我只不過喺自修室溫書,點知比我遇番佢。

1001 回覆
141 Like 10 Dislike
2017-05-04 15:26:17
我希望你唔會唔記得,我地喺埋一齊嘅每一日,都係咁開心,我都係咁愛你。
─黎明 《玻璃之城》

新手故
只係希望大家睇得過癮。
文筆比較差 要屌屌細力啲
之前覺得唔係好流暢 所以再開過
2017-05-04 15:28:56
<一>
「你聽日係咪會再翻黎呢到玩架?」小女孩問。
「會,一定會!我應承你啦。」小男孩答翻個女仔。
.
.
.
「醒啦,自修室要閂門啦!」

有把好似天使嘅聲音突然將我由夢境拉番去現實,我抬頭望一望,個女仔已經轉身走咗。算啦,嚟咗自修室咁耐,都未遇過啲所謂女神嘅女仔,老蘭個故都呃人嘅,就算有都唔會睇得上我呢啲小毒毒,都係翻屋企繼續瞓下教好過。可能見到靚女嘅機率仲高。

但係,到咗第二日...


「恭喜你個發財呀,個鬧鐘又唔響嘅??!」

我即刻跳落床,用唔夠5分鐘時間換好衫刷好牙就衝落樓下截的士。當我幾經辛苦先截到架的士,車門另一邊又有個人開咗車門上車。

「尖沙咀呀唔該!」有個著住校服嘅女仔上咗車就即刻講。

What the fuck?!?!邊個咁唔識做同本大爺爭的士呀?等陣,把聲咁熟嘅?不過係呢啲生死存亡嘅時刻,邊理得咁多野,我梗係唔作出讓步,劈頭一句,

「喂,架車我截先架喎,落車啦!」

「咩呀,你點證明呀,總...總之我就唔落車架啦!」個女仔仲串番我轉頭。

「有冇搞錯呀,咁刁蠻嘅你...」話口未完,個的士佬講突然插把口,

「算啦後生仔,同個女仔爭有咩謂呢,俾啲風度你讓俾人啦!」

屌呀!而家唔係話咩男女平等架咩?什麼叫做風度呀?!!公平咩,呢個世界公平咩?
就係咁,架的士就絕塵而去,個女仔仲特登伸個頭出窗對我做咗個鬼臉,最毒婦人心,果然冇錯。

落力去追 我要望你總能看得見
2017-05-04 15:30:23
Lm 支持
2017-05-04 15:30:47
<二>
就係咁,我又再次遲到。當我行過拍卡機嘅時候,我望一望訓導梁主任果個令人不寒而慄嘅笑容,我永遠唔會忘記佢呢個笑容。就即係等於帶我上去一個充滿毒蛇猛獸嘅火山口上,唔理我嘅哭叫,唔理我嘅哀嚎,狠狠地,毫無憐憫地,將我用腳一伸,伸落去火紅嘅岩漿裏頭。係幾咁恐怖,幾咁奸險!!

佢笑住咁講:「同學,又遲到啦啵!」

「佢好似永遠對住你笑,笑到你心都寒埋。」我腦入面浮現咗呢句野,唉屌,又係留堂室見。

其實我覺得我都唔算壞學生,但係唔知點解個訓導好似特別對我有偏見咁,一有位,就會乘機入我波。
2017-05-04 15:32:45
「喂,廢紙,看招!」

我行入課室,都未反應得切,就已經俾人一腳kick底咗。

「搞咩呀死肥豪,晨早流流省尻我,痴線架?!仲有呀,唔好再叫我廢紙!我係姓費(秘)架!」我好嬲咁講。

噢,係喎,都唔記得講番,我叫費子楓。稍為有啲常識嘅都知逢親姓氏「費」字都係讀「秘」字。偏偏我身邊班friend都好似冇咩常識咁,個個都叫我廢紙。都唔知我老豆係同我有仇定我同我老豆有仇!

