我只不過喺自修室溫書，點知比我遇番佢。

明明小霖先係一直陪喺身邊嗰個,公平咩

其實都係幾唔公平架
現實太多呢啲情況

哩啲咁青春既戀愛
我地過左二字頭就已經無曬
身邊好多臭雞

咁好彩我都未二字

第二日翻學，我一朝早就喺巴士站到等小霖，睇下會唔會咁啱見到佢，然後同佢道個歉又好，或者三口六面講清楚。

可惜一直等唔到，可能係因為佢老豆有車佢掛。唔緊要，喺學校講都可以。

然而，佢喺學校一直都有意無意咁避開我，每當我上前搵佢，佢都會即刻扮有嘢做走開咗。

曾經試過小息果陣，我地喺樓梯轉角位撞到，我以為呢個係個好機會。

「喂，小霖！」我即刻嗌住佢。

「做咩？」

「可唔可以聽我講幾句？」

「講啦。」無論眼神定語氣都係+EST嘅冷淡。

「我知..上次搞到你傷害好大，但係..」我想講嘅嘢都未組織好。

「不如唔好再提。」之後佢又再走咗去，淨係留低茫然嘅我喺梯間。

「點算呀？」我向班兄弟求救。

之前我將果晚嘅事話咗比佢地聽之後，佢地都好似一早估到會係咁。

「放學將佢綁起黎，逼佢聽完你講嘢先走！」阿星個樣變到吳孟達咁，猥瑣至極。

「你癲架，一陣傷到我女神！」阿豪扑佢個頭罵。

「咁咪伏佢囉，喺佢當完值走果陣伏佢。」阿月講。

「唔係唔得，但係可以行多一步先。」阿言望住阿晴講，我地都將目光放去阿晴到。

「下，我？！」阿晴好疑惑咁問。

<五十三>(小霖視角篇)

「你真係冇諗住理番阿楓呀？」呢一刻我同阿晴坐咗喺星矢吧傾計。

「係佢地叫你黎嘅？」我問。

「咁你都唔采佢，佢地咪叫我勸下你囉。」俾我踢爆咗，佢都直認不諱。

「其實我好想同佢和好，係好想好想。」我都唔隱瞞佢啲咩。

「但係我怕我會抽唔到身，我知萬一我一同佢好番，我就冇辦法忘記佢。」

一直以黎，阿楓喺我心目中都佔住一個好重要嘅位置，喺我有意識成長開始就一直有佢嘅存在。

佢係個好外向嘅陽光少年，我就成日唔出聲，個個都俾我外表誤會，以為我係啲難以親近嘅人。

因為有佢存在，先令我枯燥嘅生活可以尋回一啲啲色彩。因為有佢我先識到好多朋友。

但係佢總係好似大唔透，成日要人操心呢樣，擔心果樣。又成日坐唔定，係得我先可以治到佢。

唔知幾時開始，我慢慢害怕佢有一日唔再需要我，害怕冇咗我都可以開拓屬於佢自己嘅人生。

直至天蕊嘅出現，我就知呢一日終於都到。

「沒有這件事 妨礙我們 難道我和你 又會一樣」

我一直好怕佢地會撻著，但係佢地一日比一日親近，就象徵我同佢嘅距離一日比一日遠。我知我冇辦法可以留住佢。

「牢牢看守著你 提防你搭上這一個她」

天蕊出現之前，我一直以為我應該都有機會掛，但原來唔係呢回事。

我一直做好祝福者嘅角色，去祝福佢地，都唔敢有任何奢想。

去到天蕊離世，我好努力幫助阿楓走出個陰霾，我地又好似回到從前咁。

「下個她 都會趁我看不到誘惑你」

可惜又有個小涼出現咗，今次我真係覺得再無力去挽回。

「明白如你要這樣易變心　哪到我害怕」

文呢

文呢

打梗嘛

小霖豬 我想你得到幸福

小霖豬 我想你得到幸福

佢會有好報嘅

我終於同佢講出我嘅心意，但係咁又點？佢都係當我只係朋友咁。

我知道我係時候要忘記佢，忘記佢帶俾我嘅歡樂同埋傷痛。

「就算她 跟你有段情 我也為你高興」

我唔可以再活喺佢嘅陰影之下，咁樣只會大家都痛苦。

「誰話愛你註定 好心好報」

「所以你就寧願連你地十幾年嘅友情都一齊摒棄？」阿晴問。

「係，我要忘記對佢嘅感覺只可以咁樣做。」

「我曾經都好似你咁諗，以為離開阿言就可以忘記佢。」

「但係原來都唔得，愈想逃避佢，我就愈忍唔住去關注佢嘅消息，其實仲變得更加痛苦。」

「後來我先明白，就算你避得到佢個人，你都躲避唔到自己內心嘅愛意，咁點解唔好好去面對佢？」

「一個人有病痛，都係選擇去醫治佢啦，愈唔理佢其實就會愈惡化。呢個係我家姐教嘅。」

「我冇得揀啦。」

「你有得揀架！」我地身後突然有把聲出現。

<五十四>

係阿豪...

