸唔到佢！甚至佢喺度諗緊啲乜嘢我都睇唔穿！

「當時我出事，Professor佢係第一個發現我嘅人... 甚至發生呢件事之前佢已經預見到，提醒咗我要小心自己安全... 始終都係一時大意！」

『咁個仆街呢？！個仆街去咗邊？！』Jennifer嘅同類！

我突然想刮條仆街出嚟毒打佢！

「唔知... 我都唔知... 但係... Professor話佢一直搵人mon住，如果佢走咗返火星，一定會見到佢離開大氣層。阿恆，佢仲未走吖。佢仲喺度吖... 只係唔知匿埋咗喺邊咋...」Jennifer認真咁望住我講...

『Jennifer，我應承你，我會保護你。就好似你喺山上面保護我嗰次咁！』我好堅定咁望住Jennifer！

Jennifer摸著我嘅後尾枕... 佢錫我...

「傻豬... 你... 你... 唔夠佢鬥架...」Jennifer嘅下巴挨住喺我背脊咁攬住我，係我耳邊講...

『你要記住，我唔係凡人，唔係普通嘅地球人。』我好堅定咁講... 我有決心我保護到Jennifer！

「好啦，返入去啦... 我ok架。」Jennifer佢強顏歡笑...

『你... 會唔會PTSD架？唔好死頂喎。』

「冇嘢啦。」Jennifer伸手繞著我再拖住我，跟住推門入返去...

「可以聽我講嘢啦嘛？」Professor佢見怪不怪咁...

『「嗯。」』我同Jennifer都點點頭...

「呢支係我Reverse Engineering整出嚟嘅失憶棍。」果然！

「只可以用喺裝有腦聯嘅人身上，但係效果唔係咁勁。如果意志力強嘅人，未必有效。」Professor佢繼續解釋...

『壓力失憶棍～？』（詳見粗口叮噹）

「你估真係一個交叉窿隊埋去收人皮咩？No... 呢樣嘢係要叉喺佢條頸度用嘅...」Professor作勢示範喺我身上...

『唉吖！得得得得！我明我明！』我都嚇到避一避...

Jennifer喺度笑我嘅反應...

笑咩？明明頭先你仲驚過我！

「叉住，跟住喺手柄上面撳掣，佢會即刻暈低。為咗安全起見，我set咗係暈低之前10秒內嘅記憶會冇晒，以防落入錯嘅人手上嗰陣造成災難。」Professor佢非常精簡咁解釋... 姐係失憶範圍係固定嘅！

「嗱。」Professor將支棍交到我手上...

我手震震咁接著佢... 支棍摸上去好似金屬做嘅...

重量就同把風筒差唔多...

「咁姐係換言之，我哋每見到一個守衛，只有10秒時間去解決佢？如果見到有兩個嘅話就要10秒解決兩個，否則另外第二個會目擊到失憶前10秒發生咩事。」Jennifer非常冷靜咁問...

「就係咁啦，Jennifer。」Professor滿意咁點點頭...

都估唔到Jennifer嘅頭腦咁快就變得咁冷靜...

「仲有，都係以防有咩不測啦... 不過萬一要用上佢，都肯定會出大事。」Professor喺地下打開咗個暗格...

我發覺呢間房真係好多機關同埋暗格，如果唔係屬於呢度嘅人，根本就唔會諗到！

佢攞咗兩隻啞黑色嘅箱上嚟打開咗佢...

只見入邊支好似手槍嘅物體... 但係多咗個短槍托...

呢支槍仲短過Jennifer嘅P90...

「啦，吖恆你今次唔好再整爛我啲槍啦！我呢度唔係海防基地，冇嗰間石屋仔架！」Professor佢有啲唔高興咁提醒我...

「呢支係MP7，同P90屬於同一個級別，都係PDW。呢個係40發彈盒，射速950 RPM，拉trigger嗰陣小心啲！唔好亂咁浪費子彈。」Professor一度講，一度扭個搣聲器上槍管嘅尾部...

「仲有，滅聲器唔係好似睇戲「焦焦焦」咁嘅聲架！裝咗滅聲器只會令到人難啲認到嗰啲係槍聲，但係一樣都好大聲，肯定會有人聽到架！」Professor再次提醒我，然後將裝上滅聲器嘅MP7交到我手上...

跟住佢同樣幫Jennifer準備一支。

「欸欸欸欸！槍唔可以亂指人！放低！」Professor佢鄭重咁警告我！

『係！Sorry！』我即刻檢查，槍膛未上彈嘅...

Jennifer同樣喺度檢查佢支MP7... 確保一切冇問題...

「最後最後，呢樣。去到VS嘅控制室之後搵佢部server出嚟插落去。」Professor交咗條長USB俾我...

『Ok.』我手震震咁揸住...

