大清亡國關慈禧蛋牛治

【常威中史】為慈禧平反系列（一百二十九回）

呢幾日內心掙扎咗好耐，究竟我需唔需要喺度詳細寫日俄戰爭呢？因為一場日俄戰爭（日本稱做 #日露戰爭）基本上唔關大清帝國事，清國只係旁邊鶴，參戰國家係日本同沙俄，只不過戰場喺大清國境姐……但係我想咗一想，始終都係想寫吓呢一場戰爭嘅具體經過，等大家對當時整個歷史格局有更加深刻瞭解。

華語世界經常忽略呢場日俄戰爭，用中文寫成關於日俄戰爭嘅書籍原來少之又少（英文著作就大量，不過讀英文好費神，冇辦法我常公子程度低），所以接落去嘅描述，因為參考資料不足，可能好多錯誤發生，請大家見諒。亦在此要求一眾網絡高手幫我補漏同指正錯處（即隨便屌）。

有人話，日俄戰爭徹底體現大清喪權辱國一無是處，竟然容許其他國家喺自己國境內無法無天進行戰爭行為。依一點難以否認，但當時嘅清帝國就係弱成咁，軍事實力接近零，其實可以做啲乜呀？畀你吹兩句其實畀足面你喇。

常公子講過，日本同俄國嘅衝突，其實係由 #豆斗 一手促成。#甲午戰爭 後，豆斗為咗抑壓日本人響東北嘅擴張，利用鐵路權益將俄國人引入東北，一山不能藏二虎下，終於引發兩隻老虎自相殘殺。起初豆斗嘅戰略目標係日本人，但係日俄戰爭爆發期間，清國表面上態度中立，但豆斗係企返喺日本人嗰邊，清國甚至向日本提供大量軍事情報協助日本取勝，部分東北嘅清軍甚至直接參加咗日本人嘅軍事行動對抗俄軍，當時上海萬國紅十字會會長 #盛宣懷（1844-1916）就曾經秘密籌款畀日軍，甚至乎對日軍招募華人義勇隊作戰視而不見。

種種跡象都話畀我哋知，當時豆斗係將注碼投注咗日本人身上。事後證明 #馬基維利主義者 慈禧太后又做出最正確選擇，戰爭結束後，清帝國亦都借日本之手保住咗東北地區。當然名義上東北係屬於清政府，但其實上東北已經係日本人鳥，日本放低響東北嘅勢力，亦都直接或間接促成咗之後「#滿洲國」（或偽滿洲國）嘅誕生。無論滿洲國嘅內容係啲乜嘢，呢一個當時國際社會認定嘅「獨立國家」基本上就係大清帝國1911年辛亥革命之後嘅延續體。清政府、末代皇帝 #溥儀 同日本千絲萬縷眉來眼去嘅關係，亦都係由日俄戰爭開始。

亦有歷史學家講過，滿洲國亦都係令到中日二次世界大戰爆發嘅主因，呢啲嘢我哋之後再講，高山流水流流長。

1903年日俄談判破裂。國際社會努力周旋之下亦都毫無進展，本來同日本沙俄結盟嘅 #英國 同 #法國，亦都睇得出炸彈就快爆炸，紛紛避席唔玩。事實上嚟到20世紀初期，英國同法國喺歐洲要面對最大嘅敵人係 #德意志帝國，千里之外嘅遠東事務，佢哋亦都開始抽身退（自己都顧唔掂邊有時間搞9你吖）。1904年2月6號日本向俄國發出最後通牒，要求俄軍立即撤出東北。俄國聽到日本嘅最後通牒，撤軍就冇喇，仲大量增兵添！

當時日本嘅首相（#內閣總理大臣）係 #桂太郎（1848－1913年），桂太郎係陸軍阿頭，退休將軍。長州藩出身，曾任台灣日治總督，後來三度出任日本內閣總理大臣（1901－1906；1908－1911；1912－1913），係日本有史以來任職時間最長首相（呢個記錄有機會畀今日 #安倍晉三 打破），智慧型政治家 #伊藤博文 第四次組閣（1900年10月-1901年5月）下臺之後，佢嘅政治影響力響日本政壇漸漸式微，取而代之係貴太郎，代表軍閥一脈嘅 #軍國主義 勢力大興盛。

20世紀初期日本軍國主義火熱升溫，國內好戰情緒急劇上昇，#脫亞入歐，左翼 #大東亞 夢想成為日本國民嘅生存目標。以黃種人身份打敗白種人，正正就係佢哋一直想做嘅事，日俄戰爭就提供咗一個咁嘅舞臺比日本人表演……

下集，日本人預演偷襲珍珠港！

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【大清亡國關 #日本帝國 蛋牛治】

😄2019年1月1日，happy new year！

😝1895年發生嘅甲午戰爭，其實徹底將東亞整個格局改變。日本人嘅計畫，原本係佔領遼東半島後，就發動「直隸戰爭」，完全照住1860年英法聯軍嘅行軍路線直接打入北京，佔領大清國。當時嘅局面日本人完全有能力咁樣做，因為清國陸軍根本完全唔夠打，冇辦法履行到保護國家嘅任務。日本人最後冇咁樣做，只係因為西方列強嘅壓力，或者講係嚟自俄國嘅巨大壓力。

😊地緣政治相當重要，中國（清國）同俄國日本朝鮮接壤。中日嘅恩怨，已經延續到今時今日。大家要記得，共產主義係來自俄國，甚至蘇聯1991年嘅解體，某程度上亦都係1989年六四事件所引發嘅連鎖反應，呢件事已經好少人記得。1991年蘇聯嘅解體亦都告誡咗中共領導層，原來一個超級大國真係解體上嚟，可以好簡單，改革開放某程度上非常危險（就好似1902年嘅滿清一樣），所以六四事件之後，中共明白經濟可以開放，意識形態絕對要勒緊不放手，直至今日，我哋見到嘅國情就係由此而來。

😄放權其實係一件好難嘅事，被迫放權成日都會發生，主動放權歷史上好少見，係奇蹟。上世紀80年代，就連續兩次出現上述所說嘅政治奇蹟，第一次當然就係蘇聯嘅戈爾巴喬夫放權，但某程度上戈爾巴喬夫都係被迫，因為佢唔咁樣做，就冇可能挽留國民對社會主義嘅信心。真正擁有權力而又肯主動放手比人民嘅人，係臺灣嘅蔣經國先生，希望遲啲有機會講講。


♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🔦http://yt1.piee.pw/DM2RE

🎃https://youtu.be/cl32zftlT6c


【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

爸打加油，一定要寫埋落去，仲追緊架！

【常威中史】為慈禧平反系列（一百三十回）

日俄戰爭，由日本率先出手！1904年2月6號，日本向俄國發出最後通牒，同埋宣佈斷絕日俄外交關係，即日驅逐境內外交官出境！2月8號，日本海軍偷襲停泊係旅順港嘅俄羅斯旅順艦隊，依一次係一次小規模嘅偷襲行動，並冇為俄羅斯艦隊帶來大規模損失，純粹係作為一次挑釁，目的只係要逼俄國宣戰，令戰爭順利爆發。

