我唔覺意穿越咗時空 遇到個神秘女仔？！（2）

昨日心情久佳的，還有我。。。

更新到Chapter 84

Chapter 84 海底隧道

「嗯，陣間去到海底隧道嗰度交換。」Jennifer滿意咁點點頭，然後開車入太古城...

等等先... 太古城？？？ 唔通...

『Jennifer！你打算行東區走廊？』我驚訝咁問！

「無錯，我已經要求咗佢哋啟動雷達...」Jennifer單手指一指上面...

只見突然有一個黑影喺我哋嘅上空掠過！係我哋果隻改裝咗嘅偵測機！

「而家咁樣非常之安全，更何況我哋有Link 22。偵測機見到嘅嘢，除左會傳去總部之外，我呢度都見到。」Jennifer單手喺17吋玻璃螢幕上面撳咗個制...

*現時北約嘅部隊有一個叫Link 16嘅通訊制式，可以令到戰機同其他部隊之間互相溝通，效果就好似故入邊嘅Link 22咁...

跟住就見到偵測機嘅高度，位置，速度同埋佢偵測到嘅嘢...

仲見到架機讀到我哋嘅位置，show埋我哋喺地圖上面！證明個雷達係正常運作緊嘅！

Jennifer上咗斜路，左轉入東區走廊鰂魚涌段...

「你哋扣好安全帶架嘛？」Jennifer望一望綽姿同埋佢個拍檔...

大佬吖... 你揸緊車架...

「嗯。」綽姿冷淡咁答... 我都望一望，我都有扣嘅。

「隆！嗚嗚嗚嗚嗚嗚！」我嘅身體猛然被大力向後一拋！

Jennifer突然嚟一個地板油，Model X Plaid就如狂牛咁加速！我甚至感受到我啲內臟好似有嘢壓住咗咁！

「嗚！」綽姿都忍唔住慘叫咗一聲...

我眼瞄一瞄17吋螢幕，只見短短3秒之間我哋已經上到時速150公里！Jennifer仲未有減速嘅意欲！

「隆隆... 隆隆... 隆隆...」不停聽到避震碌過天橋接駁位發出嘅聲響...

我不禁心跳加速... 而家就好似坐飛機喺跑道加速起飛咁...

只見我哋已經嚟到北角，過咗ICAC，去緊我平時搭110果條路線...

跟住就好快穿過咗炮台山隔音屏障嗰段... 見到右手邊灣仔繞道隧道入口全黑...

我個身被大力壓向左面... Jennifer佢上咗斜路，高速轉右去告士打道！

只見告士打道上面有幾架廢車... 可惡！其中一架塞住咗轉上紅隧嘅天橋入口！

「嗚吱吱吱！」Jennifer大力剎車！好彩有安全帶箍住我姐！

如果咪我已經憾咗落車頭擋風玻璃度！

平時搭110果陣... 通常巴士都會經海灣道...

「切...」Jennifer發出不屑嘅聲音...

『Jennifer，試下轉右前面天橋。』我指一指海灣道天橋...

Jennifer唔出聲，慢慢扭軚轉右，然後沿著海灣道果邊...

「前面再轉右...」我教佢行返巴士條路線...

咦？呢度有會展站？我之前搭車經過果陣好似仲剪緊鋼根架咋喎...

只見我哋左手邊係一個大型嘅廢車場... 堆滿咗好多架廢棄嘅雙層巴士喺度...

呢度原本係灣仔北巴士總站嚟架喎... 點解會搞成咁...

跟住再見到前面變左做一個廢棄碼頭，有圍欄圍住...

呢度之前唔係比啲情侶嚟玩下船仔嘅咩？

跟住再見到前面... 係海底隧道CROSS-HARBOUR TUNNEL。

兩邊嘅出入口都有廢車... 對面嘅出口嘅廢車殘骸...

外形係坦克同埋裝甲車！ 痴線！似乎PLA曾經用裝甲車喺對面岸經隧道攻過嚟！

跟住我哋呢邊嘅行車線... 我見到地下有一條係水管嘅物體？

只見水管一直伸延到漆黑嘅隧道入邊...

奇怪啦... 佢哋究竟喺隧道入邊搞乜嘢呢？

Jennifer停低咗架車，跟住望住綽姿佢...

「綽姿，係時候交換啦。」Jennifer拎起紅色嘅水晶，示意佢攞把劍過嚟...

綽姿拉一拉佢個拍檔... 個拍檔立即手忙腳亂咁搵返自己把劍出嚟雙手交比Jennifer...

