葉開葉開
2021-09-08 19:19:00
二百六十
其實出場之前,響更衣室入面陳sir都不忘同我地做左個最後既戰術briefing。
「記住,雖然對面夾左唔係好耐,但佢地球員既個人質素係好高,所以尤其是比賽初段,我地一定唔可以太急進攻,首先係要控制住個比賽節奏先,咁先可以有效咁運用到我地既戰術。」呢個係陳sir當時對我地既叮囑。
「知道!」大家當時係咁回應。
「好,大家出去喇。」陳sir拍下我地膊頭。
*
返黎球場。
「喂,我地要比個教訓果兩條二五仔。」阿必笑笑口咁搭住我膊頭:「呢場大炒佢地就最適合。」
順帶一提,雖然大家都口口聲聲叫柏彼得同牛康叛徒,但私底下我地都仲係好friend既。
梗係喇,咁多年隊友,而且響香港隊又都會繼續做隊友,點會冇friend做?
再講,球場上離離合合係好正常既事,我同阿必都唔係次次都做隊友喇,係咪?
「當然,係咪呀大舊佬?」我轉頭問盧家顧:「你係全港top 5前鋒黎架嘛,係咪?」
「當然。」大舊佬好神氣咁講:「入夠佢五球!」
*
大家響呢場波都有個好大既決心,就係希望擊敗對手,等佢地知道,就算佢地響唔同既球會挖角幾多球員都好,贏既都一定係我地。
就係因為呢股心態,令到我地完全忘記左陳sir賽前既部署,諗住一股作氣咁攻破南○既大門,結果踢到好急躁,反而係變左好多傳波係自己傳失斷左纜。
如果係響香港隊,大家一定唔會犯呢個錯誤,因為大家都好撚驚劉sir,咁踢法就算贏都好,都實比陳sir用吹風機屌到仆街。
呢個時候,阿必諗住急傳比右翼上緊去既康達,點知比柏彼得截左。
「唉屌。」阿必叫左出黎。
但係接住落黎發生既先係更屌既事。
柏彼得截左個波之後快速咁傳左比同樣係今季先比人挖角既歐華緯,後者趁我地大舉進攻既時候,一個直線劏穿我地既防線,然後由佢地既前鋒7號既陳韋拿接應單刀射破熊輝既十指關……
屌,我地雄心壯志要大勝一場,估唔到我地竟然係先失波果一隊!
響失波之後我傾力反撲,越踢越急但同時越踢越亂,結果又係同一方式比南○又以反擊再入一球。
又係7號既陳韋拿。
結果半場我地已經落後左兩球。
講控球既時間絕對係我地佔優,但有威脅既埋門就冇乜幾次。而且太早失波,南○更加可以睇住個形勢黎踢,專心做好防守黎打反擊。
我地啲攻勢就雜亂無章,連平時練波既一半都發揮唔到出黎。就算亂鳩咁斬入去禁區,都比南○隊長豪歌同另一個中堅相宗豪清晒,大舊佬完全搵唔到機會施展佢既高空攻勢。
我地垂頭喪氣咁走出球場,同開波之前既高漲士氣完全唔同。
陳sir響半場briefing既時候皺晒眉頭,問:「你地點解咁急?唔記得開波之前我講過乜野喇咩?」
其實我地都唔知點解。
好彩而家既教練係陳sir,如果係香港隊既時候,劉sir應該屌到我地仆街,然後換撚走晒我地十一個(講笑啫,最多換三個架咋)。
「我地唔好再去諗上半場既表現,唔好再諗個比數。」陳sir見我地個個垂頭喪氣冇人出聲,於是續道:「兩年前我地對愉○一樣係上半場落後兩球,大家記唔記得先?」
「記得。」我答。
我響流○既處子戰,仲要一出場就有波入,點會唔記得?
陳sir點點頭,再環顧一下大家。
「咁我地最後贏定輸?」陳sir追問。
「贏!!!」熊輝大大聲答道。
「冇錯。」陳sir點點頭:「落後再反勝,我地成日試架喇,係咪?」
係咩?除左果場對愉○,我好似淨係記得我地由頭贏到尾……
不過大家點點頭。
「雖然落後緊,但唔駛怕。」陳sir續道:「我有個戰術,係時候放手一搏。」
「嗯。」大家屏息靜氣,聽陳sir講解個戰術。
*
下半場就開始了,我地響場中心圍圈打氣。
「我地要相信陳sir。」熊輝再深吸一口氣:「仲有相信自己。」
呼。
冇錯。
相信自己。
(待續)