1941年12月7號日本偷襲珍珠港，目的都係一樣。純粹係要將本來想置身事外嘅美國拉入二次世界大戰嘅漩渦，當然偷襲珍珠港嘅規模大得多，對美國太平洋海軍造成嚴重損傷！當然，未向他國宣戰就採取攻擊殺人行動，係非常之不道德嘅行為。但係如果你覺得有問題，我實在無言以對。因為任何戰爭本來就係不道德，要喺不道德嘅世界裡面講道德，有陣時嘥X氣。正如今日嘅香港，你要喺極權主義嘅社會裡面講民主自由，都係嘥X氣。

旅順港偷襲事件發生，第二日2月9號，日本海軍配合陸軍登陸仁川，響仁川港外面被兩隻俄羅斯巡洋艦攻擊，日本成功擊退對方，令到敵艦自沉。由一開始日本人就占住上風，其實以後一路打落去，佢哋都未輸過，日俄戰爭基本上係日本一場順風順水嘅大戰。

2月10號，兩國同時向對方宣戰，戰爭正式爆發！2月13號，大清帝國政府宣佈對戰爭中立，並且為日本同俄國畫下以遼河以東地區為交戰區。真係好好笑，畀其他國家喺自己領土上面打仗，而當時清帝國亦都冇作出任何撤退交戰區內民衆行動，任得平民百姓於戰火之中受苦受難，其實俄國同埋日本係當時嘅東北亦都拉咗唔少中國人做戰伕、駁腳，有啲有糧出有啲又冇糧出……

大家千萬唔好以為一場戰爭只有軍人參予，其實參與戰爭嘅仲有大量無名嘅幫工戰伕，佢哋嘅數目甚至係正規軍人嘅倍計，好簡單，係一個交通並唔發達嘅世界裡面，淨係搬嘢運嘢托嘢做咕哩已經要大量人手，仲有兩軍交手之前，通常衝喺最前面嘅、幫手掘地雷嘅、就係呢一類本來係平民百姓嘅戰伕。呢啲人死咗冇人知，亦都冇人會紀念佢哋，甚至唔會被統計入戰爭嘅傷亡人數裡面，我好相信，成場日俄戰爭，呢類無名戰伕駁腳幫工嘅死亡人數，會大大多於日本同俄國正規軍人嘅死亡人數。

我為慈禧平反，但我唔係認同佢嘅一切做法。至少喺對待平民方面，佢仍然遠遠做唔到一個20世紀領導人應有嘅「政治道德操守」，大清之後亡國，係理所當然。時代只有不斷嚮前走，拖住時代後腿，想世局返番轉頭嘅人，永遠唔會有好結果。

戰爭基本上係一件好殘忍嘅事，從來喺戰爭裡面最受苦受難嘅就係平民，老一輩人班OldSeaFood成日講社會唔可以「亂」，因為佢哋某部份人親身體驗過戰爭（或政治運動）有幾咁可怕，佢哋好珍惜太平盛世嘅好日子，某程度上都係冇錯嘅。喺佢哋嘅角度同埋意識形態裡面，太平盛世畀統治階層剝削吓、欺壓吓、鎮壓吓，或者喪失言論自由或平等機會，其實冇乜所謂，衹要唔使死，唔使坐監、有得食有得住，穿得暖食得飽，有錢搵，其實已經好足夠。

但好多人會覺得，碎肉機開始，自己總有方法置身其外，但係我話俾大家知，從來碎肉機一開動，所有人最後都會被搞成肉醬，無論你想同唔想都好……

成日講日本，下次不如講下俄國啦。

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

唱蕭作稟 柒頭者聯盟第一部：DSE創世紀(通往地獄的電梯)
https://play.google.com/store/books/details?id=LyxjDwAAQBAJ



follow my instagram @historysandwich

Facebook 專頁：https://www.facebook.com/historysandwich/

一路都係，上果時個局都死局黎

【常威中史】為慈禧平反系列（一百三十一回）

有追開依個專頁嘅朋友，可能都會有一個印象，就係金槍人俄國佬係一群橫蠻無理、不知所謂嘅仆街狗。但係真相並唔係咁，今日講講俄國人嘅歷史。同大清帝國一樣，羅曼諾夫皇朝（House of Romanov 1613-1917）統治下嘅沙俄帝國，基本上都係一個奴隸國家，沙俄早期行嘅係「農奴制度」，即係地主蓄養奴隸，同美國剝削黑奴基本上一樣，同清國都一樣。

但隨住歐洲雙元革命（即工業革命同法國大革命）發生，時代巨輪急速向前，東歐強國沙俄亦都趕上快車，1703年，沙俄喺偉大嘅城市聖彼德堡（Sankt Peterburg）建立首都，聖彼德堡係為咗紀念彼得大帝（Пётр Алексеевич Романов，1672-1725），因為係彼得大帝將沙俄帶上開放改革現代化之路，面向歐洲，擺脱古老內陸封建帝國嘅文化枷鎖。

進入19世紀，沙俄出現咗一位偉大嘅君主，佢叫做亞歷山大一世（Александр I ，1777-1825），佢係羅曼諾夫王朝嘅第14任沙皇，佢在位期間，打贏咗軍事天才拿破崙（1769-1821），粉碎咗法國嘅超級霸權，復興番歐洲各國嘅王室，因此被歐洲人稱為歐洲救世主。佢嘅繼任人係尼古拉一世（Николай II，1796-1855），尼古拉一世統治期間，開始釋放國內農奴制度，進一步推行開放改革措施，融入歐洲資本主義市場經濟。終於到咗1861年，第16任沙皇亞歷山大二世（АлександрII，1818-1881）在位嘅時候，徹底廢除農奴制度（219法令），同時亞歷山大二世亦都改革軍制，設立地方自治議會，重新訂立司法制度，並開始推行初等教育。沙俄亦都一步一步同整個歐洲連成一線，成為我哋口裡面嘅「西方列強」之一。

其實整個19世紀，全個世界都喺度進行緊改革，因為舊嗰套已經再唔識用，你唔去改，就會俾世界暴力淘汰。大清帝國喺豆斗主政之下，其實同沙俄都係行住同一條路，大清改唔到，最後冇辦法躋身世界列強之內，某程度上係行衰運，某程度上亦都係我哋嘅知識份子儒家哲學傳統威力太過巨大。

