大清亡國關慈禧蛋牛治

【大清亡國關 #吹水 蛋牛治】

😜吹水唔抹嘴，差唔多係現代政治世界嘅基本玩法，選舉前，政客為咗得到選票，許下諾言，到選舉之後，一切煙消雲散。依種情況，香港亦都見唔少。政客都係一份工，高薪厚職，立法會議員月入接近十萬，計埋津貼，十幾廿萬，去邊度搵？為咗個位，為咗份糧繼續供樓，講吓大話，都無可厚非。

😍唔講大話嘅政客好少見，今日嘅美國總統特朗Donald Trump係其中一個，佢選舉前話要保障美國人嘅就業機會，振興經濟，打擊對手中國，要響墨西哥邊境起圍牆，防止非法入境者進入。呢啲選舉諾言，佢當選之後真係去做，而佢真係做。有人話，佢係咁多個美國總統之中最差嘅一個，但我覺得，佢係一個守諾言嘅人，比起好多成頭道德光環嘅說謊者，特朗普其實更值得尊重。

😜特朗普任期已經行咗一半，我哋香港人覺得佢唔受歡迎。但其實唔係，佢最新發表嘅國情咨文，得到好多美國人支持，有七成支持度，亦係非常罕見嘅事情。我哋響傳媒睇到抹黑特朗普，其實又係另一回事，因為美國傳統，荷里活同埋傳媒都係支持民主黨傾左路線，相反，美國普羅民眾，或者年紀大個群，做生意個群，其實都係共和黨特朗普嘅支持者。

🤓作為一個國家嘅領導人，捍衛國家同自己人民嘅利益，絕對冇錯。現在香港發生緊嘅事，就係我哋當權者並冇將香港人嘅利益放喺第一位，有另一種利益，淩駕喺香港人嘅利益之上。冇辦法，作為一個妾侍，就只能夠接受妾侍嘅命運同對待，過去如是，今日亦如是。當家作主自己話事並唔容易。人生如是，政治亦如是。


♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/DYPVP

🍳https://youtu.be/4xUQTni-qmQ

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

推

【常威中史】慈禧平反系列（一百五十九回）

其他改革措施，包括成立大清國家銀行（雖然比明治政府遲咗30年），開始探索統一貨幣措施，為沿用至今嘅幣值單位奠基，即所謂十進制元、角、分單位。

#鐵路 方面，1906年由 #盛宣懷（1844-1916）、#張之洞 督辦嘅大project #京漢鐵路 正式通車（由77盧溝橋到漢口），呢一條係中國經濟嘅大動脈，貫通南北貨運貿易，大大促進咗南北商業資本市場發展。講開鐵路，不得不提中國鐵路之父 #詹天佑（1861-1919）。詹天佑係首批大清公帑保送出國嘅留學生，畢業於美國耶魯大學土木工程系，主修鐵路工程，1902年10月19日，#袁世凱 正式任命詹天佑為總工程師，以四個月時間及低廉成本建成咗中國人自己第一條興建嘅鐵路。

20世紀初期，鐵路工程火速發展，大清每一個重要城市，紛紛集資籌建鐵路系統，趕上大時代。不過好可惜，鐵路係把雙面刃，大清最後亡國，都係亡響鐵路融資之上（#朱元璋 講得冇錯，中國人最大嘅問題就係貪污同偷錢，今日都係）。我一早講過，你要現代化，又要極權統治，仲要古卵惑惑偷蕃薯，古往今來，冇人做到，還看今朝，只有中共可以。

豆斗新政最重要嘅一個德政，就係終於可以解決糾纏清國國民一個世紀嘅 #鴉片 問題。根據不完全統計，當時大清嘅道友老同數目佔去勞動人口嘅30%以上，中國人打仗冇辦法勇武起嚟，貪生怕死，可能都係同吸毒有關，我諗你都未見過有道友參加運動會吓嘛？

大英帝國國內對鴉片貿易亦開始覺悟，冇辦法，人之常情，靠販毒發咗達就想積福做好人撈正行，正常嘅。你睇今時今日嘅香港富豪榜，我諗超過50%都係撈偏發達。1906年英國國會再次辯論中英鴉片貿易問題，豆斗抓住呢個機會，於同年9月20號頒發上諭，「定限十年以內，將洋土藥之害，一律革除淨盡」，大力推行禁煙運動，大英帝國亦因為國內民心取向同國際輿論壓力，配合大清禁煙措施，答應大幅度減少鴉片輸入清國。幾年之後，國內吸食鴉片人數大幅削減。遺害接近一個世紀嘅毒禍，終於響豆斗手上拉開閉幕。

十年後，到咗1916年，改朝換代後，英國對中國嘅鴉片貿易徹底停止，從此之後，鴉片成為地下商品，生意做得更大，又係另一個故事。

其實1902年之後，豆斗嘅新政徹底改變咗中國嘅面貌，大清帝國不但回氣成功，而且正式踏上咗全面現代化嘅步伐，如果冇咗1911年嘅 #辛亥革命，以大清當時國內經濟環境，如果順利配合 #君主立憲 推行政治改革，清帝國好有可能走上日本 #明治維新 相似嘅發展道路。

不過我講呢啲嘢，其實都係多舊魚。歷史並唔X係一件咁簡單嘅事物。我常公子最喜愛的、偉大歷史學家 #霍布斯邦（Eric John Ernest Hobsbawm，1917-2012）講過，冇人能夠預測到歷史發展嘅趨向，但以人類嘅天性而言，歷史總係會朝著黑暗一方面發展。

人類比喻作水，其實相當適合，因為水係向下流，人就係下流嘅動物。

#常威 #大清亡國關慈禧蛋牛治 #慈禧太后 #晚清歷史 #辛亥革命

【大清亡國關慈禧蛋牛治】實體購買
https://www.382now.com/product?id=87 ;

