[b]250正評
加更[/b]
好耐無加更了
一夠數就加
接住落嚟嘅日子,我有啲驚返學,之前嘅時光太過美好,我都會每日期待返學嘅日子。
唔係話依家唔美好,呀詩依然係我身邊,只不過我見唔得呀Ken同呀詩咁好。
一種好幼稚嘅想法,就係呀詩係我㗎!邊個掂下佢都唔得!
每日就係過住啲心情忐忑嘅日子,好似坐過山車咁,只要呀詩搵我就好開心,佢一上堂返去坐嘅時候呢,就成日周不時都會望住佢。
上堂一啲心機都無,真係為女死為女亡。
喱啲煎熬嘅日子我唔知捱咗幾耐,耐到我以為有一年了吧?
終於有一日,子晴都睇唔過眼,係一堂中文作文堂忍唔住同我講:
「你係度擔心啲咩姐?」之前我同子晴都有講過下嘢,但唔算熟,熟嘅係佢同呀詩姐。
子晴忽然間送咗一句埋嚟,我哋好似開咗話題咁,成堂講唔停,有時係度諗,中學嘅緣份就係咁奇妙。
無啦啦就會熟,而且只要其中一個願意行出一步,就會陪你行好多好多步。
「擔心呀詩囉⋯⋯」我唔係幾好意思地答佢。
「驚呀Ken溝走呀詩?」子晴道出我心聲,子晴把聲好溫柔,呀詩有時把聲好中性,撒嬌會好返啲。
「有咩可能唔驚啊?」我細細聲地回應子晴,我唔係幾想講我同呀詩嘅事,見子晴同呀詩係好朋友,先比較放心講。
「你喱排成日都係咁㗎啦,隻眼成日飄去人哋度。」子明隻眼無離開過張作文紙。
「做咩咁留意我啊?鍾意我啊?!」我開玩笑道,我就係知無可能先講喱種玩笑。
「噗!」子晴嫣然一笑,終於放下手上支筆。
指一指我張空白嘅作文紙,道:「你睇下你啊,都就嚟落堂啦,你寫咗啲咩啊?好難唔留意下你喎。」