大清亡國關慈禧蛋牛治

【常威近代史】（一百九十八回）
袁世凱平反系列

1898年戊戌政變發生後，政局大洗牌。慈禧太后親信榮祿被擢升成為北洋大臣兼直隸總督，集軍政大權於一身，袁世凱亦同時成為豆斗同榮祿嘅親信。政治嘅嘢，最緊要排啱隊；搵食世界，最緊要跟啱老細。榮祿為咗答謝袁世凱幫拖唔支持新黨造反，送多2000人畀天津小站嘅袁世凱，呢個時候袁世凱手下嘅軍隊，擁有作戰能力嘅洋化士兵已經超過10000人，成爲咗大清國內一股重要嘅軍事力量。

去到1898年底，袁世凱已經飛黃騰達，正式成為政治核心嘅人，再唔喺核心以外。呢個時候，清帝國重整京畿駐軍系統，將各支唔同派系嘅軍隊整頓成為一支防守北京嘅「武衛軍」，由榮碌一手包辦，真正嘅政治目的，就係要將李鴻章留低嘅淮軍系統徹底粉碎，改朝換代，而袁世凱天津小站編練嘅新建陸軍，亦成為武衛軍系統中嘅「武衛右軍」。

但係呢支榮祿新編保衛首都嘅武衛軍，軍隊嘅質素並唔理想，1898年英國海軍少將貝斯福訪問中國，就有以下嘅睇法，「按照西方標準，袁世凱的部隊是大清帝國唯一裝備齊全的軍隊。此外，他在中國軍隊中發現許多領導很差的事例，多數情況是糧餉不足，除少數例外，全部缺乏紀律和訓練。」、「中國的軍隊領導弱，號令不統一，武器不劃一，缺乏有效率的後方勤務系統，物資保管馬虎……除了這些不健全之處以外，還要加上久已令人不滿的貪污、徇私、吃空額和餉銀過薄。」（註）

所以除咗袁世凱嘅軍隊，其他嘅大清陸軍都係處於「屎」嘅狀態，由呢件事大家就可以睇到，袁世凱真係有料到。亦可以反映出，袁世凱本人並唔太貪腐。如果佢係一個貪腐人物，亦冇可能練出一支勁旅。當然任何嘢都係相對，袁世凱只係相對於當時大清官吏嚟講唔算太貪腐；放響今日香港，佢當然要比ICAC查去北角飲咖啡；但如果又將佢放響今日嘅中國內地，佢又算係一個清官喎。

好！講咗咁耐，又話袁世凱之新建陸軍點勁點威，依支軍隊終於要出手鳥！

1899年，山東地區爆發義和團之亂，中共官方稱之為「義和團反帝國主義愛國運動」，凡事睇你點演繹嘅啫。山東巡撫毓賢鎮壓不力，清政府撤換咗佢，並且點名袁世凱率領武右衛軍前往山東鎮壓義和團。1899年3月，袁世凱由天津嚟到山東，大力鎮壓義和團，取得空前成功。由此證明，中國人練嘅軍隊，最大嘅用途就係鎮壓番中國人（如果大家有個心理錯覺，覺得軍隊本身係愛嚟對付外敵入侵嘅話，咁你就大錯特錯，其實世界上任何一個國家嘅軍隊，主要係維持國內政權嘅穩定性，鎮壓自己人基本上係一個國家嘅軍隊最重要嘅頭號任務，沒有之一），1899年年底，清帝國任命袁世凱處理山東巡撫事務，實際上，槍桿子出政權，山東省已經完全被袁世凱控制。

一個人點解叫做阿叻呢？就係好似袁世凱，一邊完成上頭委派嘅任務，一面擴大自己嘅實力（一面抗日，一面壯大）。響山東省鎮壓義和團，袁世凱更加積極擴充佢嘅軍隊，一方面吸納山東原有嘅殘兵，另一方面招攬新人加入黑社會，佢響山東濟南建立大營，繼續練兵，到咗1990年6月底，袁世凱手上面嘅兵力已經超過原來新建陸軍嘅兩倍以上，多達20000人！

阿叻就係阿叻，袁世凱最叻嘅地方唔喺呢度。1900年5月，八國聯軍登陸大沽口，進入華北地帶，矛頭直指北京！目的係拯救喺北京城內畀義和團圍攻緊嘅同胞。呢個時候，部份義和團已經被北京班愛國仇夷仆街收編，同清國陸軍血戰緊八國聯軍。守響山東嘅袁世凱，亦接到頂頭上司榮祿order，要佢全力出兵對付八國聯軍，防守北京！

