20 Like
14 Dislike
陸海樞紐駐馬店
2021-10-18 04:13:04
咁一來呢個係自古以來既問題，係漢官們既習性。二來我相信呢點亦證明咗制度上清朝比明朝寬鬆，三來我認為清朝比明朝更發達都可能加劇咗問題烈度。
轉身射個卅分波
2021-10-18 04:13:42
其實張獻忠之前
四川盆地
畀人屠殺都得返老虎喺度
歷史上唔止一次
陸海樞紐駐馬店
2021-10-18 04:18:19
但係四川人口都唔少，而大西王們可以殺到要湖廣填四川，甚至改變埋當地語言。我諗湖廣同江南再犀利都係出現咗河南安徽方言島同江淮官話侵蝕吳語區，未去到改變語言咁誇。
陸海樞紐駐馬店
2021-10-18 04:19:42
其實人口清空係窪地獨有傳統，歷朝歷代都係咁。
轉身射個卅分波
2021-10-18 04:19:49
洪武死咗文字獄已經消失一大半
永樂死咗更加基本無再提及
但清朝個高烈度文字獄一直到乾隆晚期仲越演越烈
實在係好難話清朝比起明朝寬鬆
具體嚟講洪武朝嘅烈度可能比清朝高峰位更犀利
但長時間計
洪武朝得30年
清朝文字獄巔峰期係持續150年
轉身射個卅分波
2021-10-18 04:24:16
祠堂唔係一百年產物嘅話
最多只能追溯到南宋
但祠堂成為主流 點都需要一啲時間
陸海樞紐駐馬店
2021-10-18 04:32:23
因為洪武永樂兩朝太瘋狂，搞到後來既皇帝要休養生息，而且範圍太廣闊。誅十族固然瘋狂，藍玉案試過有下人買菜個陣同另一家既下人傾計，結果連嗰家人都被判謀逆罪。清朝既文字獄主要針對某啲所謂高危人士，而且文字獄其實去到嘉靖年間都仲好犀利，係之後先收斂啲。去到萬曆天啟年間先再有發生。
轉身射個卅分波
2021-10-18 04:34:22
如果短時間之內設立嘅西厰內行厰(分別5年同34年)真係咁重要嘅話
咁清朝長時間侵奪正印官權力同明朝相比
真係一個天一個地
清朝唔單止一個部兩個尚書 所有職務都係十羊九牧 職務大幅度分離 權責不明 凡事靠欽差
連你姨都話清朝嘅官有理由羡慕明朝嘅相權
今日共產黨名義上都無咁做的
陸海樞紐駐馬店
2021-10-18 04:37:03
南方既話其實明初漢化已經大致完成。更遑論北方。我諗祠堂係元末明初嗰陣已經成為主流，係朱元璋為咗壓制宗族力量而厲行禁止。
轉身射個卅分波
2021-10-18 04:42:09
誅胡誅藍誅方孝儒有清晰對象 就係皇帝要殺反黨集團 十族有冇呢點亦都有爭議
但清朝文字獄係冇清晰對象 並不限於反黨集團 皇帝亦都高度介入其中 任意興風作浪 屬於政治運動
呢個係你講嘅無得比
陸海樞紐駐馬店
2021-10-18 04:47:27
我諗呢啲亦可能同清代比較信任皇族有關，皇族入列自然削弱文官部份權力。權責分明呢樣嘢我諗係封建專制之分，畢竟清代係制度上較明代封建，反正係皇族揸旗，權責就毋須分得清楚，但其實去到末期，明同清既文官權力已經大大提高，不過一個係皇帝不再獨攬大權，一個係有部分貴族已經開始不議事。導致文官權力獲得提升。
陸海樞紐駐馬店
2021-10-18 04:52:13
胡藍案亦係冇清晰對象，根本係有殺錯冇放過。並不限於明確對象，株連甚廣。明朝文字獄亦係皇帝高度介入其中，亦係任意興風作浪，本質亦係政治運動。根本冇分別。
轉身射個卅分波
2021-10-18 05:03:33
下唔止係皇族喎
連最基層知府、知縣都係咁
清朝唔係得漢官 亦都有滿蒙官員 而事實上就係層層切割 明朝官員極少 清朝官員係極其冗濫
再加上清朝生員舉人係收得極其寬鬆 賣官鬻爵亦都極多 綠營常備軍數量大到史無前例
點睇都係似宋朝幾十萬冗官冗兵 官職差遣分割 高度腐化 吸納山賊做兵咁樣嘅全民統戰體制
制度上好明顯明朝遠遠無咁顯着
唔單止選舉制度
明朝防範太子 清朝索性連太子都唔設
可以話係東方專制嘅極致喇掛？
