呢幾日忙到仆街 啱啱先追翻曬
未瞓到又分享下N年前坐巴士嘅怪事
細個翻放學要坐巴士,雖然嗰條路線係會經過某墳場,但一直以嚟都冇事發生,不過呢啲事永遠都發生喺出奇不意嘅時候。
嗰日放學同啲同學去玩之後比平時夜咗好多翻屋企,上車嘅時候唔計司機,下層連埋我只有四個人,嗰架巴士係熱狗,我就坐咗喺司機位後面同上上層樓梯口之間排打橫嘅長櫈(好長兩排對坐嗰種)近樓梯口嘅位。
而其他人嘅分佈就係一對夫婦坐近右後轆嘅孖位,仲有一個坐喺落車門後面孖位嘅姨姨。由於時間已經唔早,中間好多站都直接飛,直到過咗墳場。
本身我一直放空睇緊對面風景,「叮!」嘅一聲令我回一回神下意識咁望咗下落車門,一望就覺得有種莫名嘅違和感。
諗咗陣我就發現係咩原因:坐落車門後面張櫈個姨姨唔!見!咗!
我即刻伸出少少個頭再望下另外兩個人喺唔喺度,佢哋仍然喺原位,但就真係唔見咗個姨姨,當時唔知邊度嚟嘅膽量我上埋上層睇,上層原來係冇人坐。
「個阿姨到底去咗邊?」「係咪我眼花?」「中間佢落咗車咋?」
呢幾句說話我不停反覆咁問自己,但我明明好清楚中途根本就冇上落客。
當我滿腹疑惑咁想用理性角度去解釋呢件事,架巴士埋站開門。
但係無人落車。
「喂唔好玩鐘呀下!」或者係我諗多,我硬係覺得司機都覺得有啲奇怪先特登咁大聲講嚟壯膽。
到最後我留意住對夫婦幾時落車,狗衝咁跟住佢哋一齊落。
後來同個老豆做車長嘅朋友講起呢件事,佢話佢老豆講過呢條線一向都間唔中有「人」會坐順風車,有時仲好有禮貌撳鐘,佢哋已經見怪不怪。