袁世凱會點揀？阿叻會點做？下次話你知。

註：《1895-1912年中國軍事力量的興起》，拉爾夫．鮑威爾著，陳霞飛譯，中華書局，1978年，頁62

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【120回：大清亡國關 #義和團 蛋牛治】

😚中國嘅問題，其實可以歸結做人口嘅問題。因為人口太多，如果唔可以解決就業問題，人民食唔飽，就會有民變發生。發生喺19世紀中葉嘅太平天國之亂，死2500萬人，其實就係貧窮問題嘅反映。20世紀初，義和團暴亂，其實都係窮人作反。細讀歷史，就會一清二楚，革命通常並唔係解決意識形態嘅問題，大部分革命都係為咗解決溫飽嘅問題。

😜20世紀初期，中國人口大約有4億，呢個數字去到中華人民共和國1949年建立之前維持不變。真正嘅人口大爆發，發生喺中共建國之後，1953年人口普查，中國人口是6億，去到1982年第三次人口普查，人口已經到達10億，30年內脹咗4億。其實依一個增幅係人類歷史上最大同最罕見嘅；去到2000年第五次人口普查，中國人口數字係12億5000萬，2010年第六次人口普查，人口數字係13億7000萬。但係照外界估算，13億7000萬呢個數字係中國人口嘅巔峰，之後嘅日子，因為90年代嘅計劃生育人口政策會大幅下降，目前中國嘅人口出生率係全世界最低。但係可以想像，未來嘅二三十年，中國要面對人口老化嘅巨大問題，呢個問題唔係一個普通嘅問題。

😳其實20世紀五六七十年代啲人口大爆發，即所謂戰後嬰兒潮，並唔係單單中國嘅問題，去到21世紀，其實全世界好多國家都要面對人口老化嘅問題，香港都一樣，當成個社會冇生產力嘅老人數目佔大多數嘅時候，其實係一件好可怕嘅事情。香港的未來二三十年，就要面對呢個問題。現在日本面對緊，你睇吓幾大鑊……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！打埋開口牌，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！

🍳http://yt1.piee.pw/G372X

🍳https://youtu.be/SVOTGTbcmaU

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

推一推

推

推👍🏻

【121回：大清亡國關 #八奇 蛋牛治】

😚陳果嘅《火鳳燎原》係我最喜歡嘅香港漫畫，漫畫裡面有八個軍師，叫做八奇。八奇嘅思考方法都係超越凡人，佢哋能夠用凡人冇辦法接觸到嘅角度去睇事物，從而做到運籌帷幄，處處領先。響現今世界裡面，似乎真係存在住呢一類人物，佢哋能夠脫離普羅大眾嘅眼光去觀察事物，睇穿世界嘅真象，知道世界嘅真正遊戲規則係乜嘢。當然，佢哋能否發達？又係另一回事。

😃佔中案宣判，戴庭耀入獄，香港踏入全新階段。響未來，政治檢控會否成為常態？我諗都好大機會。香港作為一個自由嘅城市，亦都會成為過去式。未來會變成點？冇人會知。聽日嘅恒生指數升定跌？亦都冇人可以肯定。對於未來，容許我引用我偶像磁力王霍布斯邦嘅說話去講，佢咁講，對於未來，佢並唔知道會變成點？但係可以肯定一句，「歷史將會朝住更差嘅方向發展」。電影《星際啟示錄》亦都提過一條「梅菲定理」（Murphy's Law），具體內容係話「任何可能會出錯嘅嘢，都會出錯」。

😃香港早已經出錯，97年前我哋設想嘅最壞情況亦都相繼出現，其實一啲都唔需要覺得奇怪。對事物抱住美好嘅願景，只係人間嘅一廂情願。現實始終係現實，森林法則，係弱肉強食，我哋可以做到嘅，有時候只係可以保護自己。淪為禽獸，當然非人所願，但係活喺一個四周圍都係禽獸嘅森林裡面，唔成為禽獸，就只會成為禽獸嘅食物……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！打埋開口牌，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！

🍳https://user35103.pics.ee/GN7BB

🍳https://youtu.be/0ZV1A8SPz3A

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

閪得就閪

推

【122回：大清亡國關 #髮型 蛋牛治】

😄究竟有冇劣質遺傳基因？後天嘅力量係咪一定唔能夠戰勝先天？我哋中國人嘅基因真係有問題？我唔敢講。但我自己認為有。上一個世紀，20世紀，實在有太多太荒謬嘅事情發生喺中國裡面，多到你講都講唔曬，發生響20世紀第一年嘅義和團，其實只係成場瘋狂話劇嘅序幕……

😃但係可能問題唔係出喺「中國人」三個字上面，而係出喺「群衆」兩個字上面。1895年，法國心理學家勒龐寫一本好重要嘅書，叫《烏合之眾：大眾心理研究》 。書裡面提出一個論點，就係當一個人獨處嘅時候，佢可以係文明嘅理性嘅。但係當一群人聚集一齊行動嘅時候，即所謂群眾。個體就會變成「衝動、易怒、缺乏理性、缺乏批判精神的判斷力、對情感的過度誇張」。勒龐佢仲咁樣講：

