![](https://upload.cc/i1/2019/01/04/n9FIal.png)
【常威中史】慈禧平反系列(一百六十九回)
革命係流血嘅事情,其實一啲都唔浪漫。
一個社會要行到革命呢一步,代表咗個社會同人民已經係水深火熱。早幾年有小部份香港人不斷提出所謂「革命」會出現,其實大家喺度講緊啲乜呢?
革命嘅定義係一個階級推翻另一個階級,全盤推翻之前嘅社會制度同埋階級結構(好似辛亥革命,就係用民主共和體制推翻封建皇朝統治),嚴格嚟講係翻天覆地嘅大變動,革命嘅發生,一定係社會上大部份民眾處於極度水深火熱同被壓迫嘅處境,用簡單嘅語言去講,就係要去到冇得食同埋就快死,大家就快斷氣前,真正嘅暴力革命先會發生。所以以香港嘅世界頭十位富裕物質條件,唔好講死講斷氣,我哋距離真正嘅貧窮同飢餓仲有一段非常非常之大距離,因此香港並冇任何革命嘅條件,你夾硬話有,我都冇辦法。記住,革命唔係請客食飯。
同埋輕易將革命掛響口邊,其實極度不負責任。因為如果暴力革命真正發生,係會有巨大嘅人命傷亡。革命如果齋講,又真係幾浪漫,但係如果堅做,就係好血腥。香港人所講嘅「革命」,其實只係希望「改革」,「革命」同「改革」根本係兩回事,我哋只係希望響統治階層政治體制上作出內部調整,從而得到一個更符合民意嘅政治運作體系。所以我懇請大家,唔好再濫用「革命」呢個辭彙。
1911年發生響中國嘅辛亥革命,其實係一次非常成功嘅革命。甚至乎係全世界革命事件中一個典範例子,點解咁樣講?因為辛亥革命流嘅血死嘅人係最少。相對18世紀末期法國大革命之後嘅嚴重暴力血腥,或者1917年俄國十月革命後發生嘅一切,如果單以流血同埋人命去計數,辛亥革命無疑非常成功,以小量人命犧牲,就推翻咗二百幾年滿清皇朝封建統治,成功建立共和。
當然中國嘅革命係唔係已經成功咗?好多人有唔同嘅睇法,包括奪命書生孫文在內,孫文死嘅時候輓聯係「革命尚未成功,同志仍需努力」。由此可見孫文都係覺得佢搞嘅「革命」仲未成功,咁孫文心裡面嘅真正革命到底係乜嘢呢?我哋無法否認,孫文其實係一個理想社會主義者(甚至乎我覺得佢係一個百份百共產主義者),單就「平均地權」四個字就知道,除咗推翻封建皇朝(驅逐韃虜),佢仲想喺中國建立一個平等均富嘅社會(創立合眾政府)。
如果從上述定義去睇,孫文嘅革命理念要去到1949年先算係真正成功。但如果用呢個定義去睇,咁中國革命同法國大革命俄國革命完全冇分別,因為始終都係要付出超乎想像巨大嘅人命損失作為革命代價。
孫文作為中國嘅國父,由佢代表嘅三民主義並非共產主義概念,但係孫文嘅行事為人,或者佢嘅所做嘅嘢,絕對係一個二十世紀初共產主義者嘅行事方式。到最後中國變成一個共產主義國家,其實某程度上係實踐咗孫文嘅意志,所以話佢係國父,其實一啲都冇錯。
#常威 #大清亡國關慈禧蛋牛治 #慈禧太后 #晚清歷史 #辛亥革命
【大清亡國關慈禧蛋牛治】https://play.google.com/store/books/details?id=C3hjDwAAQBAJ
follow my instagram @historysandwich
Facebook 專頁:https://www.facebook.com/historysandwich/