我唔覺意穿越咗時空 遇到個神秘女仔？！（2）

Chapter 92 昏死（上）

「下一站係... 文明里...」係九巴嘅報站系統...

「阿恆吖～ 阿恆吖～ 我哋陣間邊個站落車吖？」身邊嘅Jenny搖搖我手臂問我...

『有排都未到喎... 黃金商場嘛～ 深水埗喎！我哋喺北河街落吖。』我溫柔咁答Jenny...

又咁奇怪嘅？Jenny佢放學之後突然約我出街...

佢話想換手提電腦喎～ 又話唔識揀，想搵人陪佢去揀...

咁啱今日有半日day off... 咪陪下佢去睇囉～ 有得陪Jenny喎！

呢，我呢啲IT狗呢個時候就可以發揮作用啦！

話晒我都喺黃金同埋高登呢兩個腦場打滾咗六年，要揀部好嘅Laptop俾Jenny，邊度會難到我吖！

「係啦吖恆... ENG2002嘅ADA做到邊度吖？」Jenny有啲嗲咁問我～

『欸... 你邊個Topic先？有三條題目架喎...』我都唔記得Jenny係邊個Topic...

佢就同咗Nickolas一Group... 果陣我仲走去問Jenny想唔想一齊Group...

點知... 換來只係俾人潑咗一大盤冷水...

唉... Nickolas又高，又靚仔，講嘢又charm...

聽講成績都好似唔差... 難怪嘅，難怪嘅...

「我？我係Question A吖～ 計分數果個Program吖～ 你呢你呢？」Jenny佢笑瞇瞇咁同我講...

Jenny... 點解你可以咁可愛... 我想一直留喺你身邊幫你架...

但係奈何你身邊已經有好多人... 無位容得落我...

等等先？

『Question A？！咦！我都係喎！』我興奮咁講！

唔通佢要幫手？份ADA其實我就一早搞掂晒啦！

Billy條友，神神秘秘咁...

聽講佢近排生日，跟住就唔知同邊個去慶祝咁！

堆C++ Code就全部掉晒俾我做！

吖好彩我以前中學已經寫Python...

Programming嘅嘢都係大同小異姐～ 難我唔到！

「吖恆吖... 你可唔可以... 幫下手...」Jenny佢用一個楚楚可憐，雙手稍為夾一夾雙峰嘅姿勢問我...

『欸... 但係... 功課應該係自己做架喎...』我有啲唔情願咁講...

姐係雖說份功課就好容易姐... 但係我其實都花咗啲時間去做...

更何況每一個人寫嘅Code都有自己嘅特色同埋風格。

尤其是每個人Documentation同埋Comment嘅style都係獨特嘅！

可愛嘅Jenny... 唔係話幫你做就幫你做咁簡單架...

「阿恆吖... 你都知啦... 我部Laptop壞咗吖嘛...」Jenny佢扁扁嘴，谷起面珠登講...

「同埋Nickolas佢... 又要搞莊果邊啲嘢... 佢叫我幫佢做住先... 我又咁唔好彩壞咗Laptop... 明明已經做咗啲架啦，跟住而家部機又開唔返！」Jenny楚楚可憐咁講...

Jenny慢慢拉我隻手臂...

「幫我啦... 阿恆... 我真係得你一個可以幫我咋... 你唔係唔幫我吖嘛...？」Jenny已經拉到我隻手臂去到佢雙峰前面... 已經就快掂到佢又挺又圓嘅雙峰！

喂吖！唔可以咁吖！唔好唔好！

『哎呀... 當... 當我怕咗你啦！好啦好啦！』我怕醜咁講，跟住想縮手！

「好嘢～ 我幾時都話阿恆你最好人嘅～」Jenny隻手突然用力，一嘢請我隻手臂食波餅！

『嗚吖！得啦得啦！』我怕醜咁縮手！

「嘿嘿嘿嘿～」Jenny喺度好開心咁傻笑～

其實我見到Jenny咁開心... 我自己都有啲輕飄飄嘅感覺...

只要女神開心咪得囉～ 就算好似而家咁樣又點喎？

我成日都係咁樣諗～

「下一站係... 北河街」咦？時間過得咁快？

「阿恆吖！要落車啦！要落車！」Jenny搖搖我嘅手臂！

嗚！我個腦突然一痛！

只見眼前嘅九巴無減速嘅意欲？

前面仲有另外一架巴士！不妙！咁樣睇怕會！

『Jenny！』我突然伸手捉住Jenny！

「轟隆！」我隻手被大力一壓！好痛！

我眼前一黑... 乜嘢都見唔到！

...

...

咦？呢度係？

我搖一搖頭望望...！

我置身於香港赤鱲角國際機場！

「喂，你肯定要帶嘅嘢點齊啦嘛？」老竇望住狼狽嘅我...

一個大背囊，身上掛住Sony A5100相機...

拎住個環保袋，仲推住個喼嘅我...

『齊！passport，現金，仲有laptop，server... 全部喺度。』我狼狽咁點算身上嘅財物！

...

「麻煩Simon，幫大家手影一張大合照先...」帶領遊學團嘅老師叫我幫手...

『三，二，一，咔擦！』我拎住配備Kit鏡嘅A5100...

...

『呵欠...』我打咗個大喊路... 始終我啱啱落機...

仲未適應英國嘅時差... 話晒差7個鐘喎...

而家呢度已經係夏令時間...

呢個遊學團... 無乜啲我識嘅人...

我見隔籬人哋嗰啲中學係一次過派8-9個學生過嚟...

遠處見到德望果邊班女仔... 有講有笑咁...

其中一個仲好高... 笑起上嚟果陣好靚，好迷人...

佢嘅氣場就彷彿好似有光照住佢咁樣！真係女神嚟！

而我間中學，只係得我同埋我個死黨拍檔Nikko...

Nikko佢份人仲靜過我... 更加怕生過我...

...

「嗱，呢度就係London Bridge啦...」導遊向我哋介紹...

只見London Bridge原來係一條平平無奇，一啲都唔靚嘅橋...

樓下嘅泰晤士河仲有啲味... 不過就無城門河咁臭！

原來我哋一直見到好靚嗰度橋，叫做Tower Bridge！

「欸，請問... 可唔可以... 幫我現（影）張相吖？」有一個講唔正廣東話嘅女仔，怕醜咁掂一掂我膊頭問我...

