有無巴絲打鐘意玩P社喲戰略game？(2)

美國好易玩啫，係英國難啲

不過，咁唔代表你塞100甚至200個5步師就可以守得住德國既攻勢，原因有三：制空權、裝甲師、車輪戰
喺HOI4入面制空權係非常重要，自己有制空權的話陸軍既能力值就會加buff/人地有debuff，咁同盟國既AI係弱智既，明明戰場集中喺比荷盧空域，8成時間搶唔到空優
另一個問題係CAS近接支援，CAS既運作方式同HOI2唔同，HOI2係用黎直接殺傷陸軍既兵力值，當陸軍移動緊/撒退果時用CAS炸係可以直接將陸軍蒸發，而HOI4既CAS係用黎炸戰場入面敵軍既組織度，當戰鬥持續時間拖得越長，CAS造成既傷害就會越高，咁都係果句同盟軍對住德國係居然冇空優既，自然就係咁比德國空軍炸，導致組織度跌得比一般快 (而且唔好忘記地形係平原)
依個問題接乎無解，事實上你同德國既戰爭，大部分時間都係喺空劣既情況下打

第二個問題係德國有裝甲師而你冇，點解裝甲師係會造成荷蘭潰敗既關鍵?
以前我亦都講過，HOI4既世界係有「金盾」依回事

金盾係人地對自己既組織度傷害-50%之餘，重對敵人造成多50%組織度傷害，如果你成條線都係5步師，冇加任何戰防砲既情況下係冇辦法擊穿德國裝甲師，就算佢破唔到你防，但佢就可以一直磨你組織度，磨多一兩個星期你就輸

對照返上面位巴打既圖，會輸9成就係因為果2個裝甲師一路都有金盾，而你硬攻又唔夠高，輸係正常既事

解決方法非常簡單，就係加戰防砲支援連


如果戰場入面正在戰鬥既陸軍師有足夠硬攻，擊穿裝甲師，個盾就會變爛盾，當系統每個鐘抽到果隊陸軍師對裝甲師發動攻擊的話，就可以造成顯注既傷害，其他冇裝戰防砲既師一樣會食「金盾」
(戰鬥機制唔詳細講了，有興趣自己上網查)

但係，以民主荷蘭既工業力黎講，要全部師裝晒戰防砲根本冇可能，因此需要逐小逐小咁換裝，唔好直接換晒有戰防砲既編制
(基本上情願唔用都千萬唔好缺員缺裝備，否則戰力重差過你唔裝某款裝備)


至於第三，就係AI既車輪戰
喺法國篇入面我都有提過AI會不顧一切撞牆，而戰爭中既師團唔會回復組織度
雖然你能夠不斷擊退敵人既進攻，但磨你幾星期甚至半年之後，你喺果一格既師已經比人磨走晒組織度，一旦變晒做0的話就輸

解決方法係喺後一格放預備兵力，當前線師團既組織度降到咁上下就要輪替，比士兵休息

最簡單係用某個軍團放一條撤退線駐守，慢慢輪替士兵上陣，勉強擋住2~3波大攻勢之後就可以轉到2~3格速加快遊戲速度



要再提大家一樣野既，係民主化荷蘭有一個國策係加入同盟國

依個記得喺39年先好揀，如果唔係英國會拒絕你要求，令你遲左幫法國個弱智AI守邊界，一個唔好彩就比人佔左馬奇諾防線




至於具體佈防係3個24師既師團放喺荷德平原地帶、1個24師既師團放萊茵河邊界(將來再延長戰線，守埋比利時同盧森堡同德國既邊界)、再派24個師幫法國防守，12個放馬奇諾防線、12個放阿爾卑斯山既法意邊境

(你可以唔幫佢守，但比AI磨多幾個月就會比人突破防線)
記住任何一個防線都要隨時留意組織度，一發現長期比人磨的話就要做輪替，比士兵休息


1939年8月24日，德國正式向波蘭宣戰

德軍以閃電戰迅速解決波蘭之後，揮軍往西線，準備實施佢既施里芬計劃2.0，經阿登森林同荷蘭進攻法國，以圖繞過馬奇諾防線
喺同年既10月，德軍向荷蘭、比利時、盧森堡宣戰，發動攻勢

殊不知依個決定，將會令德國人從此陷入地獄...

