我唔覺意穿越咗時空 遇到個神秘女仔？！（2）

Chapter 80 噩夢繼續

「我哋... 呢度附近嘅空間，時間或者重量，是但一樣，或者兩樣，或者所有嘢可能被扭曲緊。你而家望唔望到嘢？」Jennifer認真咁講...

『我乜嘢都睇唔到吖而家...』我眼前已經黑到完全望唔到嘢...

「咁樣有機會係時間扭曲咗。相對於出面，我哋而家感受到嘅時間可能慢過出面，所以你先覺得唔夠光。對於我哋嚟講，係少咗光入我哋對眼，類似相機快門太快嘅原理。」Jennifer仲可以咁冷靜咁解釋！？

「你等我一陣，我仲有辦法望到你。我試下咁樣...？」我感受到我膊頭有重物？

咦！我腦海入邊閃一閃，突然見到眼前有紅色嘅影像！但係明明我知道我對眼係咩都望唔到架喎！唔通係...

咦？我見到個影像係望住我自己... 跟住再周圍望望...

見到火箭嘅殘骸其實喺我哋10步範圍之內。

呢個係Jennifer嘅視覺！佢原來用獵人眼果陣係色盲架！

就好似啲舊款夜視儀咁淨係見到一片紅色...

我雙眼望望...見到我膊頭附近隱約有啲紅色光...

我感受到Jennifer嘅體溫上升緊...

佢喺度用緊自己對眼！佢可能用得好大力添！

「我第一次用呢個方法傳影像，你感唔感受到？」Jennifer令到我「望到」周圍...

『Ok，頭先嗰一剎那，我睇到嘅，而家好朦... 而家冇咗啦！』我如實咁講...

「我... 無辦法用咁耐，我要保留體力。」Jennifer好似開始有啲喘氣...

「繼續向前行，我會拖住你。」Jennifer輕輕拉一拉我...

『好。』既然都入咗嚟，既然都未死，諗辦法啦我哋！

「恆，G-Particle可能係一種Quantum Material。意味著每次接觸佢，佢所做嘅效果都會唔同，令人無法估計。」Jennifer喺度解釋緊...

「你提唔提得起隻腳？前面係平路嚟。」Jennifer嘅視覺再次喺我腦海入邊出現。

我嘗試行... 可惡？隻腳好似裝咗鉛咁樣，拎唔起！

『唔得吖！好似痴實咗咁樣！Jennifer！你試試！』我無論如何點樣發力，都無辦法！

「我隻腳都郁唔到！可惡！而家連重量都可能扭曲埋！」時間... 重量... 只差空間！

我諗到個恐怖嘅問題... 如果空間扭曲埋點算？！

「空間扭曲嘅話，我哋可能會永遠消失喺原本世界... 等等！」Jennifer嘅語氣突然驚訝！

突然，我見到眼前有一個黑色身影...

咦？！我頭先好似係睇唔到嘢架喎！？

呢個身影望住我，但係唔講嘢... Jennifer... 你，你見唔見到？？？

係咪我有幻覺吖？！

「我... 我都見到... 你無幻覺... 我... 都見到佢！」Jennifer有啲震咁喺我路入邊講...

咩嚟架？！！！

「呼......」身影發出低沉嘅聲音...？！

「呼...... 飛......」我幾肯定聲音係來自呢個身影！

點算吖！Jennifer！點算吖！會唔會係怪物嚟架！？

只見身影好似有手... 佢雙手捧住啲嘢...！？

跟住佢慢慢行咗過嚟... 遞咗比Jennifer！

『Jennifer！咩嚟架？！點解佢會！！！』我好驚！我完全無辦法理解眼前發生緊乜嘢事！

我感受到有隻冰冷嘅手捉住我嘅左手同埋Jennifer隻右手...

然後佢放咗啲嘢喺我哋手上！呢件嘢好凍！

唔知咩嚟！ Jennifer... 我哋點算？！

「你等等，我試下同佢溝通！」Jennifer喺腦海同我講...

「*******？**，×××××××？」Jennifer喺度講緊一種我聽唔明嘅語言...？？！

「佢唔理我... 似乎都唔係果樣嘢。」Jennifer有啲失落... 但係佢都好confused...