話說頭先省尻我果個叫阿豪。其實佢都唔算太肥,只係有個肚腩仔,所以我地都叫佢肥豪。我同佢由小學已經識。就係咁,我地就做咗對死黨。佢係個標準嘅漫畫迷。無論咩香港定日本嘅漫畫佢都好鐘意睇。我諗佢都係琴日唔知睇咗咩武俠漫畫學到新招先搵我黎做白老鼠。

「哈哈,佢玩咗咁多人得你一個中伏,果然係廢紙。算啦,你又唔係第一日識佢,放過佢啦。」

講野嘅係阿月。係個帶住副眼鏡嘅文青少年。睇落斯斯文文,其實就好鬼大隻。讀書都唔差。好多女仔迷佢架。但係佢好似全部都睇唔上眼,聽聞係因為佢都有意中人。佢同我地一樣都係同一間小學升上黎。我由小四開始就同佢同班到而家中五。我間直係見證住男神嘅蛻變。

「點解今日咁多人叫我算數架!」我大嗌。

「會唔會係你今日特別黑? 」阿言問。

阿言係我地班嘅學霸。唔係唔係,應該係我地級。基本上佢有讀嘅科都可以包辦曬第一…除咗數學。唔係因為佢數學差。相反仲係最好。但係事實係點,根本冇人知。佢係除咗馬壯以外第二個最接近神嘅男人。佢又曬一個全能嘅人都會有嘅特點。不過呢啲都可以遲下再講。

話時話又係喎,點解今日好似咁黑仔,係咪咩特別日子?唔得,今晚要睇睇通勝先。而家嘅我已經身心受到摧殘,希望今日唔會再有咩倒霉事發生係我身上啦。

「Good Morning Class!」班主任郭sir 行入黎講。我對於呢個班主任,可以話係又愛又恨...
2017-05-04 15:37:44
<三>
「Good morning Mr. Kwok!」
「費子楓,你又遲到?今年第幾次呀?再係咁你就知死!」一敬完禮,郭sir就對住我大喊。
「嘩,郭sir我好驚呀,你會對我點架」我用對手遮住個後欄問佢。

「你…你…坐翻低,唔好再遲啦!」
「好啦,各位同學,今日班主任堂都冇咩野做我地直接教書! 」佢俾我激到扎扎跳咁講。

郭子儀,我地班主任,亦同樣係我地數學老師。大約三十出頭。同平定安史之亂嘅郭子儀同名同性同姓。但係成就就差得遠。可能因為年紀關係,同我地都冇咩隔膜。係學校其中一個受歡迎嘅老師。而確實佢又幾關心啲學生。

我地叫佢阿王。因為佢自小好崇拜郭富城,仲將自己英文名改做Aaron。真係...


但係佢就成日都搵我笨,洗人唔洗本。點解要搵我落手?因為佢正正係我表姐個男朋友。佢地係同一間U grad ,喺Year 3一齊之後就到而加。當我Form4知道係佢做我班主任之後,我就知道大禍臨頭啦。果然不出我所料,開學第一日就屈尻我做班長兼班會副主席。係好彩今年阿豪自薦做班長我先倖免於難。
2017-05-04 15:38:06
Lm 支持

感謝
2017-05-04 15:40:15
終於捱到去放學。

阿言問我同肥豪:「去唔去星矢吧呀?今日有9折。」

星矢吧係我地學校附近一間小食店,有時我地放學會去果到打蹙。我地幾個都好鐘意睇星矢,仲自稱為「黃金聖鬥士」。

「你唔記得佢今日要留堂咩,嘻嘻嘻」阿豪講。

就係咁,佢地好無情咁去咗星矢吧hea,我自己死死氣咁去咗留堂室。

「又係你呀,自己搵個位坐啦。」去到留堂室,個當值生一見到我就話。

佢叫做汪映霖,都係我地班嘅一份子。我地都叫佢做小霖。佢嘅清新脫俗已經冇辦法用言語黎形容。唯一係為人cool到死,名副其實係一個冰山美人。

講到咁你地都估到。佢又係一個女學霸。好多厹都拜喺佢石榴裙下。但係有種人你知道同佢最盡都係去到知己嘅關係。我同小霖就係呢種關係。佢比我阿媽更加了解我,所以有咩野我都會搵佢幫手。

「成日都遲到,然後就留堂,你唔厭架咩?」小霖問我。

「你咁準時咪又係要坐喺到。」我駁番佢轉頭。

「冇你咁好氣。」佢答。

「仲好講,唔係今朝有個女仔搶咗我架的士我洗咁狼狽?比我再見到佢我實大卸佢十八塊,再學黃秋生咁將佢整成叉燒包!」

「變態。」 佢答。

但沒語言 甚麼心意你又聽得見
2017-05-04 15:41:59
有咩可以改善嘅一定要講 就算屌都冇咩所謂 最緊要就係要講出黎
2017-05-04 16:02:22
做咩開新po
2017-05-04 16:07:53
做咩開新po

因為覺得太散同埋有啲地方想寫得好啲希望繼續支持
2017-05-04 17:03:45
<四>
「抖夠未啊,抖夠就落自修室啦。」我阿媽叫。

我阿媽好緊張我啲成績,每晚食完飯就會摧我落去溫書。都啱嘅都就黎大考。係時候都努力下。雖然我嘅成績冇阿月阿言佢地標青,但係其實都算中規中距架。每年級排名都可以穩住喺30名以內。經濟就最好,通常都有頭五。

