有無巴絲打鐘意玩P社喲戰略game？(2)

點玩genocide

btw玩落先記得應該係第一聯盟唔係第六

hpm/hfm mod
https://www.reddit.com/r/victoria2/comments/9uh6fi/is_there_any_mod_out_there_where_i_can_genocide/

我都未試過咁玩

更新喇更新喇

開局頭果1~2年都係等時間慢慢過，因為一開始冇資源冇人口冇船冇野可以做，都係就咁叫science ship探下路，一般而言開局用4~5隻科研船探路+解anomaly就非常夠用，夠合金又夠200電請科學家就可以整一隻出黎探路，唔夠電就去market賣下食物/消費品就得

要claim system既主權要等你架科研船完整探索完一個system先得

claim既時候需要用影響力同合金，影響力幾乎冇方法增加收入，所以唔好亂咁用
一般而言claim system所消耗既影響力係以該星系與本國邊境星系距離幾多跳而定，例如依家我claim 1跳要48影響力，2跳的話就會乘以2變成96，如此類推，一般而言除非出於特殊考慮例如要搶choke point，否則逐個system去claim會好D

開局兩年之後可以揀第一個tradition，揀邊個開門先係可以寫幾千字黎討論既野，而我既立場係先揀擴張

以前探索有科學神教可以加凝聚力，2.2 nerf左之後第一個傳統已經冇揀探索既價值，因此先揀擴張提升殖民速度(最重要係其中一個分支又加10%人口增長率)
同時喺非常早期已經開始左第一聯盟事件鏈，跟住科研船勘探果時total抽中6個先驅者既anomaly，再完成晒就可以抵達第一聯盟既首都，到時候亦都正式宣告依局我已經贏左


喺勘探完太陽系周邊既星系之後，正式開始人類既殖民大計
聯合國喺2200年進入宇宙世紀既時候，日本理事曾經提出改曆做UC象徵新時代既到臨，但最終因為唔想將來會出現戴有角面具又鍾意將機身油成紅色既痴線佬擲行星基地落地球之類既不祥事故，聯合國決議沿用西曆作為地球曆法，並於2205年派出第一批由民營公司主導既外星殖民船，前往比鄰銀河系既Alpha Centauri星系入面所發現既大陸型星球，建立第一個人類殖民地，並預計喺4年後建立殖民地政府，成為正式既人類居住地


聯合國同時亦都承諾將來所有喺地球外生活既人類，都同地球人一樣擁有同等既權利，亦因為地球人主體思潮相信極端唯物主義，只有極少數人會相信提倡"Mother Earth First"既地球教，齊心為人類光輝既未來而努力發展

(圖為地球教信徒之一)

每架殖民船都係用8電作維護費，直到完成殖民果刻先至停，初期黎講負擔都算重，不過依家有貿易值大大增加電力收入，過左頭5年之後派2~3隻殖民船都唔太大問題
一般而言我自己第一粒殖民星會揀農業區域大D既星，因為早期而言電/礦比較充裕，而最大問題係人口增長太慢，所以首先大量生產糧食，就可以每粒行星都開行星法令+10%人口增長，加快早期發展

建立左第一個宇宙殖民地既人類，到底將來發展何去何從? 欲知後事如何，且看下回分解

你開局玩幾多星? 1000?
其實螺旋星系同橢圓星系係咪完全無分別?

你開局玩幾多星? 1000?
其實螺旋星系同橢圓星系係咪完全無分別?