叉開一筆，中華人民共和國其實係一個意識形態國家，乜嘢叫意識形態國家呢？就係用意識形態做基礎去建立一個國家，中國嘅意識形態就係馬克思主義，共產主義列寧主義同埋毛澤東思想。但係上世紀80年代開放改革之後，寧右勿左，其實整個國家嘅意識形態大樓已經徹底倒塌，現代中國基本上係一個冇意識形態基礎嘅國家。但係馬克思主義已經冇人再信奉，所以你會發覺最近十幾年中共亦都急忙想開拓另一種意識形態取代原本嘅意識形態，於是乎放咗響屎坑內幾十年嘅儒家思想再次被捧返上神台，孔子學院全世界係咁開。但我只係想講一句，千方百計，用咗咁多人嘅鮮血同埋時間先拋得開嘅儒家哲學思想紮腳布，又再被重新採用，到底本身係唔係一個悲劇呢？

19世紀嘅沙俄帝國，係國際社會間嘅風評並唔好，因為佢哋唔鍾意遵守條約，而且打仗嘅時候相當殘暴，但係俄國基本上唔係一個冇文化根底嘅國家，相反，俄國文化比好多歐洲國家都要先進同埋文明。如果你當俄羅斯佬係老粗，咁你就大錯特錯！

今日講住咁多先，下次繼續。

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百三十二回）

今集我哋繼續講金槍人……

俄國人基本上唔係老粗，佢哋亦有深厚嘅文化根底，19世紀俄國文壇，巨匠輩出。我常公子夠膽講一句，現實主義文學地位，俄國係天下第一。先有19世紀前期奠基者普希金（Aleksandr Sergeyevich Pushkin，1799－1837）、果戈理（Nikolai Vasilievich Gogol-Yanovski，1809－1852），屠格涅夫（ Ivan Sergeyevich Turgenev，1818-1883），中期托爾斯泰（Lev Nikolayevich Tolstoy，1828—1910），杜斯妥也夫斯基（Fyodor Mikhailovich Dostoyevsky，1821-1881）兩大巨人創造黃金時代，加埋音樂家柴可夫斯基（1840-1893）天鵝湖，俄國文化何粗之有？

俄國文學響19世紀到達巔峰，戲劇詩歌小説等偉大作品歷久不衰。以我自己嘅經歷，杜斯托也夫斯基1880年所出版嘅小說《卡拉馬助夫兄弟們》（The Brothers Karamazo）仍然係我所睇過最高嘅小説作品，有幾高？有20幾層樓咁高。而且俄國文學，我鍾意佢完全唔離地，寫嘅都係現實世界嘅悲苦同埋人生嘅無奈。人未到40歲，千祈唔好睇俄國小說，因為未經歷過人生嘅苦難，一定睇唔明，我呢一生人，《卡拉馬助夫兄弟們》睇咗四次，每一次睇，都有唔同嘅體驗，一本好似枕頭咁厚嘅小説，就好似一個永遠都冇辦法開發得曬嘅人生寶藏一樣，咁你話勁唔勁吖？的確係近，係近到核爆嗰隻！

俄國嘅文化根底奠基於放眼歐洲嘅彼得大帝，至偉大女皇、本身都係文學愛好者嘅凱薩琳大帝（Catherine ll，1729-1796）大力提倡，女皇解禁出版，加上俄國18世紀末期有冬將軍幫手，打敗咗天下無敵嘅拿破崙入侵，俄國人民士氣高漲，民族尊嚴直線上昇，創作熱情澎湃激盪，文學作品亦都蜂湧而來，而且一發不可收拾。

踏入19世紀，俄國同整個世界其他國家一樣，都進入咗一個動盪嘅時代，文藝復興伸延而嚟嘅人文意識逐漸高漲，偉大嘅軍事家拿破崙南征北伐，同時亦將法國大革命嘅自由，民主，平等嘅觀念散佈於整個歐陸大地。位處東歐邊陲嘅俄國人民亦都同時醒覺過嚟，向一直剝削佢哋嘅貴族階級上層建築發出怒吼同反抗嘅聲音。

1825年，俄國爆發咗一場「十二月黨人革命」，一群有質素同遠見嘅貴族知識份子挑戰沙皇皇權，武裝起義失敗收場後，革命反動嘅種籽就一直埋向俄國人心裡面，亦反映響佢地嘅文學作品裡頭。反觀歐洲大陸，要去到1848年，馬克思主義出現之後，先有工人階級武裝革命遍地開花。其實俄國人行早佢哋成20幾年。到咗1917年，俄國建立咗世界上邊第一個共產主義意識形態國家，其實都係有跡可尋。

俄國冇出名嘅哲學家同思想家，因為佢哋嘅思想同埋哲學都全部融入咗文學作品裡面，用我嘅角度去睇，係水火交融最高境界。常公子誠意推薦大家睇托爾斯泰同埋杜斯托也夫斯基嘅小說作品，以現代人眼光去睇，內容係無比深澀嘅，但係如果你能夠放下身段，突破沉悶，深刻咀嚼，你會喺裡面發現一個無法想像嘅生命境界。而且你會深刻體會到，人類嘅思想並唔係嚮前行緊，而係嚮後倒退緊，一切都係拜資本主義所賜。

古往今來世界上最偉大嘅文學，都係寫實主義，源於人生苦難、發掘人性嘅光輝而來。中國人所受嘅苦難，應該都唔係講笑。但係我哋嘅文學作品，同我哋所受嘅苦難量完全唔成正比，係中國人唔識表達？抑或唔想表達呢？幸好大清帝國中葉仲有個曹雪芹，一本《紅樓夢》，足以永垂不朽。

最後要補充另一個俄國作家（因為唔講以後唔知有冇機會講），佢叫索忍尼辛（Aleksandr Isayevich Solzhenitsyn，1918-2008，有人譯佢做索忍尼仁琴），佢係1970年諾貝爾文學獎嘅得主，佢嘅作品亦都非常之驚為天人，大家有機會睇睇。索忍尼辛係一個反蘇聯反動作家，1970年，佢怕出境之後冇辦法返番蘇聯，所以冇去到瑞典領獎，1973年揭露蘇聯勞改營黑幕巨著《古拉格群島》出版。終於觸怒蘇共，1974年索忍尼辛以叛國罪名被逮捕，蘇共總書記布里茲涅夫（1906-1982）隨即簽署命令，剝奪索忍尼辛蘇聯國籍，並強制押佢上飛機將佢驅逐出境，索忍尼辛不服，臨行前立下誓言：「我將活著回來」。

