我唔覺意穿越咗時空 遇到個神秘女仔？！（2）

你覺得呢個係主因?

“可能佢內心係逃避緊一樣一旦要面對嘅話會令到佢崩潰嘅事（佢自己唔會知）”

或者因為發左個夢，提示緊我係一直逃避呢樣野，所以導致我有呢種情況。

的確，一直付出唔去理會有否回應，可能係自欺欺人的所謂“使命”，當夢同現實都面對同樣情況，確實令人不知所措，同選擇去逃避，畢竟，越了解一個人，就越會知道，什麼是。。。

明白🙇‍♂️🙇‍♂️

每個人都有陰暗面，收藏於潛意識內唔敢面對的人和事，這刻未能突破缺口，係暫時性。。

更新到Chapter 85

Chapter 85 交收

「嗚... 隆隆... 隆隆...」而家綽姿開車...

感覺上綽姿佢揸車穩定好多，無Jennifer咁狠～

架車突然猛烈搖一搖！

『嗚！』我個頭突然撞一撞車身嘅地板...

「綽姿，睇實隧道入邊嘅廢車吖。」Jennifer溫柔咁提醒佢...

就算Jennifer而家已經被「挾持」都好，似乎佢已經冇之前咁仇視綽姿...

「嗯。」傳嚟綽姿回答嘅聲音...

以而家嘅時間嚟估計，我哋應該已經過咗隧道一半...

而家得返車入邊嘅燈... 我望一望上面嘅車窗...

出面全黑，除咗車頭照光嘅位置...

跟住我感受到，綽姿佢好似減慢咗車速...

「吞噬，拎住，唔好用住。」綽姿佢轉身遞咗其中一粒紅色水晶比佢個拍檔....

佢個拍檔係叫吞噬？

點解我覺得個名咁中二病嘅... 不過比綽姿知我咁諗嘅話，實斬到我手斷都似！

跟住我偷偷望到綽姿佢用力一握紅色水晶... 佢身上散發住紅色粒子...

然後綽姿繼續開車...

過多陣，只見前面開始有光... 係紅磡果邊嘅出口！

我好奇咁除咗個氧氣罩，半身坐起身望...

只見隧道收費廣場嘅閘口全部都係著紅色交叉燈！

綽姿佢停咗車...？

跟住...！呢座係... 巨型機械人？ 只見有幾座3-4米高嘅人型裝置！佢哋手上都有加特林機關炮！

「阿恆你做乜嘢吖！！我唔係叫咗你趴低咩？！陣間比啲Cyborg見到你點算吖！」綽姿通過倒後鏡見到我，跟住鬧我！

嗰啲叫Cyborg...

『吖... Sor Sor Sor...』我嚇一嚇，即刻趴返低！

跟住綽姿個拍檔攞件長袍蓋住我...

「你已進入禁區，沿路折返，否則後果自負！你已進入...」出面隻Cyborg不停重複廣播段說話...

「你唔快手嘅話，佢哋會開炮架...」Jennifer有啲驚咁講...

唔通Jennifer佢以前都見過呢啲Cyborg？！

我聽到綽姿好似喺度搵緊啲嘢...

...


隔咗一陣...

「目標已確定，獲准通行。」我聽到出面傳來同一把聲...

跟住感受到綽姿佢慢慢開車...

我呢個姿勢無辦法望到車窗出面... 究竟綽姿佢係咪真係帶我哋去槍會山軍營呢？！

我感受到綽姿佢直去，跟住轉左...？

而家我哋應該係向油麻地方向... 跟住綽姿佢停咗車...

我聽到紅綠燈聲... 真係好耐無聽過啦！

跟住我聽到出面好似係有人拉開鐵閘嘅聲...

我哋架車慢慢駛上一條斜路... 停咗喺度...

「咯咯咯！」有人敲敲Model X嘅車窗...

我聽到綽姿放低Model X嘅車窗...

「GD份子首領在哪？」聽到有把粗獷嘅聲喺度問...

「呢度，你自己望，貨真價實嘅GD分離份子首領。」

「100萬Sil，如果咪我唔會交佢比你。」綽姿依舊冷淡咁回覆佢...

聽到靜咗一陣...