欲知後事如何，69後自有分曉

用美國可以玩48個裝甲師車死元首，冇野好睇 (btw玩羅馬帝國的話應該可以用24*5個裝甲師平推美國，蘇聯爛地冇補給反而要用返步兵師)
再唔係用玩海陸師，加埋陸軍顧問堆buff諗起都興奮
又可以玩3000戰略轟炸機炸爛晒德國D機場、工廠，輕鬆平推

英國你識整殖民地軍隊的話已經贏左9成(唔需要吞併)，又係冇咩野好睇
就算你棄守法國再反登陸都好容易(以前我玩英國真係咁玩)，因為德國根本冇可能登陸到英國本土

上回提要：德國正式向同盟國宣戰，荷蘭迎來史上最大危機

德國喺向荷蘭宣戰之後，大量軍隊如潮水不斷拍打荷蘭既要塞線，原先德國計劃以步兵協同戰車師，就好似波蘭戰役一樣快速突破防線，進而使荷蘭軍隊喺無法回防既情況下滲透到戰場後方，然後反包圍喺前線軍隊，甚或直取荷蘭首都阿姆斯特丹

不過，荷蘭一方早喺開戰前幾年已經默默準備反制方法，為一部分師團配備反戰車砲，令德國既坦克師不單無法發揮應有既效果，反而成為一具具棺材

(開戰後半年既戰況圖，一個德國裝甲師試圖突破防線，但喺長期既高強度作戰下，其充足率早已低至原有既一半以上)

用同盟國同軸心國打，應該好多人都想磨走晒德國或者意粉既人力，但真係要打到0人力所花既時間遠遠比你想像中長
你會以為軸心國有人力問題，其實只係同盟國果邊先至係，例如英國因為core本身人口少，服役人員就算你開到徵10%人力，相信同德國開5%差唔多
但咁唔代表磨人力依個行為本身冇意義，你磨人力既時候其實同時消耗緊雙方既裝備，例如步槍、砲、坦克，當你切換徵兵法既時候，你可以見到徵兵人口比例越高，對於工廠生產速度既懲罰亦會越高
https://hoi4.paradoxwikis.com/Ideas
服役人口去到10%，扣10%工廠生產速度，去到20%的話就會惡化到-30%
步槍的話一般而言要補充唔算太難，但最大既問題係坦克、飛機等武備成本遠高於步槍，就算係冇懲罰下生產坦克，亦需要投入大量時間同工廠先至滿足一個裝甲師所需
情況變成當你頂到頭幾波大攻勢後，敵人既裝備充足率就越整越少，進而導致你更容易就守得住防線，越守越輕鬆

更現實咁睇，因為你仍然需要等機會，等盟友一齊反攻，或者等自己組建出一隊主力師反攻，所以開戰後既1~2年時間，都係要由頭守到尾


開戰後3個月，即1940年1月底，戰況令德國陸軍參謀部異常困惑為何未能突破西線任何一個地方

喺德國向比利時同盧森堡宣戰後，兩國同時加入荷蘭所屬既同盟國陣營，荷蘭亦即時調派駐守萊茵河既軍隊協防兩國既阿登森林地帶，透過有利地形一次又一次地阻止德軍既突破 (遊戲內森林地帶進攻方減傷20%)
而更難以致信既，係荷蘭軍隊居然單靠平原上挖既壕溝，就抵擋左十數萬德軍既進攻，戰果甚至比當年第一次世界大戰時索姆河戰役更慘
喺依3個月，荷蘭一共有約9萬人陣亡，換取得黎既係寸土不失同德國60萬人性命，戰損比約為1:7

40年5月中旬，英國、法國、比利時聯軍眼見德國無法攻入比利時，遂策動一次進攻試圖將德軍趕到萊茵河對岸，以建立更為穩固既防線，可惜既係如同德國一樣，大軍難以在森林地帶展開，令戰況發展無法一如預期，只能稍稍推進十數公里