我屋企係起喺個小型屋宛入面。屋苑個會所有個自修室,通常都開到11點先閂門,又少人。所以我都幾鐘意落去溫書。

去到自修室我就不斷望下有冇類似尋日果個女仔嘅物體出現。我發誓我落自修室絕對唔係為咗溝女架下。不過有少少FF都唔過分嘅。

有個身形相當健碩嘅四眼妹望過黎向我微笑。嚇得小楓楓一陣嘅龜縮。

「唔會係果個四眼暗瘡妹掛..」我心諗。

我即刻唔敢再幻想任何野,只怕希望愈大失望愈大。都係專心溫書。

門口有2個女仔入咗黎。其中一個竟然係今朝同我搶的士嘅女仔!我地對望嘅一瞬間,即刻風起雲湧,江湖即將又掀起一場腥風血雨嘅…講笑姐,邊有咁誇。不過佢即刻用個好唔友善嘅眼神啤尻住我。喺我身邊經過果陣仲特登踩咗我一腳。

「呵呵,唔好意思喎」佢好細聲,又好輕挑咁講。

好彩我仲意識到自己喺自修室,先冇嗌出黎。但係真係眼淚在心裏流。可憐我隻腳成為呢場戰爭第一個犧牲者。佢地番到埋位之後仲一路望住我一路喺到唔知講咩,不過我諗同呢個女仔都難免勢成水火啦!
2017-05-04 17:46:04
lm
2017-05-04 23:03:27
lm

感謝你 一陣出文
2017-05-05 01:13:06
<五>
「廢子楓!」

第二日翻到學果陣,阿王突然一邊追住我一邊大嗌我個名。出於本能反應我梗係即刻跑起上黎。

點知佢好似食咗春藥咁,三兩下就追到我。

「你做咩愈叫愈走!」佢問。

「咁你做咩又捉賊咁追住我?!」我又問番佢。

「你走我咪追你囉。」

「你追我咪走囉。」

「你唔走我咪唔追你囉。」

「你唔追我咪唔走囉。」

天啊!究竟呢個係咪真係老師黎,竟然真係同個學生係到拗埋啲無聊野。

「好啦,唔同你玩。有啲野想你幫下手。」阿王突然好認真咁講。

我好少可見佢咁認真。每當佢咁認真嘅話,通常都會有大事發生。

「咩事?」我有啲唔係幾好嘅預感。

「下個禮拜你表姐個生日會你都會去架可?」

「梗係會啦,佢由細到大都咁錫我...等陣先!你唔係想...」我答。

「係呀!我果日想同佢求婚!你會幫我架可?!」佢突然用一種好卑鄙嘅威脅
語氣問番我。

What the fxxk!?我本應只係想問佢係咪想唔黎,佢竟然俾啲咁嘅答案我?

「都冇得唔幫啦,唔幫我仲洗喺呢間學校立足嘅?」

我諗如果我拒絕佢我會俾呢間學校嘅所有男仔日夜con死,再日日俾啲女仔用十大酷刑折磨。可想而知阿王係幾受學生歡迎。

「嘻嘻,咁就得啦,果日早啲到,招呼唔到呀。」

講完佢就好滿意咁走咗去,真係當自己男主人咩....
2017-05-05 01:28:49
為咗呢件事,我成朝都冇里神氣咁。我唔知阿王做咗我表姐夫之後會點。雖然佢真係幾好人,但係佢啲小人性格又真係好變態。

到咗小息我同阿豪佢地講咗呢件事。佢地個個都知我同阿王嘅關係,而且佢地同我表姐都幾熟。

「呵呵,廢紙,你都有今日囉!遲啲你實做咗阿王嘅奴隸。」

我發覺阿豪除咗串我就唔識講其他野。但係其實呢樣亦都係我擔心嘅野。俾佢下下用我表姐做擋箭牌仲得了嘅。

「我覺得,佢做咗你表姐夫都唔錯。其實佢份人都幾老實。而且對你表姐都唔算差呀。」阿月托一托眼鏡咁講。

「你覺得你唔幫佢你仲有命係到講咁多廢話咩?」冇錯呀,咁一針見血嘅說話係阿言講。

「屌呀?!你又啱喎」阿豪又加把臭口埋黎。

「放心啦,阿王求婚單野我地幾個都會幫手,佢唔會對你點嘅!」阿月又托一托眼鏡咁講。

有佢地呢番說話我先定番啲。
2017-05-05 02:03:45
係咪真係唔好睇 推一個先
2017-05-05 02:28:36
<六>
又到夜晚,又要去自修室。