我呆咗一呆... 唔係好識反應...

『欸... 可以吖...！』我怕醜咁講！

...

「唉吖，咁樣影吖！咁樣！唔好現（影）得我金（咁）肥！」Ellie佢搶咗我部A5100，跟住好不滿咁喺度話我影得佢唔好！

『吓，但係你唔係肥喎...』Ellie佢其實冇乜肉...

「再現（影）過！今次咁樣！」佢揸住我隻手，揸住我部相機，教我調整角度...

...

「Angie Angie！到你啦！」後面班MK Band 3仔竟然可以同班德望女玩得咁開心...

我就聽住佢哋喺度細聲講大聲笑！

唔知點解... 成個團啲人都好自然哋分咗堆出嚟...

而我就無辦法融入任何一堆入邊...

「吓？！Angie你A0？！你喎...」後面班MK喺度大聲驚訝咁講...

我無繼續聽落去，正打算閉目養神...

「喂！喂～ Simon你蝕（食）唔蝕（食）？」我哋坐緊旅遊巴，Ellie佢坐我隔籬行，隔咗條走廊...

佢拎咗包食咗一半嘅餅乾出嚟，遞比我...

『欸...』我唔好意思收...

「你蝕（食）啦！你蝕（食）啦！我怕肥！」Ellie笑住咁遞塊餅乾比我...

我食咗... 餅乾有啲甜...

好甜...

原來就算我埋唔到堆... 仲有Ellie肯同我做朋友...

ellie有咩圖謀
係咪想呃恆仔

更新到Chapter 93

今次呢篇好長好長
同埋都花咗啲心思

Chapter 93 昏死（下）

我自己一個拎住部相機喺綠油油嘅國家公園度行...

日落帝國果然唔同啲... 人哋真係一個國家～

呢度啲公園會有湖，會有好多樹～ 湖上面仲有啲天鵝喺度游水～

真係令人心曠神怡，令到我好放鬆...

而家連Nikko都埋咗其中一堆毒撚嘅堆...

而我就唔係太中意佢哋...

反正班毒撚啲話題好on9唔啱我傾，所以我冇同佢哋一齊行...

我自己坐咗喺圍住湖邊嘅欄杆，舉起A5100，對準湖上面嘅天鵝...

正當我撳咗一半快門，對焦住天鵝準備影嗰陣...

「喂～」有人拍一拍我膊頭！

「咔擦...」唉吖... 咁就浪費咗SD咔上面13MB嘅位！

邊個壞我嘅好事？！我擰轉身一望！

Ellie傻笑咁望住我...

我見到佢個傻笑樣，我嬲佢唔落...

「同我一齊現（影）相！」Ellie佢坐咗上嚟欄杆，用着住緊身褲嘅大髀掂住我！

係我第一張同Ellie嘅自拍...

『喂吖！唔好Po啦... 我咁樣衰...』我怕醜咁講...

喺張相見到我自己滿面暗瘡...

仲有Ellie可愛嘅傻笑...

...

「我其實一直都無朋友... 我離（嚟）到香港之後... 佢哋唔中意我...」Ellie隔著Whatsapp錄音俾我...

「佢哋覺得我係大陸人... 要排斥我...」佢把聲楚楚可憐咁...

「佢哋趁我去上體育課嗰陣偷我錢... 老師之後搵過... 但係都搵唔到邊個做...」

『仲有我喺度嘛... 我唔會好似佢哋咁樣對你。』我打字安慰佢...

我好同情Ellie嘅遭遇... 甚至自己感同身受...

我細個就係因為自己奇怪嘅脾氣，加上講嘢得罪人...

搞到喺中學入邊冇乜朋友... 細個仲因為矮，所以俾人蝦... 俾人打...

唉，我而家都仲未夠160... 嗚！

明明係班仆街蝦我先... 我還手，最終老師全部人都罰！

而家竟然有Ellie... 就算佢係大陸嚟都好，佢同佢哋唔同！

佢好努力學緊廣東話！佢好努力咁嘗試講，就算講得唔正都好！

...

「一唔一齊去沙灘？」Ellie Whatsapp問我...

『過咗9點啦... 要偷偷哋走出嚟喎...』我有啲驚俾host family發現！

...

迎面吹來海風，好凍好凍！我不禁喺度抖震！

我全身縮埋一舊！日落帝國呢度就算夏天... 一就快日落就得返14度！

「幫我現（影）相吖～」Ellie又再次拉拉揸住相機嘅我...

『好吖好吖！』我好開心咁幫Ellie影...

佢嘅身後係日落嘅海景... 天空橙橙藍藍咁... 天色好靚...

我再將Ellie放喺日落嘅水平線之上... 猶如佢企喺海上面咁...

「咔擦！」

『你睇？』我拎住相機，Ellie靠近過嚟望～

『嗚... 乞嗤！』我突然抖震打乞嗤！

『吖Sorry呀...』我失咗儀態... 好尷尬咁望住Ellie...

只見Ellie冇出聲...

佢除咗件牛仔褸... 我見到佢入邊着住件緊身嘅黑色crop top...

好顯身材吖！我頓時怕醜面紅唔敢直望佢！

「Simon，你着住啦...」Ellie佢披咗件褸喺我身上...

『唉吖！唔好唔好！』我怕醜咁望住佢，嘗試掙扎！

但係Ellie佢點都堅持要我着住！

「我唔想你冷親吖...」Ellie佢喺我耳邊溫柔咁講...

我顫抖咗一下... 我都幾肯定今次顫抖唔係因為凍...

呢件褸有住Ellie嘅餘溫... 散發住佢嘅體香...

Ellie佢照顧我... Ellie同我一樣都係冇朋友嘅人...

佢照顧我... 我好想繼續咁樣俾佢照顧...

我心動咗。

我見到其實Ellie都好似覺得凍...

『我哋... 返去囉？』我怕醜咁問一問Ellie...

「嗯～」

...

一架A380-800正在以0.85馬赫嘅速度飛越俄羅斯嘅上空...

而家機倉進入黑夜模式... 所有燈都變得昏暗...

『Ellie... 我可唔可以挨喺你膊頭...』我有啲怕醜咁問...

Ellie佢笑一笑，無阻止我咁樣做...

反正而家得我哋兩個... 無人會見到嘅～

佢嘅膊頭好暖... 令人覺得好有安全感。

跟住我仲俾佢啲頭髮掂住我個頭...