除左難易度之外都係default setting，中型600星
銀河系形狀主要影響hyperlink既連接方向同密度，密度越低代表行動既自由越細，亦代表更容易做防守，不過就局限左國家既擴展方向，好容易就比第二個國家頂住出唔到銀河系既內/外則擴張，睇得唔食得之類

上回提要，人類踏出地球尋找新天地，正式開始宇宙殖民運動

喺宇宙入面人類並唔孤單，有好多種唔同既生物，亦有超越目前人類所能理解既存在

依類boss叫Leviathan，冇返幾十k戰力係唔會打得贏，見到一定要即刻走

雖然宇宙係非常危險，但係喺探索既過程中人類搵到更多宜居星球，幫助人類喺宇宙站穩基礎

作為第二殖民地既Osseq II熱帶型行星，距離太陽系3跳距離，軌道上有一條小行星帶，再加上行星上面本身有豐富既礦物，為人類提供源源不絕既礦物

第三殖民地Uhgrone IX同樣係熱帶型行星，比Osseq再遠兩個星系，雖然係只有10格既小型行星，但係上有亦都有相對已發現行星入面最豐富既能源，可以為人類提供早期發展提供不可或缺既電力收入

最後係第四殖民地Sirius VI，位處太陽系同Osseq星系之間，喺依一片荒涼既土地上雖然冇乜自然資源，但係佢擁有既正正就是充足既土地可供規劃
實際掌握聯合國既財閥早就預計地球喺將來人口會過於擠迫，因此需要將產業分門別類，地球作為人類既發源地亦即政治同經濟既中心，必然成為經濟樞紐，土地全部比商人拎晒去發展實體經濟既同時，亦必然會擠壓其他產業既發展空間
因此為左令一部分人可以專心研究科技，就喺背後主導一批科學家向另一粒氣候同地球相似既行星移民，並喺將來發展成為科學型星球

(人類進入宇宙既20年之後，已經擁有5個資源豐富、分工明確既行星)

行星根據發展會有唔同既類型，一開始母星屬於首都，會有宜居度加成etc，而當殖民地由「星艦改裝庇護所」升級成為「行星機關」之後，根本行星上面既主要產業會成為礦業星/農業星/加工星/科研星，提供資源產出加成，例如專門研究科技既「科技星球」會加5%科研值，去到後期一粒星產出超過500科研值既時候就等於你慳左幾個人口

宇宙之大無奇不怪，有時會出現D奇怪野

依個工廠可以唔洗資源直接生產合金，係咪好正呢?
但係要留意佢會食走你既有機人口，一拎到千祈唔好用
解決方法係整機械人出黎


研究完科技之後可以開始整機械人，佢同有機人口既增長進度係分開，所以開局之後最優先要研究機械人出黎，大大增加人口總數
而果間合金工廠只要放機械人入去，冇幾耐就會彈event出黎話一切正常可以繼續用


另一個好消息係專門產出糧食既Alpha Centauri VII發現左一種原居巨型生物，佢地肉質鮮嫩又多肉地，當然係圈養晒佢地為人類果腹

+8農業區又+30%食物產量，一粒星就可以養晒成個人類國家幾百個單位既人口

遊戲時間過左廿幾年之後差唔多點完第一個tradition可以揀飛升，第一個飛升我會揀加法令時間既「執政魄力」

加法令時間有咩好處? 因為有好多法令都好有用，但部分既法令成本比較貴(例如要用影響力)，拉長時間就等於成本越低越抵用

幾乎又係由開game開到end game既人口增長法令，+10%人口增長率，中期開始要衝科技又要開研究補貼，所以揀+50%法令生效時間一定唔會死錯人


而當人類向外探索一段時間之後，終於遇到第一個鄰居，而佢地既科技水平遠遠超級人類二百年以上

依類國家叫做墮落帝國，科技水平極高但發展停滯，未去到後期先萬唔好同佢硬碰，因為係必死無疑
不過好在墮落帝國對於完全唔關心銀河系，只要你唔好搞著佢佢就唔會理你
而依個墮落帝國既隔離又係另一個墮落帝國