「咦,你都喺到呀?」我落到自修室之後見到小霖就問。

「你盲架?」小霖好冷淡咁講。

小霖同我都係住同一個屋苑。我地之所以咁熟係因為細個成日落會所個遊樂室玩。都算係青梅竹馬嘅。

「咁你又唔係成日落黎自修室。」

「溫書啦,仲講咁多。」

當我做trigo果陣做到我頭都爆埋。點解可以咁難!我最差嘅就係數學。可能前世我係俾個算盤扑死咗。

我一有唔識就會問小霖。佢啲數就好好啦,三爬兩撥就搞掂一題。可惜佢名次前面仲有2個近乎無敵嘅存在。其中一個梗係完美嘅阿言。令到小霖每次數學都淨係得第三。

「你上堂究竟有冇聽書架,郭sir咪教得好清楚!」雖然佢好細聲,但係我都聽得出佢嘅唔耐煩。

「唔好提個死人老王啦!」我仍然為梗今朝嘅事好煩惱。

就喺我地拉鋸緊嘅同時,果個巴渣妹又入咗黎自修室。佢見到我同小霖坐埋一齊果陣,個樣好似有啲愕然。但係好快又換番個好不可一世嘅表情。

「喇!咪就係呢個巴渣妹囉!搞到我截唔到的士!」我同小霖講。

「咁你仲唔過去大卸佢十八塊?不過佢幾靚呀,你捨得?」

睇真啲個女仔又真係幾靚嘅。佢唔似果啲文青女神咁白白淨淨,相反仲黑黑實實咁。帶住副圓框眼鏡,眼大大,又扎咗個包子頭,其實睇落都幾可愛。不過可惜呀,心地唔好呀!天使咁嘅面孔都冇用。

「算啦睇你都唔敢,好啦,我走啦,阿媽叫我翻去飲湯。聽日見啦。」

講完之後小霖就走咗。冇咗小霖喺到,搞到我都溫得悶悶地,溫下溫下仲訓著咗。

當我醒番果陣,自修室都接近閂門,巴渣妹果陣都走咗。我背脊好似痴住咗啲野咁。原來係張memo紙。

點解你成日都訓教架xdd

唔通係上次個女仔??

像全沒進展 同時像隔兩公分彼此有明天
2017-05-05 03:24:01
推一下
2017-05-05 15:19:13
<七>
眨下眼,已經係表姐生日嘅日子。阿王倒塔咁早就打比我叫我去會合佢。收咗線之後我再打埋比阿月佢地同佢地講番。

「喂衰仔呢邊呀!」阿王一見到我就大嗌。

「你請我做野可唔可以好啲聲氣?」我好唔耐煩咁講。

「咦,你地都黎咗呀?」阿王完全無視我,對住阿月佢地三個講。

「係呀,郭Sir 你求婚咁大件事我地點可以唔幫手!」肥豪好雀躍咁答。

我地陪阿王去咗APM買咗啲佈置野,再去到附近嘅一間party room,個老闆都好好人咁比我地早啲黎佈置。

「喇,一陣呢就咁咁咁,阿言你就…」阿王好興奮咁同我地講佢個計劃。聽落都幾有心思,睇黎佢都準備咗幾耐。

生日會就黎開始,阿王就去咗接表姐。留低咗我地幾個。我地唯有鋤下D。啲親戚朋友都陸續到啦。最先到嘅係我老豆。
2017-05-05 16:00:02
「阿媽呢?」我問老豆。

「佢同你姨媽去咗行街,一陣先黎。咦,阿豪你地都係到呀?玩緊咩呀?」

「uncle!我地鋤緊D之麻,一齊啦,阿楓佢好廢呀,成日都輸。」肥豪又係到潤我。

「搞錯呀,身為我個仔一啲賭術細胞都冇嘅?唔怪得啲人叫你廢紙!」

下?!個名唔係你改架咩,唔係你我會比人叫做廢紙咩!?