😍「一個人沉浸在群體中一段時間後很快會發現自己---要麼是由於群體仿佛有磁性的影響，集體的心理暗示造成我們是無知的，在一個特殊的狀態下，很像一種類似於迷戀的狀態，被催眠的個體發現自己在催眠者的手中。」

🙄於是乎，一種集體嘅催眠現象喺群衆中出現，群眾就會變成一群烏合之眾，變成暴民，做出一啲非理性嘅事情。當然勒龐嘅講法唔適合用於21世紀，21世紀喺世界上一個好文明好文明嘅地方，有一班人，聚集埋一齊對抗強權，一直落嚟和平理性非暴力。到最後運動失敗，領頭者同參與者被政治檢控，要坐政治監。乜嘢先係暴力？大家要睇得一清二楚。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！打埋開口牌，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！

🍳https://youtu.be/2kzK3VDj3qc

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】（二百零一回）
袁世凱平反系列

要睇一個人係唔係好人？要睇佢點樣對朋友，一個對朋友好嘅人，有義氣嘅人，衰極有個譜。

袁世凱有個好朋友，叫徐世昌（1855-1939）。徐世昌一生人都算係叱吒風雲，全因為佢識咗個好朋友叫袁世凱。徐世昌係一個窮人，自幼喪父，1877年認識咗袁世凱，兩個人就結義金蘭，成為咗生死與共嘅朋友，有人話佢哋係Gay，男人行埋少少就係Gay，只係我哋呢一代人嘅on 9想法。

袁世凱知道徐世昌冇錢上京考試，於是醒咗100兩銀畀佢做旅費，折算港紙三皮幾嘢（應該更多），咁嘅朋友去邊度搵？於是佢兩兄弟一齊上京考試，袁世凱就肥佬，徐世昌就一嘢考中舉人，之後考中埋進士，授翰林院庶起士，三年後授編修。兩榜正途出身嘅徐世昌，之後響北京做皇室學術工作，悶X到發慌。不學無術嘅袁世凱就棄文從武，去朝鮮走咗轉，飛黃騰達，撈咗個「練兵大師」個朵番嚟；做人嘅嘢，讀書叻未必一定有用，就係咁解。

今日香港，好多人好注重學歷，其實學位嘅嘢，人有我有啫。最後都要自己有食力或者老竇有錢。讀咗個三大大學學位可以發達嘅年代已經過去，毛澤東講嘅，讀書讀得多會讀壞腦。唔係有心從事學術研究嘅朋友，千祈咪撚讀咁多書。

1895年，袁世凱小站練兵，徐世昌就雞咁腳加入成為佢嘅幕僚。當時徐世昌咁做，響士大夫階層嘅角度，係自貶身價。但係徐世昌決定攞自己後半生做賭注，輔助好朋友袁世凱打江山。而袁世凱亦好睇自己嘅兄弟，畀咗個參謀營務處總辦佢做，徐世昌成為袁世凱嘅左右手，喺北洋系統裡面，地位僅次袁世凱。兄弟？咁就叫兄弟！做兄弟嘅嘢，一定要帶摯吓對方，好兄弟要勤交收，要有福同享有難同當。唔係淨係一齊吹水一齊跳舞，有好嘢自己收埋，呢啲唔係叫兄弟，叫豬朋狗友。

1901年後，大清新政上馬，好需要人才，響袁世凱推薦下，徐世昌做過巡警部尚書同郵傳部尚書，最後入值軍機處，成為政治核心人物。1905年日俄戰爭結束後，清帝國係關外設置行省，徐世昌以軍機大臣身份出任第一任東三省總督，論官位，仲響當時袁世凱之上，徐世昌在任東三省總督期間，為東三省現代化事業打下深厚基礎，兩兄弟拍住上，真正飛黃騰達。

到咗1908年慈禧死後，攝政王載灃玩權力鬥爭罷黜袁世凱，徐世昌亦被燉冬菇燉返做郵傳部上書；但佢冇所謂，一於置身事外，等袁世凱再彈起。後來袁世凱復出，佢就做返袁世凱左右手出任軍諮大臣。徐世昌做人處世非常圓滑，當時佢有個綽號，叫「水晶狐狸」。佢係袁世凱嘅自己人，但係清室亦都對佢信任有加，佢做人亦都好有原則。1911年辛亥革命後，民國初期袁世凱同國民黨合作嘅時候，徐世昌堅決不出山，就係唔願意同清帝國朝廷最直接嘅敵人（革命黨人國民黨人）合作。

直到二次革命失敗，國民黨人退場，徐世昌先肯出山接受國務卿總理職務。後嚟袁世凱臨老有柏金遜症想稱帝，徐世昌亦都曾經勸過袁世凱唔好咁做，可惜命運勝過情義，袁世凱嘅最好朋友徐世昌，始終冇辦法阻止袁世凱最後臨老跣腳、遺臭萬年……袁世凱死後，徐世昌仲做埋國民政府嘅大總統。而徐世昌之後嘅故事，我哋之後有機會再講。