正當人類懷疑係咪全宇宙既科技都遠超人類所能企級既地步之際，喺太陽系既東北面終於發現左一個科技水平相近既國家

最近既鄰居原來係狂熱親外主義，佢對於人類弱小既實力產生出一種憐愛既感情，根據科學家指出依種感情就同人類鍾意狗仔貓仔一樣，亦都代表人類有左一個大靠山

透過佢人類得知佢既鄰居重有一個專出罪犯既節肢類國家，但好在人類既邊界應該唔會同佢有接觸

目前既銀河系形勢，西面係兩個墮落國家，唔接觸佢地就唔會有軍事衝突
而東面既鄰居係保留人類既狂熱親外國家，聯合國認為應該學習人類21世紀既歐洲人做法，國防就交比美國佬，軍費自己唔洗出又有人保護，自己可以專心發展經濟

依個時候科學界傳來重要既消息：成功定位第一聯盟既母星，並且位於距離太陽系極近既位置

依個發現令到科學界開始懷疑到底人類既祖先係咪都係由宇宙既其他地方而黎，最終又因為咩原因而定居於地球? 又係咩原因導致人類既科技退步至石器時代? 而太陽系周圍又大量出現適合人類居住既行星，又係咪當年曾經擁有改造行星氣候既技術導致?
無論如何，當科學家勘探第一聯盟既母星星系時，發現左一粒全個行星都係都市區既星球，並發表人類歷史中最重要既學術論文，講述數千年前宇宙曾經發生過咩事


就係咁，現今人類透過第一聯盟既遺產，搵到一條通往宇宙霸權既捷徑

一個都市型行星(Ecumenopolis)最勁既地方係可以起區域直接生產合金、消費品、凝聚力，完全唔洗等人口解鎖建築物，每個區域直接提供10個職業，而最低級既合金/消費品工廠只係提供2個職業
正常你想起Ecumenopolis，要先去到遊戲後期研究某個科技再揀飛升，差唔多要等100年時間，而第一聯盟直接送一個25格既比你，2230年左右已經可以用
有左佢之後就有大量消費品可以生產出黎，就可以大量起科技實驗室加速科技，之後又可以大量生產合金建立銀河系第一既軍力
所以由殖民上去果一刻開始，已經可以確定人類將來會統治銀河系

到底人類歷史將來會點發展? 且看下回分解

thx, 剩係玩過螺旋, 下次試下玩橢圓

正, 好似睇緊故事咁

想問點解你登陸咁成功推到上去

熱那亞果邊登陸上面一堆山 對面回防得好快

想問點解你登陸咁成功推到上去

熱那亞果邊登陸上面一堆山 對面回防得好快

夾硬頂，第一批上岸之後即刻衝上山，AI回防的話用其中一個師打果一格扣住佢唔比佢走，等自己人企左佢地想佔既果一格先
另外要用騎兵/摩步師，行快D

銀河既歷史又翻開新一頁

上回提要：人類透過探索宇宙，搵到真正既祖先——第一聯盟既母星星系Fen Habbanis，並且派出殖民船踏上依片完全冇自然景觀，只有城市既行星

經過科學家同人文學者解讀不同文件，以及喺宇宙搵到既線索，例如某D行星上，居住左因為核子戰亂而令到科技水平倒退返青銅時代既既智慧生物，得出一個結論：當年第一聯盟既首都由於斷左食糧供應，整個首都既糧食無法自給自足，最終導致整個聯盟既分崩離析

其中一支人型哺乳類生物率先定居於太陽系既第三行星——一個有充足自然資源，以及大量水體既星球而生存落去，可惜因為星球上缺乏舊有既科技維持生活水準，因此人類既科技大幅度退步，只留低部分科技比佢地既後人應用，例如起金字塔、空中花園等等超當時時代科技既工程，而最終全數散佚，直至數千年後既西曆2200年，當今日既地球人重新掌握太空技術，先成功搵得返當年既歷史
因此，第一聯盟既首都星可以話係人類既母星，因此佔領並重新殖民擁有充份既合法性