「你相信我嘅話，我願意幫你去忘記佢架！」

「嘩，你做咩會喺到？」阿晴問。

「我冇心偷聽你地架，只係咁啱經過..」好流...不過算啦。

「我唔想將你變成水泡啊。」我講，我唔想傷害任何人，受傷害嘅感覺我好清楚。

「我唔介意架，我知呢個只係過渡期，我相信你之後一定會發現我嘅好！」呢個人，都好耿直。

「有冇咁偉大啊..」阿晴好細聲咁同我講。

「真係好多謝你咁為我，但係有啲嘢我都係想自己面對番，我唔想對你有任何嘅唔公平。」

「不如你..走先啦。」阿晴同阿豪講。

「咁好啦..拜拜。」

「你..點睇啊？」佢問我。

「佢呢個時候講咗番咁嘅嘢..其實都有啲感動嘅，不過我都係想自己面對，至於同阿豪嘅嘢..順其自然啦。」

「所以你打算..？」

「嗯，我唔會再避佢，我要面對佢，面對自己。」
.
.
.
當晚，阿晴就用skype同我地講番尋日同小霖講嘅嘢。

「你搞咩呀死人豪，突然出現嚇死人咩？」阿晴講。

我地都好嘩然，佢竟然咁勇？？

「我唔想再退縮，我要悍衛我女神！」佢好有自信咁講。

「佢話佢會搵你喎，叫你唔洗去搵佢。」咁樣咪仲令我心掛掛..

於是我就抱住無限嘅顧慮休息。

之後果日，佢冇搵我，但係好明顯對我嘅敵意都冇咁深。

再之後，仍然冇搵。

特別嘅係，佢開始同阿豪傾起計，雖然都係阿豪撩佢先。唔通佢真係俾阿豪打動倒？

到咗今日星期五，佢終於都send咗個whatsapp黎。

「今晚9點，會所見。」

到咗9點，我已經到咗會所，我一分鐘都唔敢遲到。

但係我見到嘅唔係小霖，而係小涼。

「點解你喺到嘅？」我問。

「係小霖約咗我..你都係？」

「嗯，佢約咗我喺到等，但係冇講約埋你。 」

「你地都到咗啦？」小霖都到埋。

我望到佢嘅眼神，係我呢世人見過最複雜，最無助嘅眼神。

我應該用咩態度去面對佢？好似以前咁？我唔清楚。

我好生硬咁同佢講咗聲：「Hi。」

「你嗌曬我地兩個黎，係咪有咩事？」小涼問。

「係，我諗我地今日應該有個解決啦，再拖落去會3個人都好辛苦。」

「對唔住啊小霖，我知我對你傷害係好大，但係我希望你明白，你係我人生入面最好嘅朋友，我真係唔想俾呢啲嘢而冇咗你呢個朋友。」我終於可以將呢段說話講出黎。

「我真係好憎你架費子楓，我做咁多嘢去取悅你原來都係白費心機，但係我終於明白我唔應該因為我自己付出咗啲咩而要求相等嘅回報，咁樣一樣咁自私。」

「咁樣唔係愛，只係佔有，但係真正嘅愛唔應該係佔有。」


佢走過黎，拎起我同小涼隻手疊住。

「我知道你地一定會好幸福，記得要好好咁相處，唔好咁易分開。」佢眼泛淚光，但係笑住咁講。

呢個笑容，亦係我見過，最心痛嘅笑容。

「小霖，多謝你嘅成全，我地仲係朋友架可？」我問。

「當然啦，我地三個永遠都係好朋友。我一定會睇實你，你有咩對唔住小涼，你死緊。」

「多謝你。」小涼講。講完佢地就擁抱起黎。

之後佢就走咗，只係留低咗我地兩個。

「希望佢真係放得低。」我喃喃自語。

「佢一定可以。」小涼拖起我隻手之後講。

整理好思緒之後，我就講：「早啲翻去抖啦，聽日我地仲有約會 。」

「係喎，嘻嘻，咁走啦，聽朝你屋企樓下等啦。」

「好呀！」

一個人的成全　好過三個人的糾結

終於都完了。

費子楓，希望你真係可以幸福啦..