鄂圖曼莫卧兒都無去到廢儲君呢一步的
轉身射個卅分波
2021-10-18 05:06:06
咁一百二十年後明朝皇帝已經對高度介入其中已經冇興趣
十全老人仲玩得興致勃勃
我睇唔到無分別
陸海樞紐駐馬店
2021-10-18 05:22:26
咁佢係外族政權，自然要分餅仔俾滿蒙官員，而且佢地某程度亦充當藩王同錦衣衛既角色，而且滿清人數太少，得12萬，點都要增加管治方面既人手。你覺得明朝冇呢個問題，係因為佢地採用軍戶制，當然賣官鬻爵呢個問題明朝都有。至於秘密立儲，係因為九王之亂而誕生，而去到後期已經明存實亡。同專制冇咩關係。清朝未入關之前係用選舉方式，係後來先改變。
陸海樞紐駐馬店
2021-10-18 05:23:59
咁係你睇唔到嘉靖嗰陣都係玩到興致勃勃，連芝麻綠豆小事都要成案。
轉身射個卅分波
2021-10-18 05:34:42
賣官鬻爵制度化嘅明朝得監生 清朝文武中央地方官都可以賣
分餅唔止係分畀滿蒙 絕大多數呢啲quota都係畀漢人
儲君同僭政冇關真係第一次聽
不嬲無論儲君外戚後宮太監
呢幾個版塊同皇權嘅侵犯同擴張此起彼落
副手從以前天子出征就監國 天子守國就撫軍
到明朝變吉祥物
再去到清朝連太子嘅威望都怕 成個唔設
唔知你話名存實亡係幾時
道光咸豐同治光緒宣統都係秘密建儲
我真係搵唔到後期有邊個係做個太子
陸海樞紐駐馬店
2021-10-18 05:58:39
唔止得監生，其他職務好似軍戶都有。咁你仲有漢人八旗又要攏絡仕紳，你唔可以好似明朝隨意壓制佢地就唯有咁做。清朝不用儲君係因為九王之亂太多人結黨營私，雍正為咗唔俾此情況再度發生，先發明咗呢樣嘢。唔係怕太子既威望，而係怕爭權奪利、兄弟宗室相殘既事再度發生。
名存實亡既意思係大家一早已經估到會成為下任皇帝，其實係乾隆嗰陣已經係咁，根本立唔立儲都冇分別。
轉身射個卅分波
2021-10-18 06:03:26
公開固然咁講 但事實上就係享受咗皇帝獨尊權力嘅優惠
清朝每一個皇帝都話想改革廟祀 自己功德微薄
自己咪一樣最尾係做咗萬世不祧之主
冠冕堂皇話邊個唔可以講
轉身射個卅分波
2021-10-18 06:11:10
嘉靖夠話道士話二龍不相見 立太子會剋死對方
一樣會遭受誹議
咁冇理由清朝皇帝就有唔受誹議的特權
陸海樞紐駐馬店
2021-10-18 06:13:35
所以我覺得唔立儲既原因除左防止爭鬥同唔想皇權被分薄外，仲有一點就係唔想跟嫡長子立儲制，想揀個自己屬意既做下任皇帝，其實咁樣仲好，起碼防止靖難或萬曆立儲之爭再度重演。
轉身射個卅分波
2021-10-18 06:19:14
嫡長子立儲唔係關乎皇帝個人權力
而係整個國家都係按嫡、長繼承權行先
皇帝破壞憲法係任意嘅僭越
只不過係清朝皇權大 大家當睇唔到
明朝嘅話個個都泣血上訴 大臣三五七日叫皇帝早定國本以安人心
轉身射個卅分波
2021-10-18 06:37:05
何況儲君無論係嫡長子繼承制、幼子守灶定兄終弟及
都係為咗眾望所歸同累積威望 有事時佢就係plan b
呢點喺邊個君主制國家、英格蘭定土耳其都係不變
所以與其話立儲會剋死/自相殘殺
不如話係唔想有plan b 等更多人奉承佢 好似羅馬元老臨死先分身家畀義子咁
同時減低自己被政變嘅0.001%風險
陸海樞紐駐馬店
2021-10-18 07:28:43
咁滿清本身行部落推舉制既，唔行嫡長子立儲又唔係咁難理解。始終新朝行新法，清承襲明制，但唔係全部。靜係蒙藏部份已經有差異。而且又冇影響到整個社會既嫡長繼承制。
陸海樞紐駐馬店
2021-10-18 07:38:18
你咁講都啱。當然如你所言，李爾王情結可能都係其中一個原因。但係終清一代，佢啲兵權分得咁散，又用八旗制度統領軍隊，某程度上降低咗政變既可能性。所以唔立儲好大機會係唔想承襲漢地舊制加防止奪嫡事件再次上演。