我只不過喺自修室溫書,點知比我遇番佢。

1001 回覆
141 Like 10 Dislike
2017-05-16 17:14:12
翻工做到攰
上黎打個圈
都有新文睇

今日留咗喺屋企 多啲時間打 加油啦
2017-05-16 17:40:15
<三十四>
「我改好你地份卷啦。講真呀,好多人嘅成績都未達到我要求。或者只係勉強夠應付今次大考。」

「但係出年你地就要DSE,內容要考番呢6年學過嘅野,呢個成績絕對唔夠應付個試,希望大家可以繼續努力,唔明真係要問。」

「特別係你費子楓,你都知你屋企人對你有咩期望架啦。」

聽完阿王講呢番說話,突然個心淆一淆,唔通今次又炒?!

唉,算啦,預咗。

「不過,你今次進步真係好大,我一直都知你係得嘅,要keep住呢個成績呀,出黎拎份卷啦。」阿王繼續講。

我拎過份卷睇之後,竟然有72分!!係72分!

我升咗上高中之後都冇試過拎多過60分。今次竟然有呢個分。

「多..多謝郭Sir,我..我會繼續努力架啦。」我真係太興奮。

「呃,你個死仔竟然肯嗌我做郭sir。」

「哈哈哈。」成班都係到笑柒我。

我翻埋位之後即刻將呢個消息whatsapp俾小涼知。

「真係架,好叻呀你!!」

「今次真係好多謝你添。想我點報答你先?」

「嗯...聽朝陪我食早餐啦。」

「冇問題冇問題。我請!」

除咗小涼之外,都要多謝小霖嘅。所以我就去同佢道謝。

「咁我應承咗auntie要幫你加麻,今次實開心死佢啦。」

「咁你要繼續射住小弟呀。」

「係喎,啱啱我約咗小涼食早餐,當係多謝佢,你都一齊呀?」

「你咁快..就同佢講咗啦?」

「係呀,頭先就whatsapp咗佢。」

「噢..我唔去啦,聽朝爸爸會車我。」

「我..我想去廁所呀。」之後佢就跑咗去。唔知佢做咩呢,奇奇怪怪咁。

「有冇急成咁呀..」

「小霖佢做咩呀?」阿月行過黎問。

「唔知呀,講講下突然好似急到瀨咁就跑咗去。」
2017-05-16 17:50:18
追番小霖啦
2017-05-16 18:06:29
放學之後,就係籃球比賽嘅初賽。

首先係我地班對B班。好阿王之前話齋,B班多數都係讀書嘅人,所以都唔太怕佢地。

我地暫時唔俾阿言上場住。其餘2班都會睇呢場比賽,我地唔想俾佢地知道阿言嘅實力。而因為佢地對阿俊已經好熟悉,都冇咩好隱瞞,所以就將佢放喺首發,盡量用佢黎屠殺對方。

我地一落場,就有好多人歡呼。當然啲歡呼聲唔係比我=.=除咗支持對方,就係支持阿月。冇法啦,阿月又高大又靚仔,梗係多fans。

一開波,阿俊就好似一匹脫疆嘅野馬咁,攞到波就沖去對方個籃底,上籃,唔洗6秒嘅時間已經開齋。

對方都仲未反應得切就送咗2分俾我地。

之後對方明顯想著力防住阿俊,竟然搵3個人防一個阿俊,是多麼愚蠢的做法。

結果就俾我同阿月阿星不斷嘅合作交替,如入無人之境。佢地根本毫無反擊之力。

最後我地班以30-12順利入決賽。
2017-05-16 18:13:19
比賽嘅段落適中啊可?會唔會太短?
不過我都唔想太花時間落去寫太多
2017-05-16 18:39:26
差唔多啦 太長反而冇咁好
2017-05-16 18:57:01
差唔多啦 太長反而冇咁好