但係，從袁世凱同徐世昌40年嘅交情裡面，我哋可以睇到，袁世凱佢係點樣對朋友同身邊嘅人。可以講一句，冇袁世凱就冇徐世昌。袁世凱嘅性格亦都可以從呢件事睇得一清二楚。再抹黑袁世凱係仆街嘅人，唔該自己睇睇。做人要重情重義好難，玩政治要有情有義仲難，袁世凱某程度上做得到，我有陣時覺得，或者就係袁世凱比較好人，所以當時人後世人都唔驚抹黑佢。你睇吓毛澤東，當代人後世人都冇人敢搞佢，典解？唔係因為佢係一個好人，而係因為佢係一個魔鬼天生殺人狂。understand？

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

推

【常威近代史】（二百零二回）
袁世凱平反系列

做生意最好做獨市生意，1902年辛丑條約簽訂後，成個清帝國北方軍事，袁世凱一個人玩曬，加上佢當時已經成為清政府炙手可熱嘅軍事強人同埋慈禧太后嘅自己友，真係任佢點玩都得。

同埋八國聯軍入京，全清國人都睇到，清國真係要有番一支現代化武裝力量守衛大門口。袁世凱食住個勢，進一步擴展自己嘅力量。1902年到1904年，袁世凱推行咗「北洋常備軍」建設，由佢手上嗰支「武衛右軍」編制開始，繼續發大嚟搞。

袁世凱正式接任直隸總督兼北洋大臣後，立刻起草軍制改革建議。佢知道要將全國各省各有各搞唔一樣嘅軍制、兵器、組織統一起嚟，必須建立一個全新嘅軍隊組織。「北洋常備軍」嘅構思，就係去參考各國兵制而制定，強調喺軍隊組織之內設立常備軍、續備軍、後備軍；同時成立糧響局、軍械局、軍醫局、軍樂隊等後勤機構。袁世凱又將主力部隊，即常備軍分為左右兩鎮，各鎮步兵33營、陸路炮隊2營、過小炮對隊1營、馬隊4營、工程隊1營、輜重隊1營，合計19120名人員組成。呢個時候，袁世凱擁有嘅兵力，已經由原本響山東離開時候嘅二萬人，暴增多一倍。

1902年6月，袁世凱建議設立一個全新嘅專門機構負責全帝國軍事建設，即係「軍政司」，而「軍政司」督辦，即係大佬，梗係由袁世凱本人兼任，而軍政司裡面所有嘅重要職位，亦都係袁世凱自己人做。呢班人就係袁世凱自天津小站練兵以嚟嘅親信，長期嘅合作關係，已經令呢班人同袁世凱建立咗一個利益共同體，其中段祺瑞（1865-1936）、馮國璋（1859-1919）同王士珍（1861-1930）就係代表人物，被稱為「北洋三傑」。

呢啲人嘅大名，大家都聽過。我之前講過，做人最緊要跟啱老細，袁世凱跟正個好老細榮祿彈起，而上述嘅人，亦跟啱袁世凱呢個好老細，結果之後彈到上宇宙！（千祈唔好唔記得仲有個徐世昌）

北洋系統，呢個時候正式成形！

響1902年到1905年，短短三年間，袁世凱嘅北洋常備軍系統，由一支軍隊，編操擴充至六支，即所謂「北洋六鎮」，軍隊人數亦由原本小站練兵嘅二萬人，增加到接近十萬人。

整個北方，軍事力量由袁世凱同其親信完全操縱響手。北洋六鎮之中，除咗駐守北京外圍嘅「京旗（經期）常備軍」一鎮內裡有八旗子弟、滿清王朝可以有部分話事權外；其餘五鎮，實權都係操縱響袁世凱手上。亦可以大膽講句，北洋六鎮軍隊其實效忠嘅人並唔係清帝國政府，而係袁世凱本人。

其時，袁世凱積極配合慈禧新政推行，大清帝國同軍隊全面現代化。我講過，袁世凱係一個忠誠嘅人，佢雖然擁有咁X強大嘅軍事力量，但係佢從來冇諗過奪權或發動軍事政變，反而一心一意輔助慈禧重建大清。可惜你係咁樣諗，人哋並唔係咁X樣諗。袁世凱嘅勢力日益坐大嘅時候，滿清王朝班仆街，亦開始唔9妥佢……其實你睇返袁世凱成世人，好多時候都係躺著也中槍，好九慘。

政治世界，冇永遠嘅盟友，亦無永遠嘅敵人。所以玩政治，人類會變成毫無人性可言，因為黑白不分，是非不分。我欣賞袁世凱嘅地方，就係佢嘅有情有義，又要玩政治，仲要玩軍事，仲要玩到有情有義，袁世凱有幾高？世貿中心咁撚高囉……但係又或者可能太高，高到成為咗架飛機撞擊嘅目標囉……



