二百五十六
十一月尾既呢一日,我地照舊響放學之後球會練波,流○既各位隊友都好努力咁備戰週末聯賽對南○既榜首大戰。
賽前我地以一分之微領先緊次席既南○,如果贏左既話我地就可以擴大領先優勢到四分,所以呢場真係一場好重要既榜首大戰。
就連練完波大家一齊食飯,話題都離唔開呢場波。
除左我。
我由頭到尾都響度㩒電話。
「女朋友?」賈加華忍唔住問。
我搖搖頭,繼續覆messages比淇淇。
但其實我keep住check既,係秋兒姐姐有冇覆我messages,而回覆淇淇只係順便。
我知秋兒姐姐其實開緊會既,所以雖然係覆得好慢,但至少有回覆,對我黎講已經好好。
淇淇則係秒回,同埋我覺得佢好似同我傾得幾開心。
「咁痴身係好辛苦既。」華爺笑道。
我聳聳肩,不置可否,亦都懶得解釋。
華爺繼續笑道:「你又係咁,達叔又係咁。」
我望一望達叔,果然見佢響度低頭send messages。
華爺之後拍一拍阿必:「幾時到你又桃花啊?」
「我?」阿必驚訝地道:「乜你唔知而家響屋企有幾條索女排緊隊等緊我返去同我做愛咩?」
「係喇係喇,上次你先話自己係處。」華爺都冇阿必咁好氣。
「我係話我碌鳩好似碌柱咁撚粗。」阿必不慌不忙咁糾正地道。
「哦,係呀係呀。」華爺應酬式咁樣回答。
「唔信?等我而家入廁所show比你睇!」說著說著,就要拉華爺入廁所。
屌,好撚基。
禍從口出既華爺就係咁比阿必強行拖左入廁所show丁……
痴撚線……
*
出左地鐵站之後,我就踏上一個人既歸途。
其實自從上次之後,我都再冇自作聰明咁幫秋兒姐姐買埋飯盒。
廢事浪費喇。
我一個人一路行又一路㩒下個電話,最後又click左入去秋兒姐姐最後一個訊息入面。
秋兒姐姐:‘‘嗯,我而家都準備走喇
’’
無錯,秋兒姐姐總會回家既。
其實呢個都係一個返屋企既原動力黎既。
即使只係一陣,但我都叫做可以見到秋兒姐姐,同佢傾下計咁。
我甚至乎會拎埋啲功課過去一齊做,等我可以對住秋兒姐姐耐啲!
其實都好好架喇。
唔經唔覺,我已經行到去屋企樓下。
離遠見到馬路旁邊泊左一架黑色既私家車。
我唔識車喇,但架車比我既感覺好名貴,響公屋附近既馬路黎講特別顯眼。
…
嘖。
有錢大晒咩。
然後司機位既車門打開,一個著住西裝既老司機落車,再行去後座打開其中一邊既車門。
一個身材高大,髮型打理得整整齊齊、著住校服既男學生落左車。老司機則響後面恭敬咁企響度,男學生輕輕力友善咁拍一拍佢膊頭以示道謝。
我同呢條友既距離有啲遠,睇唔清楚佢個樣。不過呢條友落車既動作、對老司機既態度,唔知點解比到一個風度翩翩、好有教養既感覺我。
嘖嘖。
呢啲咁既人黎我地呢啲公屋既屋邨做乜春?
男同學落車之後慢慢咁行去私家車既另一面打開度車門,然後一個著住校服既女學生一臉唔係幾好意思既樣落左車…
…
…
…
我目定口呆…
點解…?
係…
秋兒姐姐…?
秋兒姐姐落左車之後,一臉微笑咁向男同學道謝。男同學同佢講左啲野,佢又微笑咁搖一搖手,再傾多兩句,然後大家就揮手道別,老司機為男學生打開車門,男學生就上返車,老司機隨即都上返車揚長而去。
而我就呆左咁企響遠處。
唔知點解,我心入面對果位男同學湧起強烈既敵意。
呢個時候我應該係上前會合秋兒姐姐同佢一齊上樓,但唔知點解我企響度好似郁唔到咁,只係呆呆咁望住佢上樓。
……
……
……
個男同學…有車…有司機…有教養…
我只係屋邨仔一個…
秋兒姐姐仲對住佢微笑…
……
……
……
我手中既電話突然間一響,我拎起黎一望……
係秋兒姐姐。
秋兒姐姐:“我返到屋企喇,你又話差唔多返到既?”
我回過神來。
秋兒姐姐對住個男學生只係禮貌性既微笑啫,佢響學校都係咁架喇。
唔好諗咁多喇。
於是我回覆左句:“在樓下了”,然後再次起程。
(待續)