佢塞咗一隻耳機落我耳，要我同佢一齊聽歌...

「只想會有日可能 與你共姓的身份
要回望這生 也有你陪襯
不作陌生人 只做你情人 不枉此生...」係Dear Jane嘅不許你注定一人！

Ellie佢會聽廣東歌？

Ellie佢... 想借呢首歌嚟表白？

我...

我係咪應該表白呢？可能會成功呢？

『Ellie... 我... 可唔可以中意你？』我鼓起勇氣咁問！

昏暗嘅燈光... 隱約見到Ellie笑一笑...

尷尬咁擰頭...

我... 俾人拒絕咗...

『點解喎... 點解吖？』我仍然鍥而不捨地問...

我唔明... 明明我哋兩個相處得咁開心！

明明你都需要人照顧，我可以照顧到你！

你讀書唔叻，我讀地區Band I學校，我可以教你！

點解？！點解吖！

「因為我係大姐姐，我大過你」Ellie喺手機上面打字拎俾我睇...

手機刺眼嘅光，令到我對眼有啲唔舒服...

呢道光就好似判我死刑咁直接穿透我空虛嘅靈魂。

手機上面呢一句說話... 令到我心入邊更加唔舒服...

...

等我仲以為我會有人可憐添...

等我仲以為有人會照顧弱弱嘅我添...

原來到頭來都係得我自己一個。

原來到頭來都係我自作多情。

#####

『Professor... 阿恆佢掂唔掂？』我擔心咁望住Professor問...

Professor佢黑晒面望住我...

「你做咩唔早啲出劍？」Professor佢冷冷咁講咗一句...

我未見過Professor咁嬲咁對我...

『我... 我以為... 我以為海防嗰邊所有人都因為我而死晒啦...』我喊住咁講...

『佢要脅我... 話佢發射咗彈道導彈... 我深知道海防嗰邊嘅S-400... 根本唔會夠時間攔截... 跟住佢哋... 整暈咗我...』我差啲就害死晒所有人...

「你知唔知佢為咗救你，搏埋自己條命吖？」Professor指住暈低咗嘅阿恆...

「知唔知用A-Particle嘅人類如果用力不當嘅話，A-Particle會吸乾佢個靈魂架！？吖恆佢就係用力過度。為咗你，用 力 過 度。」Professor佢語氣好重咁話我...

其實我好自責... 我之前已經害死咗基地嗰度好幾個中意我嘅人...

今次又為咗保護Professor佢，攞海防基地嘅大家嚟較飛...

但係如果唔咁樣做嘅話... 又會犧牲Professor佢！

跟住而家又因為我俾自己嘅情緒操控咗... 搞到連吖恆佢都出埋事！

『我... 好對唔住...』我低頭咁講...

「唉，我都唔想再怪你啦，再怪落去都冇意思。嗰陣啲導彈俾我同阿恆攔截晒啦。我有啲喺米國衛星公司做嘅朋友，一見到出事就即刻通知咗我...」

「但係而家你自己要諗下點樣整返醒阿恆佢。仲有，有時人哋救你同埋幫你嗰陣，你自己都要爭氣啲先得架Jennifer...」Professor嘆咗一口氣，語重心長咁講...

『嗯... 知道...』我低頭咁講...

其實我覺得自己好冇用... 嗰一刻竟然乜嘢都做唔到！

俾人兇兩兇就真係信咗... 原來我聽到嗰啲爆炸聲...

係Professor同埋阿恆佢成功攔截咗啲飛彈嘅聲...

當時見到出面嘅閃光唔係閃電... 亦都唔係彈頭爆炸嘅閃光... 原來係攔截導彈嘅激光！

我行近病床望住阿恆... 當時我咁辛苦護住阿恆...

仲要一度開槍拖延班PLA同埋武警時間，等Professor隻機夠時間re-arm返黎執阿恆走...

佢暈咗之後一直都... 我個腦都感受唔到佢...

點解？我明明知道佢發緊夢... 但係點解？

點解我會咩都睇唔到架？？？

唔得！我陣間再試下！

「唉，好彩我以前讀U嗰陣學過急救姐... 至於佢隻手... 輕微骨折，表皮界傷晒... 我幫佢包紮咗，但係都會有疤痕。跟住佢唔食嘢唔飲嘢唔得嘅... 所以都係俾咗啲葡萄糖水佢...」Professor佢拎住細電筒喺度照阿恆隻眼，喺度觀察佢瞳孔嘅反應...

『Professor... 我身體嘅血，有好強嘅修復功能... 我...』我未講完...

「痴線架你？唔好吖Jennifer！你想輸血俾佢吖？！」Professor嚇咗一跳！

『如果我冇研究錯嘅話... 我嘅血對人類嚟講應該冇排斥性... 同埋我係你哋嘅O型... 應該ok架...』我繼續講...

「唔得，我唔係醫生！呢樣嘢，連我都唔敢幫佢做！你唔好亂嚟吖！」Professor佢都冇把握！

不過我嚟地球之前... 已經熟讀地球人類嘅身體結構...

結構上的確同我哋好似，但係冇我哋咁優越...

我趁Professor佢行開咗... 偷偷喺櫃桶搵到一pack未開嘅針筒...

阿恆... 呢個就當係我對你嘅贖罪啦。

我而家冇辦法應承你，但係我都唔想辜負你嘅愛。

文嚟啦 文嚟啦

又同恆仔交換體液

妖 你錯重點

感覺ellie只係想照顧細佬

可能聽日朝早先會有
或者可能一陣沖完涼等頭髮講果陣校對

攰嘅就唔好等我啦

更新到Chapter 94

Chapter 94 鬼門關

「滴... 滴...」咦？我感受到我隻手有一絲溫暖...

我見到眼前係Ellie坐喺我隔籬...

呢度係... A380-800嘅機艙... 但係而家靜到出奇...

得返Ellie挨喺我身邊... 佢訓到流緊口水落我隻手...

我望一望出面...

A380-800嘅窗外... 係夜景嘅景色...

咦？呢條橋... 肯定唔會認錯！肯定係青馬大橋！

我哋就快降落喺香港赤鱲角國際機場！

『喂！Ellie！醒醒吖喂！』我搖一搖Ellie嘅膊頭！

「嗯？做咩事吖Simon...」Ellie察覺唔到周圍嘅異樣...