6月，德軍陣亡人數已超過200萬人，且完全冇減慢既趨勢

同時可以留意既係意大利一方已經喺阿爾卑斯山脈同埃塞俄比亞方面合共損失90萬人口


根據同月既統計，德軍既陣亡士兵人數中有160萬，即8成係陣亡於荷蘭戰場

5個月後，即1940年11月，德軍陣亡人數突破300萬人

由1939年10月到1940年11月，就喺短短既13個月中，德國已經失去300萬人，平均每日有超過7500人戰死，非常誇張
據江湖傳聞，當德國軍隊接到命令要前往荷蘭戰場或發起進攻時，德國軍隊無不視為係宣判佢地既死刑，但因為有黨衛軍督戰，以及逃走的話會令家鄉既親人被囚禁於集中營，只好視通往荷蘭既道路為前往天堂既捷徑

荷蘭方面，參謀部眼見各地防線開始穩定落黎，於是拍板決定徵募兵員，組建主力師喺不久既將來反攻德國
到底依場戰爭將會變成點? 欲知後事如何，等我地都打完我地既終局之戰再作分解

休息既時候順手update，我地重有幾場仗要打唔好放棄


上回提要：荷蘭成功守住佢地既國土，準備向邪惡政權反攻

時間話咁快黎到1941年，荷蘭軍隊經過一段時間後終於準備好離開家園，前往德國境內策動反攻

第一階段既反攻目標單純想將德軍由荷蘭國境既平原地帶推到河流既對面，建立一條比較穩固既防線，打算之後再向南推到瑞士邊境，將包圍圈內德軍全殲後先至再向柏林推進

但係理想同現實總有段距離，荷蘭因為工業力低，開戰前冇充足既工廠生產坦克(大部分拎左黎生產步槍、戰防砲，而亦剩低少量既工廠可以生產榴彈砲)，因此陸軍編制係以14步4砲既40寬師進攻，結果就出現一個問題：冇制空權、比德國CAS狂炸，令陸軍既組織度比一般情況跌得更快，往往每推1~2格province就要停低

不過，既然已經洗濕左個頭，幾大都要先達到最初既目標，將德國推到不來梅先會收貨

同年6月，荷蘭軍隊強攻不來梅近郊，付出沉重代價跨過河流，為既係將威廉港附近既德軍包圍殲滅

成功包圍後，雖然有一部分既德國喺荷蘭軍隊開始進攻前由海路往丹麥撤退，但喺北海有既係英國皇家海軍，又邊有咁容易比你走
最終，一共有十幾個德國步兵師約13萬人被圍殲於包圍圈內，全世界收到依個消息後都係之震動，被認為開戰後撐唔到一個星期既廢柴荷蘭居然先守住德國長達2年既攻勢，重係第一個國家既軍隊成功反攻德國

不過，因為荷蘭軍隊編制問題，為左達成依個戰果，一共有5萬人長眠於死敵既國境內
死人本身唔係問題，但問題係人口本身已經甚少既荷蘭實在無法長期承受咁重既人口為代價，所以只好咬緊牙關，將部分軍工廠轉而生產重AA坦克，將陸軍編成改返做12步5砲1重防空，拎返個金盾出黎先至再反攻

然後等緊坦克完成補充既同時

1941年7月，由於日本向美國殖民地菲律賓宣戰，美國正式介入戰爭

身為同盟國國家最期待既畫面終於出現
美軍未來我邀請 美軍來了我帶路


美國參戰既消息如同敲響德國既喪鐘，到底戰爭將會點發展?
欲知後事如何，且看下回分解

上回提要：美軍來了我帶路

隨著美帝既參戰，歐洲戰場可謂風起雲湧，美國步兵師一個接住一個抵達前線，本黎德國已經打唔穿既戰線變得更為穩固，而且又有一個兵力雄厚既國家繼續磨德國既人力，德國根本冇辦法反敗為勝

不過，美帝AI有用係建基於佢參戰果時歐洲大陸同盟國國家守住，唔需要打登陸戰，因為AI太弱智，就算強如美帝都未必可以打贏登陸戰，更枉論反攻德國
所以如果你玩同盟國國家的話，美國參戰之後最好都係自己落手守住歐洲大陸，或者自己打完登陸戰再等AI調陸軍支援，佢自自然就會喺荷蘭、漢堡、但澤一帶登陸，引走晒德國既軍隊走，自己就可以推得輕鬆D
總括而言，與其靠美國，不如靠自己，自己國家自己救


