卡比先生
2019-02-15 08:35:49
A route(前半)
「你口口聲聲掛係嘴邊嘅『我哋』、『組織』……到底係乜?」你話鋒一轉,撇開有關病毒研究的話題。
「我哋係邊個唔重要……重要嘅係,我哋可以做到啲咩,而你又可以幫我哋做到啲咩。」莎姐手持著試管走近一張長桌。「病毒依家不斷自我進化緊……按照依家呢個速度,佢好快就會脫離我哋嘅控制,而目前為止做過嘅所有研究亦都會前功盡廢……」
她一邊說著,一邊熟練地把注有你血液樣本的試管放置到離心機裡,把它的蓋子關上後,又回到了電腦桌之前。「趁變種病毒仲未進一步進化,甚至去到一個已經同原形幾乎截然不同嘅地步之前,我哋一定要盡快搵到應對方案--呢樣就係你同我哋可以、亦都應該要做嘅事。」
話音剛落,她正要伸出手去按下錄影按鈕之際,又徒然把手收回,轉身望向猶豫的你。
「……唔通你想一隻一隻喪屍咁殺咩?無可能㗎……以佢哋感染嘅速度,除非你用核彈將成個香港夷為平地啦,如果唔係根本就無可能有完全將病毒徹底消滅嘅一日。」她語重心長地說道:「事實上……你唔係幫緊我哋,你做緊嘅嘢只不過係救緊你自己……同埋呢個地方。」
卡比先生
2019-02-15 09:43:01
「你一路都唔肯比我知道你哋嘅身份,我又點信得過你講嘅嘢係真?」你再次追問。
「如果只係求其作個大話嚟呃你啊,我就無必要專登熄cam啦,係咪?」她眨了眨眼笑說:「……呢啲說話唔係Off record情況下講嘅話,會出事㗎。」
「車……你啱啱先講完呢到有CCTV,你熄定唔熄部機咪又係一樣。」你對她的說法嗤之以鼻,始終不肯相信。
「CCTV嘅錄影片段只會store係呢到嘅Server room,但錄影機就會直接經電腦即時上傳到雲端,只要係可以access到呢個伺服器嘅任何一個地方都可以同時睇到,例如係軍用卡車上面嘅個部電腦。」她又恢復正色道。
「但係--」「事實上,如果唔係出於保鮮問題,我根本就唔洗帶你嚟呢到;而係我拎到血液樣本之後,我亦都唔需要解釋咁多……你信又好唔信都好,悉隨尊便。」莎姐以冰冷的眼神直視著你。
……換句話說,無論你選擇繼續留在這裡與否,對她而言並沒有絲毫分別--因為從頭到尾,她都只是要把你的新鮮血液弄到手罷了。
你決定自行離開實驗室(a),
還是認為暫時留在這裡更為安全(b)?