跟住Jennifer放手，啲水晶交咗比綽姿...

綽姿佢滿意咁點點頭。

「係時候話我知你想帶我去邊度啦。」Jennifer問佢...

綽姿佢唔出聲... 唔通佢想反口？！

「我提醒你，如果你而家唔講，條隧道係用唔到嘅。」Jennifer竟然會有呢一着？！

但係佢點樣做到令到條隧道用唔到吖？？

「軍營，近海底隧道嘅。」綽姿冷冷咁拋下一句... 跟住要我哋兩個落車調位...

竟然比Professor Y估中咗？！

「好，今次我信你。」跟住Jennifer落咗車，去咗隧道旁邊嘅水管...

跟住佢去打開隧道牆身一道鐵門... 見到有個儀表板？

我都好奇咁望住... 呢度有電壓計，仲有呢個寫住係水泵嘅開關？

只見電壓計指住0V... 呢度完全無電...

正常吖，港島區嘅電力都停咗... 淨係得返海防果邊先有電咋嘛？

「海底隧道本身係會不停滲入地下水。當時我哋為咗避免PLA再利用隧道攻過嚟，專登炸毀晒啲泵水設施，令到條隧道自己水浸。」Jennifer一度講... 跟住拉咗個電閘！

佢拎起電話嘅app... 撳咗啲嘢？

「噠！」個儀表板有啲聲，跟住著咗燈？！

380V！佢哋竟然係用3-Phase高壓電？同埋點解呢度有電架！？

「隆隆隆隆隆...」我聽到附近有啲機器喺度運作緊..

「估唔到之前擺部發電機喺度，今日會用得上場添...」原來隆隆聲就係發電機...

我沿著水喉伸延嘅方向一度行... 見到條水喉駁到去碼頭果邊... 而家喺度排緊啲水出嚟！

Jennifer揮手示意我返嚟上車...

「綽姿，而家條隧道排緊水，5分鐘之後就可以用。但係入邊可能仲有啲廢車，你行果陣要小心啲。」Jennifer再三叮囑綽姿...

「嗯。」綽姿依舊冷淡咁答...

「仲有，你唔好諗住我而家開返條隧道出嚟，你啲PLA就可以乘機攻過嚟。我只係set咗15分鐘時間比你過隧道，跟住個水泵會抽返晒啲水嚟浸咗條隧道佢！」Jennifer呢招真係好絕！

佢連綽姿可能利用自己嚟開返條隧道都諗埋！

「仲有綽姿，拎住佢。恆，你都係。」Jennifer遞咗個手提式氧氣罩比我？

點解吖？？

「隧道入邊無通風嘅情況下，一來唔會有氧氣，二來可能有沼氣。唔想暈低嘅話就戴著佢。」Jennifer認真咁講...

等等，咁Jennifer佢自己呢？！仲有綽姿個拍檔呢？？

「欸... 欸？我... 我有冇架？」綽姿個拍檔有啲唔好意思咁問Jennifer...

「無。你同阿恆佢輪流用啦，如果阿恆肯嘅話。」Jennifer冷冷咁拋下一句。

『Jennifer你呢？！』我有啲驚訝咁問！佢又想犧牲自己嚟保護我？！

Jennifer對眼突然一紅，望一望我...

「我吸氧氣嘅份量少過你哋地球人好多。」Jennifer把聲喺我心入邊...

「吞噬，我唔會用，呢個比你。」綽姿佢拎咗個氧氣罩比佢拍檔...

「綽姿，架車比你揸。」Jennifer坐咗上車頭乘客位...

「阿恆，你唔好坐喺度，訓喺車尾地下。」綽姿擰轉身同我講？

點解先...？ 但係綽姿佢咁惡我唔敢問，唯有照做！

「欸，我唔會踩到你吖嘛？」綽姿個拍檔有啲唔好意思咁問我...

其實都睇得出佢係一個好人嚟... 唔知點解淪落到要做僱傭兵呢？

「夠鐘，而家你有15分鐘時間過隧道。」Jennifer望一望手機，跟住同綽姿講...

「嗚...」Model X慢慢起動，開始落斜駛入海底隧道...

cool table唔使吸氧氣咩？

但cool table而家精神化咗咩？

我同你情況一樣，提唔起勁去更新，好多野想做，想構思，但又唔知等咩?

算唔算抑鬱，應該未算，但成個人好似重組緊，知道有D野迫在眼前要處理，但冇動力，甚至有少少想放棄，又發埋D反映內心想法嘅夢，令我有更多困擾。。

你明我困擾緊D咩?🥺