蘇聯1991年解體之後，索忍尼辛返去莫斯科，最後終老死響自己嘅故鄉上面，我講索忍尼辛的故事，只係要比較另一個人嘅遭遇，佢叫劉曉波。

一講文學我就收唔到口，我怕我會寫十萬字，所以一定要喺呢處煞定佢，下一回我哋翻去歷史系，繼續講俄國嘅亡國之君尼古拉二世…………

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

歐陽鉅和我好朋友三島悠亞合寫的作品【誰偷走了我們半塊芝士】實體書快將見街，密切留意出版日期！

推

【常威中史】為慈禧平反系列（一百三十三回）

全世界小 #林鄭月娥，我常公子撐林鄭月娥！點解？因為佢 #屍政報告 嗰個一萬億填海造地偉大工程實在太正，正響邊？正在個波吹得夠大！要玩就玩盡佢！上面order到，工程要吸水，泥砂當金賣，ok！收到！俾個驚天大project你，向你交差先！至於做唔做到係另一回事，逢親大波蓆就要研究修訂咨詢反覆再研究修訂咨詢同傾好X耐，傾吓拖吓，到時我任期到，下位重新起步，大家鬥長命啫，傾傾吓冇咗件事叫和稀泥，八萬五如是，置安心如是，港人港地如是，香港工務員國技係太極拳，聽過未？林鄭，好嘢！

去返十九世紀沙俄政壇，戰鬥民族唔可以講笑，隨著沙俄不斷開放改革，國家經濟欣欣向榮同時，國內反動反皇權情緒亦不斷昇溫（清帝國1902後情況），但俄國人實牙實齒，吓吓揾命搏。1881年3月1日，#亞歷山大二世（1818-1881）被政敵用炸彈炸死，佢個仔 #亞歷山大三世 繼位（1845-1894），亞歷山大三世係 #胡錦濤 式領導人，做事非常小心謹慎，唔會行差踏錯，佢在位十幾年間，沙俄平安無事，和平穩定，人民都愛戴佢。有陣時撈領導人千祈唔好玩嘢弄權，得起就最好，玩大咗呢就收唔到科嘅。

亞歷山大三世任內，建設咗一支世界第三嘅海軍力量，完成西伯利亞鐵路藍圖，為沙俄征服中亞嘅霸權美夢打下堅實基礎。好可惜，或者佢真係擺好曬棋比承繼人、佢個大仔 #尼古拉二世，結果尼古拉二世就以為有得威玩大佢，最後連老本都輸9埋。老實講，如果尼古拉二世唔係要擴張沙俄勢力，入侵大清國，同日本人打日俄戰爭，俄國會係相安無事，平穩發展，世事冇如果乜如果物，個天就係要佢做亡國之君，叫天命難違。

叉開一筆，亞歷山大二世做過一件驚世大柒事，不得不提，1853年歐洲爆發克里米亞戰爭，俄國驚住 #阿拉斯加 殖民地被英國人搶走，於是提議將阿拉斯加賣比 #美國，1867年3月30日，美俄雙方同意以7,200,000美元成交。依筆土地交易成為世界土地交易史上面積最大一筆交易，平均每平方公里4.74美元，你以為阿拉斯加冰天雪地乜都冇？但後來美國人響阿拉斯加發現豐厚石油儲存，美國響20世紀工業飛騰而上，成為世界第一工業大國，真係要多謝俄國人！

出生於1868年嘅尼古拉二世憎恨日本人，亦可能同一件事有關，1890年，佢未登基，21歲仔環遊世界。十個月內，佢去過維也納，希臘埃及印度，1891年4月到達日本，喺長崎登陸，接住暢遊京都，鹿兒島，幾開心呢。5月11號，係滋賀縣嘅大津市，佢比一個日本巡查（警察） #津田三藏 用武士刀襲擊，尼古拉二世個頭要縫咗八針，呢件事就係「#大津事件」。日本人其實幾暴力，記唔記得佢哋用槍打過李鴻章？呢單嘢係國際頭條，外務大臣同埋內務大臣雙雙引咎辭職，日本 #明治天皇 仲放下身段，親自去醫院探尼古拉二世修補關係，不過皇太子尼古拉二世就一直懷恨在心，呢兩個國家，或者早就註定要生死相搏一場……

1894年10月21號，#甲午戰爭 發生期間，亞歷山大三世駕崩，年僅26歲嘅尼古拉二世接任沙皇，1896年5月，服喪後嘅尼古拉二世正式加冕，喺加冕儀式後四日，作為祝賀儀式嘅其中一個環節，政府響莫斯科郊外嘅霍登卡廣場發送紀念品俾民眾，結果好多人去攞，造成混亂，#蘭桂坊慘劇 出現，人踩人，死咗1389人……真係大吉利是！

睇嚟尼古拉二世真係黑仔，人黑，個天都幫唔到你，下次繼續……

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【大清亡國關 #福澤諭吉 蛋牛治】

😄今集同大家總結甲午戰爭，甲午戰爭嘅失敗徹底將清帝國由1860年被太平天國剿滅主力後重新建立起嚟嘅軍事力量再一次清空，將清帝國送入棺材嘅人係洪秀全，而將棺材蓋釘好嘅就係日本人。1895年甲午戰爭慘敗後，其實清帝國已經步入咗最後嘅倒數階段。百日維新、戊戌政變、義和團之亂、八國聯軍入京……統統因為甲午慘敗而發生，所以一場戰爭其實都可以改寫一個國家嘅命運。

😝我最近閱讀一啲關於越戰嘅書籍，越南戰爭對美國來講亦都係非同小可，戰爭巨大嘅軍費開銷，某程度上促成咗尼克遜1972年放棄金本位，而放棄金本位的貨幣政策亦都徹底改變咗之後嘅世界。另一方面，越南戰爭亦加速咗尼克遜同中共建交嘅決心，中國能夠打破文革遺留落嚟嘅困局，以合法角色進入世界體系，尼克遜嘅外交政策係轉捩點。尼克遜的確係一個非常重要嘅美國總統，最近有人將現任美國總統特朗普同尼克遜比較，話佢係尼克遜二世，佢哋兩個都係做實事嘅人，亦唔鍾意喺頭上面戴光環，佢哋兩個不約而同，出現係為美國解決問題，並唔係為咗被人讚賞同供奉。


♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🛀http://yt1.piee.pw/DNE9U

🚣https://youtu.be/fBUClyJckiM

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

追左三日 終於live

【常威西史】慈禧平反系列（一百三十四回）

#地獄黑仔王 #尼古拉二世，真係唔係講笑。佢嘅遭遇同明朝亡國之君 #崇禎 有得揮，兩位都係年輕執政，好大喜功，想證明自己並唔係一個二世祖（或N世祖），可惜礙於佢哋嘅見識同埋高度，都比佢哋身處嘅環境所限制，結果每每眼高手低，加上真係黑仔，做出連番錯誤決定，結果最後崇禎媒山上吊，尼古拉二世比 #托洛斯基 拉去後卷打靶，慘卵到顛。