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】
https://play.google.com/store/books/details?id=e1N7DwAAQBAJ

【常威中史】慈禧平反系列（一百六十回）

大清帝國1902年進行嘅現代化改革其實取得卓越成效，國家經濟欣欣向榮，但最後難逃亡國命運，其實有幾個偶然條件共同催生：

第一：#八國聯軍 入京之後，王朝威信蕩然無存，東南互保之後，南方人更加冇將中央政府放入眼內。

第二：#保路運動 引發民憤。

第三：革命種子一早種下。

第四：三個字，#袁世凱。袁世凱。袁世凱。

除咗第四個條件袁世凱，上述每一個條件如果個別發生，大清都未必亡國，但好可惜，所有條件集中喺幾年內發生，咁就冇人可以拯救到愛新覺羅王朝。

仲有一點好少人提，我試下拎出嚟講講，就係 #大英帝國 因素，事實上清帝國一直可以苟延殘喘，同大英帝國響背後默默支持好有關係，大英帝國喺亞洲嘅金融總基地、自由城邦 #上海，響清帝國庇護下存在咗六十幾年，簡直唔能夠想像上海為大英帝國帶來咗幾多豐厚利潤，以英國人紳屎嘅個性，保住大清On9仔政權，佢哋百利而無一害。可惜辛亥革命發生前後，#第一次世界大戰 將大英帝國差唔多拉入深淵（國內損失30個%壯年人口），真係自顧不暇，仲邊有能力理你清國發生乜嘢事……

仲有，人類思想裡面有一個嚴重錯誤，就係我哋永遠相信新嘅事物一定會比舊嘅好。20世紀初期嘅滿清政府其實做得唔錯，但係人民總係想像建立一個全新嘅共和民主國家，一定會比而家好上一百倍，結果係點？大家有目共睹，睇冇問題嘅，要受先慘吖嘛。

但教訓又一次發生，之後個大亂局，廣大中國人民又再希望一個新嘅烏托邦世界出現拯救佢哋，一個宣稱眾生平等嘅共產主義社會建立，一切幸福就會降臨……

答案係乜嘢，我唔講喇。

1905年，當大清經濟欣欣向榮、#君主立憲 政體改革步伐展開之際，#奪命書生 #孫文 同 #黃興 喺日本橫濱成立「#同盟會」。計一計數，到咗1905年，其實孫中山已經搞咗革命十年。由1894年春《上李鴻章書》開始，同年11月24號響檀香山建立「#興中會」（*同年美國吞併夏威夷王國），1895年1月同香港人 #楊衢雲 建立香港興中會，1895年策劃廣州起義流產，1900年惠州起義失敗，百折不撓，終於開始見到革命曙光……

推翻滿清極權統治，固然係理所當然。我唱好大清同 #豆斗，亦都係實話實說，大家千祈唔好覺得奪命書生唔啱或有錯，任何人都只會企喺自己嘅立場觀察事物，世界本來就係人類大腦想像出嚟嘅圖像，加上以前世界資訊並唔發達，任何人都冇可能清楚整個局面嘅全部，人只能靠見到嘅嘢想像全局、推敲未來。

辛亥革命發生之後，其實奪命書生同所有中國人一樣，都希望有一個美好世界出現喺面前，事與願違本來就係常態，人生不如意事就係十常八九。

下次我叉開一筆，要講講葬響跑馬地嘅革命先烈楊衢雲先生生平。

#常威 #大清亡國關慈禧蛋牛治 #慈禧太后 #晚清歷史 #辛亥革命

【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】線上購閱
https://play.google.com/store/books/details?id=e1N7DwAAQBAJ

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

【大清亡國關 #偽造文件 蛋牛治】

😜康有為偽造光緒帝嘅密詔，老作出「圍園殺后」嘅吹水大陰謀，呢件事差唔多係近代史上一件最荒謬嘅事件之一，隨口噏，當秘笈。慈禧太后亦都係因為睇香港報紙先知道光緒要謀害自己，所以先將光緒從此遠禁，之後六君子人頭落地，唔多唔少，都同康有為偽造文件有關，歷史上從來冇人講係康有為累死六君子，六君子之中，仲有康有為親生兄弟在內，如果成件事真係佢造假，佢絕對對唔住自己兄弟。

😍近代史上，好多人相信康有為筆下戊戌政變過程，我喺Youtube裡講，寫出嚟就係真？咪玩啦翠如BB，文人多大話，自古以嚟，中國歷史上就充斥住無數咁多大話，同現今世界都好相似，凡事吹大十倍，三萬大軍，就話三十萬大軍，三國時代，曹操話率領八十萬大軍打東吳，當其時，成個中原都係得二三百萬人口，何來動員八十萬大軍？後世史書寫，曹操動員二十二萬人，但我覺得都係多咗好多，八萬左右就啱數。

😜香港都成日見呢啲事，片酬500萬，實收50萬，單工程興建費用十億，就出價100億，吹大個波，目的不外乎係搵水位偷錢，中國人有句說話叫「開天殺價，落地還錢」，單工程十億可以做好，你同政府吹100億，最後大家來回斟酌，30億成交，咁你就有20億落袋，中國人嘅智慧就係咁高！你唔信？但我常公子話你知，呢啲事每一日都喺度發生，無論乜嘢界別，只要牽涉到公帑，政府科水，就多到你唔信。你係局內人自己友，就收錢收到手軟。

🤓因此，中國人最鍾意做官，最鍾意做公務員，就係咁解。香港，勝在仲有ICAC！

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/EM8XB

🍳https://youtu.be/gj8dNeuJ-rs

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百六十一回）

兩個敵對或帶有敵意嘅國家，解決矛盾嘅方式係戰爭。

但係戰爭都有好多種形式，實牙實齒軍事衝突係一種，#貿易戰 係另一種，仲有一種常用嘅招數，就係透過金錢資助同埋意識形態輸送，培養敵對國家內嘅反動份子，為敵人製造政治上嘅動盪。