乜嘢嚟架...？！ Jennifer... 你唔係想話我知呢個世界有鬼掛！？

咦？我感受到我嘅背後有一隻冰冷嘅手推我？！

『喂喂喂你想推我去邊吖？？唔好吖！』我有啲慌張咁喺腦海講，同時拉著Jennifer借力，諗住阻止佢推走我！

「唔係吖！佢係推緊我哋兩個吖！」我唔知點解突然可以行到！Jennifer都係！

一步... 兩步... 咦？我好似行到！

『Jennifer，我覺得佢無敵意架！』我開始有啲猶疑...

「我都唔知... 但係我對眼唔可以再用啦，我感受到好似就快到極限！」但係我隱約開始見到光！

『Jeeeenniiiifer！』我衝口而出！咦？！

「恆...恆？我... 聽... 咦...？」我好似望到Jennifer個輪廓！我都聽到Jennifer把聲！只係慢咗2-3倍，但係勉強聽到！

突然，背脊冰冷嘅手掌消失咗...

去咗邊？？！我嘗試擰轉身望？？等等先點解我轉到身？

咦？乜嘢都無！！

嘩？！！我見到身邊突然出現紅光！

「恆，唔好驚，係我嚟。」Jennifer把聲喺我心中出現...

『你仲用？！』痴線，一陣暈咗點算吖！？

「呢個盒... 上面嘅封條印住DO NOT OPEN！」Jennifer好似喺度摸緊隻盒...

『我哋而家去邊好？』好似郁得返... 但係我哋係咪真係搵到想要嘅嘢呢？

始終我哋冇真正咁接觸過火箭嘅殘骸... 我哋只係喺附近...

「返去頭先原本落嚟嗰度先。」Jennifer慢慢拉著我行...

一步... 兩步... 我哋好似慢慢越行越輕鬆！

我開始望到Jennifer嘅輪廓！

『Jennifer，你見唔見到我吖？』我喺度誇張咁揮動右手！

「見到吖！見到吖！呢個盒... 似乎就係我哋想要嘅嘢...」Jennifer望住我哋手上揸住嘅盒...

係紅色嘅！同Email入邊嘅圖一樣！

我哋慢慢行，慢慢見得返嘢！跟住行到嚟頭先遊繩嘅位置...

咦？只見天色已經好昏暗，明明頭先嚟到果陣係下晝嚟架喎？ 咁快日落？

「恆，你幫手拎住。」Jennifer一隻手拉著條繩...

跟住我哋小心翼翼咁上返車路... 只見架Model X嘅車頂多咗啲枯萎嘅樹葉...

我硬係覺得有啲奇怪。

『Jennifer，你覺唔覺有嘢唔妥？』我望住Jennifer... 只見佢喺度用電話app，開咗Model X嘅車頭行李箱...

跟住我哋小心咁慢慢放隻箱入去...

「嗯，我都幾肯定，我哋而家身處嘅空間有啲唔同。」呢句說話聽落好怪，但係我諗我慢慢明佢嘅意思...

Jennifer拎起水樽一聞... 跟住面上嘅表情變得厭惡！

「啲嘢壞咗，唔飲得啦。」Jennifer即刻放低個樽！

『支嘢仲未腐爛... 應該仲係啱啱開始變壞。保守估計，5日。』我已經有不詳預感...

Jennifer連接Model X嘅WiFi... 拎出電話一睇...

「恆，我哋頭先已經過咗7日啦。」Jennifer拎住電話比我睇，面色凝重咁講！

會唔會個基地已經畀中國人拆咗

你咁樣姐係唔信Angie啫
明明Angie又型又索

更新到Chapter 81

Chapter 81 噩夢完結？

「恆，我哋頭先已經過咗7日。」Jennifer拎住電話俾我睇，面色凝重咁講！

我認真望一望個日期... 我再望真啲！

我再望住手上支壞咗嘅嘢飲... 就算我有幾唔想接受都好...

事實擺在眼前，頭先嗰短短1個鐘... 咁就已經過咗7日。

Jennifer喺度撳着Starlink，嘗試同總部果邊溝通...

「Jennifer同埋阿恆... 希望你哋會安息...」係總部果邊send過嚟嘅訊息...

「我未死架！啱啱出返嚟啦！」Jennifer有啲唔高興咁喺電話打字，跟住send咗出去！

Jennifer喺度倒車，嘗試喺單程路上面掉頭...

跟住佢重新將架車駛返上山...

只見出面嘅天色已經有啲黑... Jennifer着咗車頭燈...