所以話老竇大把錢都未必係一件好事，古往今來，亦有好多人就係因為上一代嘅巨大壓力而變得不知所謂、進退失據。當然，呢個論點亦只不過係安慰我哋呢亭窮L嘅藉口，撫心自問，我梗係想我老竇剩低大把錢畀我，成世唔X使做啦，或者淨低幾曡 #太古城 俾我收租都好吖。

叉開一筆，好多人都以為人類嘅想法（即係 #意識形態）係可以自主嘅，即「#意識決定存在」，但我話俾大家知，意識形態係有強烈 #階級性，一個人嘅意識形態往往由佢身處於邊個社會嘅階級所決定，真相係「#存在決定意識」，有錢人有有錢人嘅想法，#窮L 有窮L嘅立場，所以有錢人永遠唔會明白窮L嘅處境，你希望一個貴族或者高高在上嘅有錢佬，會到最後明白民間疾苦，從而將整個社會局面改變，呢個係極度戇鳩嘅諗法。

中國民間傳奇傳統，往往就係希望會有一個偉人出嚟翻天覆地，拯救眾生，當然呢個人都曾經出現過，可惜佢帶來嘅只係比十次核爆仲要勁抽嘅苦難！喂，你連身邊嘅人都唔相信，但竟然可以相信一個同你有離天九丈遠嘅所謂「#偉大領袖」，咁咪話唔戇鳩囉。

上次講到尼古拉二世登基慶典節目有踩死千幾人嘅慘劇，仲有on9嘢要補充，原來慘劇發生當晚，喺法國大使館內有一個ball舉行，正常人都應該唔出席啦 ，取消佢喇，早幾年國慶沉船事件發生，唔通仲年年放煙花慶祝咩？但係尼古拉二世就照舊出席舞會，嘻嘻哈哈well well ……結果一上任就大失民心，以前嘅俄國人記性比今日香港人好。你做小小錯事會記住你成世，邊有話好似今日香港特區政府官員咁正架，無論做過幾多柒事on9嘢，都係冇人記得，都可以幾十萬一個月咁撈落去……

當時俄國喺國際社會上面信譽並唔好，因為大英帝國唔like佢，所以冇乜朋友，法國響普法戰爭戰敗後，亦都極力想擺脱德國 #俾斯麥（1815-1898）嘅封鎖戰略，於是同俄國一拍即合，結成「#俄法同盟」，時間係1894年。

要做地獄黑仔王唔係想做就做嘅，仲有好多因素，尼古拉二世個皇后 #亞歷山德拉（1872-1918）好靚女，佢老母係 #維多利亞女王 細女，家底亦厚。本來就係一段美滿嘅貴族婚姻，但係皇后唔鍾意交際，喺聖彼德堡嘅社交圈子中不受歡迎，經常柄埋自己，仲有好衰唔衰，佢同尼古拉二世好勤力三年抱兩，八年抱四，但係先後生咗四位公主，做皇后生唔到仔好Q大鑊，終於到咗1903年，佢先生咗個王子 #阿列克謝（ Tsarevich Alexei，1904-1918 ） 出嚟，但係個細路仔先天就患有絕症 #血友病，而當時認為血友病嘅基因係來自母系，咁就真係調理農務系勒。

個么仔有絕症，沙俄帝國承繼人尚未出現，佢黑成咁，仲要同日本仔宣戰打日俄戰爭，其實未打都知邊個贏啦！

下次返番去東北戰場……

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

支持

【大清亡國關 #下關條約 蛋牛治】

😄今集講李鴻章去日本傾馬關條約，日本人叫做下關條約。商量甲午戰爭慘敗之後嘅賠償問題。國際社會上，國家與國家之間嘅談判其實非常重要。今日中美爆發貿易戰，雙方已經進行咗多輪嘅談判，拉拉扯扯，仲未有一個定案。但係談判嘅過程中，世界經濟就因為依場中美貿易談判而不斷起伏。香港有堆人，成日講政治同經濟係互相分開，呢種人嘅知識水平其實低到爆。根本政治同埋經濟就係同一件事，人可以蠢，但唔可以太蠢。

😝講開談判，我諗起80年代中國同英國就香港前途問題展開談判。當時英國原本嘅方案係希望中國放棄香港主權，但鄧小平一步不讓，寧願玉石俱焚，都要響1997年收回香港主權。因此構思咗「一國兩制，高度自治」嘅劃時代巨獻拋畀英方，最後英國基於國勢江河日下，只有讓步，答應1997年交還香港主權，戴卓爾夫人響人民大會堂前仆街一幕，瀝瀝在目。依一仆，亦代表咗大英帝國嘅輝煌歷史告一段落，從此以後世界大舞臺轉換角色。

😚到咗今日，英國成為世界舞臺嘅二打六，只係做美國嘅附庸同應聲蟲，其實都幾心酸。英國國勢急轉直下，因為第一次世界大戰同第二次世界大戰，歷史話比我哋知，凡事真係唔可以去得咁盡，保留實力，唔揭開自己最後一張底牌，先係上策。呃呃騙騙，本來就係人間常態。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://youtu.be/eMTdsjHfGLg

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

推

【常威中史】慈禧平反系列（一百三十五回）

寫寫吓俄國史，差啲寫到列寧同托洛斯基出場，勒住佢先，事實上20世紀初期，聖彼德堡已經出現咗大批自稱為「馬克思主義者Marxist」嘅革命份子，俄羅斯第一位馬克思主義者係出生於1856年嘅列漢諾夫（拉丁名Plekhanov，1856-1918），呢一批人同之前嘅反動分子唔同嘅地方係，佢哋嘅理論根底相當深厚，甚至響實踐「馬克思主義」現實化方面、即具體建立一個社會主義/共產主義社會，甚至超越馬克思本人。當中列寧同埋托洛斯基就係其中嘅表表者，後者係我常公子偶像，遲少少我有好大篇幅講佢。

上次講過尼古拉二世自己黑西，國內又鬼死咁多鬼。而且沙俄響宰相/首相塞吉維特（1849-1915）主政下急速工業化，導致咗農業不振。當時全世界農民真係好慘，每個國家嘅工業化，差唔多最初嘅資本都係來自剝削農民，但係一旦工業化成功之後，農民就被拋諸腦後，完全享受唔到國家工業化資本主義下帶來嘅好處。有句說話都講得幾啱，革命時期就叫你做戰友，革命之後就叫你做「低端人口」。20世紀初期嘅聖彼德堡，就係充斥住大量失業嘅農民、流浪漢同乞衣。後嚟佢哋全部畀列寧同托洛斯基所吸收，都成為咗馬克思主義者嘅忠實信徒（ture believer，搞革命，一定要大量ture believers），等到1917年十月革命，開天闢地。