依一招隔山打牛，刃不沾血，但往往可以產生最佳效果。20世紀以來，呢招用得最好嘅係美國人，第一美國有錢，第二美國嗰套自由民主政治意識形態，（透過電影）包裝得實在太靚，好難令人唔接受唔buy。美國最成功嘅例子，就係1991年，一支導彈都冇用、一條士兵人命都冇損失過，過就令超級大國 #蘇聯 解體。當年嘅 #朗奴列根（Ronald Wilson Reagan，1911-2004）同埋 #戴卓爾夫人（Margaret Hilda Thatcher，1925－2013），其實係示範咗人類歷史冇可能做到嘅驚天舉動。

嚟緊，我想深入少少寫一個歷史人物 #楊衢雲（1861-1901），點解要咁樣做？第一，楊衢雲係正宗 #hongkonger，我對佢有一份獨特感情；第二，我想響楊衢雲身上，揾出革命事業嘅本質係乜。

楊衢雲，原名楊飛鴻，1861年12月16日出生於HK，佢老豆係知識份子，曾經做過教師，亦做過政府機構翻譯。楊衢雲14歲進入香港國家船廠學習機械，但係一次意外佢冇咗右手三個手指頭，於是佢唔做學徒讀返書，中學畢業後，佢執教於聖若瑟書院。1891年佢認識同樣喺香港接受高等教育嘅 #孫中山，起初兩人冇建立特別深厚嘅友誼，唯一嘅共同點，佢哋都係半個西人（hongkonger）。

1892年3月13號楊衢雲創立「#輔仁文社」，呢個組織並唔係革命組織，只係一個社交俱樂部同埋研究團體，以「開通民智」為主旨，創會嘅16個成員，大部份都係任職香港嘅洋行職員。

1895年1月「#興中會」創立時（士丹頓街13號），部份輔仁文社成員亦加入興中會，當時楊衢雲任職於香港「#英國沙遜洋行」。

香港沙遜洋行，要講一講，香港沙遜洋行由英國猶太商人Elias David Sassoon（1820-1880）響1844年創立，係香港早期最具影響力嘅洋行之一，沙遜家族由18世紀開始，已經係歐洲最富裕嘅家族之一。而Elias David Sassoon亦係0005上海 #滙豐銀行 創立嘅主要股東，所有關係，其實一早已經千絲萬縷。順帶一提，沙遜家族撤出香港正正就係1949，中共取得江山嗰年，我相信一切並非偶然。

楊衢雲同孫中山，仲有 #謝纘泰（1872-1938）、#鄭士良（1863-1901）同 #陳少白（1869-1934），佢哋嘅社會背景、所受嘅教養、興趣愛好、西學知識方面其實極為相似。首先佢哋冇一個人出身於士大夫官僚紳士階級，亦冇一個人接受過整套傳統嘅儒家教育熏陶，佢哋係從同大量外國人接觸而接受到西方民主議會思想，佢哋親眼目擊殖民地（HK）物質文明嘅先進，亦都深深體會到殖民政府(HK)對中國人嘅歧視。其實以當時嘅中國人數量，呢班人係當中嘅少數中嘅少數。

其實呢班人都係帶有偉大夢想而參與政治活動，佢哋希望中國能夠富強起來，希望中國人民嘅生活得到改善，更唔希望中國會被列強瓜分喺呢個世界上面消失。當然佢哋口中嘅「#中國」並唔係「愛新覺羅家族嘅大清帝國」。

「驅逐韃虜，恢復中華，創立合眾政府」係當時興中會加入會誓言。

星期三繼續。

#常威 #大清亡國關慈禧蛋牛治 #慈禧太后 #晚清歷史 #辛亥革命

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】線上購閱
https://play.google.com/store/books/details?id=e1N7DwAAQBAJ

【大清亡國關 #羅玆威爾 蛋牛治】

🤓政治上邊有好多神秘事件，呢個就係普通人唔能夠知道歷史發展嘅重要因素。戊戌政變嘅真相永遠冇人知道，清帝國亦都冇發表過任何官方檔案釐清真相，光緒皇帝係唔係要發動兵變攞慈禧條命？亦都冇人知道，好有可能，大家都只不過係誤會一場，但係按照慈禧太后嘅仁厚性格，佢唔係蔣介石同毛澤東，佢唔鍾意亂咁殺人，佢事後要六君子人頭落地，背後顯然有一個大陰謀存在，呢個陰謀，亦一定同日本人有關。

😃我個人認為，歷史上最十惡不赦嘅事，係德國納粹黨所做嘅一切，最近響Netflix睇咗套講德國集中營 Concentration Camp嘅紀錄片， 內容係講盟軍登陸諾曼第之後，向德國推進，之後解放咗唔同嘅集中營，紀錄片就係第一時間拍攝集中營之內嘅慘狀，睇完呢套紀錄片，你會對人類有一個全新嘅了解。第一個了解係，文明人係可以做出最禽獸嘅行為；第二個了解係，原來所謂人類，只係一個個臭皮囊，響死亡面前，可以一文不值。

😃一個邪惡嘅希特拉，一班心智有問題嘅變態納粹黨員，就可以做出人類歷史上最恐怖嘅屠殺行為？我唔認同。發生喺眼前嘅事，發生喺集中營嘅事，背後嘅真相係乜嘢？德國人日爾曼民族心裡面諗緊嘅究竟係乜嘢？我到今時今日都未摸清楚。