【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【123回：大清亡國關 #中華民族 蛋牛治】

😄有睇開我條頻道嘅朋友都知道，我好早已經提過，中華民族呢個概念，只係非常近代嘅產物。大概出現喺20世紀初期，發明人係梁啟超同埋章太炎。「中華民族」四個字出現，成為咗辛亥革命成功嘅必要條件。因為響之前，人民生活係清帝國裡面，就係清帝國留條辮嘅子民，忽然有人同佢哋講，佢哋叫中華民族（唔使留辮），而中華民族同清帝國子民係一組互相矛盾嘅概念，兩者勢不兩立，前者必須推翻後者，中華民國必須要取代清帝國。呢個其實係一個意識形態嘅遊戲，革命需要口實，動員要有口號。而響當時，「中華民族」就成為革命嘅口實同口號。

😜「中華民族」20世紀出現嘅時候，其實只係包括中原漢族人。孫文嘅革命口號，仲有「驅除韃虜，恢復中華」。內裏嘅「中華」，其實就係大漢族本位主義。但係中華民國成立之後，中華民族概念嘅內容顯然有所改變，中華民族所包含嘅並唔係祇有漢族。仲包括漢、滿、蒙、回、藏，即後來所謂的「五族共和」。滿洲人，前清帝國統治者，明明由一開始唔係包含喺中華民國概念裡面，係中華民族嘅敵人，但唔知點解，忽然又變成中華民族嘅一員？當然蔣介石一定要咁做，否則滿洲人自己勾結日本人搞滿洲國就係非常合理，就係因為滿洲人係中華民族成員之一，所以嗰個「滿洲國」先可以被稱呼為「偽滿洲國」。講到尾，又係大一統。

🤔意識形態嘅嘢，真係高深莫測。其實中華民族呢個概念，其內容係隨住時代同埋政權嘅需要而不斷轉換同偷換。到咗今日，「中華民族」又變成咗「中國人」，因為用「中華民族」，好容易就會聯想起臺灣嘅中華民國政權。而「中國人」呢個概念，就係包含臺灣在內。講到尾，又係大一統。


♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/irIdFwqsacg

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】（二百零三回）
袁世凱平反系列

由19世紀開始，清國軍隊打親仗都輸（對外），原因就係無軍紀，一盤散沙亂柒咁嚟。袁世凱一手將軍紀依樣嘢帶畀中國人。吓？打仗要紀律嘅咩？唔係有槍在手識殺人就得嘅咩？

袁世凱由1895年小站練兵開始，一直將現代化軍隊觀念注入清帝國，1902年佢成為大清「軍政司」，進一步大力整頓全國陸軍，簡單啲講就係要統一化，唔可以你有你搞我有我搞，我鍾意點搞就點搞你鍾意點搞就點搞，咁樣最後係唔撚使搞。

提高士兵質素係最重要嘅問題，大家都清楚，去得當兵嘅人都唔會係好人，「好仔唔當差」，要搵條命去搏，梗係有理由。袁世凱好明白呢一點，所以軍紀非常重要。其次係統一軍階，統一薪水。1904年，兵部制定《陸軍隊員任職等級補官體制章程》，規定陸軍官佐為三等九級，而各級軍官嘅薪水亦有明確嘅規定。做個兵仔，一個月就有四兩五錢白銀薪水（折算港紙1300蚊），都算唔錯，當時嚟講係中產階級。

統一軍階同薪水後，就要統一武器裝備，唔能夠你用槍打仗我仲用緊大刀，所以軍隊所用嘅槍械、大炮都有嚴格規定，唔可以亂柒咁嚟。除此以外亦喺全國建立軍事學堂，等人可以正經讀書成為正式軍人。

1905年，袁世凱嘅軍事班底「北洋六鎮」成型，袁世凱身兼八大臣職務，即是參與政務大臣、會辦練兵事務大臣、辦理京旅練兵大臣、督辦山海關內外鐵路大臣、督辦津鎮鐵路大臣、督辦京漢鐵路大臣、會議商約大神。（註）哇！仲未計佢本身已經係直隸總督兼北洋大臣。能者多勞，身兼多職，除咗玩陸軍，仲玩埋鐵路，豬籠入水就一定架啦。當時已經有人上書慈禧彈劾佢，勢力太大，除咗軍隊，袁世凱仲不斷擺自己人落政府每一個部門，短短幾年間，佢嘅勢力仲猛過之前嘅李鴻章，袁世凱有幾叻？就好似陳百祥咁叻！

