「即係話……我哋好有可能仲會遇到其他變異體……」榮叔深呼吸了一口,又從袋裡掏出皺煙盒來。「點搞……一隻都已經夠曬煩……」
黑柴、MK妹和你互望一眼,也想起剛剛為了擊殺黑眼喪屍的難度之高,甚至還間接讓金仔負傷昏迷。若然再次碰上同類變異體的話,對於現在缺少狙擊手的你們而言,恐怕就再也無法照辦煮碗,在一擊得手之後還能夠安全脫身了。
「睇嚟我哋今晚應該無辦法起行㗎啦……太冒險啦。唔單止金仔仲未醒翻,而且仲要小心唔知係邊到突然出現嘅變種喪屍……」榮叔閉上雙眼,以正夾著煙枝的手揉揉額頭,苦思著該如何是好。「最重要係我哋彈藥都已經所剩無幾……偏偏呢樣係最難補給嘅物資。」他邊說著邊點燃手上的煙頭。
「……差館!」MK妹忽然舉手喊著:「槍房入面有,啊……但係就未必有步槍嘅子槍……」
「但至少左輪用嘅點三八會有……」一旁的黑柴亦開腔接話,「前提係我哋搵到差館,而又有辦法入到槍房。」
「咁你哋識唔識呢一頭嘅路?」榮叔見狀向你們問道,卻想不到你們竟同時搖著頭。「依家無咗網絡用唔到GPS導航……但如果慢慢搵路又太曬時間,萬一因為咁而同Sabrina佢哋擦身而過嘅話……」--你們很可能就像兩塊落在漣漪兩頭的浮葉一樣,隨著波紋愈飄愈遠。
換言之,只要愈把前往實驗室的時間押後,你們所承受的風險就愈大……根本沒有兩全其美的方法。
「反正都係無子彈,我哋又唔識路……咁不如依家就出發啦?仲可以省翻啲時間添。」你們當中唯一的女孩子再次提議。
「……唔得,咁樣太危險。我哋根本唔知出面仲有無變種喪屍係到……甚至乎只要俾一大群普通喪屍包圍嘅話,我哋都已經實死無生……」黑柴反駁道。「夜晚係佢哋嘅主埸,如果依家茂茂然行動,蝕底嘅只會係我哋㗎咋。」
「係原地停留又有幾安全啫?萬一附近真係仲有其他變種喪屍,我哋咁樣同坐以待斃有咩分別?反正都係要搏,點解唔等架車係移動狀態嘅時候嚟搏啊,咁樣唔係先至最安全咩?」MK妹也依然是寸步不讓。
公說公有理、婆說婆有理--他們再這樣爭論下去的話,你都快想要和金仔交換身份,索性一直昏迷不醒算了。
……彈藥補給……與莎姐會合……真的沒有辦法能同時兼顧兩者……嗎?
你突然靈機一觸,想到了一個可能有點冒險,卻比起大海撈針更為可行的方法。「或者……我哋可以嚟個草船借箭、螳螂捕蟬。」
……沒錯,一個只需要一個晚上、以逸待勞,更可以借力打力的三嬴解決方案。