卡比先生
2019-02-25 22:02:34
「好,咁個邊就交比你哋啦,我哋翻去摷吓佢哋身上有無其他有用嘅嘢先。」
榮叔語畢便和黑柴負責回到剛才的戰埸上搜索敵人屍體,而你和MK妹則帶著阿桂回到藏在林間深處的卡車上。
「到啦,嗱……入面就係--」正當你走到車尾拉開篷布,卻未把下半句說完之時,阿桂便已經一馬當先衝到車廂裡頭。「洗唔洗咁趕啊……」你搖搖頭說了一句,隨即也從後跟上。
只見阿桂的雙手飛快地在鍵盤上操作著,面對那同樣是黑底綠字的程式碼介面,對他而言卻好像是不費吹灰之力的事情。有別於身旁只是略感驚訝的MK妹,曾經挑戰過這台電腦的你看見屏幕上的字元正以列為單位的迅速向下滑動,都幾乎不敢相信自己的眼睛了。
……若然被他看到「略懂電腦」的你是如何逐個命令字元的嘗試的話,肯定會被不留情面的嘲笑吧--
「哈哈……哈哈哈……哈哈哈哈哈哈!」阿桂突然捧著肚子大笑起來。「救命……哈……哈哈……邊個傻仔……逐個逐個command試,加加埋埋仲要錯成七十幾次……哈哈,條友有無腦㗎!哈……哈哈哈!」
「……可……可能佢唔識電腦呢?哈哈!」感覺到自己的臉上一陣熾熱,你尷尬地笑了笑說著。
「佢仲要……佢仲要蠢到send咗自己個GPS signal出去兩次,係兩次啊……哈哈哈哈!邊到有人咁蠢㗎!你話佢唔小心錯咗一次都算啦,之後仲要嚟多次……真係……哈……哈哈……」
「係囉,你話如果個傻仔第二次send出去個陣都仲呃到人,係咪好好笑啊!哈哈!」你故意諷刺地放聲乾笑了兩下。
「哈……哈哈哈……係……係啊……比佢呃到個啲人都唔知係咪朦㗎!救命!咁都上當嘅!哈哈哈哈……哈……」他臉上的笑容再一次僵住。
回頭一看,你和MK妹臉上又是掛著惡魔似的笑容。
「我唔會係……話緊自己掛?」阿桂好像突然意識到了甚麼似的,臉色更是由紅變青。「頂,原來係個局嚟嘅……唉屌……」