美軍參戰後，荷蘭主力師亦完成改編，喺1941年既10月開始向東往漢堡、柏林等地推進，並成功將11個德國步兵師約11萬人包圍殲滅

取得漢堡後，參謀部決議先將主力師調往北方，先解放丹麥以除後患


完成解放後已經係1942年4月，荷蘭喺整場戰爭入面超過55萬人戰死，但德國方面則有535萬人戰死，其中約500萬人係被荷蘭軍隊所造成既，代表每個荷蘭士兵幾乎都係葉問一個打十個

解放丹麥之後，剩低既目標只有一個：柏林
不過德國本土實在太多森林地帶，要推實在非常困難，所以用左足足一年時間，去到1943年3月先至佔領敵人既首都

不過，就喺荷蘭軍隊操過柏林布蘭登堡門之際，發現柏林地下戰壕早已人去樓空，原來希特拉已經晨早走佬返去佢家鄉奧地利既首都維也納
咁剩低既野只係得返一個，進攻維也納

之後，荷蘭軍隊一次又一次創造多場名留青史既戰役，大量圍殲開戰前戰無不勝既德國軍隊

同年4月，喺荷蘭邊界將德國既10個突出戰線既師團圍剿，是為突出部之役


6月馬格德堡之役再殲滅15個師


8月，荷蘭軍隊成為將德國從北至南分斷成東西部分，將大量軍隊包圍於萊茵河以東地帶，並且將33個步兵師全殲於此



此時英國軍隊亦冇坐定定乜都唔做，由於荷蘭早前解放丹麥，令盟軍可以透過波羅的海登陸德國東部，可惜既係由於後勤補給問題，令到當地軍隊喺德軍回防之後，反被推到海岸線附近，幾十個師團面臨被圍殲既風險，荷蘭只好將主力師重新抽調到東線打通陸路聯繫


咁當然順手再將大量德軍圍殲啦





解決左德國東部既德軍之後，荷蘭軍隊總算可以向南推進到維也納，將萬惡既德國打到投降
由於喺之前荷蘭軍隊圍殲德軍過百師團，德國已經冇能力再抵擋荷蘭軍隊既攻勢，今次相對於之前推進到柏林既時候輕鬆得多

1944年4月，荷蘭成功佔領維也納，同日得悉希特拉自殺既消息、德國正式向荷蘭軍隊投降

為左戰勝德國，荷蘭付上左90萬士兵既性命，而德國成為大戰中陣亡人數最高既國家，約900萬人喪生，其中600萬人死於荷蘭軍隊之手，佔陣亡人口既6成半

不過，德國投降唔代表大戰既終結，同盟國重有一個敵人需要打敗，佢就係......意大利
連德國都打得贏既荷蘭，又點會將小小既意粉國放在眼內?

非常簡單地將軍隊重新集結於舊奧地利同意大利邊境，完成集結後快速推到海岸線

然後再將軍隊一分為二，一隊將阿爾卑斯山既殘兵推晒落山谷，另一隊向南推到西西里島，就係咁只用2個月就迫到意大利投降


和平會議是但啦

就係咁，第二次世界大戰終結，根據各國統計，同盟國陣營戰死人數約1200萬，而軸心國一方則有2100萬士兵陣亡，而當中有幾多人係死於荷蘭軍隊手下，相信各位都心中有數

跟住，由於我地今次玩荷蘭既目標係完成成就"Trading the Narrow Path"，先用210日完成填海工程，並且一個core都唔喪失既情況下到達1945年1月1日，剩返要做既係轉到最快等時間到

done

事實證明，就算用最弱雞既民主荷蘭都可以打贏AI德國，並且係最大功勞果一個國家
其實任何一個國家要守得住德國或者蘇聯，只需要配備一定數量既戰防砲已經贏到
不過民主荷蘭最大既問題係冇工廠冇人力，開戰之前千辛萬苦先擋得住德國攻勢，開始反攻之後拎德國領土既工廠比自己用，先至勉強滿足到軍備需求
而人力就更加冇計，開局果時吸左90萬印尼人口，都要將徵兵法開到徵20%人口先勉強夠人力打贏德國
(其實解成就唔洗反攻德國，就咁坐到1945年都得，不過今次玩大D)
真係要打的話，建議都係轉到排外法西斯或者共產政權，打柒比利時同盧森堡，甚至將法國砌低，咁就可以非常簡單地完成依個成就

(咦你問1941年日本打埋印尼，東南亞戰場呢?
緊係唔理啦)
民主荷蘭奮戰記 完

下回預告：Make Romania Great Again

短期內都冇心情update，聽日我地再一齊出黎，好嗎?

