轉煙油味要唔要清洗霧化器？
我自己覺得，洗就梗係好過唔洗，尤其係D比較大味嘅煙油；有D人搞好多嘢去追求電子煙嘅口感，但係對於洗霧化器竟然比較求其，唔通溝埋D舊味都係口感一部份？
其實上網睇，有好多唔同嘅做法，有人用梳打粉開水浸，有人甚至用白醋浸，我自己做法就比較簡單，拆開哂個霧化器，用水喉水冲下，然後放入個保暖杯浸熱水半個鐘，攞番出來等一陣凍番，再用水喉水冲多一次，放在陰涼地方風乾或者用風筒暖風吹乾。
如果係用Kanthal A1、Ni80、或者SS316發熱線整嘅DIY發熱圈，可以拆咗D舊棉之後，用水冲下個發熱圈，然後上機燒絲，在發熱圈紅嘅時候，將霧化器向下擺埋水喉冲下個燒紅嘅發熱圈，然後用細嘅鋼絲掃（電子煙店有賣）輕輕掃下個圈，掃走D積碳，重複以上步驟直到清走哂D積碳為止。如果唔清楚，可以去YouTube睇下人地點做（揾"clean vape coil"）。用Ni80線整嘅發熱圈其實唔係咁耐用，如果個發熱圈洗完燒完都唔乾淨就換咗佢啦。用Ti或Ni200發熱線整嘅發熱圈唔可以乾燒，唔乾淨就要換咗佢。
我有以下經驗想補充下：
- 成品霧化芯都可以浸洗，但係唔好期望可以洗走D積碳，浸洗只可以洗走部分舊嘅煙油味，如果個成品芯太燶就要換啦，成品芯洗完亦需要比較長時間去吹乾（起碼一日）
- 唔好過度拆散個霧化器，有D位拆唔到就由佢，夾硬拆可能會整爛個霧化器
- 我唔會拆埋D橡筋圈出來洗浸，我揾唔到好嘅方法可以在唔損毀D橡筋圈嘅情況下拆出來
- 我只會用90度或以下熱水浸，可以做“橡筋圈”嘅物料有好多，有D甚至可以抵受200度高溫，但係你唔會知生產商用咗邊隻物料做橡筋圈，我查過大部份嘅物料都可以抵受到90度嘅熱力
- 可以裝一個有正極嘅510散熱片去架機道先裝霧化器底座去燒絲冲水，減少架機被冲水濺濕嘅機會
- 有時如果煙油味太大，我都會用藥用酒精去抹下個霧化器
- 定時用藥用酒精去抹下個510吸嘴消毒下，畢竟口水都幾多細箘
- 唔好用機械桿燒絲，用機燒可以先check下電阻先燒，比較安全，另外燒過絲都要check番D固定發熱圈嘅螺絲有無扭緊
想問下點解要用熱水?
煙油係有機化合物，熱水能夠加速溶解有機化合物
咁想問吓大家係咪食晒一枝油先再轉食第二枝?
如果唔係咪要成日洗
