我冇調頭,因為我踩緊嘅係單程路,如果貿然調頭,我好怕一個唔覺意畀對頭車撞到,反而我繼續去,想試吓有冇一個位畀我兜返落去。
呢個決定絕對係錯中之錯。
喺唔同嘅迴旋處兜咗幾個圈,每個出口都好似係又好似唔係,兜嚟兜去都搵唔到一條路係出返去或者駁到去Budapest。天黑情急之下,我打算膽博膽,沿住highway直剷Budapest。
歐洲係右線行車我相信大家都知,當時嘅我靠住右邊,去到一個三岔口,最左邊係有車會入嚟,轉去中間或者右邊條路(唔計我身處嗰條),而我要入嘅就係中間條路,換言之我有後時間需要越線,唔可以全程靠右。(稍後會用電話補圖)
我做得最錯嘅係,我電筒冇電,我冇用到頭尾燈,諗住憑住微弱嘅月光盡快踩到去有街燈嘅地方。
喺我剛剛切線,諗住踩入中間條路時,左邊突然一部大貨車高速駛至,而我冇燈,貨車司機見到我嘅時候已經係要轉入中間條路嗰陣!我嚇到呆咗,下意識第一時間係剎停忍者龜,除咗咁我都冇嘢可以做到,一切交畀個天。
又或者交畀個貨車司機。
當佢見到我嗰陣,佢立即急剎同扭軚,千鈞一髮之間,貨車恰恰避開咗我,轉入中間路口,仲剷咗上邊邊嘅沙地,差啲撞埋右面嘅鐵欄。
只要我踩快兩步,又或者早兩秒,我肯定已經畀貨車撞到正一正!
唯一唔明嘅係,如果佢本身都係轉入中間路口,點解仲會扭到靠咁右,剷上沙地同差啲撞欄?抑或係其實佢本身想轉入右面路口,係見到我先急急扭軚?但點都好,呢一吓一定係我錯,我唔止差啲累死自己,仲累到人。
幾時都話,自己死唔緊要,真係唔好累人累物。
事後我猶有餘悸,腳都軟埋,但冇路可走之下唯有硬住頭皮繼續踩,希望可以盡快離開highway,同時我心入面不停同自己講,執返條命,以後要做多啲好事,最基本係唔可以再喺highway踩車,雖然今次都係衰戇鳩。
重覆多次,唔撚好學我,仲有你死你事,唔好累街坊。
一背都係冷汗咁頂埋落去,托賴都畀我捱到離開呢條highway入城,再慢慢踩去市中心,一條大直路咁搵到姐姐位於極級中心點嘅屋企。
問咗我鍾意飲豬骨湯,又咁耐冇湯水,特登煲定
姐姐住嘅並唔係普通apartment(當然市中心都好難住郊外嗰啲House),而係拍戲或者睇旅遊節目先會見到嘅──百年古宅!
一棟成百年歷史嘅樓──入面其中一間好撚大樓底好撚高嘅單位!