突然，眼前有一個黑影閃過！Jennifer佢閃避唔切！

「碰！轟隆！」架車突然震一震！我哋好似撞到個黑影！

『Jennifer，你係咪撞到嘢？！』我有啲驚訝... 點解Jennifer會睇唔到？！

「大鑊，快啲落車睇！」Jennifer即刻停咗架車，跟住同我一齊落車望一望車頭！

只見一個男人暈咗喺架車側邊... 無反應..？！

『先生，先生？』我輕輕拍一拍佢膊頭... （Response）

只見呢個男人係一個後生仔... 佢着住緊身嘅行山服裝...

傷者冇反應！先檢查呼吸... 咦？仲有呼吸！（Airway，Breathing）

我再摸摸佢隻手... 仲有血色，有心跳，有血液循環！（Circulation）

再檢查受咗咩傷... 我見到佢頭部出血... 上身有地方擦傷... 昏迷... （Disability）

我再揭起佢嘅衫，搵一搵有冇其他受傷嘅地方... （Expose）

可惜，果陣我哋無留意到有異樣...

『佢頸椎同埋腰部都無受傷。Jennifer，有冇紗布？』我要幫佢止血先...

「得毛巾咋...」Jennifer遞咗條白色毛巾比我...

我用毛巾撳住頭部出血嘅傷口... 除咗咁樣做之外，我都唔知應該點樣處理！

睇怕都係會細菌感染架啦...

跟住我幫佢用件衫包住個頭，用件衫壓住塊毛巾。

佢咁樣，要諗辦法送佢去海防果邊先得！

唔係啦，可能要醫院都唔定！

『Jennifer，佢暈咗但係仲有呼吸，應該係撞到頭！可唔可以送佢去海防嗰邊？』我有啲誠懇咁望住Jennifer...

佢未必肯俾陌生人入海防嗰度！

「抬佢上車先，今次係我大意。」Jennifer同我合力將呢個男人抬上後座，我用安全帶固定佢。

「我開車，你幫手打電話俾Jessie！」Jennifer俾咗佢部電話我，跟住佢繼續開車！

Model X嘅上斜扭力十足！就算係柏架山道呢啲斜路都唔吃力！

我連咗WiFi之後，嘗試call Jessie...

「嘟... 嘟... 嘟...」拜託！Jessie求下你快啲聽電話！

「咔擦...？喂...？」係Jessie把聲...！？

『Jessie！我係阿恆吖！你聽唔聽到？！』我激動咁講！

「恆？！點解嘅？！我哋以為你同Jennifer真係消失咗吖！點解你會用Jennifer嘅電話嘅？！Jennifer佢有冇事吖？」Jessie好興奮咁一卵嘴講！

『無事，我同Jennifer都無事。我哋而家喺回程嘅路上，但係...』我都未講完...

「但係乜嘢吖？！痴線點解你哋竟然仲在生架，咁遲先同我講架！唔得唔得！我要即刻上去搵Angie同佢講！」Jessie聽到我哋在生... 似乎太興奮...

『Jessie！我哋無事，但係我哋唔覺意撞傷咗人吖！而家載緊佢返黎，要你幫手！』我認真咁喝住佢！

「咁... 咁大鑊... 咁... 傷者佢乜嘢情況？」Jessie終於意識到事態嚴重...

『仲有呼吸，但係似乎撞傷咗個頭！我幫佢止咗血... 應該...』我緊張咁講...

『Jessie你果邊會唔會可以準備定器材，幫手接收傷者... 或者洗唔洗過去隔籬東區醫院攞...？』

「Ok嘅，我同Angie佢講聲，跟住幫你準備！」Jessie似乎都幫到手...

『好，麻煩晒Jessie你啦！』我緊張咁望住條路...

只見我哋已經上返大風拗，而家準備落山去鰂魚涌！

「話說，我有啲掛住你... 仲以為你真係死咗吖！」

『欸... 好啦唔講啦！陣間見！』我尷尬咁收線！

只見天色已經黑晒，Jennifer淨係依靠車頭燈... 同埋佢嘅雙眼... 佢嘅雙眼？！

『Jennifer！你仲用？！』我突然嚇一嚇！

頭先佢話差唔多極限架啦喎！再用咪出事？！

「我而家唔係用得好大力，應該... 應該可以嘅！」Jennifer雙眼專心望住漆黑嘅山路咁講...