與此同時人類並冇停低返宇宙擴張既步伐，不斷搵到一D充滿資源既宜居行星殖民上去
喺其中一個星系Trappist，居然搵到兩個資源豐富既行星


一個係有大量能源既第五行星，另一個係有高品質礦既第六行星，有左佢地人類就有更多既資源可以加速向外擴張既速度

而當人類殖民上第六行星一段時間之後，居然搵到當年第一聯盟留落黎既星球環境改造裝置，同時亦印證左科學界猜測古時既宇宙人真係有改造星球既技術

最終科學家向行星上既民眾隱瞞，啟動該環境改造裝置以實際觀察並記錄科學數據，令將來人類得以重新掌握改造氣候既技術，令全宇宙所有行星都係人類既宜居星


最終既結果，係人類賭贏左
數以百萬計既納米機械人喺裝置啟動既一刻開始運作，將行星由原本既極寒冷氣候一轉而為適合任何有機物種生存既星球，甚至比地球更適合居住，科學家對依種從未見過既星球種類命名為「蓋亞星球」 ，出處係希臘神話入面大地女神之名，以頌讚科技之美

隨住人類擴張既步伐不斷加速，各個行星上既人口仍然遠遠追唔上物質既發展，國家有既係錢，有既係礦物，但人口實在增長得太慢，所以財閥就諗左條計出黎：既然不同行星會專司不同資源生產，點解唔整一個專繁殖人口出黎既星球?
因此，一個無論當代抑或後世都覺得荒謬至極，但實際上卻令人類發展得更高速既方法被實行——一個專門生產人口既星球上線啦

成個熱帶行星佈滿由財閥所開設既性愛樂園，所有黎依到既人都係為左啪啪啪滿足性慾，而佢既存在亦都只係為左有地方比人類啪啪啪
喺行星入面除左政府管理人員同部分職員，規定所有來客最少要留一胎先准離開，行星上分設唔同既樂園滿足唔同人既性癖，由青春少艾到後生少婦，再到MILF乜都有，玩法由cosplay、扮成原始人不斷同人交配回歸獸性，再到平平凡凡搵初戀既感覺一應俱存，可以話係一個星球版既水龍敬樂園
而為左提供行星上最基本既服務，當然亦設有一個機械人工廠全日24小時運作，並且生產多餘既機械人，出口去其他星球使用


依到要講下人口增長既方式

人口既增長率由兩樣野組成，一個係基礎既人口繁殖，基數係3.0，可以用好多種方法落buff，而另一樣野係移民帶黎既推力/吸力，一個行星唔夠職業/居所/穩定度低，會令人口移出去，假如基數為3.0不變，人口移民吸力係1，增長進度會變做4，即25個月加1個人口
如果吸力係-1，增長進度得返2，就要50個月先加1個人口
而上面張圖你會見到基數有個debuff係新殖民-50%，依個係你用緊「星艦改裝庇護所」所有既debuff，佢會加人口吸力，但10年之後吸力就會消失，所以一定要先儲起10個人口，先將庇護所改建成「行星機關」，到時候雖然人口吸力buff會消失，但同時亦都會將-50%人口基數增長率既debuff都取消埋
同時間如果要最大化人啊增長速度，要留最少5個人開一個建築格生產機械人，咁你就有源源不絕既人口可以移民去其他星上面工作
(不過強制移出人口要比100電，請留意國庫狀況)

人類正式進入有史以黎最高速既發展期，到底將來重會發生咩事? 且看下回分解

上回提要：人類進入高速發展期

之前tradition行完擴張之後，今次行探索，著眼點係依段時間國家規模未算好大，倒不如行探索拎關門既10%研究速度加成，而第二個飛升亦理所當然咁揀+10%研究速度既「科技優勢」 (連同狂熱唯物既10%加成，一共快30%)


與此同時亦都要開始留意貿易系統
所有星系喺你claim左主權之後，就會起左個space station出黎，如果喺同一個星系有宜居行星並且殖左民的話，就可以升級成太空基地，先至可以將殖民星生產出黎既貿易值傳送返首都

