Rob鼻鼾好大。
畀佢嘈到我醒吓瞓吓,拖到七點半先起身。當時我仲非常自信,覺得自己可以一日踩接近二百公里去到個host度。
臨走嗰陣,Rob都起咗身,佢送我落樓,話要去隔離Burger King借wifi。交換contact之後,攬一攬,我就出發去希臘。
希臘?係,你冇睇錯,係希臘。
我曾經諗過,如果去希臘唔去Athens同地中海嘅話,不如唔好去,但事實上呢啲地方都喺希臘南部,以我時間同budget,我係唔應該去。咁點解我仲要去希臘?無他嘅,喺土耳其過去,希臘同保加利亞個關口都好近,為咗喺passport吸個印,又可以望一望希臘係咩環境,我咪入咗希臘再由希臘入保加利亞囉,踩多少少咋嘛,差唔多方向。
即日由土耳其過希臘,再直插保加利亞,一日踏足三個國家,諗起都扯旗。
去希臘關口途經嘅Edirne商業街
Why? How?
喺Edirne去邊境,都要踩返幾公里,但因為尋日落過雨,啲爛路積晒水,拖慢咗我啲時間。
終於,我去到土耳其同希臘嘅邊境。
因為經常有車往來希臘同土耳其,呢度嘅關口係可以揸車過,基本上只要個司機落車,畀晒全車人passport個海關check,其他人係唔需要落車就獲得通行。
再一次畀個關員問我點解冇visa,經過一輪解釋之後,擾攘一陣先放行。
再終於,我要離開土耳其。
離開土耳其呢個同伊朗喺好客方面不遑多讓嘅國家,意味住我好可能唔能夠再感受到當地人嘅熱情招待。進入歐洲呢塊出名冷漠嘅土地,我十分懷疑,嚟緊自己可唔可以適應,始終我畀沿途呢幾個伊斯蘭國家縱壞咗。
我仲可唔可以喺人哋屋企借宿?仲有冇人主動執我返屋企?會唔會有人請飲請食?仲有冇人會覺得我係上天賜畀佢哋嘅禮物?仲有冇人想結交我?我交唔交到朋友?甚至我連一句熱情嘅招呼都唔敢肯定會得到。
我真心唔知。
但,曾經有人同我講巴基斯坦好差、伊朗又好危險、土耳其東部會畀人綁架同掟石,而我親身感受過之後,呢啲嘢我都冇經歷到,咁人哋對歐洲嘅睇法呢?會唔會……佢哋其實唔冷漠?
嗯,真正進入歐洲大陸喇,等我試完話你聽。
Goodbye, amazing Turkey.