我唔覺意穿越咗時空 遇到個神秘女仔？！（2）

Chapter 66 急才

我再細心研究激光炮嘅炮身... 只見有兩個大窿？好似刻咗啲字喺上面...

COOLANT INLET PORT， COOLANT DRAIN PORT！

係冷凍劑嘅連接口！但係我哋要冷凍劑！

我突然靈機一觸！

『Jessie，我哋要落返去，試下拉條消防喉上嚟！』我指示Jessie向下爬！

「我喺度等你啦。」Jessie示意我自己落去...

『你...』佢一個人喺度會唔會好危險...

「我唔怕吖，你快啲落去吖，陣間我呢度可以照應你吖嘛！」Jessie示意我爬落去...

我自己爬落去，跟住道梯好似識得自動向下咁... 唔使我繼續爬落去...

我經石屎隧道跑返出去大本營... 跟住望下有冇紅色嘅水喉...

「Jennifer，Laser已經到182度... 而家仲有7個target，係咪繼續？！」聽到Angie同Jennifer講！

「阿恆佢哋應該整緊架啦！繼續用！」係Jennifer把聲...

「恆？！你做咩落嚟吖？」Jennifer見到我！

『水喉！我哋要消防喉！』我周圍搵緊紅色嘅消防喉...

跟住比我見到牆角有一大碌！

『有無水架Jennifer？！』我指一指牆角嘅消防喉！

「等等，Jackey！去幫佢開掣！」Jennifer企喺Angie果邊，但係同時指示另一邊嘅Jackey做嘢！

「呢個係53號... ok，我call泵房果邊！」Jackey過咗嚟望一望我果邊嘅消防喉碌，跟住就返咗去位拎起電話...

我都唔敢怠慢，立即拎起消防喉跑過去梯果邊...

「恆，接住！」Jackey突然拋咗一件物體比我！

係一個對講機！我立即將佢放入褲袋！

然後一直用力拉條水喉去到鋼梯果邊上去...

一定要快啲！我已經見到上面有光... 仲有啲燶味...

Jessie見到我喺下低上緊嚟，跟住打開咗上面個蓋...

佢幫手接著條水喉，我再爬上去...

突然感受到條水喉變得好硬！應該係有人開咗水掣！

我哋兩個夾手夾腳將條水喉接咗上炮座嘅水喉port！

「小心熱！」Jessie突然伸手扶住我，深怕我會失平衡掂到個激光砲台！

佢真係好細心...

『好，開掣！』我大力一扭消防喉上面嘅拉桿！

「吱吱吱沙沙沙沙！」係啲水熱到變蒸氣嘅聲！

我拎起對講機：『Laser而家注緊水，有冇改善？』

「而家維持咗喺173度... Target... Fire！」我聽到背景有啲雜音！

佢哋想再開火！

『Jessie！扒低！』今次到我拉佢扒低再掩住眼！

「嗚吱吱吱！」再次聽到激光炮發射嘅聲音... 我就算掩住眼都見到有紅光！

「嗚吱吱吱吱吱！」「轟隆隆！」似乎今次唔止發射一炮！

『Jessie，我哋應該搞掂咗啦！落去囉！』我拉一拉佢...

「嗯~」Jessie首先爬落去...

我喺上面跟住佢一齊爬... 跟住道鋼梯慢慢咁自動降落去...

我沿途都小心避免個身掂到條水喉...

跟住我哋兩個都落返去石屎隧道果邊...

『Jessie，好彩頭先有你幫手咋~』終於明白點解Jessie會選擇留喺上面...

「唔係吖，阿恆你都好犀利，用消防水喉呢招竟然咁快比你諗到！比在我都未必諗到吖！」Jessie笑面盈盈咁答我...

我哋行返出去大本營嗰度... 只見Jennifer仲好忙咁指揮緊！

「Laser維持喺150度，暫時唔再過熱。」Angie向Jennifer匯報...