不過要留意喺傳送既過程中，如果經過一D冇太空基地既星系的話，就會吸引海盜黎搶走你既貿易值，需要搵海軍駐守壓制海盜行為，減少貿易值既損失，所以去到依個時候就要管理大量散收收既艦隊先處理到
(一係駐軍，一係巡邏，睇你夠唔夠船玩)

另一點要留意既係擴張國家既時候，會根據你佔領星系/殖民行星/建設區域而增加行政管理值(AC)
每claim一個星系或者殖民一粒行星，就會各自增加2點AC，而開一個區域(例如都市區等)增加1點AC
一般帝國開局時只有30點，Megacorp.則會另外多20點，透過公民性同研發科技可以增加行政管理上限

超出行政管理上限會導致不同種類既懲罰，例如請人貴D、開政策貴D、科研變慢、要更多凝聚力先揀到新tradition等等

不過AC其實係完全唔洗理既野黎
超AC最大的壞處係科技同傳統變慢，但只要搵一粒星絕大部分建築格起晒科學實驗室，玩唔夠100年已經可以研究7成以上既科技，而傳統只要普及建設加凝聚力既建築，收入增加既幅度會遠超懲罰增加速度，所以只會變快唔會變慢，開局時一個科技隨隨便便都要2~3年時間，去到中期就算係高階科技，亦只需要1年左近就搞得惦

Megacorp.政體另一樣野可以玩既係喺人地粒行星上面起分公司，只要同果個國家既關係夠好就可以簽商業合同，通過左之後就可以比電力同影響力開公司

行星上每有25個人口就會解鎖一個建築格，可以起一D特別既建築物，職位只會留喺果粒行星，而生產出黎既資源會直接納入本國既資源收益
而最屈機既做法係分公司剩係揀生產消費品，計返成本等於用1電買3消費品賺到笑
到左遊戲後期，因為貿易值破千同開設大量分公司，根本唔洗自行生產消費品，全部礦物剩係拎去生產合金建立超大型艦隊，建立銀河霸權

good
等緊睇
meracorp 等緊佢特價先買

以地球曆法起計50年，人類喺話長唔長，話短唔短既時間已經將足跡遍及廿多個星系、殖民於8個新行星上，並且派出到銀河系各方位既科研船不斷尋找到種族、文化、思想不同既宇宙國家，有國柄由黑幫掌控既犯罪國家，亦有由教宗作為元首既宗教國家，更有由機械人組成既機械體國家，熟悉於財經既人類財閥喺依個時候感覺到，係時候建立一個以銀河系為規模既貿易市場，集中一個地方同銀河系唔同地方既人做生意，又從中抽天文數字級既手續費賺錢!

(當遊戲時間經過50年，並且搵到銀河中超過半數既一般國家，就會出現組織銀河貿易市場既event)

每一個國家都可以提名自己既某個行星作為市場中心，喺行星決策入面比1000電同150影響力就可以，如果自己國家成為銀河貿易市場中心，將會減少10%既市場交易費用，令自己買賣貨時賺得更多


經過五年時間既籌備，各國終於達致共識，由當今銀河系入面人口最多、商貿活動最為頻繁既太陽系作為銀河系貿易中心
地球聯合國發表宣言，表示人類將會促進銀河系所有國家既經濟發展，幫助弱小國家提升國力同人民生活質素，但聯合國背後既財閥此時已經悄悄地從唔同門路將觸手伸入各國既財政命脈，只要掌握物流同財政，就可以控制一個國家既政治，喺將來必然成為人類既奴隸

成為銀河系既經濟中心之後，人類既物質發展一日千里，唔洗十年時間人類已經攻克左修改人類DNA既最後一個堡壘，可以亳無風險地調整人類既基因令人人都可以爆Seed，亦可以無限量地複製人口

依個時候財閥雖然想推行人類補完計劃，透過改造手術只保留優良既基因，將惡劣既基因消除，不過礙於輿論既壓力同民眾既反彈，該計劃只能暫且擱置，等待將來當民眾完全接受食用基因改造既食物、飼養基因改造過既寵物，先至再重新操作輿論，等民眾亦接受人類自己都可以做基因改造手術