「不錯。人來，抓上去！」嗰把粗獷嘅聲講！

聽到另外一度門打開咗！

「嗚吖！痛吖...」Jennifer佢突然被人暴力咁捉咗落車！

「碰！」換來嘅只係一聲大力閂車門嘅聲響！

Jennifer！我突然激動，正想大叫！

綽姿嘅拍檔一隻臭腳踩住我把口，唔比我發聲！

「這個給你。」聽到嗰把粗獷嘅聲喺度同綽姿講！

「啪！」係一下類似手機撞到嘢嘅聲...

交易完成？

「咯咯！」係後座窗門被敲打嘅聲！

「還有，這個是誰？」嗰把粗獷嘅聲突然咁問！

大鑊！唔通係見到我？！死啦今次！

我驚到個身都震埋... 死啦，我會唔會連累埋綽姿佢哋架！？

「我拍檔。」綽姿好冷淡咁講...

跟住靜咗一陣... 佢喺度打量緊後座嘅地方？

我郁都唔敢郁，又唔望得佢喎！

「真想不到你會有這種瘦弱拍檔～」把粗獷嘅聲略帶嘲諷咁講...

似乎唔係發現咗我... 還好還好...

不過佢話緊吞噬佢瘦弱？ 好mean囉...

我感受到綽姿佢倒車... 跟住佢駛上第二條路？

「佢... 阿恆佢係咪可以出嚟啦？」吞噬有啲驚青咁問綽姿...

「嗯。」綽姿似乎唔係太理...

我坐返起身... 只見綽姿佢駛咗上彌敦道...？

等等！我仲要去救Jennifer！

咦？！我哋身邊突然有一架全白色，閃住藍燈嘅車高速駛過嚟！

白色車身上面印住「武警」兩隻字！

武警警車突然一個抽頭，攔截咗Model X！

綽姿想cut線迴避，但係隔籬原來仲有另外一架武警警車包抄我哋！

綽姿無奈之下停咗車...

『咁大鑊...』死啦... 肯定係俾佢哋認到架車唔係九龍嘅車啦！

架Model X改裝到咁嘅款，一睇就知喺港島偷過嚟架啦！

咁樣會唔會俾人拉架我哋...

兩個着住軍綠色服裝，手持暗灰色聚合物製步槍嘅武警落咗車，其中一個用槍指住車頭玻璃後面嘅綽姿，

另外一個就行近駕駛座，要求綽姿放低車窗...

「你的車輛屬於非法改裝，立刻展示駕駛執照，並配合警方調查！」我聽到個武警同綽姿講！

突然，我見到綽姿對眼發住強烈嘅紅光！

情況就同之前啱啱同佢交手果陣一樣！

「唔好阻住我做嘢。」綽姿沉住聲咆哮！好恐怖！！

吓？！我見到個武警嚇到面色一變... 跟住連續退後兩步！？

「啊！抱歉抱歉！」個武警立即九十度鞠躬，然後示意另外果個武警駛走架警車，唔好阻住我哋...

有冇咁犀利吖...？！綽姿佢嘅影響力，係可以令到武警都要降服佢？！

難道SPIRIT組織凌駕於某國武警？！

『欸... 綽姿... 我哋去緊邊吖而家？』我見佢一直沿著彌敦道行... 已經去緊油麻地眾坊街！

但係我要返去玻璃大學果邊架！我仲要救Jennifer呢！

「屯門，我要返去恆順果邊。」吓？！屯門？！

『阿... 吞噬？你呢？』我有啲尷尬咁問...

「欸... 我... 我諗住陣間行返去V City嗰度...」吞噬佢細細聲咁講...

『我要去救返Jennifer架！』我嚴正咁講！

「我有應承過會救佢咩？」綽姿喺路邊停低咗車，冷冷咁用紅色嘅雙眼望住我...

『你唔理嘅話，等我嚟救！』我不滿咁講！

吞噬佢望住我... 好似有嘢想講，但係又唔出聲...

「如果... 如果你有命嘅話... 攞返過嚟... 屯門V City俾我啦。」吞噬佢拎咗件長袍，同埋交咗粒紅色嘅水晶俾我...

佢... 想我用SPIRIT嘅力量？！

唔掂啦
得返10篇存貨
我好似真係追唔上進度

重組了!!

當。。真實的一面都接受到，

還有什麽會令自己陷入崩潰的呢?!