【如果當時沒有 擦肩而過 也不會懂心可以多痛
感謝你給我一場 美好的夢 既然是夢如何追究
跟你愛的人走 原諒我不送 年輕是我唯一的錯
在列車進站之前 紅燈在閃爍 閉上眼放開雙手
請在我後悔之前離開我 在我還沒有崩潰的時候
不願意再用深情 勒索你的溫柔 會有多難過明天再說
請在我後悔之前離開我 去某個幸福快樂的星球
不確定我的笑容 還能夠撐多久 如果你慈悲 千萬別回頭】

「你冇嘢啊嘛？」點解佢呢個時候又會出現？

「嗚...嗚..嗚..索索..」我伏咗喺佢膊頭喊咗好耐好耐，仿佛呢個係令我暫時舒服啲嘅方法。

「喊咗出黎好啲未呀？」阿豪遞咗張紙巾俾我。

「好啲啦，點解你又喺到嘅？」

「阿楓..佢喺group到話你約咗佢，我唔放心，所以咪黎睇下囉..橫掂咁近。」

「多謝你。」估唔到喺呢個時刻，喺我身邊嘅竟然係一個好普通好普通嘅朋友。

或者佢真係有好多我唔知嘅優點吧。

pish

快啲出

小霖呀 其實你仲有一條路 就係坐正做大婆 迫小涼做二房

pish

快啲出

打緊打緊

小霖呀 其實你仲有一條路 就係坐正做大婆 迫小涼做二房

搶個正室番黎做有咩意思

<五十五>
「嗶嗶嗶…」我打開眼，望下個鬧鐘，都係10點鐘姐，可以瞓多陣。
.
.
10點鐘？！死啦死啦，我尋日唔係較9點半起身架咩。

得番15分鐘，我要刷牙、洗頭、吹頭、jel頭、換衫，仲要食早餐添，點算！

「隨時愛相見 便見面 未怕疏遠了十萬年..」邊個咁唔識做而加打黎？！

我隨手拎起個電話就聽：「喂，邊位？」

「係我呀..你啱啱起身呀？」

「梗係唔係啦，哈哈，起咗好耐lu。」我點敢話係。

「係呀，咁好啦，3個字之後樓下見啦。」

收線之後，我刷牙同洗頭都一次過搞，之後即刻吹好個頭就求其蠟咗兩嘢，之後就換衫。早餐呢啲嘢，let it go 啦。

最後都用咗15分鐘先可以著鞋出門口，出門口之前又搵極都搵唔到銀包，真係濕滯。

計埋等lift、落樓，我足足遲咗10分鐘。

10分鐘，足以令世界毀滅，如果你約果個仲係恐怖至極嘅女人。

「對..對唔住呀，我..遲咗。」我落到去即刻補鑊。

只見佢依然笑容滿面咁望住我，之後講：「唔緊要啦！」

喂巴大人你唔好嚇我呀大佬，我知咩叫笑裏藏刀架！

只要佢將放喺後面嘅手遞起，果然冇錯！佢嬲啦 ！

我即刻用對手擋住，仲嗌咗聲：「唔好呀！」

隔咗一陣..「咦，冇動靜嘅？」

「做咩姐你，發燒呀？」只見佢拎住個麥當勞袋，好疑惑咁望住我。

「下，我遲到喎，你唔嬲咩？」

「唔嬲呀。」

「我遲到喎！」

「都話唔嬲！」oh jesus！皇恩大赦呀！

「頭先聽你把聲都聽得出你啱啱起身啦，仲扮嘢，不過起咗身都唔怕啦。」

「睇你都未食嘢咪去買埋個麥記俾你，嘻嘻。」

「oh，我女朋友真係善解人意，冰雪聰明，人見人愛呀！」

「我人見人愛你係咪要驚？食啦，凍曬啦！」

我一路咬住呢個充滿愛嘅魚柳包，一路拖住佢隻手，前往我地第一個目的地。

推一個 一陣再出

推

去到地鐵站，當我諗住行去調景嶺線再落港島線果陣，佢卻拉咗我行去油麻地線果邊。

「做咩行呢邊呀？」我問佢。

「唔好問啦，跟住我行啦，嘻。」咁我之前嘅計劃咪全部白費曬？！

我地搭到去深水埗站，佢唔係想帶我行黃金呀..？

好彩係去咗西九。

「做咩黎呢到嘅？」

「今日溜冰抵呀！$65就可以溜全日！」

「做足功課喎你。」西九溜冰最正就係呢個位，所以我同阿言佢地周不時就黎呢到溜。

雖然個商場比我嘅感覺係非常唔自在。相信有行過西九嘅都同意…

當我著好對鞋果陣，佢仲未搞點，仲搞到左手綁右手咁，見到都好笑。

「我幫你啦！」見佢咁「呢hea」我忍唔住出手相助。

「唔該。」只見佢好似好唔好意思咁。

「你未溜過冰架？」我問佢。

「係呀...」

