今晚有冇文
當我初到Budapest時,只係睇住地圖踩去姐姐屋企,並冇意識到呢條大路極為順暢,基本上唔使點轉彎就搵到佢屋企。去到先知,因為佢住正喺市中心嘅旅遊區,根本條大路就係鋪出嚟通往市中心。
喺兩邊都係歐式建築嘅街上搵到佢住嗰棟大廈,唔算好高,亦只係平平無奇咁坐落喺建築排中間,但後來聽姐姐講,原來呢度有超過一百年歷史,即係早喺第一次世界大戰之前,呢度已經存在!
咁點解我會覺得佢平平無奇呢?因為喺Budapest(或者話係中歐),呢類建築一街都係,根本佢成條街都有悠長嘅歷史,喺海中嘅一滴水又有幾標青?
雖然係百年古宅,但呢度亦與時並進,喺樓下大閘裝咗個密碼鎖,可以撳上樓通知姐姐,然後佢就落嚟接我。
呢次可以話係喺旅程中第一次畀自己嘅讀者見真身,仲要喺我外型最柒嘅時候,縱然我一早拜託過姐姐到時見面要幫我剪吓個柒頭。
上到呢個樓底超高嘅屋企,擺低嘢,我即刻除鞋拎衫沖涼。事後講返,原來呢條友仔話聞到我對腳好撚臭,但當時未熟到可以講出嚟笑鳩我。屌,腳就梗係有腳味㗎啦,腦魔不知幾撚鍾意奶。
姐姐其實係上海mix廣州人,所以識講廣東話,讀電影出身,機緣巧合同咗仔仔移民嚟匈牙利,接吓freelance拍嘢咁,都叫一個專業人士。之後傾多幾句,幾撚啱傾之下,我哋好mk咁用姐弟相稱,到依家我仲叫佢做家姐。
喺家姐屋企其實可以話係一個畀我調整心態嘅空間,每日都冇咩特別嘢做,陪佢湊吓仔,個仔返咗學就去買吓餸同飲吓咖啡咁,有日我又出去參加walking tour,叫做畀我有一個喘息同反思嘅機會。
反思吓究竟自己仲堅持緊啲乜,究竟我仲係咪因為當初嘅目標而踩。
好乾淨嘅街市
呢間café都過百年歷史
最正嘅係,我喺家姐屋企痴飲痴食,一解多月嚟嘅中餐癮。
左邊係紅燒肉,我去到英國之後叫家姐隔空傳授,自己都煮得唔錯
當晚好攰咁同家姐喺廳吹水,講咗好多心事。然後佢開咗套當時嘅新戲我睇,話我會有共鳴。可能你哋都睇過,《狂野行》,講女主角原本自暴自棄,係性上癮嘅公廁,後來老母有事,佢先反思自己嘅人生,想作出一啲改變,然後新手上路挑戰美國嗰條PCT。
嗱,除咗冇性生活,我老母又健健康康之外,係有啲似嘅。
不過可能因為太攰,當時冇乜感受,之後一沈澱咗,就覺得呢種一係就唔嚟,一嚟就要打大佬嘅改變,真係好相似。
係,我要嘅,係一百八十度改變嘅人生。