［日本戰國史］關東英傑傳

岩岩醒起 推介戰國控巴打們follow佢 好多歷史既影片

關東平原方面，下野國勢力 - 宇都宮廣綱自1571年12月甲相同盟復辟後，擔心北條家捲土重來，就任用重臣岡本宗慶，再度與佐竹家結盟，並與當地勢力包括小山家、壬生周長、佐野昌綱等互相照應。但好景不長，岡本宗慶響1572年1月14日被親北條派既皆川俊宗、皆川廣照等人刺殺，隔日皆川一族計奪宇都宮城，把持家中大權，將宇都宮廣綱軟禁，並且與敵對勢力 -壬生綱雄、那須資胤聯手支持北條家，令下野國掀起一層波折。

為左令大家認得方便，就分享下野國形勢關係：
關東本土聯盟：佐竹氏、宇都宮氏、佐野氏、小山氏、鹽谷氏、壬生周長
親北條聯盟：皆川氏、壬生綱雄、那須氏、結城氏



下野勢力分佈圖

5月，加入「信長包圍網」既武田信玄開始策劃西上作戰，東線有盟友北條坐鎮，對外唯一顧慮只有越後上杉家，武田信玄為左令上杉家分心，先聯絡加賀國光頭黨，邀請佢地到越中國協助椎名康胤，以及越中既光頭黨。由杉浦玄任率領既加賀光頭黨，多年前曾經肆虐越前國地區，後來被朝倉宗滴響九頭龍川擊退，但一直未能收拾殆盡，反而令當地成為獨立領土。

加賀、越中光頭黨會合後勢不可擋，人數直迫三萬，椎名康胤亦乘機起事。不只如此，就連從屬上杉既神保長職亦倒戈相向，與光頭黨結盟，上述事件令越中國增添混亂。光頭黨聯軍接連進攻越中中部，因為呢班光頭黨坐擁多支鐵砲，火力十足，各地據點被圍到彈盡糧絕，駐守越中既家臣 - 河田長親響6月出兵救援，響神通川因為寡不敵眾接連敗退，日宮城、白鳥城、富山城相繼陷落，光頭黨完全控制中部、西部地區。

到左7月，呢班光頭黨繼續向東推進，山浦國清、河田長親血戰多時依舊不敵，仲要被迫退到新庄城死守，河田長親見形勢不妙，立即向春日山城告急，迫使上杉謙信必須重視事件，無暇理會武田。但係，攻勢又點會咁少？武田信玄仲請北條家同時進攻上野羽生城、深谷城等地，那一天，上杉謙信回憶起被三面夾擊既時光。

上杉謙信派養子 - 長尾顯景到上野一帶防守，並與佐竹家聯絡，但冇收到任何回音，反而因為下野勢力 - 那須資胤、結城晴朝在6月與佐竹家議和，「關東本土戰線」開始進攻壬生綱雄及皆川俊宗，北條家亦因此轉移視線，令上野國暫時脫困，並響9月調配上野兵力到越中參戰。



上杉謙信進軍構想圖

同時，上杉謙信率領一萬人救援越中，抵達新庄城、富山城一帶，飛驒勢力 - 江馬輝盛亦應邀參戰。9月，上杉軍在尻垂坂一帶大戰光頭黨，我地既「軍神」先生趁天降秋雨，對方鐵砲啞火，無法有效應戰時突擊，輕鬆宰殺光頭黨至少三四千人，再乘勢攻陷富山城，包圍瀧山城等地，將暴虐既光頭黨徹底趕走，拳打光頭黨、腳踢椎名康胤啊！

嗯，一聽見我咁描述，就知道冇好野啦？呢個係所謂彰顯「軍神威風」既尻垂坂之戰，響多本記載上杉家既史料包括《越中史料》、《上杉文書》、近代所寫關於上杉謙信既史料，甚至係《北越軍記》呢本上杉版《甲陽軍鑑》既灌水史料，都冇提及過「尻垂坂之戰」既事情。就連《北越軍記》都只係講上杉謙信進攻富山城，雙方互有攻守，僅此。



水份書 - 《北越軍記》節錄 (轉載自百度)

我地再睇其他史料既解說，大多都只講上杉謙信參戰，其中《上杉文書》就提及飛驒勢力 - 江馬輝盛應邀到越中參戰，與光頭黨遭遇應戰，後被河田長親率兵擊退，捕獲十幾人。至於其他關於上杉謙信既史料，都只係講「出兵到越中新庄城，擊潰富山城光頭黨」、「光頭黨見上杉強勢，退守日宮城，上杉包圍瀧山城」等等內容。