『周圍冇晒人吖！』我慌張咁講！

「嗯？有咩問題喎？仲有我吖嘛...」Ellie望住我傻笑同我講...

「你唔好行開啦... 喺度陪我...」Ellie拉一拉我...

『你唔覺得好奇怪咩？唔係我哋呢幾排冇人喎... 你聽到有人聲咩？』我周圍望... 冇晒人！但係架機仲飛緊！

但係點解我聽唔到引擎聲嘅？！

A380-800總共有4台Rolls Royce Trent 900 Turbofan引擎，點會咩聲都冇吖？！

等等先... 點解我知得咁清楚嘅？呢段記憶...

「有咩好奇怪喎...」Ellie佢不以為然...

「阿恆... 阿恆... 返黎吖恆...」係一把好熟悉嘅聲音...

『Ellie你有冇聽到？！好似仲有人喺度！』我激動咁四處張望！

「咩吖... 你係咪幻覺吖？」Ellie佢...

「唔好聽佢講吖恆！過嚟吖！」呢把好熟悉嘅聲...？

『過嚟？』我疑惑咁喺度搵聲音嘅來源...

「Simon吖... 唔好走啦...」Ellie楚楚可憐咁央求我...

「唔好聽佢講... 乖... 過嚟... 過嚟...」嗰把聲... 好弱... 但係好似喺機頭嗰度傳嚟...

把聲好熟悉... 反而我眼前呢個Ellie... 好奇怪...

我一直行... 慢慢行去機頭...

係駕駛倉嘅門...

突然，道門打開咗！一度刺眼嘅強光迎面來襲！

...

『嘩！』我大吃一驚！我望望...

「嘻嘻...」呢個女仔係... 咦？點解你咁熟悉嘅呢...

「終於醒啦恆？」咦... 佢... 佢點解會叫我中文名嘅...

佢就係Jennifer！？

等等？呢段記憶...？？奇怪啦？

我唔係搭緊飛機咩？我周圍望望...

呢度係... 咦？係玻璃大學嘅班房... 我訓咗喺張病床上面？

我見到自己隻手有啲血... 身邊有啲拆咗出嚟染咗血嘅紗布...？

啊！痛痛痛！我望住我流緊血嘅手！咦？等等？

呢啲好似唔係我啲血嚟？ 係啦點解我隻手傷咗嘅？

我隻手唔係嗰陣我保護Jenny嘅時候整傷嘅咩？

咦？等等，Jenny？呢個女仔... 好似係Ellie之後嘅...？

咦？Jennifer？Jennifer！係喎！我要救Jennifer架喎！

『Jennifer！係你吖！』我突然激動咁叫咗出嚟！

Jennifer佢騎咗上嚟我張病床攬住我...

「係吖... 你冇事啦恆... 我哋冇事架啦...」Jennifer佢溫柔咁攬住我，喺我耳邊講...

我記得啦！我記得返晒啦！我隻手係轟落車頭玻璃嗰陣整傷架！

咦？！ Jennifer佢... 我要確定一樣嘢先！

『Jennifer，呢度係咪真架...？你係咪真架...？點解... 點解我哋出得返嚟嘅？點解我哋冇死到架？！』我摸住Jennifer嘅面，喺度搣佢！

「喂喂！唉... 都怪我嗰陣唔爭氣... 遲咗用劍。我... 我曾經想...」Jennifer佢控咗個頭埋嚟...！

我見到一啲好恐怖嘅影像...！

『但係Jennifer... 你嗰陣係被迫嘅... 唔好咁傻吖知唔知吖？』我激動咁雙手搭住Jennifer嘅膊頭！

「嗯...」Jennifer諗都唔諗，直接錫落嚟！

『吖！痛痛痛！』我隻手又痛！

「吖！Sorry Sorry！似乎仲未好得返晒！」Jennifer佢連忙道歉！

『但係... 你係點樣逃走到架... 我哋嗰陣喺彌敦道喎...』我都覺得有啲不可思議...

「Professor佢架機掉咗你落嚟之後就飛咗返去玻璃大學嗰邊Re-arm... 而我嗰陣就聽到你叫我！就算佢哋打咗鎮靜劑落我身，我都俾你整醒咗！跟住我就發現，原來你仲好想救返我出嚟... 所以我最後用咗劍斬開！但係...」Jennifer好溫柔咁喺度解釋...

「但係呢個時候，增援嘅PLA已經殺到... 我將你放喺裝甲車入邊，搵嘢擋住... 跟住不停地用劍斬同埋擋佢哋嘅攻擊... 我斬死一個PLA就搶埋佢身上嘅步槍！一手揸槍另外一隻手揸劍！嗡嗡嗡嗡吱吱吱吱吱！又擋又殺咁！」Jennifer好激動同埋誇張咁比畫住！只見佢又揮又劈又射咁樣！

「終於俾我拖到Professor部機返黎！佢幾個5kg炸彈就炸死晒班陸軍，俾時間我綁你上無人機上面！然後我就沿著彌敦道殺返落去，沿途Professor就放煙掩護我！」Jennifer講完發生咗咩事啦...

『咁我... 我暈咗幾多日...』我終於明白...

頭先嗰幾段記憶原來係發夢... 係我仲未放低嘅回憶嚟...

「Ummm... 足足24個鐘。」Jennifer望一望手機個時間，跟住同我講...

「隆！」大門突然被粗暴地打開！

「Jennifer，唔掂！我收到風佢哋陣間逐層搜吖！」Professor佢突然衝咗入黎同我哋講！

「咦？阿恆你醒咗！？」Professor見到擘大咗眼嘅我...

Jennifer仲喺我張病床上面同我纏綿緊...

『欸...』我有啲尷尬咁望住Professor...

「你哋兩個，即刻同我執嘢走。」Professor嚴正咁講！

趕客？！

『吓？我哋可以去邊吖？』我有啲錯愕咁問...

「跟我過嚟！」Professor示意我同Jennifer落床...

我行出門口... 原來我返咗嚟R Core 9樓...

跟住Professor佢慌忙咁收拾染咗血嗰啲崩帶同埋棉花，然後出咗嚟...

「嗱，你望下。」Professor佢拎住電話，Show咗成間玻璃大學嘅平面圖...

只見有一堆紅點而家喺PQ，QT，TU嗰邊...

恐怕好快會去到QR，跟住就係R Core...