😏同大家分享一件事，話說納粹黨執政年代，黨內宣傳大師戈培爾博士要搞文化政策，於是同好多女明星有染。戈培爾老婆睇唔過眼，想補救婚姻。於是佢去搵當時渡緊假嘅希特拉投訴戈培爾嘅風流韻事，希特拉知道之後大發雷霆，捉咗戈培爾博士責駡，希特拉仲同戈培爾講，佢唔可以繼續佢嘅不道德行為，否則會撤銷戈培爾喺黨內嘅一切權力，呢一個咁重視人倫倫理道德嘅男人，就係佢，默認所有發生喺集中營內嘅屠殺行為。正如我睇過一本書講，德國軍官可以一邊聽住舒伯特嘅音樂，一邊將猶太人送入毒氣室。一句痴X線神經失常心理變態，就可以解釋上述嘅行為？我唔覺得。

😘我未認識過一個德國嘅朋友，如果有，我真係想同佢哋講吓上述嘅問題……

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FGE5M

🍳https://youtu.be/TPDy4S7TlNc

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百六十二回）

繼續講hongkonger #楊衢雲，1895年 #興中會---中國近代史上第一個民間政治團體---成立，同年清帝國 #甲午戰爭 大敗，全國震驚。1895年3月16號，馬關條約簽訂前一個月，興中會成員開大會，決定係農曆九月初九重陽（10月26號）起事，地點係 #廣州。

呢一次亦係1911年辛亥革命成功前所謂「#十次革命」嘅第一次，佢嘅重要性可圈可點。#奪命書生 負責喺廣州策劃軍事行動細節，楊衢雲負責喺香港籌款買軍火同募集死士。楊衢雲嘅朋友黃昹商，賣咗香港嘅一層樓，8000蚊港幣全數捐作起義費用。

8月27號，廣州嘅革命部署大致完成，10月10號（#雙十節 起源），興中會喺香港舉行選舉，推舉邊個做未來「合眾政府大總統」。呢單嘢都幾搞笑，義都未起，就諗將來邊個做坐館話事？選舉由奪命書生同楊衢雲競逐，傳説鬥爭得非常激烈，雙方支持者甚至放棄廣州革命嘅預備工作，全程投入大總統選戰。最後孫中山為咗顧全大局，畀楊衢雲當選，就係咁，之後嘅五年，其實楊衢雲先係興中會坐館。

關於合眾政府大總統之爭，其實多舊魚。因為第一次革命未開始已經被二五仔篤爆咗，10月28號，45個革命黨人喺廣州被捕，軍火被抄沒收。楊衢雲留響香港遙控指揮冇事，孫文則經香港著草日本。同埋點解之後孫文唔搵香港做佢嘅革命事業根據地呢？我諗都係同楊衢雲有關。

佢兩個嘅關係，就好似蘇俄革命 #列寧 同 #托洛斯基 嘅關係，49年後 #毛澤東 同 #周恩來 嘅關係，既是戰友，又係最高權力嘅競爭者。大矛盾裡面有小矛盾，小矛盾裡有更小嘅矛盾……其實都係常態。喺民主共和集體領導嘅世界裡面，權力鬥爭係基本遊戲規則。#君主立憲 嘅好處，就係避免咗競逐最高權力而產生嘅黨內血腥鬥爭，所謂君主（英女王，日本天皇，泰皇），某程度上係一個形而上嘅角色，佢哋冇政治實權，但擁有至高無尚、無法挑戰嘅皇權，或者作為上層建築權力鬥爭嘅最後仲裁者。當然我上述講嘅人話，係就20世紀初期而言，今時今日當然唔適用。

孫文去咗日本，響之後嘅16年，直至1911年辛亥革命成功之前，佢其實只係返過中國一次（1907年12月響越南邊界嘅廣西關南山頭住過一晚咁大把），依16年，佢係環遊世界（即流亡），到處籌款同演講，其中發生過1897年倫敦被清政府行刺事件，令佢聲名大噪，西方媒體一齊煲起佢，令佢成為中國革命嘅KOL，因禍得福，之後長住日本，之前我已經講過好多。

1895年第一次廣州革命流產後，楊衢雲雖然仍然係興中會會長，但係已經無所作為，1898年3月，佢索性同孫中山一樣，移居日本橫濱，以教授英語為主（佢係唔係去做補習老師？其實我相當質疑）。

呢個時候，其實所有1900年第二次革命的重要角色都雲集於日本橫濱，佢哋同日本黑白兩道都有千絲萬縷嘅關係。更加無法否認嘅係，之後發生喺清帝國嘅一連串革命流血事件，其實日本人先係幕後最大嘅金主。我再講多次，革命理念只係革命本身嘅包裝，革命真正需要嘅係錢同軍火。

近代史描述中，日本嘅角色不斷被淡化同妖化，其實中國民衆能夠推翻滿清封建統治，日本人出嘅力係最多。下一集，楊衢雲三部曲最後一章，1900年第二次革命，10月圍城。

#常威 #大清亡國關慈禧蛋牛治 #慈禧太后 #晚清歷史 #辛亥革命

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】線上購閱
https://play.google.com/store/books/details?id=e1N7DwAAQBAJ

【星期日特別放送】社會碌葛嘅政治潔僻

社會碌葛依個團體作為整個社會最大嘅凝聚力同黏貼劑，價值連城。冇咗社會碌葛依班勁人，個社會就有可能會崩分離析，就會亂，一亂就大家仆街杏加橙！所以維持社會碌葛團體嘅人數佔社會大部份，的確係統治階層維持政權嘅重要政治任務(之一)。

社會碌葛話政治好污糟邋遢，甚至冤崩爛臭喎？

冇錯既，正解！

社會碌葛係唔應該去理政治，或者談論政治，甚至響香港政治機構立法會內亦只應該討論民生問題，唔應該牽涉政治問題！(**如果你真係有上述嘅想法，恭喜你！你已經完全進入咗社會碌葛嘅思考領域……)社會碌葛帶有「政治潔僻」，當然亦係統治階層樂於見到嘅事情。

