葉開葉開
2021-10-08 19:10:16
二百七十三
著住西裝同跟住音樂既拍子跳,我覺得比起平時既練習好似唔同左,個節拍稍為難左小小。
但係秋兒姐姐好就住我,就算我既拍子甩左佢都就住我黎跳。
嗯,咁其實我都只係識識地亂跳一通罷了。
浸沉響呢個浪漫得黎又疑幻似真既氣氛入面,感覺上隻舞好快就已經跳完……
雖然因為甩左拍子,結果變左首音樂完左我地都仲爭小小未跳完晒隻舞,但無可否認我真係跳得好開心。
「好多謝你賞面同我跳舞。」秋兒姐姐笑得好甜。
我諗秋兒姐姐都同我一樣咁開心。
「嗯……我都好想同妳跳舞,所以我好開心。」我真心咁講。
估唔到我響學校舞會會場好渴望既心願,竟然會響而家呢個情況之下實現。
所以就算唔係響禮堂只係公園仔跳、就算冇悅耳既舞曲只有電話錄製既老翻伴舞,我都已經非常非常開心。
諗到呢度,我面上不自覺咁掛起甜美既笑容。
「嗯…我都係。」秋兒姐姐甜笑道:「我都好開心。」
「嗯…」
我地兩個就咁甜笑住咁對望左一陣。
我個心甜到漏。
我係咪應該做啲咩…?
就響我思考緊既呢個時候…Kitty姐姐既樣突然間浮現左出黎…
之後係Betty、Jessica、Ada……
然後又係果陣罪惡感、內疚感、不安感又湧現出黎。
……
……
……
次次都係響呢啲時候走出黎既!?
次次都黎得唔係時候!
響內疚感等感覺湧現既同時,我都鬆開左攬住秋兒姐姐腰部既手。
秋兒姐姐微一愕然,稍為露出失望既神色,不過好快又回復返笑容。
不過今次既笑容……
好似…有啲尷尬…?
嗯,應該都係冇乜野。
「呀…係呢,點解妳會突然想同我跳舞既?」我為左消除尷尬,於是問秋兒姐姐。
秋兒姐姐微笑地回答:「因為啱啱冇得響hall同你跳吖嘛。」
「唔?」莫非秋兒姐姐…佢都想響Christmas Ball既時候同我跳舞…?
「啱啱我除左最開頭兩隻舞之外,我就要keep住做野,」秋兒姐姐笑住回答:「而且你又係工作人員,我唔可以光明正大咁同你跳舞…」
我忍唔住打斷秋兒姐姐,問:「頭兩隻舞…妳同邊個跳…?」
人有時就係咁犯賤。
明明自己已經知道個答案,但仲係要自己伸個頭出黎受靶。
秋身姐姐答道:「唔…係同Jonathan…」
「哦…」其實我一早知道答案,仲問黎做乜?
想秋兒姐姐解釋多一句其實佢係被逼?
可惜佢冇。
我呢啲係咪叫做自討沒趣?
「嗯…」我諗我失望既表情洋溢於面上。
可能秋兒姐姐見到我既表情,於是又解釋道:「咁係因為工作需要…」然後突然細細聲道:「同埋你都唔跳得…」
……
唔?
言下之意……
即係如果有得揀,秋兒姐姐會選擇同我跳?
正當我仲響度亂咁諗野既時候,我個肚突然打起鼓上黎……
係喎……
我今晚都冇野落過肚。
小食都冇食過。
秋兒姐姐噗哧一笑,道:「你好肚餓?」
我唔係幾好意思咁R下頭,道:「係呀…今晚成晚都冇野落過肚。」
秋兒姐姐好誠懇咁對我講:「多謝你呀熙熙。」
「下?」做咩突然多謝我既?
「我知道你係因為我先至做義工幫手,」秋兒姐姐又再次展露出佢溫柔既笑容:「你仲要忙到野都唔食。」
「嗯…」我其實係響舞會會場掛住搵秋兒姐姐,搞到自己連小小野都唔記得食。
其實真係一啲都唔似我。
平時有免費野食既話,我一定諗都唔諗就仆出去食。
秋兒姐姐對我黎講,究竟係一個點樣既存在呢?
竟然可以令我連免費野都唔食?
咁秋兒姐姐對我黎講,又真係好重要…
「黎喇,我地去買宵夜返上去食?」秋兒姐姐親切地笑道。
「嗯!」我將奇怪既心情掟埋一邊先,再同秋兒姐姐一齊返屋企。
唔知係咪因為估到原因呢?定係睇得出我唔鍾意Jonathan?
秋兒姐姐除左響hall果陣之外,一句都冇問過我點解唔著Jonathan件西裝去Christmas Ball。
(待續)