「槍，放喺腳嘅槍袋入邊。」Jennifer拎起吞噬俾我嗰件長袍着上，跟住幫我綁咗個槍袋喺我大髀，幫我放好我支MP7...

「呢個邊個揸？」Professor拎住支失憶棍...

「等我嚟。」Jennifer！？佢竟然！

「我都係時候克服呢樣嘢啦。」Jennifer佢真係好勇敢...

「你哋攻入去VS... 呢度嘅閉路電視，我係access到嘅。只係冇權限去更改人面辨識嘅系統。」Professor佢... 仲可以配合我哋？

垃圾桶

桶桶桶桶桶桶
連自己個桶都打錯 真係唔掂

壓力失憶棍

吖 等我食佢老美大茶飯
做呢區嘅收皮王先

我發現我成日都唔記得pin

更新到Chapter 99

Chapter 99 裡應外合

「恆... 我都講咗好多次俾你聽... 我呢個冷氣軍師唔係咁簡單架。」Professor佢喺電腦上面開咗幾個Window...

呢個係...？

「首先，你哋去到VS嘅保安室之後，我會製造停電。無錯，保安室係有後備電源嘅，但係需要時間啟動。」Professor開住VS嘅平面圖...

「斷估佢哋會派兩個人出去摸黑開電掣。」Professor指住走廊嘅位置，作出斬首嘅動作！

「咁樣首先解決兩個，CCTV暫時乜嘢都睇唔到！跟住入房！解決埋入邊嘅人！」Professor用手指揮揮揮！

哼哼... 你講就容易吖... 之但係...？

『Professor你可以整到停電？！同埋停電嘅話佢哋唔會懷疑乜嘢咩？』我喺度研究緊mon上面其餘嘅版面...

「停電好出奇咩？你係咪住太耐香港島，唔知道九龍停電係好平常嘅事嚟架咋？」Professor佢幽幽咁講...

「某電力公司... 哼... 真係只能怪佢哋唔爭氣，用埋晒某國製嘅設備啦。你睇下，佢哋搞咁多嘢，咪又係俾我access到～」原來Professor佢除咗hardware之外...

要佢hack入人哋啲設施控制都難佢唔到！

「好，你哋兩個出發先。」只見Professor佢喺牆上推咗一下... 反咗另外一個暗格落嚟...

佢拎咗一支長槍落嚟... 呢支槍嘅形狀...

我話佢似步槍又唔係，因為佢前面有一條長嘅子彈管...

『Professor你...』唔通佢都出手？

「你哋兩個行先，我覺得有啲嘢唔對路。」Professor佢皺皺眉頭咁講...

只見Professor拎起一啲紅色圓柱形嘅子彈入落支槍...

佢嗰支係Shotgun嚟！一時噏唔出型號添！

我同Jennifer喺R Core 9樓沿著走廊行...

而家唔知係咪慳電嘅緣故，走廊入邊完全無燈照明...

呢度只係靠戶外嘅自然光照射入黎... 勉強見到室內嘅輪廓。

我唔敢自己行，只敢拖住Jennifer佢一齊慢慢行...

「死啦，前面點行？」Jennifer貼近我，有啲猶疑咁喺我心入邊問...

『呢度... 呢度係QR！落去八樓，我哋沿著QR去QT...』我慢慢帶著Jennifer摸黑落樓梯...

我哋兩個放輕腳步... 慢慢推門入QR嘅8樓...

冇記錯呢度係某工程系嘅office...

玻璃大學嘅建築係一棟連住另外一棟嘅...

圓形嗰啲叫Core，圓形同圓形之間有走廊連接...

譬如連接Q Core同埋T Core中間嘅走廊就叫QT...

而家我哋終於嚟到T Core...

『Jennifer，落樓梯先... 我哋嘅目標係S Core連接入VS嘅四樓天橋...』我記得保安室就喺VS嘅新Can上面...

奇怪啦... 我記得以前我喺玻璃大學捱夜嗰陣，夜晚呢度都會有保安巡樓...

點解我哋而家一個人都唔見嘅呢？！

我哋而家眼前就係ST 4樓嘅走廊... 過埋走廊呢度就係VS嗰邊嘅保安室...

Jennifer嘅雙眼發住綠光... 其實咁樣好明顯...

『Jennifer，你有冇辦法令到你對眼唔發光架...』我喺心入邊問...

點知Jennifer對眼突然變紅！我嚇一嚇...

「欸... 可以咁樣... 而家係咪冇咁明顯啦？」Jennifer對眼變咗弱紅光，細細聲問我...

佢溫柔細聲講嘢嗰陣把聲好誘人... 唉吖！正經！！！

我望一望出面嘅地面... 仲有其他行人喺度...

Podium嗰邊係着住燈嘅...