可能決賽先寫多少少
2017-05-16 19:50:53
之後就係C班同D班嘅比賽。

C班固然贏面比較大。但係D班其實都唔差,佢地都有打開籃球嘅隊員。所以場賽事都係有睇頭。

當阿ROY一出場,好多女仔都為佢歡呼。睇見條柒頭個串樣就覺得黑人憎。阿晴都落咗去睇佢比賽。

一開始兩方都好似旗鼓相當,大家有來有往。但係熟行情都知C班根本未出全力,只係喺到誘餌D班。而D班又相信自己真係有得同佢地打。

阿ROY同譚偉峰、李至圖無意一兩球嘅合作已經盡顯佢地默契。上半場大家嘅分都係相差唔太多,但係實情係D班用上好多嘅氣力去維繫。

到咗下半場,D班好多隊員體力已經不勝負荷,而換上嘅後備實力都唔太好。

令到C班三子可以盡情肆虐對方,下半場好似變咗佢地三個嘅表演咁。

最後結果已經唔洗多講,佢地將會係我地決賽嘅對手。

「黎爵言,睇下我點打謝你。」阿ROY過黎挑釁我地。

「隨時候教。」阿言都唔再退縮,露出好堅定嘅眼神。仲望咗望阿晴,可惜阿情好似煞有介事咁避開咗。
2017-05-16 20:52:49
樓主出文嘅速度
2017-05-16 21:26:55
樓主出文嘅速度

2017-05-16 23:09:28
<三十五>
第二日,我就當然去咗同小涼食早餐。其實種感覺好奇怪,明明我地前一晚溫書溫到11點先番屋企,前後都只係8個鐘,我地又再見面。但係唔知點解,我又冇咩厭嘅感覺。

「其實你成日對住我唔厭架咩?」我問佢。

「厭架,對住你個木獨佬仲多過爸爸媽咪,悶到死!」

「咁你仲約我食早餐-3-」

「嘻嘻,愈厭就愈想對住喎。」費子楓,你要冷靜,冷靜..

「超,唔理你,買野食。」

「哎,家陣啲男人小氣到呢。」

「咁係咪唔食呀?巴渣妹?」

「板燒雞腿扭扭粉餐豬骨湯底加黑椒要可樂少冰!我去搵位!」佢即刻一輪嘴講低想食咩。食物果然係俘虜女人最大嘅武器。

「係呢,咁你地幾時決賽?」我買完野食之後佢就問。

「禮拜五放學呀,做咩?」

「冇呀,我估你果日都唔會去自修室架啦,咁我都唔落啦。」

走果陣我帶起個耳機聽歌,行行下有隻手係我面前揮下揮下。

「喂,嗌極你都唔應架!」

「聽緊歌呀麻。對唔住大小姐。」

「聽咩呀?我又要聽!」

「唔啱你架,係啲老餅歌。」

「我要聽呀!」

於是我就分咗一邊耳機俾佢,我地就係咁一人帶住一邊耳機行去巴士站。

「係今生不再喎!」佢聽到之後講。

「你又識?」

「我細個坐爸爸車成日聽架!佢成日播天濛光啲歌。」

「天濛光?」

「咪即係黎明囉死蠢!」

「係喎,哈哈。識貨喎你,我都好鐘意聽黎明啲歌。」

「你唔記得我叫Neway 十三姐咩?我聽唔少歌啦。佢果啲廣告真係超正 !」

「嗯嗯!好似..喂,阿MAY?」

「仲有我係咪好任性呀?」

「係!不過我揀嘅。」

我地好似都notice到好似講咗啲唔應該講嘅野,所以突然變得尷尷尬尬咁。之後就咁聽住歌行去巴士站。
2017-05-16 23:20:20
呢part可能你地睇得唔太明
上面幾句係黎明啲和記廣告對白,我本身就好鬼鐘意黎明,所以想插一啲情節滿足自己
2017-05-16 23:27:40
呢part可能你地睇得唔太明
上面幾句係黎明啲和記廣告對白,我本身就好鬼鐘意黎明,所以想插一啲情節滿足自己

好彩有解說,有冇廣告嘅link?
2017-05-16 23:30:53
呢part可能你地睇得唔太明
上面幾句係黎明啲和記廣告對白,我本身就好鬼鐘意黎明,所以想插一啲情節滿足自己

好彩有解說,有冇廣告嘅link?