叉去現在香港，好多人唔明「一黨專政」嘅意義係乜嘢，明明社會上咁多政黨，有乜嘢理據可以一黨專政呢？但係共產主義信徒或者社會主義者眼中，佢哋成立嘅政黨係代表社會上邊嘅無產階級同埋低下階層，而一個社會內，低下階層必然占絕大多數。所以共產黨就係必然代表社會上嘅絕大多數民眾，就係呢個大前提之下，一黨專政概念先可以成立。buy嗎？哈哈。

1904年2月10日，日本同俄國正式宣戰，戰爭前夕，日本擁有一支訓練有素裝備當時世界最先進嘅骨幹部隊，總動員後，日軍增至38萬人投入依場戰爭，已經過甲午戰爭十年之後，日本亦成為海軍大國，當時日本擁有第一流嘅軍港。整個大日本海軍有戰鬥艦艇80艘。

但係相對於俄國，整體上日本係及唔上嘅，俄國擁有當時世界上最龐大嘅陸軍部隊，但，1904年佢哋喺遠東嘅軍力大概有10萬人，加埋警衛部隊3萬人，合共13萬。俄國遠東艦隊以旅順港為總基地，擁有各種艦艇63艘，日俄戰爭爆發初期，日軍人數係俄軍嘅3倍，火炮幾乎係8倍，機槍數目係18倍，艦艇優勢係1.3倍。

單就遠東東北戰場方面，日本完全占住上風，同埋佢哋有地利因素，整個日本同朝鮮響背後全力拾卜，踏入20世紀嘅現代戰爭，除咗打軍備打戰術打數量之外，重要嘅係打後援打補給線，更加重要嘅係打經濟，打整個社會結構同打意識形態……

我可以大膽講句，日俄戰爭一爆發，日本無論係邊一方面都秤先俄國一班，俄國戰敗係必然嘅！

所以俄國要打贏戰爭，必須注入更多兵力，特別係海軍方面，戰爭一爆發，沙皇尼古拉二世就下令手中最強大嘅波羅的海艦隊出發前往遠東參戰。俄軍艦隊從聖彼得堡出發，繞過非洲大陸與印度洋，並穿越台灣海峽與對馬海峽，但係整個旅程足足歷時七個月……

戰爭係打天時、地利、人和，缺一瓣，你就好易輸。下次繼續！


#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

歐陽鉅和我合寫的作品【誰偷走了我們半塊芝士】實體書快將見街，密切留意出版日期！

推一推

【常威中史】慈禧平反系列（一百三十六回）

甲午戰爭之後，日本取得遼東半島控制權。但係喺俄國法國同德國三國干涉之下，逼得日本人以3000萬兩白銀將遼東半島賣返俾清帝國，日本人一直深深不忿。而且俄國之後冷手執個熱煎堆，響豆斗推波助瀾下，響東北同埋遼東半島大肆擴張勢力，直接威脅朝鮮半島同日本。日俄戰爭嘅開打，一方面係日本要保護自己，另一方面係日本國民覺得佢哋要攞返自己應有嘅嘢。

有一點我想公子認同日本右翼人士嘅睇法，如果當年日俄戰爭日本戰敗，我好相信現在嘅東北係會永遠屬於普京。所以戰爭爆發，清國表面上中立，其實暗中支持日本。另外大力支持日本打日俄戰爭嘅仲有英國同美國。

因為20世紀初期，世界各個資本主義國家，先後由「資本主義」過渡到「壟斷資本主義」階段，列寧嘅講法就係「帝國主義」階段。對唔住，我常公子時常用馬克思主義詞彙去分析世界，但係我覺得馬克思主義嘅分析方法係最能夠洞察所有事物嘅本質，我並非馬克思主義者，但我相信自己仍然係半個社會主義信徒。弊！又叉開咗！當時一衆帝國主義者，為咗爭奪世界霸權，為咗瓜分世界上尚未分割嘅最後幾塊土地，彼此間開始咗激烈嘅競爭。

日俄戰爭期間，俄國同法國係盟友關係，於是英國同美國就支持日本抑壓俄國響遠東掘起，戰爭期間，英美源源不絕向日本輸出大量煤炭、石油、同埋戰略物資，成場戰爭嘅洗費，有一半以上係英美銀行借出嚟，其中美國就向日本貸款4.5億美元。美國人同埋俄羅斯人嘅牙齒印，就係喺買賣阿拉斯加同埋日俄戰爭開始嘅，呢份深仇大恨到咗今日，仲未退過半分……

當然美國同英國亦唔係咩好人，支持日本打俄國，其實目的都係想佢兩個兩敗俱傷，咁英國同美國就可以穩固返佢哋喺遠東嘅支配同勢力，類似嘅思維之後不斷擴大，借力打力搵代理人打擊對手，終於，大家係咁玩係咁玩，就玩出咗第一次世界大戰同埋第二次世界大戰，死成二億人！

位於遼東半島上嘅旅順軍港，係1880年至1890年十年間，北洋大臣李鴻章傾盡清國人力物力所建立嘅北洋水師軍事要塞，喺當時被譽為世上五大軍港之一，旅順軍港嘅建立基本上係為咗防禦對岸日本人嘅侵略，守住通往北京嘅咽喉，渤海黃海水域同大沽口！旅順軍港天然環境優越，易守難攻，可惜係甲午戰爭期間就只係一個膠汽球，畀日本一篤就爆！大家仲記唔記得一場旅順大屠殺？日本呢個表面斯斯文文、謙謙恭恭嘅民族，表現咗佢哋兇殘血腥嘅一面，就係由旅順開始。

1900年後，俄國勢力入侵東北，荒廢多時嘅旅順軍港亦都「被」租借咗畀俄國人，俄國人之後大力投資，重建軍港軍事設施，派遣太平洋艦隊駐守。沙俄當時已經喺東北舗設緊鐵路，而佢哋境內嘅西伯利亞鐵路大project亦都如火如荼進行緊，衹要兩條鐵路完工合併，就能夠打通一條橫跨歐亞、從聖彼德堡直達遠東嘅軍事運輸路線。我可以寫包單，如果有咁嘅一日發生，所謂中國一早就冇X咗。

年少氣盛沙俄尼古拉二世嘅野心全世界都睇到，大清帝國豆斗梗係睇到啦，但係豆斗已經無能力再做任何嘢，1902-1903年期間，當時清帝國向日本《馬關條約》嘅分期賠款，現金仲要由沙俄做擔保人向法國銀行借貸出嚟（鬼叫你周身債咩），文化高一班嘅日本人亦梗係睇到，如果俾沙俄打通呢條歐亞全面軍事運輸線，清帝國一定保唔住之餘，朝鮮半島同日本本土亦都有機會成為下一個被俄國侵略嘅目標。