政治本身係一個社會(或者國家)嘅「管理術」，一般市民唔去理「自己點比人管」，咁對管人班人(主人或稱統治階層)來講就梗係最perfect，甚至你唔去談論政治，覺得講吓個口都會臭，咁個社會就連小小批判聲音都冇埋！咁，統治階層就可以為所欲為，做乜都得，做乜都冇人去鬧去屌，予取予攜，偷呃拐騙，一句到尾，超正斗！

你要記住，所謂統治階層都係一群人，祇不過係同你位處唔同階級嘅一群人，人就有貪念，人就會偷錢。唔去批判或制衡統治階級嘅粗暴剝削，最後個世界就只有返番去少數貴族欺壓平民嘅原始面貌。

其次，就算統治階層皇恩浩蕩肯比你講小小，比小小言論自由你，社會碌葛本身亦冇討論或批判政治嘅能力，就算講都係鳩講，都係無補於事。冇內容、冇結構冇深度嘅意見，等於「唔係意見」，更加談唔上批判層次，對整個社會向前或改善其自身處境亦作用全無。

大家睇睇香港現在嘅高官同政客，佢地就真係深得「講咗等於冇講」嘅終極真諦，出嚟行虛無飄渺，亂搬龍門。基本上，係連正常回答問題嘅能力都欠奉，更遑論話要要求佢哋有深度同「批判能力」。一隻狗，基本上係唔識批判主人嘅，佢地識做嘅，就係主人叫佢響燈柱側邊屙尿，佢就響燈柱側邊屙尿！

😎【碌葛男人嫁得過】

https://play.google.com/store/books/details?id=e1N7DwAAQBAJ

❤download電子書，可以救地球

【大清亡國關 #戊戌變法 蛋牛治】

🤓變法即係改革，凡係改革，都會引發社會動盪。1997年之後，香港回歸中國，鄧小平承諾50年不變，所謂馬照跑，舞照跳。現在距離2047，仲有28年，眨吓眼，50年不變呢個承諾已經過咗一半，2047一定會變，當然點樣變冇人知道，或者連國家領導人都唔知道，但係可以肯定一點，中央已經開始為2047之變做緊準備功夫。

😃中央提出大灣區概念，將香港納入整個大灣區規劃之內，就係中央為2047所做嘅預備功夫，較早之前，上頭亦已經將大灣區規劃中未來香港嘅任務講清楚，就係搞創科同做金融融資平台，將分工攪清楚，你搞呢樣，我搞嗰樣，就叫做計劃經濟，計劃經濟一直係中華人民共和國奉行嘅基礎政策，就算佢哋背棄共產主義搞資本主義，計劃經濟嘅概念一直捉緊不放，乜嘢係計劃經濟？即係唔畀自由經濟市場主宰一切，咁計劃經濟係咪邪惡嘅物體？咁又唔係。任由資本主義瘋狂氾濫，唔通唔邪惡咩？

😃凡事都有兩面睇，你睇吓過去幾年香港樓價嘅飆升，問你驚唔驚？最後政府插手用辣招，其實亦都係計劃經濟嘅一種手段，冇政府插手？相信樓價已經升爆咗，爆煲嗰個爆。任由資本市場操縱一切，最後一定會導致大危機發生，因為經濟本身就係一個泡沫，遲早都要爆（睇吓點爆？用乜嘢形式爆？），將經濟環境控制喺一個可以控制嘅範疇裡面，亦都係地球上每個國家機器嘅主要任務之一，當然國家機器點樣去做？或者做咗之後你內心感覺舒唔舒服？又係另一回事。

😘搞大灣區計劃經濟，就令到好多香港人心裡唔舒服。但係諗深一層，自從80年代開始，香港商人蜂擁上廣東搞廠，唔少人亦都係因為咁樣發達，其實所謂大灣區概念，已經行咗30年。香港同廣東省嘅經濟命脈，其實一早已溶成一體，亦從此以後冇辦法分得開。同百幾年前發生嘅戊戌變法一樣，所謂戊戌變法全盤向西方學習，並唔係新事物，響之前，慈禧太后李鴻章搞洋務運動亦都搞咗三十年，提出戊戌變法，只係新瓶舊酒。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/E8MXX

🍳https://youtu.be/PnMnzhhC5tM

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

推下

【常威中史】慈禧平反系列（一百六十四回）

中國革命嘅傳統都同黑社會有關，黑社會係現代人嘅叫法，黑社會即係地下秘密社團、非合法官方註冊團體，其實本身冇貶義，直至我哋用「黑社會」嚟稱呼黑社會，黑社會先變成人見人怕，所以語言同話語權有時候相當重要。

響滿清帝國裡面，所謂黑社會其實即係「反清復明」組織，亦即係天地會，亦即係洪門，而天地會洪門等組織後來就統稱為「三合會」，所謂三合會，即係香港人所稱呼「黑社會」嘅同義詞。到咗今日香港警察反黑組仍然係叫「三合會犯罪調查科」。地下社團要提反清復明，喺清帝國大清律例中當然犯法，但去到19世紀中葉太平天國之後，地下組織係「反清」，但「復明」應該好吻水，而所謂反清，亦只係地下組織抗衡官方紀律部隊嘅口實，唔通你見過古惑仔同警察做好朋友咩？

而且我個人好相信，當時活躍於廣東省一帶嘅三合會會員，其實好多都係太平天國嘅餘部，我曾經講過，太平天國運動係一場可能係人類歷史上最慘烈最可歌可泣嘅內戰（死2500萬人），雖然話中國人善忘，但係死咁多人，同滿清有血海深仇同牙齒印嘅人一定唔少。太平天國覆滅後，相信有好多人轉入地下組織繼續顛覆大清活動。1895年同1900年嘅第一次革命同第二次革命，其實地下社團成員係主要骨幹。尤其是1900年第二次革命惠州起義，基本上係由興中會成員三合會會員鄭士良一手帶領，唐才常嘅自立軍起義，其實都係。