https://www.youtube.com/playlist?list=PLoXDYYock7F0MrG9Bb4IUK2IpLoIYnaV2

篇文節錄咗93同98年嘅 有興趣可以睇下其他
2017-05-16 23:49:58
正啊有咁多文睇,繼續
2017-05-17 00:02:12
正啊有咁多文睇,繼續

打緊打緊
2017-05-17 00:30:53
「喂,咁早呀楓少。」阿月翻到黎就問。

「噢HI。」佢hea應佢。

「做咩呀?冇厘神氣咁?」

「喂你有冇試過對一個女仔有種講唔出,好虛無縹緲嘅感覺?」

「即係點呀?」

「大概即係你唔肯定自己係咪鐘意佢,又唔知佢係咪鐘意你咁上下啦。」

「屌,我解釋到我都唔洗咁煩啦!」

「你鐘意咗個人?自修室妹?」

我都分唔清呢個問題究竟係佢問我,定係我問我自己。

「我都唔撚知。」

突然「啪」一聲,阿月好大力咁拍張檯。

「你唔可以鐘意佢架!千祈唔可以!」佢一路講,之後係咁搖我。

「喂..喂..喂!停手呀屌。」

「你講咩呀?點解唔可以?」

「下..總之就唔得啦。」搞咩呀,佢打打下鎮定劑轉咗食海洛英呀?

之後再有「Bling」一聲,我地望到小霖整跌咗佢個飯壺,之後..
2017-05-17 01:33:05
自推下先
2017-05-17 01:35:21
2017-05-17 02:08:11

多謝
2017-05-17 02:27:07
<三十六>
之後啲飯餸跌曬落地,我同阿月行過去幫佢清理番。

「啲飯食唔到架啦..今日你同我地食啦。」我同佢講。

「下..好啦,唯有係咁啦,一齊食啦。」

我幫佢拎個兜去垃圾桶倒咗啲飯果陣,好隱約聽到阿月問佢

「你聽到曬呀?」

我果陣背住佢地,所以睇唔到小霖嘅反應。點解阿月會咁樣問佢嘅?

我翻去佢地到果陣,佢地又借啲意轉話題,唔通佢地有咩瞞住我?

果陣入世未深嘅我,一直抱住呢個疑惑。但係而加嘅我奉勸大家一句,有啲野真係唔知好過知。
.
.

放學之後,我地又去咗後山練波。如果上次果個特訓係算辛苦嘅話,今次可以話係來回地獄又折返人間。

阿王完全冇當我地係佢嘅學生,佢完全當咗自己係馴獸師去訓練我地。

我地都明白佢咁緊張嘅原因,所以我地都無怨言咁服從。因為我地都想贏,仲要係開巷果隻。

之後幾日我地每一日都係咁操。雖然辛苦,但係我地都好享受。呢個係我地最後可以享受熱血嘅時候。搞搞下我都覺得我地隊有啲湘北。

我地有個好似良田嘅小巨人阿星,有好似流川楓嘅萬人迷阿月,阿俊就好似三井壽咁射波咁準,阿言就好似赤木咁帶領住我地..

係嘅,我承認我想做櫻木。唔係因為佢係男主角,而係因為我同佢對贏都有入執著。

眨下眼,賭上榮譽同未來嘅比賽就開始了。

一陣就係同C班嘅決賽。

上場之前,小霖走過黎同我講咗聲加油。

「輸咗又幫唔到阿言我就殺咗你。」

「你咁樣鼓勵我架?好失望囉。」

「理得你呀,集合啦。」

「算!」當我轉身準備走果陣,「喂!」佢叫番住我,

「加油啦白痴!」

每次有咩事都係佢為我注入支強心針,我一定唔可以令佢失望。

到列隊果陣,對方果三子又擺起個臭款。

垃圾ROY又喺到講:「睇住黎啦你地,今日嘅勝利一定係我地,仲有阿晴,佢都係我嘅!」

佢講完之後先發覺我地一早已經去準備,得番佢一個喺到自吹自擂。

「嗶!」開始了。
2017-05-17 05:16:00
2017-05-17 08:25:31

2017-05-17 09:42:01
今日grad trip開始,不過我都會keep住出 不過可能冇尋日咁多
2017-05-17 13:02:03
今日grad trip開始,不過我都會keep住出 不過可能冇尋日咁多

中學定大學
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