所謂先下手為強，日本人再唔可以等（亦冇得等），趁住俄國響旅順港嘅建設仲未完全完工，佢哋一定要將俄國勢力徹底殲滅，或者將旅順據為己有，日俄戰爭嘅本質其實就係一場「旅順軍港圍攻戰」，旅順港係整場戰爭嘅關鍵同埋重點，戰爭一爆發，日本偷襲旅順，先取得黃海渤海嘅制海權，然後陸軍由朝鮮半島側面大量登陸，海陸兩面，將甲午戰爭嘅動作重做一次，夾擊旅順。

#常威 #大清亡國關慈禧蛋牛治 #慈禧太后 #晚清歷史 #日俄戰爭


【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【大清亡國關 #刺客 蛋牛治】

😄李鴻章到日本談判，期間遭受刺客小山豐太郎行刺，小山豐太郎係日本嘅極右人士，有人話佢係黑龍會頭山滿派出嘅刺客，子彈射咗入李鴻章塊面度，以一個72歲嘅老人，唔死都算係奇跡。但事後睇返，把槍嘅威力明顯好細（否則正面打頭李鴻章冇可能唔死），但成件事冇可能係假，因為打頭，應該真係想堅攞李鴻章命。但係呢個刺客最後幫咗大清國一個大忙，歷史上發生嘅事，真係好奇怪。

😚發生響歷史上嘅重要行刺事件，好多都好奇怪。最轟動嘅就係60年代約翰甘迺迪被殺，背後嘅真相到今日都唔清唔楚（唔通真係磁力王Magneto令子彈轉彎），要記得幾年後佢細佬羅伯特甘迺迪（'Bobby' Kennedy）響宣佈競選總統之前，同樣死於刺殺，兩兄弟不明不白被行刺，背後究竟係一個乜嘢嘅陰謀呢？到咗今日都係冇人知道嘅。

😱美國貴為世界上言論最自由，政治透明度頗高的國家（同中國比簡直一個天一個地），內裡仍然充斥著不少驚人秘密。有人話我呢種人叫做「陰謀論者」，只係響處不停幻想政治背後嘅連串黑幕。但我想講一句，真正嘅態度係唔係官方講乜我哋就要信乜先？我哋冇權懷疑官方嘅講法？政治正確係一種先進道德觀？對唔住，我永遠無辦法認同呢類觀點。

🙄香港現今嘅情況，就係大家都朝住政治正確嘅方向進發，反對嘅聲音、懷疑嘅聲音、抗爭嘅聲音越嚟越細，我諗到咗有一日，全個香港消音mute咗，大家就會安樂曬，唔再諗咁多嘢，快快樂樂個安定繁榮富俗無憂嘅日子，直到永遠，阿門。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://user35103.pics.ee/DKB8Q

🍳https://youtu.be/k-bgqYFBDaI

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百三十七回）

發生於1904年的日俄戰爭被譽為第0次世界大戰非常恰當，事實上整個帝國主義俱樂部成員都有份參與戰事，英美同猶太人財閥背後支持日本，俄國嘅戰爭經費大部份出於法國，德國威廉二世精神上支持俄國（只有清國食花生）。日俄戰爭嘅規模同埋使用嘅武器戰略，某程度亦都為之後1914年嘅第一次世界大戰奠定基礎，採用整體戰同大量人命傷亡，以民族主義作號召，以愚民血肉換取帝國霸權擴張，都係之後半個世紀嘅獨有玩法。

毫無疑問，由20世紀一開始，人類步入最黑暗時代。

整場日俄戰爭可以分為陸戰同海戰兩大範疇分析。戰爭嘅本質係「旅順港攻防戰」，日本方面一早就知道冇辦法單用海軍奪取旅順港，俄國駐紮旅順軍港嘅第一太平洋艦隊，並唔係大清北洋水師，係一隻真正嘅老虎。日本嘅戰略係派遣大量陸軍由朝鮮登陸，渡過鴨綠江直入遼東半島，由背後攻入旅順軍港。而且俄國最強嘅波羅的海艦隊已經響歐洲出發緊，日本人要把握時間，所以由戰爭一開始，佢哋就需要速戰速決，無論損失幾多人命，佢哋首先要奪取遼東半島嘅控制權。

簡單啲講，日本係強攻，俄國係強守。打仗嘅嘢永遠守易於攻，大戰略上俄國人衹要保住遼東半島同旅順就得，日本人係日俄戰爭做嘅嘢係向超高難度挑戰。最後取得全面勝利，老實講，真係亞洲光榮，呢場仗後，西方人再唔夠膽睇小東方人，帝國主義俱樂部裡面亦開始有東方人嘅聲音。

如果要比較十年前發生嘅甲午戰爭，日本喺日俄戰爭人命嘅消耗係甲午戰爭嘅十倍以上，同時你可以想像，日俄戰爭嘅戰爭規模亦都係甲午戰爭嘅十倍以上。

今日先講陸上戰役，日俄戰爭裡，有名嘅陸戰有鴨綠江會戰，旅順圍攻戰，遼陽大會戰、沙河會戰、黑溝台會戰同奉天會戰。

鴨綠江會戰：1904年2月開始，日本陸軍第一軍響朝鮮出發，向清國滿洲進軍途中，同駐守邊界嘅俄軍展開一系列戰鬥，日軍憑住猛烈炮火，擊退俄軍，順利渡過鴨綠江，進入大清國境。同一時間，日本陸軍第二軍亦都喺遼東半島登陸，第一軍同第二軍作戰嘅目的係將半島上俄軍南北分割，令到俄軍主力再冇辦法支援旅順軍港守軍。1905年5月，響南山同金洲城日本同俄國發生大規模戰鬥，當其時日軍兵力係俄軍嘅一倍，而且日軍不惜損耗大量人命，強攻俄軍頑強防守嘅碉堡、要塞同陣地。鴨綠江會戰，日本取得全面勝利，將俄軍主力同旅順要塞嘅守軍完全切斷，為之後嘅全面勝利打下深厚基礎。

鴨綠江會戰亦第一次向全世界展示日本軍隊勇武同埋可怕嘅一面，從此以後再冇人夠膽睇小日本人！

旅順圍攻戰：經過多個月戰鬥，切斷俄軍補給線後，日本陸軍全面向旅順軍港推進，其時旅順呢個天然嘅不凍港，駐紮住俄國太平洋第一艦隊，修建咗27座堅固嘅永久性要塞，旅順軍港內常備守軍有13000人，總動員可達40000人，配合重型炮火，其實邊個嚟邊個死，衹要能夠拖住時間，等待波羅的海艦隊前來支援就掂！

1905年8月，戰爭已經爆發咗超過半年時間，日本參謀部決定不惜一切，誓要取下旅順軍港。呢個時候日本人已經動員超過200,000大軍進入遼東半島，單睇數字你就知道日俄戰爭嘅規模係甲午戰爭嘅十倍以上。

