由松多鎮上米拉山埡口只不過係30公里。
唔係嫌30公里少,而係我一路爬,一路諗,呢座米拉山應該就係今次旅程既最後一座山,最後一次覺得踩車原來好撚辛苦。
但我成程無推過車,唔理佢阿基里斯乜鳩腱會唔會復發、膝頭哥痛唔痛。諗返起最近唔同車友各自既負面意志,但我唔理咁多,重拾返當初踩第一座高山白馬雪山既熱情,三兩下就到咗埡口了
雖然全日無論向邊個方向踩都好,風都係向住我塊面吹。最後一次俾沙塵遮擋視線,最後一次聽到自己扯哂哈既喘氣聲。當踩到奶力都無埋既時候,我同自己講 : 「屌,都唔知幾時再有機會咁樣踩車法,唔撚驚
」
米拉山埡口,5013米
米拉山唔單止分隔咗林芝市同拉薩市,仲分隔埋海洋同內陸季候風,造成東西不同氣候。西邊拉薩乾燥寒冷,東邊林芝濕潤溫暖。
上山竟然一啲頭痛都冇,仲喺埡口逗留咗個半鐘
其實我都唔想,因為影影吓相,條縛貨帶吊吓吊吓唔為意,推咗幾步車就捲咗入後轆飛輪
搞咗我半個鐘,衫袖同手都黑哂
最神奇係剪斷咗條帶,仲可以用得返
裝完後煞,順便搞吓架車啦
不過都係咬碟,由鳩佢先
4點落山,踩到8點趕咗80公里路。或者係最後一次同徒步藏民講札西德勒、最後一次聽向我打招呼既鄉村小朋友,最後一次頭赤赤,同埋最後一次踩夜車。
墨竹工卡縣雖然係一個縣,但我諗只係得兩個松多鎮咁大
賓館睇落好似好多,問咗兩間,唯有揀一間肯平俾我,又唔怕俾差佬查房既$100標間。
第二次$100過夜
食完蓋飯,啪咗粒頭止痛藥。望望地圖,仲有70公里就到拉薩市中心,有咩留返聽晚先講