1905年，袁世凱擁有嘅「北洋六鎮」軍隊人數接近90000人。你老母，要推翻你清朝，建立個軍政府，我諗仲易過上FB呃like。當時，袁世凱心目中，仲有一個編練全國新軍36鎮嘅大計，但係呢個計畫需要時間太長，軍費亦都太過巨大。照計畫嘅預算賽，要全清帝國統一建立36鎮強大軍隊，每年嘅軍費開支大約5400萬兩，當時清帝國每年嘅總收入都只不過係9000萬兩左右（仲要還外債同戰爭賠款），睇數字就知冇得搞。結果全國新軍36鎮嘅大計，未捱到1911年辛亥革命，就宣佈破產。

單就北洋六鎮每年嘅軍費開銷，就高達900萬兩白銀。呢個數，亦都係當時清政府能夠搦出嘅最大數目，但冇辦法，北洋六鎮保衛北京，你吹佢唔漲，唔要兵丫笨……六鎮編成後，1905年9月，清帝國響直隸河間縣舉行咗一次會操，即係軍事演習。依次軍演係中國軍事歷史上一次重要事件，主理人係袁世凱同當時嘅兵部尚書鐵良（1863-1938）。

下次，睇睇呢次中國軍事史上，第一次正式國際化軍事演習，有幾咁巴閉同幾咁勇武。

註：《袁世凱奏議（下）》，天津古籍出版社，1987，頁1418

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【124回：大清亡國關 #東南互補 蛋牛治】

😄發生響1900年嘅東南互保，其實即係國家分裂，中國南北之爭，一直都係中國每個政權基本嘅政治格局。清帝國自從太平天國事件後，南方士大夫軍紳格局形成，實際上已經脫離咗北方北京政府的實際統治好耐，加上自由城邦上海嘅出現，喺經濟貿易上更加遠遠拋離北方。清帝國政權名義上擁有成個中國嘅統治權，但係19世紀中葉以後，其實政權嘅實際影響範圍，只有北京直隸華北平原一帶。

😁所以，今集豆斗向全國人發出殺盡國內洋人嘅聖旨，其實佢自己心知肚明作用唔大，我真心覺得佢發出呢度命令，係想畀機會南方封疆大吏玩東南互保，將南北局勢徹底分開處理。政治唔會咁簡單，尤其是獨裁專制社會嘅政治結構，更加會係深不可測。因為大家都唔會將真正嘅政治動機講出嚟，要用其他語言包裝。今日嘅中國，今日嘅香港，其實都係一樣。

🤔中華大地，以長江劃界，長江以南就係南方，長江以北就係北方。南方人同北方人，血系文化不同源，語言同生活習慣都不同，其實係兩個分別好大嘅族群，無論邊邊當權，一定會抑壓另一邊嘅權力。南北之爭，一直存在，王家衛套【一代宗師】就講得好清楚。現今中國，其實喺來自北方嘅政權，所以現在中共政治核心裡面，仍然以北方人為主。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/bjc_0iRh90M

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

Push

【常威近代史】（二百零四回）
袁世凱平反系列

軍事演習，古往今來有兩個作用。第一向外界宣示國威，話畀你聽我有幾咁巴撚閉；第二向國內民眾展示武力，邊個想作反就隊鳩邊個。

1905年10月嘅河間會操，喺中國第一次大型現代化軍事演習，冠蓋雲集，仲有好多外國記者採訪。演習嘅主角係袁世凱控制嘅北洋六鎮軍隊，演習由10月21號開始，到28日結束舉行閱兵儀式，為期7日，總計參與演習嘅官兵46000人，馬匹5800匹，車輛1500架，戰線總長度20公里。歷史記載：

「此次回操非第以整步伐、演技擊、肆威容、壯觀瞻而已；蓋欲以飾戒備、嫻戰術，增長將士之識力，發揮軍人之精神，熟悉於進退攻守之方，神明於操縱變化之用…此一役也，仿列邦之成規，創中國所未有…積健為雄，以暢皇威，而展張國力。」（註）

一年之後，1906年，再搞多次《彰德會操》，仍然由袁世凱同兵部尚書鐵良揸旗，參觀嘅外國人，有英國、美國、日本、俄國、法國、德國、意大利、奧地利同比利時軍官，仲有大量外國記者採訪，兩次清國大型陸軍演習，上曬國際頭條。依兩次演習，亦都係慈禧1902年開始新政後嘅具體表現，亦話俾全世界知，清帝國已經喺辛丑條約後，從廢墟中企返起身，正式以一個現代化國家嘅身份融入國際大舞臺。依一段時間，係大清帝國迴光返照期，講多次唔怕厭，畀多慈禧幾年命，個世界絕對會唔同咗。