唉
rip

好傷心

唔打機，一齊打場硬仗

玩法國入軸解成就，解到後期等時間到無聊登陸英國，重新發現HOI既真理

If you can't beat them, nuke them

羅馬尼亞(Romania)，喺原文既意思即係羅馬人既國家，長久以黎國土位處於黑海西部，相對於其他大國而言係一個極不起眼的國家，歷史上直到近世之前都冇咩特別值得大書特書

時至近現代，隨著火雞國國力衰落，馬爾幹半島內N咁多個國家、N咁多個民族開始為左自己既土地、自己既政權打生打死，先後兩次爆發馬爾幹戰爭後，1914年6月28日斐迪南大公喺波斯尼亞遇刺之後，引爆左第一次世界大戰，羅馬尼亞喺最後關頭站對邊成為戰勝國，得嘗所願地擴張左大片領土
https://www.youtube.com/watch?v=Dl64mDJXMAc
(題外話，依首歌咁多年黎應該幫左唔少中學生)

直到1936年，隨住歐洲極權主義興起，羅馬尼亞位處德國同蘇聯之間，遠處既英國同法國遙不可及，令到羅馬尼亞喺政治上只能夠選擇企喺德國或定蘇聯是但一邊

喺今個世界線，羅馬尼亞既命運到底會係點?


今次既目標係解羅馬尼亞既兩個成就

一個係要喺1941年12月31日之前控制柏林或者莫斯科，另一個係擁有起始邊界既鄰國既其中一個core province，亦即由蘇聯、保加利亞、匈牙利、南斯拉夫、捷克、波蘭手上拎到其中一格或全部core先得

唯一一點要注意既係，依個成就有個比較麻煩既條件

國家元首需要keep住係卡羅爾二世，唔能夠轉政體，亦不能由national focus消除由佢帶黎既debuff(之後再講)，如果你唔好彩好似我咁後知後覺，又冇save的話，咁你就打多次啦

Ironman要load save的話方法好簡單，只要喺HOI4個game folder搵返個save,再搵另一個地方做backup就得

事先聲明，今次玩既係黑暗兵法羅馬尼亞決戰紅色革命軍
1.6版本可以玩雙學說雙工業線，不過1.7版改左，只能夠玩無限特種兵

照慣例先黎講解下羅馬尼亞既國策線先啦

最左面既係種田線，唔擴張你不如玩美國好過啦
中間既係內政線，行依條線既最大誘因係最底既第5格研究槽(同埋石油)


之後既係擴張線，行依條線令你可以直接傀儡他國，AI拒絕的話可以直接宣戰
需要留意行依堆national focus果時需要維持一定數量既現役兵，第一層400k，第二層500k，最後向火雞宣戰需要750k
而你或者會留意到開局時你有幾多兵力

只有250k兵力，一般玩法之下大概要去到39年左近先會徵夠兵去擴張
不過因為今次用小小另類方法，令自己可以喺比較早期就擴張到，唔洗慢慢等人力同整裝備訓練新兵


之後既係政治線，記住因為解成就需要維持國家精神「國王卡羅爾二世的生活方式」，所以依條線好多個國策都記住千祈唔好揀

依個國家精神睇落人畜無害，其實暗藏殺機
間唔時就會彈出黎，一係你就比90政治力換取較低既debuff，一係就硬食20%民生需求或者-20%工廠產出
喺前期而言，未改做戰時經濟、廣泛徵兵、請齊陸軍顧問、加夠穩定度之前，政治力都會非常緊張，尤其係你重要維持政體唔比外國勢力改做法西斯，所以要去到比較後期先會考慮用政治力減低debuff (詳細後面會再講)