奪命書生孫文同楊衢雲等人，其實都係受大英帝國殖民地意識形態熏陶嘅西化知識份子，佢哋都睇到清帝國內嘅地下社團組織係最好嘅革命資源，於是串聯黑社會搞革命活動顛覆大清，亦係相當合理嘅做法。

孫文等人所建立嘅革命組織早期同地下秘密社團基本上冇分別，孫文自己就曾經拜入洪門正正式式成為一個黑社會，革命分子陳少白亦有社團「白紙扇」身份。早期革命組織亦大量應用地下社團嘅儀式、口訣、符號、誓詞、規條、組織結構同語言。近代史認為孫文咁樣做係純粹戰術上面嘅技巧，畢竟秘密社團嘅戰鬥力係佢哋實踐革命目標所必需。但我個人認為，根本冇必要將孫文或中國革命同黑社會活動劃清界線。孫中山借用黑社會搞革命？佢本身就係黑社會喎。同埋黑社會基本上都係愛國嘅，點解歷史學者要成日將呢班人撇除出正當偉大正義嘅目標之外呢？依一點我相當唔明。

附帶一提，當時嘅秘密社團組織，除咗有「反清復明」呢個中心意識形態之外，佢哋大部份都係同一種經濟活動掛鉤，就係「走私私鹽」，鹽係生活嘅必需品，一向由政府公家統辦，係國營企業，賣鹽所得到嘅稅款，亦係唔少地方政府嘅主要收入來源。但沿海省份，私鹽走私活動一向猖獗，係一項巨大地下經濟活動，亦係黑社會結構嘅紐帶。明朝時代嘅倭寇，即係同走私私鹽活動息息相關。

1900年第二次革命高潮後，中國革命之火有熄滅跡象，可能亦係同豆斗1902年歸政復位有關。政治狀態恢復穩定，民間反動勢力市場亦相對收窄，直至1905年孫中山同黃興遇上，同盟會成立，中國革命先進入第二個大高潮。

寫到呢度，不得不提，政治狀態穩定與否同領導人嘅魅力相當有關係，20世紀初期慈禧太后就係好例子，慈禧一日未死，大清政權穩如泰山。人民擁護嘅係慈禧一個人，並唔係腐敗嘅滿清貴族政權，慈禧係唔係大衰人？慈禧係唔係人民憎惡嘅領導者？我諗大家應該重新考量一次。

放返喺香港，前特首梁振英在位嘅五年裡面，香港政治狀態極度不穩定。佢走咗，林鄭月娥接手，成個社會即刻清靜曬、和諧曬。林鄭施政手腕同能力強過梁振英？我唔認同，但係發生係眼前嘅一切，明顯就同林鄭嘅個人魅力有關。魅力唔同能力，有魅力唔等於有能力，但係玩政治，前者明顯比後者重要得多……

下次我會繼續講同盟會嘅事，星期三見，聖誕快樂。

#常威 #大清亡國關慈禧蛋牛治  #慈禧太后 #晚清歷史 #辛亥革命


【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【碌葛男人嫁得過】線上購閱
https://play.google.com/store/books/details?id=e1N7DwAAQBAJ

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

【大清亡國關 #揸Fit人 蛋牛治】

😃2019年財政預算案，劏房波力推大灣區概念，全面配合大國策，全面配合計劃經濟，香港進入新嘅一頁。未來會係點？冇人知，但係可以肯定一點，香港嘅自主性將會一日一日降低，港人治港高度自治已經變成明日黃花。今集講揸Fit人，晚清時代揸Fit人一直都係慈禧太后，光緒皇帝想趁住百日維新奪權，係佢睇小咗慈禧嘅政治能量。邊個揸莊，邊個惡曬，今日香港揸莊人並唔係特首，而係中央。

🤓香港人從前擁有嘅高度自由，全因為來自香港係一個特別嘅地方，香港為當時中國帶嚟嘅經濟貢獻無比強大，但隨住中國開放改革，國力暴升，香港嘅重要性一日比一日降低，呢個係毋庸置疑嘅事實，亦係歷史嘅進程，冇得返轉頭。要知道，凡事都冇永恆，香港要重新適應自己嘅角色，亦都無可厚非。

🤔面對大時代，有人選擇留低，亦有人選擇離開，我有個朋友早幾年移民台灣，響台南開咖啡店，台灣嘅生活成本比香港低得多，但同時消費力亦比香港低得多。佢走咗幾年，佢同我講，環境都唔係咁好，最近佢打算回流香港重新起步。例子仲有更多，我生平亦都未識得一個移民加拿大嘅人，響加拿大可以飛黃騰達或者有一番新作為，反而去咗十幾二十年，悶到嘔之後，忽然回流返香港做返個香港人，就見過唔少。

🤓好多人都以為世界好大，選擇可以好多。但其實真相係，人可以選擇嘅嘢並唔係太多。我講過好多次，如果印銀紙可以解決問題，整個世界基本上冇問題，但係如果我哋只係識得用印銀紙解決問題，問題只會越嚟越大。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/FDFYH

🍳https://youtu.be/CCyzbz9Tgrs

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram  @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百六十五回）

1905年，近代史上兩個對1911年革命至關重要的人物，孫文同黃興遇上，孫文係秘密會社成員，同樣，黃興之前所搞嘅流產革命，即係同黑社會「哥老會」有關，大家嘅玩法基本上一樣。1905年，同盟會成立之後，整個革命局面同玩法先開始有所轉變。

