朝早五點起身,尋晚個嬸嬸已經收咗工,多謝唔到佢。煮吓嘢食,梳洗吓咁,因為天氣凍,動作慢,都成七點先出發。
This is Hungary.
朝早並冇話踩得好急,始終一百七十應該唔需要話分分鐘都趕路,我仲每到一個鎮就search wifi搵Budapest嘅姐姐,話畀佢知我今晚就到,叫佢醒醒定定喺屋企迎接我。
國民意識好強,會掛國旗
十點零鐘,見肚餓,但仲未唱錢,唯有寄望鎮上面嘅舖頭會收信用卡。但入去一問,屌,士多仔唔收卡,歐羅又唔撚收,畀佢點咗我去隔離間銀行,諗住應該冇問題啦,你媽個臭閪銀行都唔撚唱歐羅!屌你開銀行托柒?好在銀行阿叔無懼假銀紙,私人同我唱二十歐,我先有當地貨幣買嘢食。
其實歐洲踩車就係咁㗎喇
應該係街名
呢堆就係我午餐同下午茶喇
我坐咗喺士多對出少少嘅馬路邊度食,食食吓有個外表唔高貴,但舉止非常優雅嘅嬸嬸行過,見我成個乞衣咁坐喺地下食嘢,一臉好奇咁指手劃腳用匈牙利文問我嘢,從佢嘅肢體語言同表情嚟睇,斷估都唔係話我阻街或者叫我跟佢返屋企做牛油狗,而係問我「坐喺度食真係Okay?」咁樣。
我笑住猛咁講Okay,嬸嬸又笑住點點頭,就入咗士多隔離間家品店。
冇幾耐,嬸嬸拎住個咕𠱸行出嚟,遞畀我叫我坐!原來佢怕我坐得唔舒服,走入去買個嚟畀我墊住個屎忽。呢啲咁細微而細心嘅舉動,令我對匈牙利人好感度大增,直覺我會幾鍾意呢個國家。
其實,我個屎忽又點值得享受咕𠱸帶嚟嘅舒適?佢未畀忍者龜虐待到爛已經偷笑。
食飽之後,執好嘢,我拎返個咕𠱸入去家品店,諗住還畀仲喺入面吹緊水嘅嬸嬸,點知佢又係嘰哩咕嚕咁唔知講乜,拒絕收返個咕𠱸。見我一臉愕然,佢就問佢隔離啲人,然後生硬地講咗個英文生字:
「Gift.」
然後我一直帶住呢份禮物踩到去英國。