我唔覺意穿越咗時空 遇到個神秘女仔？！（2）

更新到Chapter 103

Chapter 103 搜

『喀... 喀...』我哋而家行到上6樓... 但係我已經喘晒氣...

雖然Jennifer佢唔係非常重... 但係孭住成個人上樓喎！

你估我係消防員咩...

「嗚... 阿恆... 你係咪攰啦？」Jennifer喺我耳邊問我...

『嗯。』我其實就快行唔郁...

Jennifer佢用一用力，我拖住佢繼續行...

「隆... 隆... 隆...」我聽到樓下Podium道門... 俾人撞？！

「Sabrina，抬佢上去！下面唔會捱得耐！」Professor佢都聽到聲響，皺一皺眉頭。

跟住Sabrina直接公主抱咁抱起Jennifer，起勁咁跑上去！

Professor拎起電話一望...

「A Core入口，大量PLA，重兵。」Professor佢原來check緊CCTV！

我急急腳行到上9樓！Sabrina已經喺上面等緊我哋，佢拖住Jennifer...

又幾奇怪～ Jennifer竟然肯俾佢拖都有呢？

跟住我哋第一時間入Professor間office...

只見佢枱面有一盒盒12 Gauge子彈喺度...

Professor佢慌忙收拾！

跟住佢打開地下其中一個暗格，拎晒暗格所有嘢出嚟！

暗格個位... Jennifer啱啱好可以訓落去...

「Jennifer，你訓住呢度先... 冇辦法...」Professor雙手合十，有啲唔好意思咁講...

「嗯。」Jennifer踎低身，跟住捐咗入去...

跟住Professor閂返個暗格...

「你哋兩個，我真係唔知點樣感激你哋好...」Professor誠懇咁同阿謙同埋Sabrina講...

「客氣啦葉Sir～」阿謙佢輕鬆咁講...

「部HPLC我可能還唔返俾你哋啦，而家咁嘅勢... 咦？」Professor佢望住CCTV畫面...

只見啲喪屍停止咗撞門嘅動作...？

應該係腦聯嘅信號改變咗？

「你哋兩個，即刻落去！跟住佢哋走最安全。」Professor指住下低堆喪屍...

佢哋兩個放低武器隨即奪門而出！

Professor佢不慌不忙咁收拾我哋頭先嘅武器...

跟住佢坐咗喺電腦枱前面慢條斯理咁喺度睇緊啲嘢...

係閉路電視畫面... 只見PLA已經去到Block N對出嘅空地，佢哋等緊啲喪屍散開...

而佢哋手上全部都有長槍！我認到其中一啲係QBZ-95！

「阿恆，搵啲嘢做下，不如玩吓模型吖～」Professor佢遞咗其中一隻無人機嘅模型俾我...

『吓？』呢個時候，我哋其實係等死或者等俾人捉走架咋喎...？

Professor你好似無招勝有招咁... 完全唔驚嘅？！

「反正佢哋都係上嚟架啦～ 就算你拎起槍都唔會夠佢哋打。就算係我支Benelli M4都唔會夠咁多人打啦係咪？」Professor佢完全唔驚咁講...

咁我唯有... 拎起模型望下啦... 我拎住架無人機嘅模型...

原來Professor佢係預先3D Print出嚟... 我見佢仲好仔細咁上埋模型油...

「咯咯咯咯！」係用硬物敲打木門嘅聲音！

一聽就已經知道來者不善...

「進... 隆！！！ ... 來...」Professor都未講完... 門就俾人粗暴咁轟開咗！

只見出面一隊着住全黑色裝甲，揸住QBZ-95自動步槍嘅PLA喺門口，中間呢個似乎係高級啲嘅...

「博士，我是隸屬西九龍分隊的PLA，現在根據XG根本法附件四所賦予的權力，依法搜查你的單位！」個高級啲嘅長官對住Professor佢一輪嘴咁讀出嚟...

「做咩姐？上次你哋搜完我間房，整亂晒啲嘢我都未同你哋計... 又嚟？」Professor佢不慌不忙咁企喺收埋Jennifer嘅暗格嗰度門上面...