1905年8月20號下晝兩點，同盟會成立大會響日本人阪本金彌住所舉行。同盟會成立嘅宗旨係「驅除韃虜，恢復中華，創立民國，平均地權」，依十六個字真係唔可以講笑，之後歷史發展我哋會發現，呢十六個字一一實現咗，不過實現嘅方式，係一種比較殘忍同打折頭嘅手法表現。

同盟會由革命KOL孫文做總理，黃興當選為執行部嘅「庶務」，冇錯！係江角真紀子主演「庶務二課」嘅庶務，負責執頭執尾，斟茶遞水，但係當總理唔響度嘅時候，庶務就代為執行總理職權，大家都知道孫文好鍾意環遊世界去演講去籌款，所以大部分時間，同盟會其實係由黃興直接領導。

其他大名，仲有宋教仁（1882-1913）係司法部檢事，胡瑛（1884-1933）、馮自由（1882-1958）、胡漢民（1879-1936）係同盟會評議會嘅議員，至於評議會會長就係我哋近代史嘅大漢奸汪精衛先生（1883-1944）。

同盟會成立初期，選出嘅30個職員之中，只有兩個嚟自原本孫中山嘅興中會。同盟會理論上建設響執行（行政）、司法、評議（立法）三權分立嘅西方自由民主議會基礎之上。但係好快，為咗遷就實際需要，司法部同埋評議會就停止運作，剩低行政執行部份。三權分立呢啲洋腸嘢，都係唔啱我哋中國人（直至today香港）。

根據史料，同盟會成立初期1905年到1906年，總共有963人參加咗呢個組織，單單喺東京就吸納左863人，其他係喺歐洲、馬來西亞、河內同埋香港吸納嘅。頭兩年，同盟會嘅成員差唔多全部都係日本嘅清帝國留學生，省籍方面，籍隸王興家鄉湖南157人，湖北106人，廣東112人，廣西43人，主要南方人為主。南北之分，南拳北腿，係中國政治嘅主要分水嶺，個情況到咗今日都未變過。王家衛先生套「一代宗師」，就係呢方面有詩性嘅描寫。

同孫中山之前嘅興中會比較，興中會存在嘅11年之間（1894-1905），入會人數唔超過500人，當中只有30人接受過高等教育（如孫文，楊衢雲），170人係海外華僑，單單夏威夷一地就佔咗137人，至於籍貫，差唔多所有都係廣東人。

1905年，奪命書生孫文已經39歲，黃興31歲，胡漢民26歲，宋教仁23歲，汪精衛21歲。呢個全新嘅革命組織，大部分都係日本留學受過高等教育嘅熱血青年。而且，之後同盟會嘅顯赫會員，冇一個係嚟自孫文嘅興中會，一朝天子一朝臣，同盟會創立之後，中國革命運動領導權無疑係掌握響同盟會新一代嘅知識份子手上，當中庶務黃興，就係呢班新一代知識份子、熱血青年公認嘅實際領袖。

同盟會主軸嘅運作，黃興先係主導人。孫文掛頭牌，宣傳作用大於實際作用。情況同同期發生嘅俄國革命好相似，列寧（1870-1924）亦都只係革命嘅KOL，真正落手落腳做嘢嘅人其實係托洛斯基（1879-1940）。托洛斯基唔去爭奪十月革命後嘅領導第一把交椅，因為佢本身係猶太人。而黃興響1911年辛亥革命之後唔去同孫文爭名奪利，其實係選擇急流勇退、明哲保身。做一個功成身退嘅革命家，其實好難，單單呢一點，就係黃興值得敬仰同高到幾層樓嘅地方。

下集繼續同盟會……

#常威 #大清亡國關慈禧蛋牛治  #慈禧太后 #晚清歷史 #辛亥革命

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關 #飯碗 蛋牛治】

😃人類生存好多時候為咗個飯碗，現在香港更加唔使講，少個崩你都好大鑊。我識得唔少嘅朋友，日日開工開到好夜，尤其是年青人，竟然有人話畀我知可以深夜一點收工，第二朝老細就要求你九點返工，其實老細呢個無理要求，喺文革時代係要搦去跪玻璃。而家香港，其實好多人唔止八小時工作，白領階層情況更加嚴重，一日做十幾個鐘，唔痴線或痴肥有鬼。

😏我講過，工時過長，亦都可能係統治階層意識形態嘅操控手段之一，日做夜做，生活比份（西）工所完全佔領，咁就會冇咁多時間諗咁多嘢（問：喂，聽日上街遊行啊！ 答：Sorry…我要加班。），每個個體諗嘢嘅時數減少，參與政治活動嘅時間減少，個社會就會越趨穩定，大家營營役役，返工放工，朝九晚九，社會機器不斷運行，替資本家同統治階層不斷製造財富，一部完美嘅印銀紙機器就係咁樣出現，當然印出嚟嘅銀紙，係由少數人落袋，資本主義話畀你聽嘅公平同多勞多得嘅概念，就係咁解。

😃有一個老生常談，就係存在（Being）為咗啲乜？我哋生存喺呢個世界上面，究竟目的係乜嘢？德國哲學家海德格（Martin Heidegger）講得好好，佢話存在就係「煩」，存在就一連串憂慮同埋煩惱嘅混合物。我未必認同海德格嘅講法，存在同樣可以感受快樂，但係我可以肯定一句，一個人嘅存在，就一定唔係為咗嗰份西工，亦唔係為咗幫其他資本家繼續掠水……

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/DLWRB

🍳https://youtu.be/oZswh_3zCWQ

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】慈禧平反系列（一百六十八回）

今日叉開一筆，講另一啲嘢，我講講咩叫「革命文體」。喺20世紀初期，書本報紙雜誌嘅力量大得出奇，有人話第一次世界大戰，日本侵華戰爭，都係由媒體催谷出嚟（信不信由你）。我之前講過，1903年上海租界大同書局曾經出版咗一本鄒容（1885-1905）寫嘅書，叫《革命軍》，《革命單》係鄒容十七歲寫嘅反動書籍，其後因為呢本書，鄒容被判入獄，病死響租界獄中，享年二十歲。

