當晚食飽飽之後,因為好攰,等咗陣見Engin仲未收舖返屋企,我就自己入咗客房休息,仲勁快瞓着覺。
一覺瞓醒,我都覺得唔係幾好意思,食咗啲饅頭,執好嘢,特登叫醒Engin,諗住同佢道別。Engin一醒,同我行出露台,點咗支煙吹吓水。見佢個樣攰到閪咁,我都feel到佢寧願花啲時間陪吓我都唔瞓,我又再多啲內疚。
Engin個樣畀我感覺就成個駱應鈞咁,唔知邊個?咁知唔知邊個仆街二叔?係喇,Engin就成個仆街二叔樣咁。佢見我要走,就話Edirne係一個幾值得遊覽嘅城市,叫我朝早踩去旅遊區望吓先,睇完再走。出於嗰份內疚,我答應咗佢,求其出去兜個round。
睇到嘅不外乎都係清真寺、博物館同Bazzar,對於我嚟講都係睇唔睇都冇分別,真真正正求其兜咗個round,我就踩返去Engin嘅單車舖,諗住出發。返到去,Engin帶咗我去一間平價超級市場買補給,等我可以使晒啲土耳其里拉。然後佢送咗件印有佢哋單車舖logo嘅反光背心畀我,一嚟保護我,二嚟幫佢宣傳吓,仲叫我如果遇到其他入嚟土耳其嘅單車客,叫佢哋住喺佢度。
我心諗,其實Edirne嘅Warmshowers host唔多,而你又有求必應,reference又多,基本上喺保加利亞或者希臘入嚟都好難唔係住喺你度。當然我滿口應承,我亦唔會介意向其他人介紹吓佢,但我最後都係質咗件反光背心喺行李嘅黑洞入面,冇特登摷出嚟着。
着住影咗幾張相,突然有個後生仔揸車過嚟,係佢哋個community嘅人,提起話晏啲有個瑞典嘅單車佬會過嚟留宿,Engin就如夢初醒咁,同我講:「不如你留多晚啦!冇乜人會淨係喺Edirne留一晚,而且又有個人嚟緊,你可以同佢交流吓。」講真我又冇乜意欲留喺Edirne呢個地方,但又係出於嗰份內疚,加上我都好想問吓呢個瑞典佬歐洲係咩境況,亦心知嚟緊歐洲嘅路線配搭有太多,我今日揀咗行呢條,可能之後幾日都會同另一條冇交集,咁樣未必會撞到單車佬,喺佢哋極力挽留之下,我就決定留多日,會一會呢條單車伊巴。
然後班學生就帶我周圍逛吓,仲撞到Engineer
唔知嚟買乜
鳩流流咁渡過中午,下晝Engin個舖頭partner同我唱咗少少保加利亞紙,我都真係冇乜好做,純粹喺度等瑞典佬。
唔好以為歐洲都係用歐羅,佢哋有所謂歐元區,如果嗰個國家冇加入歐元區,佢係會用自己本身嘅貨幣,我往後經過嘅國家,有差唔多一半都唔係用歐羅,譬如我入保加利亞,之後塞爾維亞、匈牙利都係有自己嘅貨幣,入到斯洛伐亞開始先用歐羅,但喺捷克又用返捷克紙,跟手一直用歐羅用到法國,去到英國先轉返英鎊。
唔好睇小呢度呀,成二十歐㗎,嗰陣歐羅仲兌緊十㗎,我預咗使三日㗎
等到天黑,天氣開始變壞,由全日嘅毛毛雨變成滂沱大雨,令到瑞典佬抵達嘅時間不斷延遲。直至Engin差唔多收舖,佢終於到。