葉開葉開
2021-10-22 21:02:13
二百七十九
出乎意料,我地竟然真係頂得住南韓水銀瀉地既攻勢,守住一比零既領先優勢完半場返入更衣室。
其實都有啲運氣成份,歐華緯傳個波其實冇阿必傳得咁好(或者係冇同我夾得咁好),只係多得陳韋拿夠快反應對付左個韓國仔後防,我先至可以有時間修正同把握到呢次機會先開紀錄。
但係入左波之後就更加係完全變左攻防戰,直至完半場之前,我地都再冇一球波係過到半場。
所以返到更衣室之後,除左我同韋拿兩個因為劉sir既指示,冇參與太多既防守之外,其他隊友都有一種筋疲力盡既感覺。
比起暑假果陣對日本果場波更甚。
因為日本雖然係壓住我地黎打,但佢地冇南韓果陣個個都無限體力,對你死纏爆打果種感覺。反而南韓成班友痴鳩線,由頭chur到落尾仲要面不改容。
痴撚線的。
唔攰既咩佢地?
劉sir都只係簡單咁同我地briefing左陣,但就指示韋拿響下半場要多啲參與防守。至於我就因為速度快(全隊黎講我應該只係僅次於小明)同個人能力極高,所以都係繼續留響前場伺機反擊。
*
下半場除左戰術上面做左小小調整之外,基本上我地都冇乜改變。
亦都冇乜得改變。
南韓為左收服失地,一口氣半場換左三個攻擊球員入黎,對於要打防守反擊既香港隊黎講,未嘗唔係一件好事。
話唔定我地可以趁佢地空群而出偷多一球?
不過幻想總係美好,但現實係殘酷的。
南韓響下半場發動總攻勢,我地一班防守球員真係疲於奔命。
如果唔係熊輝三番四次救出南韓既攻門,我地一早已經反勝為敗。
下半場踢左唔夠十分鐘,劉sir見我地既球員氣力不繼,基本上都係龜縮響自己禁區,如果唔係熊輝既神勇,我地已經失守。
有見及此,劉sir於是將陳韋拿都換走,換入好氣好力既大隻佬3號楊舒達,轉打五四一,加強防守。
雖然係有小小改善,不過頂到一時唔頂得一世,加上有其他球員陸續消耗晒體力,所以去到下半場中段,劉sir再次一口氣換左兩個防守球員入黎。
劉sir將我同埋歐華緯換出,換入21號既防守中場柏彼得同5號蘇恩祖,決意用十一個防守球員塞響自己後半場,要死守一比零既戰果。
劉sir始終都係冇放阿必同華爺落場……
但當場入面一個進攻球員都冇既時候,南韓發動總攻勢就更加無後顧之憂,我地響後備席上面可以做既,唯有係幫落緊場既隊友打氣……
時間一分一秒過去,南韓既球員都非常著急,但受制於我地既鐵桶陣同埋熊輝出色既表現,雖然係有攻門,但係始終冇辦法攻破我地港隊既大門。
比賽已經進入補時階段,只要捱多五分鐘我地就可以爆冷響首場比賽全取三分。
至於點解補成五分鐘咁多,就係因為響南韓瘋狂既跑動之下,我地既隊友已經開始抽筋,好多時需要軍醫入場治理。
我望住場入面既隊友,心諗快撚啲完場喇,我啲隊友就黎頂唔順喇……
呢個時候南韓一輪非常靚既組織,兩三個球響禁區互傳之後,楊舒達同相宗豪同時間失位,南韓既19號殺到入禁區!
睇住佢就快要起腳!
就響呢個時候,隊長豪歌突然打橫殺到,飛身剷埋去南韓19號度!
啪!
「啊!」
中波聲同慘叫聲似乎係同一時間響起……
……
……
……
個波被剷出底線……
但同時間南韓個19號就訓左響度碌地……
豪歌就好無辜既樣攤起雙手企左響隔離……
咇!
球證呢個時候都突然吹雞,向南韓19號同豪歌既方向跑緊過去!
屌吖!
唔撚係十二碼下嘛!?
我地後備席成班人都好緊張咁企晒起身!
連劉sir都忍唔住企到接近場邊!
老老豆豆,我個位距離事發地點真係太啲遠同埋水平線,唔係好清楚睇到隊長豪歌係咪真係有犯規……
唔撚係頂左成場都頂得住一比零呢個領先優勢,而家先黎整球十二碼下嘛!?
(待續)