開局之後順住行到開第4格研究槽，第一個拎120政治力，儲起佢等行完第二個國家精神先好請個加15%政治力既顧問

第二個國策堪稱全HOI既國策入面最OP果堆，改法律、請顧問全部75折，重可以+1%人力
打左75折之後請顧問只需要112政治力，而理論上你一夠150政治力就請個+15%政治力顧問的話，70日後只係拎多25.2，而等埋發叔的話就慳左38政治力，多前者12.8政治力


再之後係空軍線同極其OP既陸軍線，空軍線可以令飛機生產成本打9折，對於軍工廠比較少既羅馬尼亞而言，有左佢就可以籌建一支喺蘇聯手上拎到空優既空軍
而陸軍線一開始直接+25陸軍exp，非常非常非常重要
後面重有一個國策可以+7%「有效總人口」，唔係直接加徵兵人口
man power既計算係分core同非core，前者可徵兵既比例會比非core既高非常多，喺好耐以前既意大利轉成羅馬後突然多成10m人力就係咁解
而依個國策將總人口先加7%再乘以徵兵比例，玩到後期徵5%人力的話，大概都差左百幾k人力

你或者會留意到陸軍線有一個國策可以加砲兵喺山地既移動速度

睇落好勁，但其實係廢的
第一佢限左要山岳先有效，第二佢限左要砲兵師，而陸軍既移動速度係睇最慢果個師，咁即係步兵師就算加左砲佢都係行4km/h，根本快唔到

最後既係海軍線，但羅馬尼亞係冇海軍，OK?

前置大概係咁，聽日開始講羅馬尼亞點樣早戰擴張

成日一訓醒就發現好多錯字
乜撚野馬爾幹半島
巴爾幹半島呀

睇巴打玩隻game都幾多數要計,平時我都係求其

正常情況玩大國唔洗點計數，但玩細國或者不正常玩法下計下數會好好多

有無巴打用steam link 係ipad 上面打hoi4/ stellaris?

開1.5 倍放大效果都ok

可以訓係度玩都幾好

羅馬尼亞開局之後，由於主要係玩早戰，基本上都係整軍工整到39年左右為止，因為真係唔夠工廠整槍

你會見到你得小小軍工，但係槍械缺口高達15k
玩過早戰既人就會明，早期係完全唔會夠軍備，令到軍隊既充足率低，進而令到戰力低下
調返轉黎講，由於36年開局個個國家都係咁，早戰AI變得比39年正常開戰容易贏好多，例如你用法國36年同德國開戰，大概37年已經可以收元首皮，但正常39年打我估你都係守到42年同美國帶路再諗啦

軍備不足既另一個問題係你訓練唔出新既軍隊，因為訓練軍隊首要條件係夠軍備，儲夠20%進度先至可以步署，咁你冇槍或者唔夠槍，又點有新軍隊
連帶落黎既問題就係國策入面宣巴爾幹半島國家既現役兵人數問題，訓練唔出新軍隊等於冇得增加現役兵，自然行唔到國策擴張

不過其實係有方法可以突破依個困難，就係直接改陸軍編制
喺民主荷蘭篇入面，曾經教過大家點樣極快地抽乾傀儡既人力，就係先訓練出3步師，然後透過轉編成，就可以只補充人力而唔比任何軍備比佢
咁羅馬尼亞就直接小小，將開局時除輕坦師之後既所有陸軍轉換成12步師，再將其中一部分轉成13步師就fit到兵力要求


拎左第4格研究槽之後要即刻揀依個國策拎25陸軍exp，拎黎改陸軍編成，記住你本身已經唔夠槍用，之後亦會不斷改編成，所以唔好訓練軍隊，一黎無意義，二來唔訓練都打得贏，三來你冇咁多槍

改編成之前有幾個技巧，因為每次加減編制都需要用exp更改，如果你之後打算用12步5砲1重防空既主力師，可以先save低12步既編成，然後再copy編成整多個13步師，慳返小小
(另外建議要留10步既編成，將來打土耳其用)
另外係要計下改編成時meet唔meet到行國策既兵力要求，而又唔會用盡自己既人力，畢竟之後要打仗，坐底都要留返10k黎消耗


