幾經辛苦，老子終於搵啱路，穿過一條小村咁搵到去Pazardjik嘅路。至到八點半，我先進入Pazardjik嘅範圍，拜託一個路人NPC幫我打電話畀我嘅host Margarita，之後佢老公Joro就揸車出嚟接我，我跟住佢車尾踩入市中心，到佢哋屋企。
終於有嘢食
Magarita係一個英文補習老師，Joro就係一個法官，佢哋有三個仔女，都係好細個，所以屋企超級嘈。Magarita話，見到咁嘅天氣，都知對我行程有影響，加上我已經遲咗兩日，其實今日佢哋都預我唔會到。
聽到呢度，我暗暗慚愧自己帶咗啲麻煩畀人，但又十分感謝佢哋唔介意我咁夜先到。
有個女發緊脾氣唔肯影相
喺我食緊嘢嗰陣，佢哋全部人喺廳同我吹水，始終佢哋接待我嘅原因都係想了解多啲我嘅旅程同埋香港係咩地方，我亦非常樂意同佢哋交流，只係當時爛身爛勢咁，諗住食埋先沖涼，有少少唔係幾好意思。
Joro同我講吓保加利亞嘅歷史，其實我本身都有個大概，都係本身係共產國家，收尾蘇聯收皮佢又變咗共和國咁。而估唔到嘅係，喺土耳其有人同我講保加利亞嘅物價仲低過土耳其，而我喺油站買嘢又唔覺，Magarita就解釋，係油站同香港一樣特別貴，而保加利亞係持續通縮，人工非常之低，啲人寧願唔做嘢，都唔想打份牛工搵嗰雞碎咁多，又或者會去其他歐洲國家搵食，所以佢哋嘅經濟係非常差。
又係一個午餐肉之國。
唔知大家記唔記得，喺伊朗Tehran嗰陣，我住喺一間免費hostel咁款嘅地方Khayyam House？喺嗰度，我見過一個韓國backpacker，牛高馬大，好多嘢講，但明顯地係講埋啲無聊嘢，嗰陣都覺得同佢溝通唔到。原來Magarita之後都host過呢條友，因為佢，令到Magarita差啲唔想再host人，而事情後來好似搞大咗，令到佢心灰意懶，冇再玩Couchsurfing。
事情就係，韓國佬應該係有sponsor去旅行，然後會出書咁嘅。佢嚟到Magarita屋企，已經即刻埋首同韓國嗰邊啲人傾嘢，又長期對住部電腦，人哋想同佢傾計都唔理人。之後出去又唔講低咩時間會返，然後就投訴人哋唔喺屋企定點，事後仲唱Magarita話佢屋企啲小朋友好嘈。
嘩屌，正一極品。
大家記得出去唔好影衰香港人，okay？
吖求其講埋啦，嗰晚就喺佢哋個好靚嘅廳度瞓，第二朝起身食早餐，然後Magarita有個中年肥佬學生上門學英文，佢想我同肥佬傾吓計，畀佢練吓英文咁。玩到十點幾先走，Joro就送我落樓咁。
呢個就係同Magarita一家嘅回憶。嗰晚我到咗首都Sofia都有喺Couchsurfing text佢報平安，佢都有覆我。後來，應該係韓國人單嘢搞到佢冇再玩Couchsurfing，我到咗London再同佢報平安佢都冇再覆了。
more more