正如一開始所講，Stellaris有所謂既三大飛升，目前版本黎講最屈機既係基因飛升，原因無他，除左修改人口特性既超強buff，重有一段飛升可以解鎖建築「複製倉」

唔洗任何人口做野，每月2電就+33%人口增長基數，去到依個時候唔計人口移民吸力，加成堆buff之後單月已經可以加7.x進度，每粒星唔洗一年就有一個人口，有人口就有資源，所以依段時間係國力提升既最高速階段
至於修改基因可以等埋二段飛升先做，一次就改造到最終形態，慳返唔少科研點數


人類喺依個全銀河化(Galaxilization)既浪潮中急速發展，透過龐大既金錢堆砌出黎既強勁科研力，已經令人類聯合國既科技比普遍既銀河帝國高最少兩個世代，並且開始研發有史以黎最大型既軍艦——戰列艦，作為人類海軍既主力艦，準備喺50年內君臨銀河系

(去到遊戲後期都係同AI鬥邊個戰列艦同護衛艦最多，因為集中運用大量戰列艦的話，火力alpha夠高，可以一擊秒殺絕大部分既船，令戰局一面倒傾斜，而護衛艦雖然血少，但可以tank alpha，用較低既損失保護自己既戰列艦免受傷害)

但有一個勢力似乎感覺到人類對銀河同佢自己既威脅，喺地球曆2281年4月底，地球外交部傳來惡耗——犯罪世家Haddam Monopoly居然向人類聯合國正式宣戰


自2200年人類進入宇宙世紀以黎，一切國防事務都交比鄰國處理，自己一槍未開、一場正式宇宙戰爭都未打過，軍備嚴重廢弛既人類聯合國，到底會唔會就此滅亡? 欲知後事如何，且看下回分解

支持戰報

有有冇巴打教路點樣 invade US in 1948
個個port都成十幾隊兵守緊

核彈開路

HOI4既核彈係綠色兵器黎
只殺軍隊不殺平民

上回提要：人類被外星異族宣戰，面臨滅國之災

喺外交部收到Haddam Monopoly既宣戰報告後，聯合國安理會緊急召開一場長達一個星期既閉門會議，確認並商討要如何應對依場危機，多個理事提出應該要立刻搵永久友好國Najklax Combie尋求協助，事實上該兩國喺人類高速發展之際，早已發生過一場小規模既戰爭，最終以白紙和平終結
不過，部分屬於鷹派既常任理事國表明，人類終有一日會成為銀河系霸主，正好可以利用依個機會厲兵抹馬，一則今次人類係打防衛戰爭，喺銀河政治上有充足既擴軍合法性，二則正好借此了解人類自身既實力，不應再將國防要務交由外國異族代勞，三則人類透過第一聯盟母星留低既遺產，工業實力已經遠超其他國家所能理解既層次

最終，聯合國理事會投票以過半數通過法案：向國內萬民宣告被異族入侵，徵募平民為國而戰!

(圖為美籍人口中廣為流傳既募兵海報)

同時太空造船廠緊急擴充規模，興建多個船塢生產大量護衛艦，海軍參謀部認為在此時勢下，需要既唔係中看不中用又花時間建造既太空旅館，而係用最短時間建造大量護衛艦，提高船艦數量靈活應對戰況既轉變，最重要既係人類未曾打過太空戰爭，只能先小規模嘗試不同喺VR訓練入面嘗試過既戰術，避免all or nothing既風險

人類既Iwamoto級護衛艦，係經過獨步銀河系既超高科技研究後得出黎既結晶，發電組係被稱為「零點反應爐」既黑洞縮退爐，用非常細既空間就能提供比核融合一倍以上既發電量支援所有裝備所需，而最重要既係裝備左「高級加力燃燒室」，將護衛艦既靈活性提高到極致，模擬結果係該級能夠迴避約85%既常規武器攻擊
而兵器方面使用具有穿透能量護盾、直接傷害艦體既「裝甲魚雷」，以極少既成本為對手帶黎強大傷害