「最簡單嘅方法就係落去食嘢，等佢哋搜完我哋先返嚟。」Professor同我哋兩個搭𨋢...

吓？！咁簡單？！！你當班PLA傻架？

「玻璃大學而家仲有學生返學架，你望下。」Professor佢指住周圍行過嘅人...

點解我硬係覺得佢哋有啲奇怪嘅呢？

係衣著打扮？定係行路嘅姿勢？定係個樣都...

『Professor... 呢啲係... 未來嘅香港人？』我有啲疑惑咁問...

可惡！我漏咗口風！

「哦，係吖。喺我以前嗰個年代呢，呢度啲人... 唔係咁樣架。」Professor佢似乎不以為然...

「而家呢... 有9成嘅大學生都唔係講廣東話架啦。不論係喺XG出世定係某國出世都好。」Professor佢嘆咗一口氣...

「阿恆，聽你講嘢我已經知道... 你都應該唔係呢個年代嘅人吖。」吓？！俾發現了！

Jennifer都有啲驚訝咁望住我同Professor！

「我而家甚至覺得以前嘅我可能識得而家嘅你。」Professor望住我堅定咁點點頭講！

『欸...』我突然諗唔到點樣兜...

「唔使再扮啦阿恆。呢個世界，咩都有可能發生架啦，係咪？」Professor佢完全唔驚訝，幽幽咁講...

被識穿了！

「由Jennifer佢叫我幫佢研究G-Particle嗰陣，我都已經略知一二。」Professor點點頭，略有所思咁講～

竟然仲有學返
btw恆仔佢哋個年代嘅話，維港應該已經窄到游水都過到

繃帶

沙中 開通 真的很 興奮

唉吖 我好似唔係第一次錯呢隻字
繃帶 繃帶 繃帶 繃帶 繃帶 繃帶 繃帶

更新到Chapter 95

Chapter 95 休閒下午茶

「由Jennifer佢想叫我幫佢研究G-Particle嗰陣，我都已經略知一二。」Professor點點頭，略有所思咁講～

「『吓？！』」我同Jennifer都同時叫咗出嚟！

Professor佢嘅推理能力會唔會勁咗少少呢？！

「你睇下你哋兩隻嘢，根本就扯緊貓尾～ 」Professor只係慈祥咁笑...

佢帶我哋行出R Core...

咦？VA幢嘢高咗咁多嘅？！以前唔係咁嘅樣架喎！

我仲見到啲外牆紅磚嘅顏色match唔返之前啲紅磚...

幢新Building起得好核突...

「舊Can你哋兩個啱食吖嘛？」Professor佢帶我哋嚟到VA地底嘅舊Can...

呢度嘅格局都同之前我嚟嗰陣好大分別...

『欸，我冇所謂。』我同Jennifer跟住Professor行...

只見舊Can出面多咗啲閘... 好似鋪頭防盜嗰啲...

「咇咇！！！！」道閘突然響起！

「你們兩個，通行證呢？」突然，有一個企喺閘後面嘅守衛指住我同Jennifer！

大鑊。乜鬼嘢通行證吖？！

「欸！同志同志，通融一下，通融一下！這兩個是我新來的研究學生，我來不及辦通行證。」Professor佢即刻上前用蝗語同個守衛交涉...

「你... 嘩！竟然是您！行行行！三位慢走！」個守衛似乎認到Professor佢，跟住就俾我哋兩個過！

「Sorry吖，近呢兩年，出入餐飲場所都要用腦聯... 」Professor佢攤攤手咁同我哋兩個講...

等等！Professor佢有腦聯！？

『Professor你裝咗？！』我驚訝咁問！

跟住我望一望佢嘅頸背... 有疤痕！

「無錯，我係有腦聯嘅。」Professor佢指一指佢條頸...

「不過，係經我改良過嘅。」Jennifer呢個時候突然加把口！

Jennifer？！

「就係靠Jennifer佢...」Jennifer佢有辦法改到腦聯？！

「你應該知道，Jennifer嘅能力可以望到其他人諗乜嘢... 我就係靠佢訓練我嘅念力。」念力？！

「而家就算我有冇腦聯都好，還是係Jennifer都好... 冇人可以睇到我諗乜嘢，亦都冇人可以控制到我。」Professor佢自信咁講...

掛住講... 都唔記得咗望餐牌添！

「你哋兩個隨便揀啦，我應承咗請你哋食嘢架嘛～」Professor望住我哋兩個，就好似照顧兩個細路仔女咁～

只見個餐牌... 而家係下午茶餐...

『「呢個！」』我同Jennifer同時一齊指住西多士雞髀薯條餐！

我再望一望價錢... 嘩屌！成50蚊？！仲要唔係用港紙喎！

乜而家啲嘢咁貴嘅咩？！Jennifer望到西多士嘅示意圖已經喺度流緊口水！

「好吖好吖，咪買俾你哋囉～ 後生仔女真係好... 仲有quota食嘢～」Professor佢自己淨係叫個炒麵... 都要30蚊...

原來Professor佢自己慳住慳住... 搞到我都有啲唔好意思添...

Jennifer仲望住張圖流緊口水，似乎唔知道要去攞托盤攞餐...

『Jennifer，嘢食喺嗰度～』我一手拖住佢，一齊行到去攞嘢食嗰度...

「嘢食！」Jennifer一聽到嘢食呢兩粒字，就即刻跟住我行！

「吖恆吖～ 我呢～ 真係好耐冇食過嘢啦！！！」Jennifer佢雙眼發亮，繞著我隻手臂興奮咁同我講...

「喝什麼？」個水吧阿姐問我...

『雪碧吖唔該～』我平時喺舊Can都係飲呢樣...

「什麼傻逼？這裡只有冰紅茶，還有碳酸糖水！」乜鬼嘢碳酸糖水吖？可樂咪可樂囉...

「三個冰紅茶，麻煩你。」Professor佢直接幫我哋揸主意！

跟住就有部垂直兩個碌嘅車碌咗過嚟...？ 仲識著燈嘅...

車身中間一個個送餐托盤嘅slot...

「咦？你哋兩個少喺度食嘢... 嗱～ 咁樣將個盤放入去...」Professor佢示範俾我哋睇...

然後我哋照跟住做...

我哋行嗰陣，架車就跟住我哋三個...

吖，又幾方便喎～ 咁樣我哋行嗰陣就唔怕倒瀉嘢飲...