8月，天氣開始進入寒冬，東北嘅氣溫大家都知道，晚上係可以跌到零下20度以下，1904年嘅寒冬，不單止係俄國人嘅寒冬，所有參與戰鬥嘅軍人嚟講，都係一場大災難。

位處日本本土嘅皇室同埋明治天皇，或者喺聖彼德堡裡面嘅尼古拉二世一家六口，佢哋大概永遠都唔知道東北戰場上邊嘅血腥同埋恐怖，依然過住富貴榮華無驚無險嘅侈華生活。呢個亦係平民同埋貴族嘅分野，當其時，馬克思主義者好似列寧托洛斯基要推翻嘅，就係依種不公義嘅制度！今時今日，好多話共產黨十惡不赦，話共產黨係呢個世界上面最邪惡嘅事物，我想請你去當時嘅時代去感受一下……似乎作惡嘅，從來唔係乜嘢資本主義或者共產主義本身，作惡嘅係人本身。

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百三十八回）

旅順圍攻戰由1904年8月19號開打，到1905年1月1日結束，歷時四個半月。日本陸軍傾盡全力進攻旅順港，日本以巨大傷亡取得勝利，旅順港俄國守軍最終投降，俄國第一太平洋艦隊喪失戰鬥力，呢一戰成為日俄戰爭嘅轉捩點，從1905年開始，日本已經取得全面優勢，全盤勝利只係時間問題。（波羅的海艦隊仲未到啊，陰公……）

旅順圍攻戰中，有一場可歌可泣嘅戰事，就係203高地爭奪戰。203高地係旅順港要塞旁邊一座小山，高203米，登上山頂可以飽覽整個旅順海軍基地，為咗佔領呢塊高地，再響上面部署炮火轟炸旅順軍港，日本陸軍不惜巨大人命損失，強攻高地，俄軍亦知道高地嘅戰略重要性，所以寸步不移，死守不退，雙方為咗爭奪呢個203小山丘，發生吐一場殘酷嘅「人肉vs鋼鐵」大血戰。

日軍有勇無謀嘅「肉彈敢死隊」就響依一戰響晒朵，1904年11月乃木希典（1849-1912）總指揮組織敢死隊發動第三輪旅順總攻擊，3100個敢死隊員，胸前纏上交叉白布，取名「白襷決死隊」，以身體作武器，所以叫「肉彈」，用血肉之軀自殺方式衝擊俄軍高地上嘅機關槍、榴彈炮防線，用人肉拚子彈，結果死傷慘重，肉彈敢死隊行動亦以失敗告終。

僅僅五日時間，日本陸軍第七師團就由15000人變成1000人，屍橫遍野，戰鬥嘅慘烈程度震驚全世界。乃木司令被炒魷，由滿州軍總參謀長兒玉源太郎（1852-1906）接替，兒玉源太郎重新佈署28厘米口徑榴彈炮掩護陸軍進攻，終於響12月5號日軍以慘重代價佔領203高地，之後一個月，日軍喺高地上設置巨炮，不斷向旅順灣內嘅俄國戰艦實施炮擊，最後終於摧毁咗俄國第一太平洋艦隊，俄守軍扯白旗，日本成功佔領旅順。

作戰勇猛、死守203高地俄國美男中將肯德拉切夫，日俄雙方均給予高度評價，日軍更為佢立碑紀念。203高地從此之後，亦取名為「爾靈山」，紀念肉彈敢死隊嘅勇武作戰行動。旅順戰役，日軍死亡人數16000人，傷44000人，俄軍戰死10000人，傷30000人，僅僅攻佔203高地作戰，日軍就死5000人，傷11000人，俄軍戰死5300人，傷12000人。上述呢堆數字，究竟內裡嘅意義係乜嘢呢？我真係唔知……

為憂國而殉國，的確係大和民族嘅血性精神。二次世界大戰佢哋延續呢個傳統，又有一支「神風突擊隊」，揸住三菱牌零式戰鬥機撞向美國太平洋艦隊戰艦，嚇死啲鬼佬，展現人類勇武之極限，真係可歌可泣。

但調返轉頭嚟睇，所謂敢死隊神風突擊隊，都係一班十、八九歲（甚至十五六歲）、教育水平不高嘅平民血性青年。我哋呢亭左膠就最痛恨呢啲事。統治階級推年青人上戰場，以佢哋嘅血肉換取帝國霸權擴張，最大利益最後都係歸於華族同資產階級，難聽啲，其實係叫「呃傻仔」。

日本到咗今時今日，半隻鷹派安倍晉三想重拾當年大和民族嘅勇武精神搞擴軍，可惜募兵工作非常困難，日本國民厭戰情緒高漲，個社會的確係聰明咗，大家開始睇通睇透事物嘅本質係啲乜嘢，平日嘅生活已經俾你班契弟剝削到生不如死，仲要同你上戰場打仗維護你嘅利益？屌……你唔通真係當我係傻仔？

#常威 #大清亡國關慈禧蛋牛治 #慈禧太后 #晚清歷史 #日俄戰爭

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關 #馬關條約 蛋牛治】

😚馬關條約天文數字嘅賠款事實上冇拖垮到大清帝國，甲午戰爭戰敗，最重要係表現咗清帝國幾十年來所做嘅洋務運動徹底失敗，有人話日本有明治維新，清帝國冇。但其實兩個國家嘅現代化步伐差唔多響1865左右同一時間開始，清帝國叫「洋務運動」，30年後，兩個國家嘅現代化最後變成一場「黃海海戰」去分高下，四個小時嘅驚天大海戰中，最後決定咗彼此嘅命運同去向。

🙃最近有朋友同我傾，割讓香港嘅《南京條約》同埋《北京條約》係由清帝國統治者愛新覺羅家族所簽下，而兩份條約嘅正本，現存於臺灣故宮博物院（不知資料是否有誤請指正），所以朋友唔明點解英國係同中華人民共和國去談判香港前途問題，而最後香港嘅主權係歸於中華人民共和國？要答呢個問題，其實好複雜，會牽涉一大堆國際法，我其實都唔識，但我知道世界上只有一個中國政權係被聯合國正式承認，1972年前係中華民國，1972年後就係中華人民共和國。而所謂中國政權就係清帝國嘅延續體，馬關條約賠款亦喺1911年中華民國成立後繼續繳付畀日本，亦都係相同道理。

🙄1972年，尼克遜訪問中國，同周恩來握手一刻，世界嘅格局從此大變，同一年尼克遜取消金本位，從此以後世界貨幣利用國家信用去backup，其實兩者息息相關。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳http://yt1.piee.pw/EVKDE

🍟https://youtu.be/CCuLusKmPb0

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

個社會的確係聰明咗，大家開始睇通睇透事物嘅本質係啲乜嘢，平日嘅生活已經俾你班契弟剝削到生不如死，仲要同你上戰場打仗維護你嘅利益？屌……你唔通真係當我係傻仔？

非常認同！