同時間，慈禧亦開始部署清帝國君主立憲時間表。（有性趣嘅朋友可以睇返之前嘅帖，我已經講過）。袁世凱建立北洋六鎮，經過兩次大型軍事演習，權勢之重，可以同操縱整個南方政局嘅張之洞相提並論。講開又講，陰陽兩面嘅張之洞，後世人又話佢係忠臣，袁世凱係奸臣，其實睇返兩個人做嘅嘢，又係調X轉咗。張之洞最叻嘅就係不斷製造自己嘅儒吏清流形象，寫吓文章撚吓詩，製造一塊咩咩羊皮披上自己豺狼身上，講cap水，講擦鞋，袁世凱邊係佢果皮？慳D啦。

不過話時話，李鴻章、曾國藩、張之洞、劉坤一依亭西人，所謂晚清四大名臣「撚人」，其實全部都好識搞形象工程，清帝國嘅仆街，依班儒家哲學發燒友西人難辭其咎，成日話係佢哋頂住大清帝國，我就話就係呢班撚樣不斷出賣大清帝國嘅利益，先搞到大清最後亡党亡国。今時今日佢哋嗰套做官模式，俾後世西人不斷模仿，表面乾淨，內裡汙糟邋遢。形象貪污第一，實力政績包尾。某前朝大官次次出鏡著同一對破舊嘅New Balance，就係玩形象囉，佢同佢家族成員加埋嘅身家，買起晒New Balance、Nike同Adidas都得喇。

袁世凱同首席軍機大臣慶親王奕劻（1838-1917）一黨，當年軍隊袁世凱玩曬，警察佢都玩埋。當時全清帝國開始設立警察制度，袁世凱就推薦佢老死徐世昌、趙秉鈞任尚書侍郎。控制咗軍隊，控制埋警察，咁仲唔係玩曬？不過，個世界邊有咁簡單？班滿清權貴睇見袁世凱不斷坐大，知道一定要抑壓佢嘅權勢（馬基維利主義者豆斗一定會咁諗囉）。1906年11月6日，《彰德會操》完畢後，由軍機大臣瞿鴻機（1850-1918）提出，將北洋六鎮新軍嘅統率權收歸中央。杯酒釋兵權，自古如是，今日都如是。因為邊個有兵喺手，就係一個政權最危險嘅敵人。

提一提你，瞿鴻機係漢人，亦係湖南人。

註：《練兵大臣袁世凱為陳校閱陸軍會操情形時奏折》，中國第一歷史檔案館藏軍機外檔，見《中國近代史資料叢刊，北洋軍閥（一）》，來新廈主編，上海人民出版社，1988，P564-569

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【125回：大清亡國關 #東交民巷 蛋牛治】

😄1900年進入20世紀，人類邁向一個真正嘅文明時代，但係最唔文明最野蠻嘅事卻喺中國裡面發生。大清帝國下聖旨要求全國人民殺盡洋人，保家衛國。件事本身已經好奇怪，我常公仔亦都用咗好多篇幅分析過點解慈禧太后會咁樣做？總之當時北京城裡面嘅幾千個外國人，就聚集咗喺東交民巷使館區一帶保命。使館區已經成為一座孤島，外邊有清兵嘅正規部隊，亦有幾萬人嘅義和團圍攻，老實講，如果真係要屠殺洋人，使館區一個洋人都唔會有機會留低。

😄唔少外國人後來都寫回憶錄記載這件事，中譯本好似冇出版過，我未睇過，所以具體情況對我嚟講仍然未完全清楚。我淨係知道清兵同埋義和團都冇諗住真係殺曬使館區嘅洋人，由頭到尾都係戲一場。有人要做戲俾滅夷派仇洋派睇，有人亦都知道，如果真係殺曬民巷裡面嘅洋人，之後大清帝國一定會畀外國軍隊夷為平地。多方面條件配合下，先至產生咗「東交民巷保衛戰」依一件咁荒謬嘅事情。

😃呢件事亦都反映出中國人嘅一貫做事方式，即係所謂講一套，做一套。表面上殺洋人，實際上救洋人。表面上玩高科技，實際上係玩上市；表面上係做善事，實際上係想逃稅；表面上係個大明星，實際上係個炒家；表面上係一個領導人；實際上係一條狗。陰陽兩面，左右逢源，表裡不一。由細到大，我自己本人非常唔欣賞中國人依種性格。人生存喺個世界上，只有短短幾十年，鏡花水月嘅人生應該要活出真我。凡是鬼鬼鼠鼠，藏頭露尾，為咗自身利益戴住假面具做成世人，究竟為咗啲乜？唔通中國人真係除咗錢同利益，冇嘢想得到？我唔知道。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/oXGBvmVfbyI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】（二百零五回）
袁世凱平反系列

好事多磨，係時候要搞袁世凱，鬼叫你膨脹到咁大呀？1906年，大清帝國開始咗君主立憲嘅步伐，1906月11月6號，清政府宣佈中央官制改革（詳見一百七十六回），將兵部、練兵處同太僕寺為一，設立陸軍部，負責全國練兵事宜。陸軍部遊奕劻揸Fit，鐵良任尚書。依一次係清帝國以中樞機構對舊軍制嘅一次改革，亦都係對袁世凱權勢嘅一次重要打擊。