認識內，享受表面，繼續前行!!

被負能量圍繞，就要分析，吸收，再轉化!!

恭喜恭喜

gg
一條友點救Jennifer

死啦 發現要出文
但係好攰

唞下啦，唔好棄故就ok

故唔會棄 結局都諗好咗 寫咗出嚟
問題係我點樣駁落去先係關鍵

我照出住先 頂到幾耐得幾耐

加油

校對緊

更新到Chapter 86

Chapter 86 不慌不忙

佢... 想我用SPIRIT嘅力量？！

「唔得！唔可以將SPIRIT嘅財產隨便俾其他人！」綽姿佢打算制止吞噬佢...

『你手上揸住呢架Model X，都係Jennifer嘅，我哋都冇應承過俾你哋。』我亦都唔讓步...

更何況，土壤樣本喺車頭！不過我唔可以話俾佢哋知！

「綽姿，今次... 今次呢支係用我啲Sil買架喎...」吞噬佢有啲唔好意思咁講...

原來佢係想幫我嘅...

『架車俾返我揸先，你哋唔幫我唔緊要，但係呢架車有我哋嘅科技喺度，我都唔可以亂咁俾你揸走。』我示意綽姿佢讓返個位比我...

綽姿佢冷眼望住我... 似乎都唔肯讓步...

『更何況... 我諗你差唔多夠鐘。』我記得上次綽姿同吞噬包圍我哋果陣，吞噬暈低咗先...

跟住就到綽姿佢... 似乎佢哋嘅「電池」係有時限嘅！

由紅隧到而家呢度，應該已經過咗半個鐘...

綽姿佢嘅面色一變... 但係依然未有讓步嘅意思。

「綽姿... 我都覺得今次阿恆佢講得啱... 一陣... 一陣你揸揸下車... 暈咗點算？你都未必可以捱到屯門啦...」吞噬佢細細聲咁講...

「麻煩。」綽姿佢晦氣咁嘆咗聲氣，跟住落車讓咗個位比我...

我坐上駕駛座... 望一望倒後鏡，望一望周圍...

只見綽姿停咗喺文明里...

『Austin西鐵站你哋可以嘛？』屯門... 帶佢哋去西鐵站Ok啦...？

「隨便你。」綽姿佢發晦氣...

「阿恆，可以架啦，可以架啦...」吞噬佢有啲唔好意思咁答我...

我沿著文明里，再慢慢駛到西九龍區嘅渡船街...

好彩呢度唔係太多車，我都可以慢慢沿著慢線行...

跟住就小心咁過咗個十字路口，喺個燈口度停低...

呢度係廣東道... 我都冇辦法停太耐...

啲路人就好奇咁望住我哋架車...

『右手邊係Austin West Rail Line。』我指一指兩個街口後嘅Austin西鐵站...

只見喺後座嘅綽姿已經瞓著咗，吞噬就抱住咗佢...

「得架啦，得架啦，就等我帶佢返屋企啦。」吞噬佢好客氣咁同我講...

「係啦，呢兩樣嘢交俾你。」吞噬佢俾咗佢件袍... 同埋果碌紅色水晶我...

『多謝你。』我誠懇咁望住吞噬講...

『係啦，吞噬係咪你嘅真名嚟架？』我忍住笑咁問佢...

「唔係。不過如果你有命返黎屯門搵我嘅話，我就話你知我嘅真名啦。」吞噬佢講完之後，就抱住綽姿落咗車...

「碰。」吞噬佢閂返車門，轉身抱住綽姿...

吞噬佢除咗驚驚青青之外... 而家我望住佢嘅身影...

其實佢都好瀟灑吖... 撇除佢係幻幻控之外！

我立即檢查，Starlink著住嘅！

我即刻call Professor Y！求下你！快啲聽電話！

「咦？阿恆你搵我有事？」Professor佢好快接聽咗電話！

只見佢嘅枱面一如既往咁凌亂...

『Professor！Jennifer佢俾PLA捉咗吖！佢而家喺槍會山軍營！』我緊張咁講...

「恆，你而家都喺九龍？」Professor佢不慌不忙咁問我...

『係吖！我呢度係... 廣東道！』我望一望身後個路牌...

「咇-- 咇咇！」後面有一架房車響號抗議我停咗喺度...