就喺人類上下一心，準備迎戰外敵既時候，人類由開設喺永久友好國Najklax Combie首都既分公司傳黎大好消息
經由分公司安插喺各地既線人、安裝既間諜衛星同星際間既物資流向，終於搵到Haddam Monopoly既遠征艦隊同佢既目標

喺確認情報無誤之後，整個海軍參謀部都為之震動，原因並唔係發現無法戰勝既敵人
相反，係人類完全唔能解理解對手既行動

事實上，當人類探索宇宙時，發現銀河系入面存在大大小小不同既「蟲洞」，蟲洞某一邊既入口會連接住銀河系入面某個星系，但係絕大多數蟲洞太細、通道入面既重力極不穩定，大概只能夠比科研船或探測器通過
而喺不久之後，基於人類既高超科研力量，早就喺幾個年代前已經搵到方法穩定蟲洞結構，令船艦可以安全通過，實驗地點就喺Trappist星系隔離既Mitin星系

Mitin星系蟲洞所連接既星系，正正就位處於Haddam Monopoly既腹地Puntrazed星系

令參諜部最為疑惑既，係Haddam Monopoly早就已經得知該組蟲洞既存在，但根據線報點解遠征艦隊既目標唔係Mitin星系，而係要先經過十數個星系先能夠到達既Advatir星系?


隨之，參謀部只能得出一個結論：對手並沒有令軍艦安全通過蟲洞既能力，所以先喺Puntrazed星系建立太空基地作定點防禦，而要攻擊人類聯合國，唯一既路徑就係千里迢迢經過十幾個星系先能到達既銀河系外緣路徑

喺慨嘆節肢類異型既智商低下，只單純從數值化後既艦隊實力，完全唔考慮戰略、戰術，亦唔考慮人類聯合國所擁有既後勤力量，就得出可以戰勝人類既結論係蠢X過隻豬之後，參謀部喺極短時間下就草議左一個戰爭計劃，開始將軍艦同陸軍部隊往Trappist星系集中，等待時機既來臨

具體既作戰方案非常簡單，簡單到參謀部喺戰後都諗唔到點解可以咁簡單就成功，就係先等待Haddam Monopoly遠征軍通過蟲洞星系Puntrazed一段距離之後，揮軍直進敵人心臟地帶，再利用遍佈喺唔同地方既線人監視遠征軍動向，如果敵人班師回朝，就喺佢返母星既路途上埋伏；如果敵人繼續前進，就以最快既速度反佔領敵人母星，強迫佢地簽城下之盟

就喺被宣戰既一年半後，外交部一封電文令人類確信依場戰爭Haddam Monopoly必敗無疑——永久友好國Najklax Combine聯同佢既鄰國Imari Free Traders既商人聯手，向Haddam Monopoly宣戰，形成3對1既局面!


眼見時機來臨既參謀部命令艦隊即時通過蟲洞，正式進行人類歷史上首次宇宙戰爭

位於Puntrazed既中子星側近既太空基地，即使係用Haddam Monopoly既最強科技而建，亦都抵擋唔到人類防衛軍既攻勢，喺開戰後既個多月就向人類投降

就喺攻佔Puntrazed星系之後，情報部門發現Haddam Monopoly居然選擇以緊急跳躍依種既不成熟，危險度亦相當高既方式緊急班師回朝
依種方法雖然人類都有嘗試過，船艦上亦裝備左依種緊急逃生系統以防萬一，但最大問題係喺異次元空間入面既時間同三次元空間唔同，可能你要經過現實中十幾甚至百年時間先會返到三次元空間，更可能因為異次元空間既重力問題，從此被困住出唔返黎