順利的話，去到36年既12月已經可以開始打巴爾幹半島既國家，你可以揀匈牙利或者保加利亞先，但建議先揀匈牙利，因為保加利亞9成係變成傀儡國，要壓低佢自治度先拎到佢既工廠黎用；匈牙利的話9成係要開佢波直接吞併，相比之下著數好多


event入面AI有低機率揀其他選項，如果你淆的話可以預早小小save定，正常情況下應該出依個event，就可以向佢宣戰

匈牙利的話出另一個event都唔緊要，可以照樣開佢波


依邊介紹第二個黑暗兵法：無限作戰方案加成
當你畫完前線同進攻線之後，軍隊會慢慢儲一條計劃值，實行計劃既時候就會有大量攻擊力buff，比你用黎抵消山岳或者距河buff
依個計劃值係以每日既零時零分增加或者減少，亦即係話，只要你喺每日既23點停止攻擊，然後換日之後再重新攻擊，就可以keep住非常高既攻擊力磨AI既組織度

不過咁做當然會有後果，軍隊自行撤退的話會當你輸，輸的話會有較高既人力同裝備損失，而且要不斷操作非常煩厭，所以都係用黎突破條河就算，之後都係正正常常咁包餃子


匈牙利戰爭入面重有一樣野要做，就係提高戰爭支持度

由於係主動宣戰，戰爭支持度會減20%，偏偏改經濟法做戰時經濟，解放民生工廠同提高軍工建設速度，需要有50%以上支持度先改到


必須講下改法律既先後次序，因為會影響到之後夠唔夠750k兵力宣土耳其，或者幾時可以改做戰時經濟

要儲夠750k兵力，必須改做廣泛徵兵法案徵5%人口，但佢有兩個前提，一個係戰時，另一個係敵國兵力不少於自己一半
正常而言你喺依個階段唔會夠225政治力切做徵5%人口，包完餃子後既匈牙利又冇你咁疊馬，有限徵兵亦唔限於戰時先轉到，咁所以依度會先揀用75政治力既戰爭宣傳加戰爭支持度，因為用150政治力既決策「戰爭宣傳」需要和平，以及戰爭支持度低於50%先可以揀
但前面我都提過，主動宣戰會減20%支持度，而同匈牙利開戰後既支持度係41%，即係和平時候既支持度係61%，等於加唔到戰爭支持度
大概而言傀儡保加利亞時會轉到有限徵兵，同南斯拉夫開戰時會守到廣泛徵兵，再同希臘開戰時就轉到戰時經濟


求求其其包下餃子之後搶晒所有勝利點(VP)，就可以吞併匈牙利，快速拎多十幾間工廠，工廠總數增加50%


步上擴張之路既羅馬尼亞到底會為巴爾幹半島帶黎乜野結果? 欲知後事如何，且聽下回分解

玩左場奧匈好好彩開頭唔使打仗都收到奧地利同捷克 然後拉埋德國食意粉

最後做反骨仔入紅軍陣營反食德國 跟手蘇聯打波蘭再食埋歐洲同盟國,到最後同美帝1打1

雖然成功消滅美帝海軍但係登陸唔到本土,咁我就係南美果邊登陸向上打返上去,問題係補給根本唔夠,升晒基建碼頭所有兵種配補給支援都係唔夠,最後係推到上去,不過代價係10M陣亡

試過登陸加拿大/費城/邁阿密,一樣補給問題比人推返去碼頭或者全滅,想問有冇高手教點樣打全盛期既美國

lm

狂整飛機拎制空
瘋狂扔原子彈end game

已經係咁玩炸極都咁多兵力

你用nuke會摧毀晒所有infrastructure同港口，之後咪唔夠補給囉
要登陸的話一係你落兩粒nuke去港口，反正一粒同兩粒都係拆晒所有野，易D上岸重好，之後再將港口附近既provine再落多粒推開前線拎多D補給
最後維修好晒基建先至再比主力師login平推

用陸路打重簡單，用填線師慢慢推，吸晒AI兵力之後全條前線nuke一次再推

機場同港口已經特登唔炸 果度最高補給得6X左右 要夠兵力推上去要補給7X左右既兵力 變相降低自己戰鬥能力

同埋盡量希望唔好用核子打法 冇咩遊戲性 想睇下有冇其他打法