法國依家冇乜巴打
有我
Tihomir曾經講笑咁講過,保加利亞人係幾自大,作為一堆歐洲斯拉夫垃圾,佢哋竟然可以睇唔起土耳其人,包括嗰啲仍然生活喺保加利亞嘅少數土耳其裔人。
據佢所講,呢批少數族裔喺保加利亞國內受盡歧視,所以佢哋一般都係留喺東北部,免得過都唔會同其他人打交道。
咁點解唔返土耳其?
唔知呢,可能土耳其唔收,又可能寧願做二等公民都唔想回歸祖國啩?
唔止土耳其,其實保加利亞人同塞爾維亞人關係都麻麻哋。就好似印度同巴基斯坦咁,明明兩個國家嘅人都好好,但總係因為某啲原因,各自以為對方係牛鬼蛇神。就連Tihomir呢個咁明事理嘅新一代,都同我講塞爾維亞人好麻煩,我過關嗰陣有可能會留難我。
天氣終於好返啲
一覺瞓醒,搞掂晒啲嘢之後,Tihomir就送我落樓,影張相,然後我就向住保加利亞同塞爾維亞嘅邊境進發。塞爾維亞最近邊境嘅城市叫Pirot,我一早經已經Couchsurfing喺當地搵咗個host Miroslav,而佢話因為要返工,所以叫我下晝六點先好到,正因為咁,我慢條斯理地起身準備,再慢條斯理咁踩。
好似返咗伊朗同土耳其咁
話咁快
唔知點解,明明一直暗斜落近,但越近邊境,越覺得寒,睇嚟除咗海拔,濕度嘅影響更加大。抵達邊境之後,再一次揼個印,並冇出現Tihomir講嘅可能被留難情況,我嚟到我喺歐洲嘅第二個國家──塞爾維亞,時區再跳前一格,計返,原來我同英國淨係差一個鐘。
嘩,死啦,突然覺得好近。
出境
前面入境
找換店
老毛病發作,硬係覺得喺邊境唱錢唔抵,又冇事先check定匯率,唔知做緊咩價,諗住暫時冇必要使錢,於是我打算去到Pirot先搵地方唱錢。
我超級他調咁踩,第一次祈求自己唔好咁早到,吖你老尾,咁都畀我四點鐘到Pirot。喂,除咗唱錢,我都冇咩特別嘢做,又冇得上網,搵唔到Miroslav或者碌吓電話,Pirot又只係一個小鎮,點打發時間?
Pirot市景
求其搵個地方唱咗錢,根據之前save低嘅位置踩到去Miroslav屋企附近,好死唔死,嗰度一排屋,都唔知邊間先係佢嘅,而其中一間仲要養咗隻看門狗,係撚咁吠我呢個陌生人。拎住佢張相問個聽到狗吠聲而出嚟睇咩事嘅鄰居,確定咗斜對面一間係Miroslav屋企之後,我就喺門口坐低,諗住打定今日日記嚟度過呢段時間。
呢個時候,聽到仲未肯停嘅狗吠聲,我身邊嘅門打開……