「我操你媽逼！這裡是廣東道！你這狗養的以為駛著武裝車就牛逼死了嗎？」後面個司機落咗車行過嚟破口大罵！

「阿恆，唔急嘅。開咗車嚟玻璃大學呢邊先，喺康莊道果邊入黎吖，唔好經過A Core果邊。」Professor似乎都聽到我俾人鬧... 笑一笑咁講...

我眼前綠燈，廣東道前面乜嘢車都無...

「隆！嗚嗚嗚嗚嗚！」我立即一個地板油，Model X絕塵而去！

由得果個咒罵我嘅某國人成碌傻鳩咁企喺街上！

我嚟到尖東，跟住轉左沿著海傍行...

我記得好似有個位置可以轉返去消防局同埋紅磡嗰邊！

「恆，記得唔好揀錯線，要行中間條路。」Professor佢突然提醒我...

『你... 你知道我而家喺邊？！』我有啲驚訝咁問！

「知～ 我呢度咩都睇到。嗱，你好入中間條線啦！」Professor佢望住個Mon但係同緊我講...

我望一望... 啱啦，入咗中間條行車線！

只見紅隧收費亭就喺我右手邊...

我仲見到嗰幾隻大型Cyborg！

「而家嗱嗱聲轉左入黎！」只見左邊嘅電閘慢慢打開咗...

我立即扭軚駛入去！

「快啲駛入室內地方，唔好喺度逗留！」Professor佢緊張咁講！

我照做！即刻沿著車路轉左駛到盡頭有蓋嘅地方... 見到右手邊就係Y Core...

「喺度等我，我而家落嚟。」Professor講完之後就cut咗線...

究竟點樣先救到Jennifer佢呢？！

唔通Professor佢有辦法？！

我緊張咁四處張望... 只見暗處有一個身影行緊過嚟？！

我冇辦法確認係邊個嚟！會唔會係玻璃大學入邊嘅保安？駐校軍方人員？！

我緊張咁伸手去儲物格，攞起Jennifer把短管版P90！

有咩唔妥我就落車開槍同佢死過！

玻璃大學嘅地底層唔夠燈，周圍昏昏暗暗咁，根本就冇辦法望清楚...

只見呢個身影突然停咗落嚟，跟住見到佢好似四處張望緊...

然後就急急腳咁行咗過嚟！

我望真啲佢嘅打扮... 佢上身着一件純色T-Shirt，下身着一條短褲...

手上拎住一部類似電話嘅東西... 電話仲插住咗啲嘢...

「咔擦？」咦？！Model X車頭嘅車門突然打開咗？！

仲有車尾同埋車頭嘅行李箱都同時打開咗！

我仲未反應得切之際，呢個男人輕鬆咁上咗車！

『點解你會開到道門架？！』我有啲驚訝咁問！

只見眼前打扮隨便嘅男人，就係Professor Y！

「哼，架車原本就係我嘅，我點會開唔到吖？」Professor Y佢幽幽咁講...

「喂，放返好。唔可以周圍指！」Professor Y佢指住我手上嘅P90，打開咗儲物格要我放好...

我一時反應唔切... 跟住佢索性直接喺我手上攞走支槍...

『點解你又會知道支槍係擺呢度呢？！』我指住個儲物格！

「我識咗Jennifer呢個衰妹都3，4年啦，點會唔知佢啲壞習慣吖？」Professor佢不慌不忙咁閂埋儲物櫃...

係喎... 唔記得咗佢同Jennifer好熟添... 但係熟到連Jennifer啲壞習慣都知？！

喂！Professor你唔好打我Jennifer嘅主意喎！

佢再落車望下土壤樣本嘅容器...

「嗯。阿恆，讓個位比我。」Professor示意我坐上車頭嘅乘客座，然後佢揸車入停車場...

只見眼前有一個車位，隔籬放咗架手推車喺度...

Professor佢喺手推車上面拎起一對手套戴上，然後就拎咗個土壤樣本容器搬上架手推車...

吓？！ 點解佢會無事架？！

等等先，又話去救Jennifer？！ 我哋唔係應該爭取時間咩？！

文嚟啦

究竟professor想做乜

你唔見Chapter名咩？
不慌不忙

Professor表示：佢未撚驚過