陸軍部裡面再無袁世凱個名，袁世凱亦都失去北洋六鎮嘅軍事指揮權，同時佢被調入中央，再唔做直隸總督兼北洋大臣，之前講過八大臣嘅重要職務亦都辭去，改任外務部尚書，軍機大臣。你老味啊，昇職加薪呀家陣！但袁世凱明知領嘢，佢要求過豆斗收回成命，但豆斗冇理佢，佢只有同張之洞一樣，焗去北京焗做軍機大臣。附帶一提，繼任袁世凱做直隸總督北洋大臣嘅人楊士驤（1860-1909），仍然係袁世凱嘅人。

屌你返中央，畀個大官你做，呢一招叫做明昇暗降。中國歷史上做得最靚嘅人叫毛澤東，1949年打完國共內戰，各方軍閥就被毛澤東召返中央，封你做十大元帥（註），封你做人大委員長、政協主席副主席有乜所謂？最緊要抽起你嘅兵權，咁你就冇兵作反。

杯酒釋兵權。其實當時都唔係個個肯返中央，好似親蘇嘅高崗（1905-1954）、饒漱石（1903-1975），就曾經想長駐東北，持住有史太林喺背後撐腰，想同北京中央分庭抗儷，但係毛澤東堅持調佢哋返嚟，所謂「五馬進京」，調高崗、饒漱石、鄧子恢、鄧小平、習仲勛等地方軍政第一要員進北京，呢五隻馬真係非同小可，裡面有我哋嘅總設計師鄧小平，亦有我哋當今皇上嘅親生老豆習仲勛。高崗同饒漱石被調返北京，之後亦都難逃清算嘅命運，鬼叫第一次叫你返嚟你唔肯啊？結果高崗同饒漱石被打成反黨反革命，一個服用大量安眠藥自殺，一個被囚禁到1975年死為止。（順帶一提，之後習仲勳都被清算過…但係佢同鄧小平係生死好兄弟，鄧小平彈起，佢就一齊彈起，用今日嘅最新講法，開放改革仲係佢教鄧小平嘅添。）

之後中共處理軍隊嘅方法，亦都以唔X畀山頭主義建立為重心，各個軍區總司令定期調嚟調去，見你喺軍隊坐大就叫你返中央做文職，陸軍調海軍，海軍調空軍，總之調到你頭暈，唔畀你坐喺個位度坐成世同建立自己嘅班底。依一招玩到今時今日。槍聽命於黨，整個中國人民解放軍只係聽命於軍委會主席一人，而沒有例外情況，軍委會主席就係中國共產黨最高領導人，黨政軍合一就係咁解。

1906年慈禧同班滿滿權貴，以為調返袁世凱做軍機大臣，就可以消除佢喺軍隊嘅影響力（忽上腦），但係袁世凱點會係紙紮呢？自從1895年天津小站練兵開始，到1907年被調離北洋軍，前後12年時間，袁世凱早已響北洋軍中建立起一個巨大嘅自己友班底，所有北洋嘅高級軍官差唔多都係袁世凱嘅人，而且佢哋仲要大部份係漢人。袁先生建立嘅新軍，質素同之前嘅清兵淮軍八旗軍完全冇得比，北洋軍講求軍紀同組織性秩序，所謂軍隊嘅秩序，就係下級絕對服從上級，一層壓一層，而金字塔嘅頂端就係袁世凱一人。

佢雖然離開軍隊，但係史書上記載佢同北洋軍嘅軍官仍然關係密切，經常有書信來往，甚至圍威喂出嚟玩同見面。千萬亦唔好忘記，滿清最高統治階層類仲有隻「水晶狐狸」徐世昌，佢唔係袁世凱嘅人，佢係袁世凱一手提攜上位嘅好兄弟（Gay？）。

當時袁世凱嘅人脈已經遍佈整個大清統治階層每一個角落，邊個夠膽挑戰佢，邊個註定仆街！袁世凱乖乖聽話，只因為佢係個守信用、重情義嘅大人物，佢堅決效忠豆斗慈禧太后，慈禧就是魅力沒法擋。慈禧一日未死，婆樹仲未冧……

問吓大家個問題：A.你認為「香港特首」權力大啲？B.抑或「全國政協主席/副主席」權力大啲呢？

如果你答「B」，恭喜你，你完全唔熟悉中國國情，來生可以不做中國人。恭喜！恭喜！

註：中華人民共和國元帥依序為朱德、彭德懷、林彪、劉伯承、賀龍、陳毅、羅榮桓、徐向前、聶榮臻及葉劍英十人，是中華人民共和國建立後於1955年授予給在土地革命、抗日戰爭、第二次國共內戰中貢獻良多嘅十位中國共產黨軍事領導人嘅最高軍階。

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87