我老豆係個40幾歲嘅男人,我有記憶開始佢已經成頭白髮。個人都幾高大。聽講以前係出黎行嘅,後來識到我阿媽先行翻老正。

佢份人都幾玩得,而且都好錫我。都可以話係一個慈父。阿月佢地都好鐘意同我老豆玩。佢成日教我地啲賭野,話出黎社會一定要識喎。

「哈哈,結啦,阿月阿豪炒!」老豆一落場已經殺到佢地片甲不留,得阿言倖免於難。

「老野你又係到教壞佢地啦!」

呢個時候阿媽同2個姨媽仲有婆婆都到啦。我阿媽係3姊妹最細嘅。佢地個名係跟「蘭」、「桂」、「芳」咁排。上一輩啲人改名係咪咁興食字-.-

「同D細嘅玩下之麻。」我老豆答。

我阿公就跟隨其後到場。一見到我阿公,我老豆就好似烏龜咁。好似因為我老豆嘅過去所以我阿公一直唔太鍾意佢。而且,我阿公一出場嘅霸氣都嚇驚唔少人。

「阿…阿爸..」我老豆一見到阿公就笠曬水咁即刻走去招呼佢。
2017-05-05 16:30:19
<八>
「喂,死人楓,你表姐呢?」突然有人搭一搭我膊頭問。

「邊個咁冇禮貌..」

噢,我轉過頭望下係邊個。之後我呆咗。原來係1霖。佢今日著得勁靚。佢著
咗一條白色連身裙,將平時扎起嘅頭髮放咗落黎,揹咗個斜咩袋,仲化咗個淡妝,簡直就好似跌落凡間嘅天使咁。老實講我都有啲心動。

「做咩呀,未見過靚女呀?」佢咁問一問我先回過神。

「超,普通啦,嘻嘻嘻。」

「唔識貨!」

「嘩..嘩小霖你今日好靚呀,飲唔飲野呀?我幫你拎呀。」阿月行埋黎同小霖講。

一向冷靜嘅阿月竟然都口窒窒咁。睇黎真係俾小霖嚇親。

「HI!大家咁快到齊啦。」

主角終於出場。冇錯啦,就係我表姐。佢撓住個死人王行入黎。都唔知死人王係咪前世平定安史有功,今世可以有個好似我表姐咁靚嘅女朋友。無論樣定身材,都足夠令天下男人葡萄。咁確實佢地拍埋一齊又真係男才女貌嘅。
2017-05-05 16:44:45
「多謝你地賞面黎喎,聖鬥士們!」表姐周圍同人social之後,終於得閒過殷同我地傾幾句。

「係我地嘅榮幸先啱啦,雅典娜!」肥豪爭住講。

呃,死仔平時又唔見你咁好口。

「豪仔仲係咁識講野呀下,肯定溝唔少女啦!」表姐講

我地不約而同咁笑咗出黎,之後話

「係呀係呀,但係冇次溝到呢。」

「係呢,表姐,你覺得郭sir份人點?」阿言突然咁問。

「佢呀,幾好架,份人擔屎都唔識偷食,又任勞任怨,最緊要對我好呀麻。」

「妖,又係一個老婆奴。」呢句當然係心諗嘅。不過睇個款阿王今晚成功嘅機會都幾大。

「係呢,表弟咁你點呀,仲未帶個女仔比我睇嘅?」

「叫佢食屎啦,搭訕佢都唔敢啦,仲話識女仔。」

究竟我點解會同呢個仆街豪咁friend....

「哈哈哈!」個個都係到恥笑我,連小霖都陰陰笑。

咦,阿言呢?
2017-05-05 20:32:03
「喂,細路,準備開始啦!」我突然收到阿王嘅whatsapp。

我向阿月同阿豪佢地打一打眼色,佢地都好識做咁走去準備,淨係留底咗一頭霧水嘅小霖同表姐。

頃刻,成個場嘅燈都熄曬。咁當然唔係停電。係阿月熄曬嘅。阿豪就捧住個生日蛋糕唱住生日歌。其他人都跟住一齊唱。

之後又係許願呀,切蛋糕呢啲例牌野。

「Aaron,我地一齊切..咦,Aaron呢?」表姐問。

呢個時候,我推咗個大箱入去,阿言都彈起「約定」伴奏。阿王都幾好野,知道呢到有間音樂主題嘅party room,所以可以係隔離借部keyboard翻黎。

雖然一百個唔願意,但係我都硬住頭皮笑住咁講:「表姐,生日快樂,睇下份禮物啦!」

表姐一打開個箱就見到阿王拎住戒指蹲咗係到,表姐驚訝到口都收唔埋。

「我請在座各位見證,我郭子儀希望娶你趙雪凝為妻,唔知你願唔願意呢?」

呢個時候表姐已經喊到缺堤咁,一路淨係係到UP頭。

NOOOOOOOO!!!!!!!!!!
就係咁,郭子儀,正式成為我表姐夫。
同伴們,請為我默哀3秒鐘....
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