所以，綜合以上說法，大致可以知道上杉謙信響8月出兵越中國，以新庄城做前線據點，強攻富山城一帶，並且請上野部隊增援，光頭黨不敵退走富山城，同時江馬輝盛參戰，上杉軍派山浦國清會合，就一齊圍攻瀧山城、日宮城等地。至於光頭黨人數，通說三至四萬，但響《平加賀守宛上杉謙信書狀》中卻指上杉以為對方有四萬人，實際光頭黨見到上杉軍主力時，已經撤離當地，剩低三四千人把守，甚至有說因為織田信長威脅近江地區，加賀光頭黨響應顯如號召，已經撤退抵抗。



有關《上杉家文書》原文記載 (轉載自知乎論壇)

不論爭議如何，我既看法係尻垂坂之戰只係虛說，不過是次出兵上杉謙信確實擊敗光頭黨，椎名康胤響松倉城被上杉軍包圍下，於1573年1月投降後，自此史料不甚記載，下落不明，越中國暫時沉寂。

輪到武田家既回合，趁上杉謙信到越中時，武田信玄於9月正式發動「西上作戰」，派人請朝倉義景、淺井長政等人攔截織田信長，派山縣昌景出兵遠江西北部，自己從甲斐翻越青崩嶺，殺入遠江東北部，攻打德川家康，「西上作戰」在主線已經提及，在此不述，欲知詳情可以睇以下網址：

12月，北條家因為下總國栗橋城主 - 野田景範背叛，被北條氏照率兵攻破，野田景範將家督退讓後，栗橋城由北條氏照接管，成為對「關東本土戰線」既前線基地。之後，北條氏照為救援被圍攻既下野國盟友，先攻打南部既多功城，但係響城主多功房朝奮戰下，被下野聯軍擊退。

轉眼就步入1573年1月，常陸國方面，佐竹義重家臣 - 太田資正趁死敵小田氏治慶祝新年時，率兵襲擊小田城，小田氏治倉皇撤退後，立即響2月反擊並奪回本據，並且擊退佐竹義重既部隊。但到左3月，佐竹、小田兩軍響築波山、手這坂一帶交手，佐竹軍大勝小田軍，小田氏治響呢場戰役後失去小田城，退守常陸南部既藤澤城。

之前被軟禁既宇都宮廣綱，因為佐竹、小山、結城三家協助，將把權既皆川俊宗驅離宇都宮城，重掌家督權力，皆川氏退回本據並協助北條家侵擾下野國人。

同時，上野親北條家國人 - 由良成繁入侵民心失附既桐生氏，將其居城 - 柄杓山城作為新根據地，然後又攻破館林城，鞏固上野南部、武藏北部既領地，上杉謙信在上野既勢力縮退至沼田、厩橋城。

4月，北條氏政聯合國人 - 成田氏長攻打武藏北部既羽生城、深谷城，上杉謙信準備救援之際，收到武田信玄停止西上作戰，從遠江撤退既消息，感到不可思議。至於常陸方面，佐竹義重聯合梶原政景、真壁久幹、多賀谷氏等殺向藤澤城，但係被小田氏治擊退，佐竹義重唔信邪，就攻打小田氏其他城，呢位「鳳凰座鬥士」又發揮小強本色，將佐竹聯軍擊退。

到左7月，佐竹義重再度出擊，到9月為止先後攻陷藤澤城外兩座重鎮，小田氏治唯有退守土浦城，佐竹軍包圍藤澤、土浦城，小田氏治每逢絕境，戰鬥力都會倍級上昇，於是黎個背水一戰，向佐竹軍突擊得手，成功保衛家園，小田氏治連戰連勝，終於重返小田城下。但係呢場勝利只係曇花一現，佐竹義重響11月反攻，迫退小田氏治、攻陷藤澤城，小田氏治退守土浦城頑抗，但到左1574年初因為寡不敵眾而開城逃亡，多名家臣戰死或降伏，小田氏治請北條氏政庇護，為復興故土而雌伏。