跟住我哋就搵到張枱坐低開餐... Jennifer佢一坐低就直接用手拎起西多士，跟住起勢咁咬！一啲都唔客氣！

呢度個位置，有啲近對面泳池...

我望住佢食嘢嘅神態，忍唔住笑咗出嚟！

我就拎住刀叉慢慢切，好優雅咁食...

咦？我隻手咁快就用得返？！咁神奇嘅咩？？

發一場夢咁樣就好返？

「.... 咩... 咩吖！」Jennifer一度咀嚼一度用不滿嘅語氣問我！

『聽唔到你講咩咩咩喎～』佢嘅表情，肯定係問我係咪笑佢啦～

我又想激下佢～ 因為佢詐嬲嗰陣個樣真係好可愛！

Jennifer有時都有可愛嘅一面架～

「望住你哋兩個... 真係好青春呢～」Professor望住我哋兩個打情罵肖，不禁嘆一口氣咁講...

只見Professor佢有啲Dry咁喺度食炒麵...

「有啲掛住以前喺度Exchange嗰陣嘅日子...」Jennifer突然認真咁講...

『Exchange？』

「你係鬼嚟Exchange... 你嗰陣係過嚟窺探人類嘅生活同埋知識水平咋嘛！」Professor佢不滿咁講！

聽佢咁講... 似乎Professor都知道Jennifer嘅秘密？

「喂吖... 咪篤穿我啦... 不過我嗰陣就係發現咗，呢度嘅人群當中，有一啲好特別嘅人。佢哋堅持用返一種佢哋原本講嘅語言。人數唔多，但係我每次都感受到佢哋嗰份堅持... 」Jennifer佢認真咁喺度形容...

『廣東話？』我諗佢所講嘅嘢... 係僅餘留返落嚟嘅XG人...

「嗯，所以開初我見到你嗰陣，我都覺得阿恆你好特別。我係因為俾佢哋呢份堅持打動咗，所以先決心學廣東話。」Jennifer點點頭咁望住我，就好似佢認定咗我咁...

呢個時候，Professor佢拎電話出嚟，望住玻璃大學嘅情況...

只見紅色點已經去到R Core... 完全符合Professor佢嘅預料...

如果唔係佢帶走我同Jennifer嘅話，班PLA實認到Jennifer出嚟！

等等先！佢哋上R Core嘅話，會見到Professor部無人機架喎！

到時認得出嚟點算？！

『Professor！你部無人機！』我激動咁講...

「哦... 一早俾我肢解咗啦～ 你唔係覺得我咁蠢吖嘛？PLA佢哋俾咗成日時間我，我仲唔消滅證據咩？」Professor佢完全唔意外咁講...

我四處張望... 突然！我發現咗一啲令到我毛骨悚然嘅影像！

而家係就快日落嘅時間... 我隱約望到出面嘅景色...

但係點解舊Can對住出面泳池嘅玻璃無晒磨砂貼紙嘅？！

『Professor... 啲磨砂貼紙...』我指住玻璃嘅位置...

「嗯？吖係吖。呢度重新裝修過嚟～ 班「膠層」話想呢度整得優雅啲，等大家食嘢嗰陣可以望住人哋游水嘅美姿喎...」Professor佢不以為然咁講...

屌！大家知唔知點解有磨砂貼紙吖？

係因為當時有人曾經喺泳池浸死過，之後就有人見到鬼...

不過而家睇落就正正常常咁...

我細心啲望住出面... 喂等等先？

我見到出面泳池有人喺水入邊抽筋！

有啲嘢諗緊
今晚未有 聽日先出

更新到Chapter 96

Chapter 96 後遺症

我見到出面泳池有人喺水入邊抽筋！

『喂，佢咁樣唔對路喎！』我指住泳池嘅方向同Professor講！

「吓？」Professor佢有啲疑惑咁望住我...

跟住佢轉身望一望泳池嘅方向...

『你見唔到泳池嗰度有人抽筋咩？咁搞法會浸親架喎！』我見到佢已經喺度掙扎緊... 大佬你越掙扎就越沉架咋！

「吖恆... 今日泳池無開架...」Professor佢突然拉一拉我，細聲咁講...

等等先... 佢嘅意思係...

我撞一撞Jennifer！

『你見唔見有人抽筋吖？』我喺心入邊問Jennifer...

Jennifer擰擰頭...

「我淨係見到有人喺度玩水咋喎... 邊度有人抽筋吖？」Jennifer都見到啲嘢！

我哋兩個驚恐咁望住Professor...

「你哋兩個... 係咪見到有嘢吖？」Professor佢細細聲咁問...

我都頓時感到不寒而慄... 姐係我眼前見到嘅嘢唔係真嘅？！

我哋慢慢咁點點頭...

「嗱，聽我講。專心食埋自己啲嘢，唔好再望啦。」Professor佢認真咁望住我哋兩個講...

我嘗試拎起刀叉... 但係隻手都震埋...

慢慢喺度切份西多士...

「洗唔洗我同你哋兩個調位吖？」Professor佢細細聲同我哋兩個講...

『唔好啦，我哋食埋嘢就嗱嗱聲走。』我驚到其實就快食唔落...

我再望一望... 咦？抽筋嗰個人消失咗！真係好奇怪！

但係無可能嘅！我肯定我頭先見到佢！

「可唔可以講下，你哋兩個究竟點樣執到嗰隻樣本容器返黎？」Professor佢轉移話題，嘗試令到我哋放鬆啲...

跟住Jennifer就描述返俾佢聽...

當時我哋郁都郁唔到，係有個神秘嘅身影執起放喺我哋手上...

「嗯... 嗱。我對於靈魂，鬼怪嘅嘢... 冇咩研究嘅...」Professor佢略有所思咁講...

「但係我思疑... 你哋應該係接觸完G-Particle之後先開始見到嗰啲嘢。」Professor佢喺度分析緊...

「冇理由，我以前都可能有接觸過，阿恆佢都可能有。點解要係今次呢？」Jennifer佢不解咁講...

「你哋接觸到嘅應該係污染咗嘅G-Particle，有機會係有雜質，改變咗佢嘅特性...」Professor佢喺度推論...