參謀部依個時候先至發現Haddam Monopoly亦都完全蠢唔晒，佢地知道一定要回頭截擊人類艦隊，但為免被埋伏情願賭一場都唔想將手上既艦隊送羊入虎口
因此，參謀部下令加快作戰進度，命令陸軍馬上出發，伴隨先遣部隊從速佔領敵人首都

第一個目標係拱衛首都，位於母星星系Haddorim兩跳距離以外既Galpan海洋行星，由於該行星屬於資源產出行星並未要塞化，人類喺冇出現傷亡既情況下就獲得行星既控制權


掃除通往Haddam Monopoly首都既障礙後，馬上揮軍直搗黃龍，同敵人決一死戰

喺敵人母星上空發生既Haddorim之戰，係人類第一場正式既艦隊決戰，由於人類護衛艦擁有極高既機動性，並且佔有數量優勢，僅以兩個半月時間就將敵人擊潰
可惜喺依場戰鬥首次出現犧牲者，護衛艦Ferret喺同敵人糾纏既時候被流彈擊中沉沒，而護衛艦Patrician則喺圍攻太空要塞時被要塞砲鎖定並被擊中，艦毀人亡

急切於佔領敵人母星既參謀部，以及報仇心切既海軍成員喺情緒激動之下，未完全清除地上要塞就投入陸軍部隊強行登陸，犧牲左兩隊陸軍師之後先至成功壓制敵人母星

豈料佔領Haddam Monopoly母星前，敵人既政府要員早已遷移至另一粒行星避難，人類既如意算盤完全打唔響，而敵人既遠征軍依個時候又突然間脫離跳躍，出現喺敵人僅餘既行星Kahajom軌道內

似乎Haddam Monopoly既指揮官今次賭贏左人類，人類海軍經過連番大戰後急待修理，無力再進攻有艦隊進駐既要塞，而Haddam Monopoly雖然無法主動攻擊人類聯合國既艦隊，但亦深知人類亦無法再組織攻勢既事實

兩軍喺對峙一年後，礙於戰局膠著以及海軍艦隊內部出現思鄉症而戰意大減，參謀部認為已經獲得足夠既戰果，就向聯合國安理會提出議案，希望聯合國能夠得出是戰是和既決定

依個時候喺地球既某個角落，實際掌控聯合國既財閥正進行定期會議

佢地確認今場由財閥背後挑動既戰爭非常成功，一方面令人類得到擴軍既托詞，另一方面作為試驗軍事科技既實驗場亦天衣無縫，更重要既係銀河政局變得動盪，各國紛紛搶購合金發展軍備，正好落入財閥哄抬合金價格既圈套

(圖為2287年年中合金價格，全銀河系只有人類會主動出售產能過剩既合金，其他國家只有國家即將破產既時候先會出售咁重要既戰略物資比市場，需求遠大於供給而令合金價格升值3倍以上)

既然已經達成目的，實在冇需要繼續依場戰爭，於是再一次透過背後操縱理事國同輿論，令安理會喺絕大比數下同意與Haddam Monopoly議和，而且係白紙和平，既不取對方一分一亳，亦即時將軍隊全數撤回

和平條款一出，雖然引起鷹派不滿，但財閥真正既打算係賣對方一個人情，畢竟財閥仍然需要一個銀河公敵挑動不安既情緒，繼續操控市場物價，而更重要人類仍然需要一個喺檯面上可以牽制Najklax Combine既對手

對事實亳不知情既人類，依個時候正期待住國家英雄既回歸，各地慶典亳不間斷到舉行，慶祝人類首次對外戰爭就獲得空前成功
而安理會亦喺依次戰爭後授權並撥款比人類海軍軍部，要求軍部訂購大量軍艦以應付將來「可能」到來既戰爭

到底人類喺進入宇宙世紀既100年內重會遇到咩? 欲知後事如何，且看下回分解

btw 越寫越長
希望一個星期左右就完到

期待
諗住寫到2500?

依個一定啦，不過後期冇咩做，時間可以飛得快D