呢本書當時清政府評價係：「此書逆亂，從古無有」。

就係咁犀利，所以一向唔搞文字獄嘅豆斗都要搞搞佢。呢本書對中國革命事業影響好深，尤其是鄒容之後嘅死，更加成就咗本書。但係《革命軍》並唔係一本講解革命理論嘅專書，佢只係一本口號式嘅即食快餐宣傳刊物，大家不妨睇睇書中一段：

「掃除數千年種種之專制政體，脫去數千年種種之奴隸性質，誅絕五百萬有奇披毛戴角之滿洲種，洗盡二百六十年殘慘虐酷之大恥辱，使中國大陸成幹凈土，皇帝子孫皆華盛頓，則有起死回生，還命返，出十八層地獄，升三十三天堂，鬱鬱勃勃，莽莽蒼蒼，至尊極高，獨一無二，偉大絕倫之一目的：曰「革命」。巍巍哉，革命也！皇皇哉，革命！擲爾頭顱，暴爾肝腦，與爾之世仇滿洲人，與爾之公敵愛新覺羅氏，相馳騁於槍林彈雨中……」

上面一段《革命軍》文字，大家有咩感覺呢？用今日嘅角度講，就算以20世紀初嘅水平嚟講，都係唔得嘅。更簡單啲講，就係「殺殺殺殺殺，血血血血血」，水平低到爆，完全唔文明，完全係野蠻落後。同期列寧同埋托洛斯基喺歐洲《火星報》上登出嘅一連串鼓吹革命文章，理論水平就高得太多太多（雖然列寧托洛斯基都係鼓吹暴力革命）。但偏偏中國人就係受「殺殺殺殺殺，血血血血血」呢一套，其實鄒容本書主要係鼓吹暴力主義、簡單主義，要建設民主漢本位新中國，就必須殺絕所有滿州人，作為滿洲人唔搞你就奇啦？

呢一種「革命口號式文體」其後更加響中國發揚光大，完全冇內容冇理論基礎，齋講口號煽動人群，響之後中國近代史兩個精神導師蔣介石同毛澤東手上更加被運用得出神入化。去到60年代的文化大革命，更加將口號式文體嘅力量發揮到淋漓盡致。

其實到咗今日，中國人社會裡面仍然充斥住大量呢一種「革命口號式文體」。我哋似乎唔需要理論基礎，我哋更加唔需要知道真實情況係乜，我哋只相信片面嘅宣傳口號，合埋雙眼追求政治正確，勇往直前為統治階層政權服務，呢個就係中國人嘅弊病所在。

其實中國人一啲都唔尊重知識（所以同時亦唔尊重知識產權），有人話英美世界行嘅係實用主義，其實中國人先係實用主義嘅擁戴者。100年過去，其實好多嘢都冇改變過，五四運動所鼓吹嘅「德先生同賽先生」（德先生即Democracy，賽先生即Science）其實一直冇出現，民主精神固然係冇（完全冇），對自然法則嘅遵守，對科學精神嘅貫徹，更加只係停留喺實用主義嘅表面層次上。

超英趕美？開玩笑啫。今日中國嘅強大，足以同美國二分天下，平起平座，老實講唔係大家實力已經接近，只係一條千古不變嘅真理作用其中：

「劣幣驅除良幣」

#常威 #大清亡國關慈禧蛋牛治  #慈禧太后 #晚清歷史 #辛亥革命

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

【大清亡國關 #大姨媽 蛋牛治】

😃光緒皇帝完全唔知道慈禧太后嘅心意，其實慈禧太后做嘅一切，無非都係為咗佢。60多歲嘅慈禧，當時的確冇重出江湖奪權嘅諗法，依一點我絕對肯定。但只不過光緒親政時間，成績實在太差。當然大清嘅衰亡，亦同光緒無關，光緒嘅能力就算強上十倍，亦都無辦法逆轉時代嘅潮流，20世紀初期嘅世界，封建王朝嘅生存率已經去到極低。同清帝國一同步向衰落命運嘅，仲有位處歐亞大陸之間鄂圖曼帝國，鄂圖曼帝國崩潰之後帶嚟嘅中東亂局，維持到100年後嘅今時今日……

😎常公仔頻道不經不覺已經去到99回，下一回就係100回，係一個好值得紀念嘅日子，響呢度，我想講一啲心裡嘅說話，首先我要多謝拍檔阿潮，仲有阿潮個老婆，因為頻道裡面嘅片，都係由佢哋製作出嚟，製作嘅時間一定要比想像中長，佢哋兩位付出嘅心力無比巨大，而且長年累月嘅戰鬥，的確需要巨大嘅意志力，我哋嘅目標，係要製造一條全球最強嘅廣東話近代史粵語Youtube頻道，要實現呢個目標，仲有好漫長嘅路要走，過去200日，只係起步。大家共勉之，我始終相信，有目標嘅人生，先至係美好人生。

😎所以，請睇到我上述一段文字嘅朋友，幫幫我哋三個手，邀請多啲朋友訂閱頻道，令常公子歷史頻道可以壯大落去。認識近代史或有興趣中國近代史嘅人越嚟越少，我再講多次，歷史係一面鏡，唔明白歷史就會唔明白自己所處嘅世界係點樣形成。未來世界，一定唔會係一個想像中嘅美好景況，當有一日要面對難關，歷史一定可以幫到你解決問題。我想講嘅嘢，就係咁多。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/FXNDU

🍳https://youtu.be/kXFTPgejTgI

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/