而北條家呢段時間，繼續響上野羽生城、深谷城，下總關宿城一帶到處進攻，並無特別大事；上杉謙信亦冇太大動作，只係留意關東動態，計劃營救羽生城、對付由良氏。



本回關東大致戰事

次回
關東平原的拉鋸（二）
直江津 - 上杉奴隸販賣市場？

又有文

又有文

再推推

留個靚名，關東個邊既歷史真係唔熟

再推推

幫手推
不能只有我看到

留個靚名，關東個邊既歷史真係唔熟

開頭因為以名門內訌為主，所以關係幾亂

岩岩醒起 推介戰國控巴打們follow佢 好多歷史既影片

今晚返屋企睇

講1574年之前，我地先講返一件事，1573年初武田家響優勢下突然撤離遠江，因為甲斐之虎 - 武田信玄身負重病，4月在駒場病逝，《甲陽軍鑑》流傳最出名既逸話，就係武田信玄要求隱瞞三年死訊，但其他史料不見記載。武田信玄死後，武田勝賴繼位，甫接手就見到境內因為長年用兵，以及武田信玄留低種種問題，包括高稅收、多關所，導致百姓負擔沉重，商業更因此廢馳，主要收入來源 - 黑川金山、安倍金山又因為恣意開採，幾近殆盡。

雖然武田信玄修復水利，但主要建立既《甲州法度》響勝賴眼中，卻係一個嚴厲可怕既法制，連坐法、密告制度等高壓手段，令當地人心惶惶，要不是武田信玄長年略有成果，以及家臣團一片頌揚下，甲斐早就爆發軍民衝突了。冇左信玄既光環，民眾亦重新審視武田家，於是勝賴就計劃改變前人嚴苛既制度。

然而，一眾舊家臣穩守府內大權，更不時向勝賴提醒要仿傚信玄，並要求保存信玄時代既政令，包括特許近臣、旗本徵稅制既制度，以及家臣合議制等，想鎮住呢位後生仔。同時，勝賴出身諏訪家，對呢班家臣黎講，武田勝賴同外人冇分別。

武田勝賴唔係蠢材，佢一邊唯唯諾諾，一邊提拔長坂光堅、跡部勝資、土屋昌恆等人，培植屬於「諏訪勝賴」既親信勢力。



武田勝賴

武田家表面和諧，實際暗藏危機，呢段時間武田家事跡唔算多，我地繼續睇關東局勢，1574年3月織田信長為左對付武田家，就派人接觸上杉謙信，向對方贈送知名屏風「洛中洛外圖」，就此建立織田－上杉既戰略同盟。

上杉謙信收到羽生城、深谷城既求救後，於1574年3月進軍關東，首要目標係擋路既由良成繁，為桐生氏復興舊地，先後攻陷深澤城、膳城等上野南部地區，包圍金山城，但因為羽生城告急，所以上杉牽制由良成繁，進入館林城一帶，北條軍亦派人迎擊。點知天公不造美，利根川水位暴漲令兩軍只能隔岸深情對望，然後各自掃蕩，由得羽生城繼續被圍，上杉軍亦響5月撤退。

5月，武田勝賴突襲遠江，攻打重鎮高天神城，老臣團全不知情，德川家康向信長求援，自己亦到附近戒備，高天神城有內應造反，協助武田軍奪城，城主小笠原信興棄城撤退，遠江東部重鎮被武田攻佔，呢一次出動亦係武田勝賴向一班老臣既示威行動，因為如此，武田勝賴繼位既消息終於傳出。

房總既里見氏率先反應，里見義堯知道武田、北條密不可分，主張對抗北條既佢，又回復當年與上杉既遠距戰略關係，但係時不我予，里見義堯響6月病逝，與北條家對戰多年，歷經北條三代強攻仍屹立不倒既強人離世，其子里見義弘正式掌握實權，但係房總半島冇左義堯，仲可以堅持到幾耐呢？

上杉遠去之後，北條氏照、北條氏繁轉移目標到關宿城，城主梁田晴助至今已堅守九年，仍力保不失，到左10月北條大舉進攻，梁田晴朗同時向上杉謙信、佐竹義重兩人求救，促成二人和解。上杉進軍武藏國北部鉢形城、騎西城、忍城一帶，四處放火引發騷亂，再去對付由良氏既領地。11月想橫渡利根川協助，但係北條氏政、北條氏照率兵阻擋，上杉一直期盼佐竹義重幫助，卻不見消息。



關宿城景色多優美

佐竹義重到底點諗呢？對方就咁回應：「上杉謙信一直以黎宣稱打擊北條，但只係治標不治本，十三年喇，我只係見到北條擴張、上杉積弱，幾年前仲要背信棄義，私自與北條同盟，今次要不是關宿城有難，我都唔會出兵。如我所料，上杉響利根川毫無進展，果然只係出黎交下差，我唔會上當既，按兵不動啦。」

如此，關宿城等唔到援軍之餘，仲要被北條軍，以及附屬既千葉、結城氏圍攻，就算梁田晴助如何奮戰也好，都無法扭轉戰局，最終關宿城因為彈盡糧絕，開城投降，梁田晴助之子 - 梁田晴助、持助父子投靠足利義氏，北條氏政正式控制下總國全境。

同時，小田氏治靠北條相助，響關宿城開戰時請北條氏房幫忙，進攻常陸國土浦城，城主菅谷政貞見到氏治回歸，立即開城投降，小田家響土浦城復辟，宣佈再次與佐竹義重爭霸常陸國，佐竹義重心諗：呢條小強幾時先肯死？



1574年關宿城之戰流程，大致係咁...

