岩岩先落左去做運動冷靜左一個鐘,之後就諗通左
本身都好嬲,覺得阿龔點解要俾一個假希望人,仲要約哂全家先黎甩底。
但後來就諗返起之前454之後討論既結果,阿龔終有一日要知道自己到底應該選擇過去,定係面對將來。一日未解決到呢一個結,就算佢地真係拍拖,但遲早都會收檔。
以下係我努力兜既版本:
首先,阿龔個人設係由少年時期開始,一直為左復仇而存在。(點解過去感情史得阿may?可能就因為呢一個原因)任何人佢都睇唔上眼,心裡面只有復仇。因為對佢黎講,愛情同復仇兩者都係最單純既存在,係不能夠有任何雜質。所以佢心裡面好偏執地認為,兩者不能並存,一直都對任何人保持距離,從來無對一個女仔動過心。
但係直到遇見水水。
見到好似天使一樣善良既佢,阿龔居然沉淪左。
佢開始漸漸忘記復仇,身處係美夢裡面,甚至開始以為自己可以忘記過去,將阿水視作人生第一位,或者開始欺騙自己,覺得其實復仇同戀愛,都係可以並存?
佢開始一直做d傻仔野,為一個女仔做左好多損人不利己,有違佢初心既事。次次見到佢既笑容,佢都好似個傻仔一樣開心到彈起。
......原本以為美夢一直可以發落去。
但係直到呀爸病情惡化既時候,佢呢一個美夢好明顯打碎左。
原來佢自己一直都放唔低復仇兩個字,佢對天使既愛情,佢自己一直以黎復仇既心,原來都滲透左雜質。
原來傑叔係佢心目中,一直都係一條大大既刺,一日唔抆返出黎,佢一世都唔可以真正接納到水水。
再加上細龍太既電話,佢不禁停低左腳步。
佢諗左好耐好耐,望住阿爸哀傷既背影,再諗起以前傑叔對佢地做既所有野,感受到自己心底裡面埋藏住、又開始冒芽既仇恨,佢開始動搖。
佢知道如果佢要係阿爸有意識既時候報仇,就只能夠行捷徑。而呢一條捷徑,一定要做好多呢個天使唔願意既事情,例如要做返一個好似以前咁既死賤精--一個衰人。
所以佢深吸一口氣,決定做一個好艱難既決定。
因為佢希望同水水共赴一生既人,係一個全心全意愛佢,心裡面只有佢一個既男人。
雙下爬天使應該配既,係一個全心全意既騎士,而唔係一個心裡面放唔低仇恨既復仇王子。
佢開始覺得,自己根本唔配。
所以佢寧願自己承擔所有,因為阿爸病情惡化,已經再無時間。
於是乎,佢選擇離開。
佢寧願天使恨佢。
寧願自己一個痛苦,佢知道咩叫做長痛不如短痛。
佢心裡只希望天使下一個愛上既,係一個完美既騎士,而唔係好似佢一樣,表面光鮮,但其實渾身傷痕既王子。
* * * *
雖然我係最近先開AC,但其實已經追左龔水好耐,所以無論如何,我都唔想放棄呢一對cp,就算過程係幾咁痛苦都好。(因為我係d偏唔信邪既人,愈困難愈要克服)。
我相信上天一定會安排一個好既結局佢地。
阿龔今次甩底,的確令水水好痛。
但係可能佢知道而家既自己真係好無資格成為水水既愛人。好似當初離開香港一樣,佢需要成為一個更好既人,先配得上呢一個咁美好既女仔。
我相信只要阿龔佢可以真真正正搞得掂自己問題,堂堂正正,永遠個心裡面只得返水水既話。佢仍然會係阿水既Mr.right。
==============
唔覺意打下打下,兜下兜下,就打左咁多字
因為只有咁樣ff下,我先可以堅持自己追落去!!
我係唔會放棄龔水架!!!我對佢地仍然抱有好大期望!