Model X嘅LED車燈照射住出面黑到伸手不見五指嘅山路...

我就有啲擔心咁望住Jennifer... 但係我乜嘢都做唔到...

過咗一陣... Jennifer佢終於安全地送咗我哋落山...

但係我見到佢喺度喘氣... 佢似乎真係唔係太得！

『Jennifer，街路我應該可以。你休息下啦，我唔想你揸揸下暈低。』我示意Jennifer同我調位！

「喀... 喀...」Jennifer身子一軟... 突然挨咗落我懷抱！我攬住咗佢...

佢始終都係用得太大力... Jennifer... 辛苦你啦。

我確保架車入咗P波... 我跨個身過去除咗Jennifer嘅安全帶，跟住小心咁抱起佢過嚟我個位...

跟住我坐上司機位... 深呼吸一口氣...

而家有呢個暈咗嘅男人... 仲有體力不支嘅Jennifer... 真係得返我啦。

問題嚟啦... 我係未考過車牌架！！！

我以前中學果陣淨係試過得閒玩下Driver San Fransisco同埋The Crew嗰啲車game！

我亦都喺台灣旅行果陣揸過高卡車，揸過沙灘車...

我玩高卡車果陣仲可以飄移扭贏晒在場嘅人！

但係... 呢架真車嚟架喎！有軚盤架喎！

無辦法！而家得返我！要救得返後面呢個男人就只能靠我！

我首先入D波... 跟住喺17寸螢幕上面撳... 高燈！

好！路面變得光咗好多！我望一望...

右邊係水族廣場舊址... 筲箕灣方向。我小心咁慢慢比油...

「嗚嗚嗚...」Model X慢慢加速... 嚟到鰂魚涌麥當勞...

我扭軚跨越幾條行車線... 終於唔係逆線行車！

有返少少信心之後我將架車駛上康山道兩條行車線嘅中間...

雖然有啲黑，只能依靠車頭燈... 但係由於平時我都會搭車落筲箕灣，所以都認得路。

我偷偷望一望Jennifer... 佢仲係瞓著咗。

另外個男人都係似乎冇乜反應... 至少果陣我係咁諗。

嘩！可惡！西灣河路上面有爛車！我連忙閃避！

好險！都好彩呢度路闊，就算逆線行車都無人捉架啦！

我慢慢加速，駛向柴灣道...

「隆隆！」Model X嘅避震發出聲響... 不過幸好避震嘅性能還好。

跟住我急速駛過阿公岩道，返到嚟海防基地！

我一駛入車庫，只見大家都已經集合咗喺度！

佢哋嘅眼神充滿期待... 同埋驚訝...

不過！而家救人要緊！我立即落車，跟住急步跑向Jessie...

『有個男嘅傷咗，頭先Jennifer開車果陣太黑，唔覺意撞到佢！』我好急咁同Jessie講... 無視咗其他人！

只見Jessie已經推咗擔架床出嚟... 跟住佢同我合力一齊抬個男人上張床...

「交比我處理ok架啦，辛苦你啦吖恆。」Jessie好溫柔咁同我講...

跟住見到Jessie推咗佢入隧道... Angie就好奇咁望住傷者...

「係啦吖恆，你哋點解會咁遲先返嚟嘅？」Erika突然喺我身邊問我...！

但唔好打

而家Jennifer佢哋係咪已經拎到g particle？

玩“仁醫”橋段?

空間扭曲左，傷者係之前因扭曲而穿越的阿恆(可能時間早左幾日。。)

不過傷左頭，腦部受震盪導致失憶，可以圓滿番2個自己在同一時空理論(面貌身體相同)

"喂!! 你唔好忘記仲有飛揚同綽芝呀!!"

cool table應該就嚟生得

唉吖
諗得太複雜啦
唔好太著重時空扭曲嗰度

Cool Table: 食咗7日午餐肉 好嬲好嬲！
究竟Jennifer係咪玩鳩我

箭法差啲啲

你覺得呢？

起碼啲午餐肉真係午餐肉先吖

似係？

明明喺屯門唔使食啲咁嘅嘢
為咗100萬Sil可以做到幾盡

確切啲嚟講 係火星土壤樣本
含有G-Particle 亦都有其他嘢
唔係純正嘅G-Particle

如果傷者係阿恆嘅話
Jessie一眼就會認得出佢

我可以話你知 佢唔係阿恆