失去關宿城之餘，利根川又被北條控制，上杉謙信連羽生城都救唔到，深谷城城主上杉憲盛病倒後，其子上杉氏憲選擇投靠北條，北條接管兩地後，將羽生城賜予成田氏長，成個關東平原既敵人，就剩低里見義弘，以及下野國勢力了。結果上杉既武藏國盟友全部倒下，同山內家一樣，所謂「關東管領」黎到呢度，不過是徒有虛名。

謙信返到越後，又收到震驚既消息，一直侍奉長尾家既三代重臣（為景、晴景、謙信三代） - 柿崎景家病逝，由繼承人爭奪開始，柿崎景家對上杉謙信忠心耿耿，多年戰事立下唔少汗馬功勞，係上杉家帳下戰鬥力最強既猛將，同佢並列既只有齋藤朝信、直江景綱、北條高廣、上條政繁、本庄繁長等人。

關於柿崎景家既死，過去就流傳佢私通織田信長，又或者私自向織田家走私戰馬，換取豐厚收入，被上杉謙信猜忌所殺，相關講法響《謙信記》、《北越太平記》等後世創作史料常見。另外《上杉家文書》，以及考究柿崎家系譜中，就只係提到景家病逝，以及1577年柿崎晴家已經就任既史料，1574年上杉、織田關係良好，而且柿崎景家長年對上杉忠心不二，上杉謙信對叛將如北條高廣、本庄繁長都比較寬容，所以私通處死既講法備受猜疑，唯獨病死比較有力。

或者咁講，上杉謙信聽得一次流言就去殺人，然後又留低人地個仔繼續為自己效命，成件事咁曲折離奇，你地到底信唔信呢？

1575年1月，上杉謙信養子 - 長尾顯景改名景勝，我地熟悉既第四代人物 - 上杉景勝亦開始蒲頭了。到5月為止，關東平原都冇特別事件，我地就開個話題講下，就係一直流傳，由上杉家經營既「直江津奴隸市場」。

直江津係越後國，以至於東北地區在日本海沿岸既重要港口，唔知幾時開始，就一直流傳上杉謙信利用直江津從事大量人口販賣，作為越後既主要收入。我地不如回顧下越後既貿易，1553年上杉謙信上京拜訪時，開通特產 - 青薴既商業貿易，但呢條商路卻因為1560年武田、上杉交戰，光頭黨被武田煽動，截斷越中航路終止。

於是有人話，上杉謙信成日去關東，當時又興捉人去賣，就如武田信玄一樣，男既捉去做礦工，女既捉去做...你懂的，軍事集團拐賣人口好常見啊，但上杉有關人口拐帶既記載，都只係出自一本真偽不明既《別本和光院和漢合運》，反而家臣河田長親既隨行記載中，就講到上杉謙信嚴禁拐帶人口。其實戰國時代捉拿人質，換贖金賺收入，贖唔走就做奴隸，係好常見既，但上杉家既人口販賣資料完全冇歷史資料佐證。



有關嚴禁拐帶既記載　(轉載自知乎)

再講，越後國本身都有金山、銀山如上田銀山、鶴子銀山等地，聞名既佐渡金山到江戶時代先大肆開發的，上杉家係咪好似武田咁窮，需要大量人手挖礦，以至將甲信地區既金銀山都榨取殆盡呢？其實又未算，反而武田信玄炒高贖身價，以奪取大量奴隸呢點，先係最令人不齒呢。講咁多，我係認為直江津為人口奴隸市場一點，毫無有力證據，想誣衊上杉謙信？少年你太年輕了！

次回
十六年的爭戰 - 越中正式平定
聯盟亦無用 - 北條家大肆擴張

支持茶坊主
推下post

過多一兩篇就進入終章

支持茶坊主
推下post

我介紹上杉家不過不失吧

支持茶坊主
推下post

我介紹上杉家不過不失吧

好想睇御館之亂

剛剛睇緊本書叫《敗者的美學》，有講山本勘助同宇佐美定滿，好似又多dd認識

留個名先

剛剛睇緊本書叫《敗者的美學》，有講山本勘助同宇佐美定滿，好似又多dd認識

茂呂美耶既書令你更認識日本, 值得參詳

推

再推，聽日應該出到文

推

推