趕故書生
2017-03-07 23:13:21
1.
我望住枱面上嘅早餐,其實我覺得屋企人都好錫我。
雖然我哋好窮,但我屋企卻俾最好嘅嘢我。由細到大,我想要咩嘢,我屋企人都會想盡辦法俾我。
越大個嘅時候,我想要嘅越嚟小,我只係想屋企人健健康康就夠啦。
所以我見到枱面上嘅早餐,真係覺得好溫暖。
係呢個時候,Kitty係廁所行咗出嚟,問,「有無新嘅牙刷呀?」
我去搵咗個新牙刷俾佢,然後我專登同佢一齊刷,嗰個畫面真係好似情侶。唔係情侶,就係夫妻架啦。
「做咩入嚟姐!好逼呀!」Kitty玩咁樣推我出去。
「明明就好多位。」我無理到佢,企係Kitty後面,一齊刷牙。
我望住廁所塊鏡,從鏡入面嘅倒影中,見到Kitty一邊刷牙一邊笑。
見到佢笑,我又跟住笑,傻傻地。
「嗯…嗯…嗯嗯嗯?」Kitty刷住牙講嘢。
屌你,真係聽唔清楚架。但又覺得好得意好好玩咁,氣氛好和諧。
「嗯嗯嗯……嗯?」
我哋牛頭唔搭緊嘴,係度九唔搭八。
我哋一路嗯嚟嗯去,直到刷完個牙。
一刷完,Kitty就大笑,「哈哈哈!你頭先講乜鬼呀?」
「你又講咩呀!?我都聽唔清楚你講咩。」我跟住笑埋一份,估唔到笑聲都可以傳染。
「聽唔清楚你又講?九唔搭八!」
「你咪一樣?」
Kitty對住我吐一吐舌頭,「嗯…嗯嗯…嗯?」