「咦？低咗啦喎？似乎吖恆佢搞掂咗！」係Jennifer把聲... 跟住佢望到我同Jessie啦！

『無錯，我將條水喉駁咗落coolant port啦。』我即刻同Jennifer匯報！

「好，盡力用Laser啦！恆，你睇住嚟！」Jennifer好hyper手舞足蹈咁講！

「Angie，Laser改用pulse mode，我要認真啦！」
Jennifer對住Angie咁講...

『「吓？！你頭先未認真架？！」』Angie同我都驚訝咁望住Jennifer講！

「未架~！」Jennifer突然行到Angie部機面前，跟住撳咗幾個掣...

跟住佢索性坐埋Angie個位，Angie企咗喺我隔籬同我一齊望住Jennifer「表演」...

「但係Pulse Mode我哋從來都未用過架喎... 應該咁講，就算Lockheed Martin嘅工程師都話佢哋未試好晒架喎...」Angie都有啲驚咁講...

只見Jennifer無出聲... 跟住喺個畫面好快咁撳咗幾個掣...

「人類，你哋唔可以一成不變。」Jennifer冷笑一聲！

跟住出面突然好似不停閃電咁！不停地有紅光係出面照射！

支Laser好明顯開得勁咗同埋光咗好多... 只見Angie都呆咗咁望住Jennifer操作...

「嘿嘿嘿~」Jennifer摩拳擦掌咁係咁撳撳撳！

「1032，1033，1034... 嘻嘻嘻嘻~」Jennifer一度撳，一度自言自語同埋怪笑...

呢個狀態嘅佢... 真係好詭異！

大本營出面望到就快日落... 但係有激光嘅不停照耀之下... 就算日落未都乜分別！就好似不停閃電咁，但係個閃電係每次都劈喺你附近！

「呢支應該係第22支導彈啦！」Angie有啲驚訝咁講...

痴線！佢哋淨係用Laser已經打咗咁多飛彈落嚟，完全無用過槍同埋火箭炮攔截！

「無晒目標啦...」Erika望住雷達畫面同Jennifer講...

只見出面已經天黑... 無咗激光嘅照射之後終於發現原來已經變左夜晚...

「肯定唔係你個嘢壞咗？」今次到Jennifer問呢條問題...

「肯定唔係。等等，有啲嘢喺空中...？」Erika又再見到啲嘢...

「鎖定目標，打佢落嚟！」Jennifer諗住撳掣...

「咪住！係西北面... 離遠緊我哋喎？」Erika制止咗Jennifer...

「咩嚟？」Jennifer意識到自己都衝動咗，稍為收斂下...

「咦？消失埋添...」Erika有啲疑惑咁講...

「你肯定你無眼花？」Jennifer覺得有啲奇怪...

「我真係見到吖！我做咩要呃你姐！？」Erika都有啲唔耐煩咁講！

「嗯，如果再有異樣就同我講。」Jennifer嘅情緒都稍為平復咗落嚟...

「欸... Jennifer... 我個位...？」Angie都有啲唔好意思咁問Jennifer...

Jennifer頭先一直都係坐著Angie個位...

「吖... Sor Sor Sor... Angie，我比返你坐...」Jennifer唔好意思咁企返起身，讓返個位比Angie...

Angie又怕醜唔好意思講... 但係又照Jennifer嘅意思...

我撞一撞Jennifer手臂...

好Hyper喎你~ 我係心入邊同佢講...

「無計... 我個人一進入狀態就會好似頭先咁樣... 奇奇怪怪好似跳咗掣咁！你會唔會覺得我好怪架？」Jennifer認真望住我，好似好怕我嫌棄佢...

咁多多少少都...

「希望你唔好介意我咁樣啦... 我有時都控制唔到架。」Jennifer無奈咁講...

其實佢咁樣都有啲似我做數果陣...

有時做做下，一進入咗狀態就會喺度好hyper咁自言自語，一度計一度講嘢咁！

所以佢果種狀態我都總算可以理解~

「我返一返房休息，呢度暫時交比你先Angie...」Jennifer打咗個大喊路...

跟住拖住我行過去石屎走廊果邊...

只見走廊嘅燈仲係紅色嘅... 似乎仲係用緊慳電模式。

「咦，點解滴水嘅？」我哋面前嘅地下濕咗一大片...