『我哋帶過嚟嗰隻容器，你已經研究咗？』等等... 唔係話要交俾米國嘅咩？

「我已經寫咗email俾米國，佢哋批准我抽50 gram嘅樣本出嚟研究... 我趁你休養緊嗰陣已經做咗啲分析。」Professor佢原來一直都無停過！

「而家我已經研究到點樣喺嗰啲土壤入邊過濾返啲G-Particle出嚟。」Professor佢原來冇浪費過時間！

「暫時我手上已經有15 gram。係啦，你哋係咪想我研究啲G-Particle呢？與其要我估估下，不如話我知想我研究啲乜嘢啦，等我有個方向都好。」Professor佢認真咁望住Jennifer同我...

『欸...』我望望Jennifer，Jennifer望望我...

「恆，Professor係可信嘅，你可以講俾佢知。」Jennifer喺枱底拖一拖我隻手，望住我喺我心入邊講...

『Professor... 我諗你多少都知道... 我其實唔係屬於呢度嘅人...』我細細聲咁講... 深怕隔牆有耳！

『我有一日搭𨋢嗰陣，無意中穿越咗時空... 我原本係應該生活喺2021年嘅。』我如實講晒所有嘢俾Professor知...

「嗯... 果然。」Professor佢點點頭，滿意咁講...

「咁... 你掛住你以前嘅朋友仔同埋屋企人，想返去見佢哋？所以想我幫你研究G-Particle，睇下點樣送你返去？」Professor佢試探式咁問...

『嗯。』我都估唔到，佢會出奇地順攤...！

唉... 我又諗起Jenny...

仲有Ellie佢... 雖然都冇機會同佢再見架啦...

「我幫你唔係唔得，但係你要應承我一樣嘢。」Professor佢認真咁講...

「你喺未來呢度見到所有嘅嘢，返到去要隻字不提。仲有，你唔好諗住喺度同我開經濟通睇股票，返去買股票吖！我都費事你傻到All In搞到蝕錢，提定你先啦！」Professor已經講埋我想做嘅嘢！

『Ok... 但係點解先？』我認真咁問...

「就算我有辦法俾你返到去，你都要有心理準備有啲嘢會改變咗。G-Particle要令到物件穿越時空就好容易做到嘅姐，我花少少時間研究就應該會work。但係同一條時間軸上面，有好多個時空，我唔知佢會帶你去邊個。」Professor語重心長咁講...

「至於你選擇留喺度陪Jennifer，定係還是返去，甚至帶埋Jennifer返去... 我交俾你自己決定。」Professor佢... 吓？！ 我帶埋Jennifer走都得？

Jennifer佢都望住我... 其實我知道佢好想我留低嘅...

佢應該好愛我，想我陪佢一齊喺度保護海防嗰邊嘅大家...

「同埋，你臨走前要幫我將啲樣本送去米國手上，唔可以有差池。如果呢幾樣嘢你都肯應承我嘅話，我就幫你研究。」Professor佢認真咁望住我講... 似乎佢對我好有信心！

『Ok，我應承你，唔會利用呢度見到嘅嘢返去嘗試從中獲益，唔會同任何人講我喺度嘅所見所聞，同埋會安全咁將土壤樣本送到米國嘅手上。』我認真誠懇咁講。

「嗯。咁就乖啦恆。」Professor佢點點頭滿意咁講。

『咁... 我頭先見到嗰啲嘢... 你有冇辦法？』我再次諗起泳池嘅事...

「你身上應該有啲殘餘嘅G-Particle... Jennifer你都係。你哋兩個，一陣我帶你哋兩個去另外一個地方，要徹底清潔下。」Professor佢已經食完炒麵...

而我就掛住講... 仲有啲薯條喺枱面未食...

我嗱嗱聲食埋佢！

Professor佢拎起電話一睇... 然後點點頭。

「佢哋而家喺R Core落緊嚟，我哋行地底好啲。」Professor佢同我哋經地底嘅車路行...

跟住我哋嚟到Y Core... 呢度係實驗室...

Professor佢帶我哋行樓梯...？

「呢度嘅𨋢唔係我控制範圍，Jennifer你唔可以俾閉路電視見到你嘅正面。」Professor佢入Y Core之前認真咁同我哋講...

跟住只見Professor佢拎電話出嚟Call人...

「喂？阿謙... 係... 我有兩個guest，其中一個唔可以見光... 係...」只見Professor佢喺度同人傾緊計？

「要De-Contamination，你嗰層有冇設施？」Professor繼續問...

我哋身上嘅污染真係咁嚴重？

「污染物一定要處理好，絕對唔可以外洩。另外要你哋準備High Performance Liquid Chromatography部機，我有啲嘢另外想驗。」Professor佢要用上HPLC？！

嗰陣我聽啲藥劑嘅朋友講，部機係攞嚟做一啲化驗嘅... 但係詳細點樣用，我都唔知道！

原來Professor佢連化學都精通！

「好，好。我帶佢哋行樓梯上嚟。」Professor收線，然後示意我哋跟住佢...

Professor佢推開防煙門...

大家等等吖

更新到Chapter 97

Chapter 97 處理麻煩

幾經辛苦... 終於行完Y Core嘅樓梯...

我哋上到去一堆實驗室嘅樓層...

一打開門就見到有兩個着住全套防護衣物嘅人嚟迎接我哋！

「葉Sir你好，呢個係我嘅女朋友Sabrina。我哋兩個會幫你哋做Decontamination。」其中一個身影高大啲嘅人講...

「呵呵，又唔使咁大陣仗嘅... 佢哋身上嗰啲又唔係咩放射性物質... 不過辛苦你哋啦～」Professor乾笑兩聲，跟住示意我哋兩個跟住佢哋...

我哋嚟到一間房... 呢度周圍嘅門都係密封嘅...

入咗一道門之後，後面仲有另外一道門...

跟住仲見到周圍嘅玻璃都好厚，啲鐵門都係一樣...

就好似啲生化危機入邊嗰啲隔離房咁樣...

唔講我以為係毒氣室嚟...

「你哋兩個除衫先，衫放喺呢度...」佢哋兩個示意我哋喺呢間房除衫...

跟住佢哋出返去？

「入去之後首先用eye wash bottle洗乾淨你對眼，然後戴上護眼罩。」佢哋兩個隔著廣播系統同我哋講...

我望住Jennifer半裸... 佢喺度除緊件底衫...

我嘅下體不禁有反應... 我尷尬咁望望Jennifer...