而家大概夜晚8點左右... 呢度樓下係新Can...

如果有咩差池嘅話，肯定會驚動好多人！

只見出面Podium嘅燈突然熄晒！周圍漆黑一片！

路上面嘅人都有啲愕然咁停一停低...

我對眼要少少時間適應...

係Professor佢知道我哋到咗ST？

我哋喺度等... 係咪真係好似Professor咁講... 會有人出嚟呢？

「咯... 咯... 咯...」我聽到有腳步聲...

Jennifer快速咁伸個頭出去望一望！

跟住做咗個「二字」嘅手勢...

正如Professor所預料，兩個人！

我同Jennifer都企喺橋嘅盡頭... 匿埋喺門後面等...

我而家緊張到甚至聽到自己嘅心跳...

我拎住MP7... 預備萬一有咩事就直接開槍解決！

「咿...」我哋喺S Core天橋呢邊其中一道門打開咗！

Jennifer做出一個兩隻手指指向門嘅動作！

行動！

只見Jennifer佢一個箭步閃出嚟！

「嘩！你是？」係其中一個保安！

「吱！」我啱啱行出嚟...

只見Jennifer佢已經攞支丫叉整暈咗一個！

果然係Jennifer！做嘢真係快，狠，準！

我同Jennifer夾手夾腳拉埋呢個暈咗嘅保安入黎門後面...

突然我見到橋入邊嘅走廊有光！ 係電筒！

第二個保安似乎覺得唔妥...

但係佢仲未發現門後嘅情況... 我望住Jennifer...

跟住我指一指道門，做出拳頭打落去嘅姿勢！

我打算等個保安行近道門之後突然踢開度門撞佢！

Jennifer做出一個Ok嘅手勢，再點點頭...

差兩步... 一步...

「隆！啪！」我助跑，再起飛腳踢門衝入天橋！

只見門撞中個保安，佢把電筒俾我撞跌咗落地下！

佢仲未嚟得切反應之際，我一支MP7桶落佢胸口度！

「哎喲！」保安慘叫一聲，然後失平衡！

說時遲那時快，Jennifer隨即趕上，跟住拎住丫叉隊佢條頸！

「吱！」第二個保安都暈低咗... 咁就解決咗兩個！

會唔會有啲順利呢？

「恆，要小心。」Jennifer嚟到我身邊... 細細聲同我講！

『嗯。我都未入過呢度... 唔知入邊嘅格局係點樣。』正常學生都唔會嚟呢度...

「我有種不詳預感...」不詳預感... 點解？

「所有嘢都好似太順利... 係順利得濟。」Jennifer有啲疑惑咁講...

佢咁樣講... 又好似係。等等！Professor佢都講過佢覺得有啲嘢唔妥！

『咁我哋小心啲，繼續。』我揸住MP7，解除保險掣預備隨時要開槍！

我哋兩個放輕腳步行入天橋... 跟住輕輕推開走廊盡頭嘅門...

只見入邊嘅走火通道照明燈着咗...

但係間房嘅間隔... 好似有好多個mon... 好多唔同嘅儀錶板...

死啦？隻USB究竟係要插落邊部機呢？

Jennifer...

「你手上隻錶，可以call到Professor。」Jennifer細細聲講...

我即刻試下...

『Professor... 我哋入咗控制室... 呢度好黑... 咩都睇唔到... 究竟要插入邊部機？』我細細聲問...

「試下搵Server Rack... 玻璃櫃... 一層層嘅刀片電腦...」Professor把聲喺隻錶度傳嚟...

我同Jennifer都喺度周圍望... 似乎唔見有。

「呢度有樓梯... 原來仲有下一層...」Jennifer打開咗道門...

我同佢放輕腳步咁行落去...

我仍然揸住MP7... 警惕咁周圍望...

Jennifer拉一拉我，指住牆角嘅位置...

係玻璃櫃！

誰知...

「哼哼，終於來了。」係一把又沉又沙啞嘅聲！

我將MP7指向聲音來源！Jennifer舉起丫叉！

「咔噹！」Jennifer嘗試將丫叉隊落呢個人影條頸度！

「嗚！恆！唔得吖！」Jennifer慘叫！

我有啲遺憾嘅事情要宣佈
暫時我庫存嘅文得返5篇...

但係礙於我嚟緊都有啲嘢忙...
有機會出現斷更嘅情況

要等一個星期後啲嘢settle down咗之後先可以返黎寫文

你咁後生竟然都識

仲有兩百蚊唱三百粒鐘

聽講仲送梳蕉

竟然壓力失憶棍都冇用

Professor有講過 意志力強嘅人 對付唔到佢

人哋而家打比賽你叫人食蕉？

90後一樣好多人識玩囉

懷疑都係外星人