葉開葉開
2021-09-10 21:13:49
二百六十一
咇!
下半場開始。
我地一改上半場急躁既打法,先將個波控制好響自己既半場,而由於對手南○已經領先兩球,所以都唔同我地急,由得我地自己響半場猜。
我地就睇準機會,將啲波瞄住大舊佬黎斬,但受制於豪歌同相宗豪既夾擊,大舊佬啲頭鎚發揮唔到太大既作用。
不過,呢個就係愉○兩年之前犯既錯誤。
兩個中堅經常性夾擊一個中鋒,意味住另一個前鋒(即係我),就會冇人看管。
時機一到,阿必或者賈加華就會傳個地波比我。
呢個就係陳sir既戰術。
就響呢個時候,我搵到個空位!
「熙!!」我同阿必響球場上咁撚合拍,佢當然即刻睇到,仲傳左個好靚既直線比我!
好!
就響我準備迎波既時候,突然有個身影衝出黎截左個波!
屌!
係柏彼得!
……
……
……
兩年之前對愉園一戰佢都響陣中……
因為咁,所以佢今次估到我地既戰術變化!?
之後南○展開反擊,只係最後陳韋拿埋門既一腳比熊輝救出左!
……
我轉頭望住陳sir。
佢點點頭。
第二個戰術了。
本來唔諗住咁快用。
*
講到尾,呢個戰術都係依賴我既個人質素。
改變左戰術之後,我突然返到好後既中圈位置。
阿必知道戰術改變左,於是輕輕傳個波比我。
我地既左翼子雄同右翼康達即刻移動!
唔止兩隻翼,連其他中場球員都開始衝上去。
同一時間,我都開始帶波前進。
講到底,其實都係由我鳩扭上去,而兩翼衝前只不過係餌。
不過,佢地唔係普通既餌。
因為我遇到阻滯真係會傳波既。
其他中場球員一樣會協助我推進。
但當然係以我為重心去推前喇。
呢個就係同黑熊既低層次戰術最唔同既地方。
梗係喇,呢度既對手水平點同社際?佢地夾擊、補位既話真係截得停我架。
面對突如其來改變左既打法,南○一時之間反應唔黎,防守得好狼狽,我鳩扭扭到佢地mark死左我就傳,隊友推進唔到又傳返比我。
就係咁,響對手防守混亂無法解圍既情況之中,我乘機近門撞入一球,追返一比二。
但係呢個戰術並唔係冇代價,所有球員空群而出既後果當然係後防空虛。南○既教練反應得好快,佢地直接換走晒啲攻擊球員,只係留返陳韋拿響最前,再用兩個防守球員貼身mark實我,再由其他球員響我附近補位,務求令我連波皮都掂唔到。
不幸既係,佢地真係有本錢咁做。
更不幸既係,佢地真係做到。
而且佢地仲要趁住我地空群而出,由陳韋拿響反擊中再射入一球。
不行了。
今次……
真係不行了……
……
……
……
除左學界,我未試過有呢種念頭,今次係第一次感覺到無力感…
咇~咇~咇!
球證鳴笛完場。
我地輸了。
真係輸左。
論實力我地唔會差過南○,但我地今日既發揮實在太差。
就係咁,呢個星期對南○既聯賽榜首大戰,我地以一比三不敵對手,將榜首位置拱手相讓。
呢個比賽結果雖然講唔上係爆冷,但賽前我地雄心勃勃,想要擴大領先優勢,點知竟然輸左比對手,由領先南○兩分,變到跌落第二位兼落後南○一分,果種感覺非常唔好受。
陳sir見大家垂頭喪氣咁行出球場,就同大家講勝敗乃兵家常事,況且仲有次循環既比賽,所以大家都仲有失分既可能。
而且就算大家都唔失分,我地都仲有一次響次循環直接對壘既機會,只要把握到呢個機會,我地依然可以順利拎到冠軍。
呢樣就係陳sir同劉sir唔同既地方。今次失利明顯係我地冇執行到戰術所以先會輸,換轉係劉sir我地應該比人屌到死無全屍,點會好似陳sir咁安慰我地?
但調返轉一開始我地就唔會敢唔跟戰術亂鳩咁踢。
潛意識已經唔夠膽。
當然好似對馬來西亞同日本果陣,我地唔係因為自己既失誤而輸波,佢就唔會責罵我地既。不過如果係今日呢個情況,我都好肯定佢會用佢果把響到拆天既聲音屌到我地飛天。
所以我幾時都話,兩個教練各有各好。
但點都好,場榜首大戰就響我地輸波之後垂頭喪氣既情況下結束左。
(待續)