「喂吖！正經先啦！」Jennifer扮嬲咁話鬼我！

跟住我哋照指示做，入咗下一間房之後就洗眼，戴眼罩...

只見牆上面有厚厚嘅玻璃，佢哋隔著玻璃下面有厚嘅手套可以穿過牆，操控呢度入邊啲嘢？

「嗱，我手上呢支係高壓水槍嚟，陣間你哋兩個要輪流過嚟俾我清洗，邊個先？」佢哋隔著玻璃同我哋講...

『我先。』我首先行前，Jennifer佢企喺後面望住我...

「沙...」一條一字型嘅高壓水簾打落我身上...

佢哋由頭洗到落腳... 連我嘅命根都唔放過！ 痛得我吖！

仲要唔止洗一次，佢哋來回洗咗我三次...

每次都飽受高壓水槍嘅衝擊... 真係同按摩冇分別！

跟住見到呢度嘅去水位好快就吸走晒啲水...

佢哋示意我過去下一間房...

原來呢度有衫俾我換... 係一啲化驗soc嘅衫嚟...

著落都幾好睇... 咁樣終於似返個大學生～

我出咗去之後，就輪到Jennifer...

我隔著玻璃望住佢俾人洗...

Professor佢睥住我...

「乜你咁變態架？中意望𡃁妹仔俾人洗吖？」Professor佢取笑我...

『哼，你咪又係望緊？』我又唔服氣...

「我真係覺得你係幻幻控嚟。」Professor你仲有口話我？！

「嘿，不過見佢咁中意你，你要好好照顧佢就真。」Professor佢語重心長咁講...

『嗯。』其實... 係咪Jennifer掉返轉照顧我咋？

不過見到Jennifer佢就好Enjoy俾人洗... 真係好奇怪嘅姐！

...

「麻煩晒你哋兩個就真。」Professor佢臨走前誠懇咁多謝阿謙同埋Sabrina...

跟住佢帶返我哋兩個落樓...

「我諗我哋仲有一樣嘢要做... 你哋跟我返去R Core先。」Professor同我哋經地底行過去QT嗰邊...

跟住我哋再經QT嗰度穿過去QR，跟住返到嚟R Core...

Professor佢做咗個手指擺喺嘴上面嘅手勢，然後行到去佢房門口...

只見房門半掩... 頭先Professor好似有閂門架喎？

「碰！」Professor率先推門入去，跟住第一時間唔係開燈喎！佢去咗搵電掣箱，然後熄晒間房啲電...

咦？透過出面反射入黎嘅光... 我見到間房有明顯被搜掠過嘅痕跡！

頭先班PLA真係有入過嚟！Jennifer拉一拉我隻手...

「唔好講嘢，間房可能俾人裝咗嘢！」Jennifer喺我心入邊講...

Professor拎起一支好似Jennifer之前用嗰啲天線插落電話... 然後喺度四圍揚下咁...

「唉吖，為什麼這麼亂呢？真奇怪...」Professor佢喺度自言自語...

跟住見到Professor喺度開始單手執嘢...

只見Professor佢突然拎起一個類似隨叉嘅物體...

跟住佢望一望電話，只見電話嘅讀數異常！

佢粒聲唔出，靜靜哋打開咗牆上個夾萬，將個隨叉放咗入去...

吓？乜個隨叉咁重要咩？

「碰！」Professor佢大力閂埋個夾萬... 繼續攞支天線周圍揚...

「搞掂！早你就收皮啦！」Professor拍枱鬧咗聲！

『其實發生咩事呢...？』我細細聲問...

「啱啱解決咗佢個偷聽器，頭先放入夾萬嗰個！」Professor嬲嬲哋咁講！

「PLA啲人真係呢... 都明知搞亂咗我間房，我返黎實會執房架啦！係都要多手放件嘢喺度，驚死我唔會發現咁！簡直侮辱咗我嘅智慧！」Professor佢懊惱咁喺度鬧...

『你講咁大聲... 佢會唔會聽到架...』我細細聲講... 然後指住個夾萬...

「哼。」Professor揭開牆上一道暗門，然後撳就個掣！

「隆隆隆隆隆隆！」聽到夾萬入邊有啲聲...

隔咗一陣，Professor佢打開夾萬...

只見入邊淨係得返一堆碎片...

佢攞個大垃圾筒過嚟，然後直接一手掃晒啲碎片落垃圾筒！

「妖！整污糟晒我個櫃！哼！」Professor佢發脾氣咁咒罵！

「好啦，搞掂晒。不過我哋仲有一樣嘢要做。」Professor佢終於認真落嚟咁講...

「為咗令到你哋兩個可以自由咁喺玻璃大學範圍行走... 你哋兩個要做多樣嘢。」Professor佢喺度翻找一啲嘢...

跟住佢攞咗條好大嘅USB物體出嚟，插落電腦研究...

「你哋一陣等天黑嗰陣，要入去VS入邊嘅保安控制室...」

「呢條USB你可以當係一個遙距控制嘅接收器... 你哋要將佢插落VS控制室嗰度部機。」

『但係點解唔可以就咁hack入去呢？』乜啲hacker唔係就咁打幾句command，跟住搵到漏洞就可以直接操控嘅咩？

Professor佢皺皺眉頭，但係就繼續耐心解說...

「嗰度嘅保安系統係同外界嘅網絡斷絕嘅... 佢哋會定期update人面辨識嘅database... 頭先PLA一嚟，恐怕已經順便上去update咗個database。」Professor佢繼續講... 我哋專心咁聽...

「Jennifer，你之前俾人捉嗰陣，佢哋有冇影你相？」Professor佢細心咁問...

Jennifer唔出聲，但係點點頭...

「佢個樣話唔埋已經上咗Database。可能兩日之內，如果Jennifer出現喺任何有CCTV嘅位置，CCTV就會立即通報NSD！」Professor佢面色凝重咁講...

但係保安控制室... 又點會冇人守住吖...？

『Professor，我哋係咪要... 殺人？』我小心翼翼咁問...

「相反，你哋一個人都唔可以殺。嗰度如果有任何一個人死咗嘅話，會令到NSD直接派人入黎！到時真係水洗都唔清！不過... 今次會有啲殘忍。」Professor佢拎咗另外一樣嘢出嚟...

「吖！！！呢樣嘢！點解！點解你會有！？」Jennifer
突然嚇到跳起大叫！