【常威近代史】（二百四十六回）
袁世凱平反系列
1913年4月，袁世凱中央政府嘅善後大借款，令袁世凱嘅形象一落千丈。上集己經講過，借錢係為咗用嚟還債。但響南方革命黨人嘅文宣底下，袁世凱依筆借款，純粹係落袋自肥，係北洋集團自己友分水。究竟真相又係咪咁呢？袁世凱生平有冇貪污？當然一定有。當時邊個唔貪？今日中國人做官邊個唔貪？常態生活習慣嚟嘅。但事後睇返，袁世凱死後，佢留低畀後世嘅遺產同不動產並冇想像咁多，起碼遠遠唔及李鴻章嘅400億港紙遺產同十三個香港地皮（常公子估算，之前講過），我話袁世凱算係一個清官，算係一個合格嘅領導人，其實冇錯。
當然喺中國人嘅角度佢係合格嘅，西方人嘅角度就一定唔合格。
動用公家嘅錢，自己落袋，一直都係一條發達嘅捷徑，古住今來好多人都用過。孫文自己，亦都因為被指控挪用革命公款自肥，令好多人唔滿意佢，包括宋教仁同陶成章（兩個前後腳都被行刺）。
其時響北京嘅中華民國第一屆國會，亦都強烈譴責袁世凱。國會由國民黨議員把持，為咗平衡勢力。袁世凱支持國會內共和黨、民主黨、統一黨三黨合併，成立「進步黨」。
呢個制衡國民黨響國會內權力嘅「進步黨」，以武漢三鎮龍頭大佬黎元洪為理事長，流亡國外14年回歸嘅梁啟超先生亦有份參加。寫到呢度真係好感觸，你話袁世凱點奸點衰點賤格都好，佢始終係玩緊政黨政治，玩緊「法統」，好似而家嘅英國美國加拿大日本咁。今日嘅中國呢？一黨專政，獨裁統治，玩一言堂，玩舉手機器橡皮圖章搖尾系統，百幾年中國政治，係鳩做，鳩做唔緊要，但唔好咁鳩得唔得？仲有你哋鳩做還鳩做，唔好將鳩做呢套嘢帶比香港人得唔得？
1913年6月26號，宋教人落葬於上海，數萬人送別，氣氛蒼涼。經過兩個月嘅發酵，革命黨內部，孫文為首嘅開戰派全面佔上風，南方革命黨人反袁情緒高漲，仗一定要打。袁世凱亦有所行動，先發制人，以不服從中央為理由，免去江西李烈鈞（1882-1946）、安徽柏文蔚（1876-1947）、廣東胡漢民（1879-1936）三省都督職務。講講當時廣東省，之前陳炯明（1878-1933）被空降嘅孫文大將胡漢民逼走、沒收權力，現在袁世凱又重新任命陳炯明為廣東都督。
補充一執屎料，當時中央政府的確好窮。6月18號，保定軍校校長蔣百里（1882-1938）當眾自殺。事源蔣百里就任第一日，向全體學生保證，一定要將保定軍校發展成為全國最優秀嘅軍事學府，令到學生得以成為最優秀嘅軍官，若然做唔到，佢就自殺以謝天下。但係由於財政問題，中央政府冇辦法撥款支持軍校建設營運，於是蔣百里實踐諾言，18號朝早，佢召集全校師生，發表一番沉痛講話，然後舉槍向自己胸膛打咗一槍！
好彩子彈冇打穿心臟，蔣百里被搶救返。做官做到咁激，真係好有大和民族血性精神。今時今日？嘿嘿，得啖笑啦。
中華民國第一次內戰好快爆發，1913年，亦係人類世界最後和平嘅一年，整個歐洲大陸，所有人仍然沉醉於20世紀初文明科技、資本主義高速發展帶嚟嘅靡爛生活。奧匈帝國嘅猶太人文學家卡夫卡（Franz Kafka，1883-1924），已經係腦裡醞釀佢嘅偉大作品、改變整個20世紀文學格局嘅《變形記》（德語：Die Verwandlun），預視20世紀人類嘅嚴重精神分裂世代快將降臨。和平同靡爛會喺一夜之間結束，取而代之嘅係無止境嘅戰爭同苦難。
響燦爛繁華致極之地奧地利首都維也納，一個24歲失意奧地利青年投考藝術學院失敗，淪為乞衣，向途人伸手要錢，佢叫希特拉。另一個34歲年青人，則百無聊賴、作客暫居此地讀書，等待一日回到沙俄首都聖彼德堡解放貧苦大眾，實現自己堅信嘅共產主義烏托邦之夢，佢叫史太林。
或者佢兩位，當時都係抱住美麗夢想嘅年青人，但之後1914年發生嘅第一次世界大戰，似乎令佢哋明白到，鮮血先可能係解決問題嘅唯一方法，戰爭改變咗佢哋，亦引發咗佢哋腦裡面嘅極端精神分裂種子。
而另一位極端精神分裂嘅世紀大暴君，出生於1893年12月26日嘅毛澤東，亦響1913年春天，以中學第一名成績考入湖南省立第四師範學校，當時佢一心想成為一個春風化雨嘅教師。
1913年春夫，維也納一份雜誌上有以下一段說話：
「我看見末世啟示錄的景象疾馳而來，預示著世界經濟蕭條，墮落的使者把塵世地獄前廳的火爐燒得過旺了。」（註）
註：來自1913年維也納，二十世紀早期最著名的奧地利作家卡爾克勞斯（Karl Kraus 1874-1936）主編《火炬》（Kackel）雜誌一月號。
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第二部《中國一百年前第一次開放改革》
【常威近代史】第二部《中國一百年前的第一次改革開放》實體購買
沒有了二百五十二