「沒有辦法，博士。現在我們懷疑有非常危險的殺人GD份子潛入你身處的樓層。我們必須加大力度徹底搜查，揪出GD頭目，把她依法懲治！」個PLA長官都係堅持要搜...

「唉，你搜還搜，你阻住我research吖長官。仲有你唔好嚇親我啲學生先得架... 我哋都係幫緊國家辦事姐...」Professor佢一度講...

但係長官佢面不改容。

「唉... 俾你搜啦，不過你哋班友小心啲，唔好整爛我啲儀器吖！我費事你哋份糧賠唔起咋。」Professor繼續企喺原地同啲長官講，同時示意我企喺佢側邊...

個長官望咗Professor兩眼... 再望一望我...

然後示意佢嘅部下全部入房...

跟住佢哋手忙腳亂咁喺度翻找啲櫃桶吖... 睇下啲儀器吖...

跟住又有啲拎住啲唔知咩探測器喺度隊嚟隊去...

有啲就喺度研究Professor部電腦...

「為什麼會登入了校園的閉路電視系統？」個長官突然指住個mon問Professor！

吓？！Professor冇鎖電腦？！

「嘩，我望見下面操場好似暴動咁嘅款，所以都係保障下自己安全，望住姐... 同埋我係有Access架喎長官～」Professor佢真係完全唔怯咁講...

佢哋依然唔放棄，有啲就喺度研究Professor啲槍...

有啲就好奇咁打開啲儀器喺度望係咩嚟...

成班懵丙，根本連自己搵緊啲乜嘢都唔知！

呢間房嘅構造，恐怕佢哋冇太多認知。

「長官！沒有發現。」班蛋散同個高級嘅長官匯報...

「博士，有沒有見過這個女孩？」個長官手上拎住一個類似手提式嘅Projector，投射咗Jennifer個立體影像出嚟！

只見Professor佢突然雙眼發白！跟住作勢衝埋去個影像！

「我要捉！！！我要捉吖！！！」Professor佢失控咁撲埋去其中一個士兵！

痴線！點會咁樣架？！Professor佢唔係話佢唔會受到腦聯影響嘅咩？！

「轟！」個長官一腳踢向Professor，搞到佢痛苦咁跌喺地下！

「夠啦，沒見過就罷了。同志們，走吧。」個長官揮一揮手，頭也不回咁行出R903...

「真不明白為什麼我們的國家會聘請這種怪人...」堆傻鳩部下都跟住佢哋嘅長官走... 臨走前拋下一句。

「碰。」佢哋粗暴咁閂門！

「屌！又搞亂我間房... 咳... 咳！」Professor面上嘅表情回復正常慢慢企返起身，跟住喺度爆粗鬧人...

『Professor，你... 還可以嘛？』我知我問呢條問題... 如果佢根本唔係理性嘅話其實冇意思...

「連阿恆你都覺得我癲咗呢～ 姐係work啦嘿嘿～」Professor佢望住我，怪笑兩聲！

原來係扮出嚟嘅！扮癲扮喪屍！

高招，高招！真係估佢唔到！

「等佢哋離開咗R Core之後... 我哋今晚大把嘢忙。」Professor佢即刻坐返上電腦枱嘅位置，稍為整理一下枱面，然後繼續望住R Core其餘樓層俾人搜嘅情況...

今晚有排忙？只見Professor佢喺度打緊字...

我好奇咁過去睇下... 呢個係Protonmail...

Dear...

Samples are ready. Delivery is only possible by air lift.
Please advise for further actions.

Regards,
Prof. Y

「等PLA離開R Core之後，我哋三個要去另外一個地方，你哋今晚要學多一樣嘢。」Professor佢認真咁同我講...

『吓？』我有啲迷茫... 我仲以為過咗嚟玻璃大學就暫時可以settle down添...

「我要你哋兩日之內學識揸F-35。」Professor佢指住天台嗰部F-35...

吓？！！！

唔係掛？！

教授究竟點收埋f35
f35照計肉眼望到㗎喎