墨說
2019-02-05 04:30:29
「好好好!吳爹。」爺爺給他一罐冰涼的啤酒,堵住其嘴巴:「你都餓啦?流浪者之家啲嘢邊係人食,今晚酒肉都無限量供應。」
「哇──!正呀。」吳爹開蓋,一口氣灌下整罐啤酒。
微涼夜色,月亮高高掛。
烤肉聚會,從吳爹拉開易拉罐作序幕。
以平日的杞家來說,現在可算是十分熱鬧。
爺爺像個酒保,一邊調酒一邊跟客人談話。不同的是,他是個肉保,一邊處理烤肉,一邊跟各位談心。
而扇柔,跟小松似乎合得來。
因為他肩上的寵物,實在太討小松注意。
「佢好可愛啊!可以一直好乖咁坐喺你膊頭。」小松試著伸手指過去,並溫柔詢問:「你叫咩名?」
「佢叫狐火。」扇柔代答。
「啲毛咁蓬鬆同咁橙,真係同啲火一樣咁。」小松點頭。
我跳到小松的肩膀上:「我都識坐你膊頭。」
「哎吔,小葵,做咩突然跳上嚟呀,想我讚你乖啊?」小松單手將我摸住。
「認識下佢。」我望向那隻狐火。
「狐火佢並唔係一般嘅貓。」扇柔向小松介紹,說:「佢具有變化能力,危急時會助我脫險。」
墨說
2019-02-05 04:42:10
「咁‧‧‧咁勁?」小松眼瞪瞪的,望住狐火。
扇柔慢慢解釋道:「動物天生帶有靈性,只要經過長年訓練,就可以將佢哋由妖獸,培育成靈獸助自己一臂之力。」
「咁佢變身之後係點嫁?」小松走更近一點,盯住狐火。
「你可以當做一隻,充滿火焰嘅狐狸。」
「小葵都要練習下啊!!」小松突然轉身,將我捉住。
「並唔係任何動物都適合一試。」扇柔溫文地笑道。
「好想親眼見到呀!!」小松兩拳握緊,已極為期待。
「小松小姐,你外公杞樹大人就係一位育獸高手,就算妖獸入面,「四聖獸」佢都曾經捕捉過,而為人所知。」
「「四聖獸」?咁中二嘅?」小松說。
「並非中二,「四聖獸」為玄武、朱雀、青龍、白虎。」扇柔舉起四隻手指:「其中,玄武、朱雀都喺年輕時,被你外公杞樹大人所捕獲。」
「外公啊‧‧‧‧‧‧?」小松試圖聯想外公的形象,面色無奈:「我淨係諗到佢交俾我照顧嘅雀仔同烏龜,話自己唔得閒照顧。」