更新到Chapter 67
新post 一次過出兩篇！

Chapter 67 神秘援手

「咦，點解滴水嘅？」我哋面前嘅地下濕咗一大片，Jennifer拉一拉我，問我...

『欸...』大鑊... 我頭先條水喉淨係插住輸入果邊...

啲水要流返出嚟架嘛... 跟住我無理到輸出嗰度...

「我上去睇下...」Jennifer示意我爬梯...

跟住我哋兩個慢慢上去...

只見成個天台水浸咗... 啲水仲要有啲熱...

見到支Laser個底座仲喺度滴緊水... 非常之狼狽。

「呢個又唔怪得你嘅，天台乜嘢都無，暫時咁樣係最好嘅解決辦法。你咁短時間improvise到一個咁嘅solution都唔錯架啦。」Jennifer喺度打量住天台嘅情況...

『你呢啲淡水嚟架嘛？如果我哋直接喺海邊抽鹹水咪仲方便囉？又唔會咁浪費...』我喺天台望住鯉魚門海峽，突然先醒起...

「唔得！海水入邊嘅Salt係電解質，會加速金屬機件氧化！」Jennifer即刻ban我！

『咁如果我哋喺海入邊嘅水域set一條水管用嚟散熱，將呢度嘅熱水泵過去一個heat exchanger，冷卻咗之後再泵返黎！咁咪得囉！』就好似電腦水冷散熱咁！只不過係大型版嘅水冷！

「唔錯嘅諗頭... 我哋有時間叫工程部果邊試下。」Jennifer之後拉我爬返落去...

『至於呢度...』我留意到隧道入邊都有去水位，條路無水浸，但係似乎地下仲係濕咗一大片...

「唔係大問題。」Jennifer拖住我返到去佢房...

「吖~ 好攰...」Jennifer成個細路女咁...

一見到張床就大字型咁攤落去訓... 同頭先好型好認真嘅佢真係好大返差...

至於我就喺度用Jennifer部電腦上網...

我都想了解下而家嘅香港...

我開咗個Brave Browser... 開張XG01嚟睇下先...

「某國外交部：強烈譴責某國港島賣港分裂組織煽動...」

係話緊我哋？我Click入去睇下... 係一條片？

只見某國嘅外交部人員又喺度讀稿...

「某國XG港島的分裂組織聯同西方外國列強赤裸裸地違反國際法！持續侵佔，霸佔某國自古以來的領土。某方，堅決反對！予以最強烈的譴責！並會採取一切反制措施。必要時依法使用迅速，有效的武力收回領土！保衛國家領土主權完整，是天經地義的，是...」（省下1000字廢話）

我再click落下一篇睇...

「某國XG九龍區百姓獲政府派發消費券... 該區百姓指現時生活安好，何必要打仗... 反而勸告還在港島區「避難」的難民起來推翻支持分離主義的勢力，擁抱小直區的懷抱...」（又再省下1000字廢話）

哼，XG01去到2035年都係官媒嚟！只係藍色logo定係紅色logo嘅分別！

我再打開BBC睇... 好彩呢度都係用Starlink，上到外國網站姐！

「Live: Asymmetrical warfare in Hong Kong...」咦？頭版竟然有講香港？

我仲以為日落帝國已經無再關心我哋添！

「1 Hour ago, MAXAR Satellites shows missile launch from PLAN's South Sea Fleet...」

「Allied countries and Russia have been equipping the defenders on the island with numerous defensive systems including the S-400... US Defense Company, Lockheed Martin has allegedly shipped prototype weapons to the island... BBC cannot independently verify this claim...」

「Analysis: Will the west retrieve their lost soil samples despite their immense support for the Island?」

竟然話有神秘武器...

咦？突然彈多咗一篇出嚟！有相嘅！

「Just now: MAXAR Satellites shows multiple explosions on the PLAN South Sea Fleet... the cause of explosions is unclear... BBC has reached out for comment from the Defense Ministry of...」

只見張相影到有多兩架驅逐艦著咗火爆炸，海面嘅油污燒着咗... 其他戰艦離開咗formation避開海上著火嘅油污...

