趕故書生
2017-03-10 01:34:37
我一扒,就扒到中午放飯。
關晴同呀楊都叫我一齊食,我諗…唔同佢哋食,我都唔知可以同邊食啦。
Kitty返緊學又唔會覆我whatsapp,搞到我成日孤伶伶一個。越係孤單,想念Kitty嘅份量就越重。
一出學校門無耐,行係我前面嘅呀楊同關晴,係我面前拖起手上嚟!
我當堂呆咗,仲唔信自己隻眼,係咁揉係咁揉。
「你哋兩個幾時一齊架?」我指隻佢哋十指雙扣嘅手。
佢哋一齊舉高隻手,「一陣咪話你知。」
佢哋兩個嘅同步令我聯想起洛克人,同步插入。
我哋搵咗間唔算多人嘅茶餐廳坐低,一入嚟茶餐廳,就諗起第一次同Kitty嚟食茶記。
原來身邊好多事情,都可以同Kitty連接,無形間,佢變得如此重要。
「好啦,你哋可以講啦。」我一臉認真。
「哈哈哈!」佢哋俾我呢種認真嘅樣整到笑咗出嚟。
「放鬆啲先。」佢哋嘅嘴角仲笑緊,「我哋係聖誕節約出嘅時候一齊嘅,只係咁啱嗰個時候,有feel。」
呀楊幫關晴開口。
「吓?但係關晴唔係有仔嘅咩?」有無咁快呀?
「分咗手啦,係聖誕節之前。」關晴自己講,始終呢啲事由佢自己嚟講係好啲嘅。
「下?分咗手無耐就一齊?」我一時之間接受唔到。
太突然啦掛?太快啦掛?起碼曖昧下,耐啲先一齊呀?
咁快就一齊,俾我嘅感覺似係……水泡。