「咁你又帶我黎？」

「就係未溜過先想試下嘛。」

「你唔怕我都唔識咩？」

「怕咩喎，我男朋友咁叻！」咁你又啱喎！

「搞點，行啦。」我拖住佢隻手，慢慢行出冰場，費事佢一陣失平衡。

每一個第一次踏出冰場嘅人都一樣唔敢行出去，小涼都唔例外。佢喺個欄杆邊糾纏咗好耐都唔敢行出去溜。咁我唯有陪佢一步一步咁慢慢「行」。

或者你地覺得，咁麻煩架佢，唔識就唔好溜啦。

但係唔溜又點會識呢？雖然咁樣慢慢行好似好無聊咁，但係我覺得好過癮，見住佢驚驚青青個樣都值回票價。

「唔怕啦，試下出黎啦，有我拖住你唔怕跌。」我伸隻手出黎。

「好似寫八字咁跣下跣下就會攞到平衡，就算跌都唔怕架，跌跌下就唔驚架啦。」我一邊教佢，佢就一直扯住我衫袖慢慢咁溜下溜下。

見到佢個樣咁好笑，我都忍唔住用部電話影低佢個樣。

「喂呀，好樣衰呀，del咗佢啦！」

「咁珍貴梗係唔del啦！」講完我就再溜出去少少，俾佢自己試下溜唔溜到過黎。

「喂，翻黎啦！」佢顯得好驚惶失措咁。但係無計可施之下，佢都選擇試下溜。

當佢差唔多溜到過黎果陣，後面有條仆街突然好快咁喺佢身後溜過，佢一時驚一驚，仆咗落我到。

你地放心，我冇咁虧撞一撞就跌。

我即刻上前扶住佢，佢穩定咗之後即刻係咁拍我膊頭。

「死人頭死人頭死人頭，又dum低我！」

「咁溜冰梗係要識溜先好玩啦，成日扶住欄杆不如落樓下行石春徑。你睇你咪溜到過黎。」我講。

「咦，又好似係喎，溜到過黎又好似冇咁驚。」

「我地再兜多幾個圈睇下點啦，拖實我啦。」

「你唔好再dum低我呀！」

溜冰，講穿咗就係一樣講求信心嘅運動，小涼慢慢建立咗信心，就愈溜愈好，我地嘅關係亦都好似隨住信心嘅建立而變得更加穩定。

lm支持

lm支持

感謝!!!!!!

「之後去邊呀巴渣妹？」玩到咁上下我地都有啲攰。

「嘻嘻..玩具街！」下？

沿途見到好多小食，即使只係普通嘅魚蛋、三寶果類小食，佢見到都好興奮。

「你洗唔洗咁開心呀？周街都有啦。」

「平時爹哋媽咪唔俾我食架，佢話啲嘢污糟。」

「佢地都講得啱呀，食親呢啲好易肚痛，唔好食咁多啦..」一講完，我就食埋佢最後果粒魚蛋。

「費子楓你個死人頭，食埋我粒魚蛋！」我地就喺條街咁追黎跑去。

「啦，俾你食埋啦。」我將咬淨果半粒，用啲牙頂住。

「唔要啦，咁鬼核突。」

去到玩具街，佢就將佢最潛藏嘅童真一下就射曬出黎。

唔好問會唔會用湧出黎恰當啲。唔會，一定要用個射字先形容倒佢嘅狀態。

「阿楓你快啲過黎睇下，係雛田同鳴門嘅figure！」

「你又有睇架咩？」

「有呀，細細個已經追架啦！希望雛田同鳴門最後可以一齊啦。」你放心啦，最後佢地可以一齊，鳴門做咗火影，佢地生咗一仔一女，好幸福。

當然呢啲果陣都未知，我諗岸本都未諗好。

「你鐘意呀？買啦。」

「唔買啦，咁細隻都咁貴，唔抵買。」

再行多陣，今次輪到我大嗌：「嘩！係櫻木花道！好得意呀！」我見到個櫻木花道嘅咕塾。

「搞錯呀，明明係良田型好多。」佢搭訕。

「嘩屌，你又有睇？」

「有呀，神作點可以唔睇。」原來我眼前嘅女生係個動漫迷。
.
.
.
咁就好啦！啱曬channel呀！掂！

之後我地就繼續行，去搵番果種我地細個睇卡通嘅回憶。

我地會企埋啲細路旁邊睇佢地玩爆旋陀螺，佢見到啲女戰士嘅figure又會變得好興奮。

我地又會扮唔同卡通人物，講番佢地一啲好熟口熟面嘅對白。

雖然我地咁樣完全唔似情侶會做嘅事，但係who ing cares？！至少我地快樂。從來冇人同我去搵番呢種回憶，今日可以搵番呢種味道，都係全靠佢咁童心未泯。

「我去一去廁所先！你留喺呢間鋪等我，記得唔好走開。」我同佢講。

之後我就去番頭先果間鋪頭，買咗兩個咕塾，一個係櫻木，一個係赤木晴子。

「得啦，行啦！」我番去搵小涼，但係佢就唔見咗...