有神秘勢力攻擊佢哋？！唔通係米國佢哋出咗手？！

會世界大戰架喎！

我望一望Jennifer... 佢好似訓得好冧，唔知嘈唔嘈醒佢好...

呢個時候... 我諗起Erika。

每次有咩事，Jennifer都唔得閒果陣我就會搵佢...

佢比我嘅感覺係一個好可靠嘅人...

『Erika，我睇到啲嘢，你介唔介意過嚟望下...』我行咗出去搵佢...

「嗯？而家似乎ok... Angie，我行開一陣。」Erika望一望佢個screen，確保無敵方嘅目標之後先跟我返Jennifer房...

我開咗段新聞比佢睇...

「咦？呢個係咩網站嚟...？」Erika見到嗰啲相... 好奇咁問我...

『BBC囉？竟然會有人未睇過？』乜有人未聽過日落帝國廣播公司架咩？！

「我哋以前嘅新聞淨係睇開XG01，武X，小X嗰啲報紙... 從來都唔會接觸到外國媒體... 更加唔會知道呢個網站名啦...」Erika嘆一口氣... 就彷彿佢承認自己無知咁...

『又啱... 你之前生活喺你果個世代... 又好難去怪你真係未睇過嘅... 英文你可以嘛？』我忘記咗...

未來嘅香港可能連網都封埋，佢哋喺一個咁嘅教育制度之下成長... 又好難怪佢嘅... 都怪我唔夠細心！

「我ok架，話晒雅思考試都攞8.5，難我唔到。之但係點解你又會知道有個咁樣嘅網站嘅？」Erika眼仔碌碌，表情有啲可愛咁望住我問...

「你講到話咩我生活喺我果個世代... 但係我睇你好似仲細過我幾年喎...？」我頓時覺得Erika嘅眼光好尖銳...

死啦，係我講錯嘢，洩漏咗自己嘅身份添！

但係如果係Erika嘅話... 我話唔話比佢知好呢？

嗯...

『我比你睇一樣嘢...』我去咗攞我個銀包... 跟住攞咗我張身份證出嚟...

「你係1999年出世嘅？！你仲大過我喎！」Erika望住我張身份證，再望下我，佢嘅表情十分驚訝！

「但係你個樣點睇都唔似36歲喎！你36歲嘅話肯定成個中年阿叔咁！」Erika完全唔敢相信眼前嘅我！

『所以問題就嚟啦，點解我個樣同張身份證仲係差唔遠呢？』我指一指我身份證上面嘅簽發日期...

Erika靜咗一陣喺度沉思... 跟住開口答我。

「我講出嚟你唔好笑我吖！」Erika認真咁望住我...

『隨你~』我就想睇下佢有咩結論...

「我大膽假設，你係穿越時空嘅人！」Erika真係估中咗！

「你係咪間諜！究竟過嚟我哋呢度想做乜嘢？！」Erika突然認真盤問我...

『你冷靜啲先... 實質發生咗咩事... 我而家都唔係太清楚。我之前只係正常咁生活，跟住無啦啦過咗嚟... 又遇到Jennifer佢...』我如實咁解釋...

「Jennifer係你嘅救命恩人，所以你就咁迷戀佢？我話你知，佢嘅背景都唔簡單架喎~」Erika嘅語氣稍為緩和...

『我都知佢唔簡單... 係啦，你可唔可以幫我保守秘密？』我其實都唔係太想咁多人知呢件事...

「當然可以吖，嗱~」Erika伸出手指尾同我勾一勾...

「吖，唔記得咗細心睇張圖添...」Erika醒起其實我叫佢入黎係睇啲嘢... 佢尷尬咁傻笑...

「竟然又多兩架驅逐艦爆炸著咗火... 唔怪得佢哋嘅攻擊停咗落嚟啦...」Erika細心咁研究張圖...

「嘻！你同Erika講咩講得咁開心吖？」係Jennifer把聲，我仲聽得出佢好似帶有妒忌嘅語氣！

就快文盡人亡啦！

好攰

辛苦你啦

得閒就入黎睇文啦～